មន្ត្រីម្នាក់បាននិយាយកាលពីម្សិលមិញថា លោកឈូកបណ្ឌិត ត្រូវបានដកចេញពីតំណែងអភិបាលក្រុងបាវិត ដើម្បីបើកផ្លូវឲ្យសាលាដំបូងខេត្តស្វាយរៀង អាចកោះហៅលោកទៅសាកសួរជុំវិញការជាប់ពាក់ព័ន្ធរបស់លោកក្នុងការបាញ់ប្រហារ កាលពីថ្ងៃទី២០ ខែកុម្ភៈ ទៅលើកម្មការិនីបីនាក់ធ្វើការក្នុងតំបន់សេដ្ឋកិច្ចពិសេសម៉ាន់ហាតតាន់។
ទោះជាយ៉ាងនេះក្តី ព្រះរាជអាជ្ញាអមសាលាដំបូងម្នាក់ បានមានប្រសាសន៍ថា បញ្ជារបស់លោកនាយករដ្ឋមន្ត្រី ហ៊ុន សែនឲ្យដកលោកបណ្ឌិតនោះមិនពាក់ព័ន្ធនឹងការស៊ើបអង្កេតរបស់តុលាការទេ ពីព្រោះជនសង្ស័យក្នុងការបាញ់ប្រហារនេះ ត្រូវបានកោះហៅមករួចហើយ។
លោក រស់ផលរិទ្ធអនុប្រធានរដ្ឋបាលសាលាខេត្តស្វាយរៀង បានមានប្រសាសន៍ថាលោក ហ៊ុនសែន បានចេញអនុក្រឹត្យមួយ ចុះហត្ថលេខា កាលពីថ្ងៃច័ន្ទបញ្ជាឲ្យដកលោកបណ្ឌិត ចេញពីតួនាទីជាអភិបាលក្រុង និងផ្ទេរលោកទៅកាន់ការងារមិនជាក់លាក់មួយនៅឯការិយាល័យសាលាខេត្តស្វាយរៀងវិញ។
លោក ផលរិទ្ធ បានមានប្រសាសន៍ថា“រដ្ឋាភិបាលបានផ្ទេរលោក ឈូកបណ្ឌិតទៅជាមន្ត្រីសាលាខេត្ត ដើម្បីឲ្យតុលាការអាចកោះហៅរូបលោកទៅសាកសួរជុំវិញការពាក់ព័ន្ធរបស់លោកក្នុងករណីបាញ់ប្រហារពេលបាតុកម្មកាលពីថ្ងៃទី២០ខែកុម្ភៈ”។
លោកបានមានប្រសាសន៍បន្ថែមថា លោកស ខេង រដ្ឋមន្ត្រីក្រសួងមហាផ្ទៃ កាលពីថ្ងៃអង្គារ បានតែងតាំងលោក ណេប សារុនអភិបាលរងក្រុងបាវិត ជាអភិបាលស្តីទី។
លោក ហឹុង ប៊ុនជា ព្រះរាជអាជ្ញាអមសាលាដំបូងខេត្តស្វាយរៀង បានមានប្រសាសន៍ថា បទបញ្ជាផ្ទេរតំណែងរបស់លោក ហ៊ុន សែន នឹងមិនប៉ះពាល់ដល់ការស៊ើបអង្កេតរបស់តុលាការ មកលើលោក បណ្ឌិត ដែលត្រូវបានតុលាការកោះហៅឲ្យចូលខ្លួននៅថ្ងៃទី១៦ខែមីនានោះទេ។
លោក ប៊ុនជា បានមានប្រសាសន៍ថា“យើងនៅតែធ្វើការងារដូចធម្មតា ដើម្បីបន្តអនុវត្តតាមនីតិវិធីស៊ើបអង្កេត”។ លោក ប៊ុនជាមិនអាចទាក់ទង ដើម្បីធ្វើអត្ថាធិប្បាយបានទេ។
កាលពីថ្ងៃទី១ ខែមីនា លោក ស ខេងបានកំណត់លោក បណ្ឌិត ថាជាជនសង្ស័យតែម្នាក់គត់ ក្នុងករណីបាញ់ប្រហារនៅតំបន់សេដ្ឋកិច្ចពិសេសម៉ាន់ហាតតាន់អំឡុងពេលមានការតវ៉ា ដោយហិង្សាមួយ ដែលធ្វើឲ្យកម្មការិនីរោងចក្របីនាក់ រងរបួស។ ជនរងគ្រោះទាំងបីនាក់នេះ ត្រូវបានអាជ្ញាធរជាន់ខ្ពស់រាប់ទាំងថ្នាក់ខេត្ត និងថ្នាក់ជាតិខំបញ្ចុះបញ្ចូល ដោយឧបត្ថម្ភជាប្រាក់ និងអំណោយជាថ្នូរឈប់ប្តឹងជនសង្ស័យទៀត។ ក្រុមអ្នកសង្កេតការណ៍បានបញ្ចេញប្រតិកម្មផ្សេងៗគ្នា ចំពោះការផ្ទេរតំណែងលោក បណ្ឌិតរបស់នាយករដ្ឋមន្ត្រី។
លោក មឿន តុលា ប្រធានគម្រោងការងាររបស់មជ្ឈមណ្ឌលអប់រំច្បាប់សម្រាប់សហគមន៍ ដែលបាននិងកំពុងតែជួយជនរងគ្រោះ ដោយសារការបាញ់ប្រហារនោះបានមានប្រសាសន៍ថាការផ្ទេរនេះអាចត្រូវបានគេយល់ឃើញថា “ជាបែបដំឡើងឋានៈវិញទេ”។
លោក មឿន តុលា បានមានប្រសាសន៍ថា “ជាគោលការណ៍ គួរតែដកលោក [លែងឲ្យធ្វើការអ្វីទាំងអស់] ហើយមិនត្រូវផ្ទេរទៅកាន់តំណែងមួយទៀតនោះទេ។តាមរបៀបជាប្រព័ន្ធការងារ លោកបានទទួលការតែងតាំង ពីព្រោះលោកត្រូវបានផ្ទេរចេញពីថ្នាក់ស្រុក ទៅថ្នាក់ខេត្ត”។
លោក សុក សំអឿន ប្រធានក្រុមអ្នកការពារសិទ្ធិកម្ពុជា បានមានប្រសាសន៍ថាគេគួរតែពិចារណាការផ្ទេរតំណែងរបស់លោកហ៊ុន សែន ថា ជាការព្យួរការងារមួយ តាមរយៈការដកលោក បណ្ឌិត ពីអំណាច ដោយប្រសិទ្ធភាព។
លោក សំអឿន បានប៉ាន់ប្រមាណថាលោក បណ្ឌិត ដែលជាអភិបាលក្រុងបាវិត អាចបញ្ជាអាជ្ញាធររបស់លោកទៅជួបជនរងគ្រោះឲ្យឈប់ប្តឹង។ លោក សំអឿន បានមានប្រសាសន៍ថា “ការដកគាត់ គឺស្មើនឹងការផ្អាកគាត់ ដូច្នេះគាត់គ្មានអំណាចទៀតទេ។ តួនាទីថ្មីរបស់គាត់អាចនៅថ្នាក់ខេត្តក៏ប៉ុន្តែក្នុងរចនាសម្ព័ន្ធរបស់រដ្ឋាភិបាល វាក៏ដូចជាការផ្អាកការងារផងដែរ”។
លោក សំអឿន បានមានប្រសាសន៍ថា ការផ្ទេរលោក បណ្ឌិត ក៏អាចចាត់ទុកថា ជាការព្រមានដល់មន្ត្រីផ្សេងទៀតឲ្យឈប់ដើរបញ្ចុះបញ្ចូលជួសមុខឲ្យគាត់ទៀត។
លោក សំអឿន បានមានប្រសាសន៍ថា “ប្រហែលជាលោក បណ្ឌិត មានខ្នងខ្លះ ហើយខ្នងនេះអាចជាមន្ត្រីជាន់ខ្ពស់ ដូច្នេះពេលនេះលោកនាយករដ្ឋមន្ត្រីបាននិយាយថាកុំជ្រៀតជ្រែក”៕ ប្រែសម្រួលដោយ ចេវប៊ុននី