កាលពីថ្ងៃម្សិលមិញ សកម្មជនជាស្ត្រី អង្គការក្រៅរដ្ឋាភិបាល និងមន្ត្រីរដ្ឋាភិបាល បានជួបជុំគ្នាប្រារព្ធទិវានារីអន្តរជាតិក្នុងទីក្រុងភ្នំពេញដើម្បីបង្ហាញអំពីបញ្ហាជាច្រើនដែលស្ត្រីនៅកម្ពុជាកំពុងប្រឈម។
ស្រ្តីប្រមាណ៣០០នាក់មកពីសហគមន៍បុរីកីឡានិងបឹងកក់ដែលធ្វើការតវ៉ាជាច្រើនឆ្នាំមកហើយចំពោះការបណ្តេញចេញពីផ្ទះសម្បែងរបស់ពួកគាត់ និងជារឿយៗតែងមានការបង្ក្រាបដោយហិង្សាពីសំណាក់នគរបាលក្នុងពេលធ្វើបាតុកម្មនោះបានប្រមូលផ្តុំគ្នានៅវត្តភ្នំ ដើម្បីទាមទារឲ្យមានការបញ្ចាប់ការប្រើអំពើហិង្សាទៅលើស្រ្តី។
ខណៈដែលអ្នកភូមិបឹងកក់ចំនួន៦៣៨គ្រួសារចុងក្រោយបានទទួលប័ណ្ណកម្មសិទ្ធិដីធ្លី កាលពីសប្តាហ៍មុននោះគេនៅមើលឃើញស្នាមរបួសថ្មីៗនៅលើដងខ្លួនស្ត្រីមួយចំនួនដែលបានទទួលរងការបង្ក្រាបយ៉ាងចាស់ដៃពីសំណាក់នគរបាល ខណៈដែលពួកគេស្ថិតនៅជួរមុខនៃក្រុមបាតុករ។
អ្នកស្រីទេពវណ្ណីសកម្មជននៅបឹងកក់ បានមានប្រសាសន៍ថា“យើងធ្វើការតវ៉ានៅទិវានារីអន្តរជាតិដើម្បីទាមទារឲ្យមានការបញ្ចប់ការប្រើអំពើហិង្សាលើស្ត្រី។យើងមិនអាចទទូលយកបានទេ នូវការប្រើអំពើហិង្សាពីសំណាក់អាជ្ញាធរមកលើស្រ្តីកាលពីអតីតកាល”។
នៅពេលថ្មីៗនេះនៅក្នុងការបង្ក្រាបដ៏ហិង្សាមួយក្នុងខែមករា អ្នកភូមិបុរីកីឡាចំនួន៣០០គ្រួសារបានប៉ះទង្គិចគ្នាជាមួយនគរបាល ដែលនៅពេលនោះបានបណ្តាលឲ្យមនុស្សចំនួន ៦៤នាក់រងរបួសហើយស្រ្តីនិងកុមារចំនួន៣០នាក់ ត្រូវបានចាប់បញ្ចូលទៅក្នុងរថយន្តដឹកយកទៅបង្ខាំងទុកជាច្រើនថ្ងៃក្នុងមជ្ឈមណ្ឌលសង្គមកិច្ចព្រៃស្ពឺ ក្រុងភ្នំពេញ។
នៅក្នុងការប្រើអំពើហិង្សាទៅលើអ្នកតវ៉ាជាស្ត្រីមួយផ្សេងទៀតកាលពីខែមុន ស្រ្តីចំនួនបីនាក់ដែលធ្វើបាតុកម្មនៅរោងចក្រមួយក្នុងតំបន់សេដ្ឋកិច្ចពិសេសម៉ានហាតាន់ក្នុងខេត្តស្វាយរៀង តាមចោទថាត្រូវបានអភិបាលក្រុងនេះបាញ់ឲ្យរងរបួសយ៉ាងធ្ងន់ធ្ងរ។
ក្រោយពីការបាញ់ប្រហារនេះបន្តិច អ្នកតំណាងរបស់លោកស្រី ម៉ែន សំអន ឧបនាយករដ្ឋមន្ត្រី និងជាតំណាងរាស្រ្តមកពីគណបក្សប្រជាជនកម្ពុជាប្រចាំមណ្ឌលស្វាយរៀងបានទៅសួរសុខទុក្ខស្រ្តីរងរបួសទាំងបីនាក់នៅមន្ទីរពេទ្យដើម្បីជួយឧបត្ថម្ភលុយមួយចំនួនហើយស្នើឲ្យស្រ្តីទាំងបីនាក់នោះមិនឲ្យដាក់ពាក្យបណ្តឹងប្តឹងបុរសដែលបានបាញ់ប្រហារពួកគេ។
កាលពីម្សិលមិញ លោកស្រីម៉ែន សំអន បានធ្វើជាអធិបតីនៅទិវានារីអន្តរជាតិជាផ្លូវការរបស់រដ្ឋាភិបាលនៅទីក្រុងភ្នំពេញហើយបានថ្លែងកោតសរសើររដ្ឋាភិបាលចំពោះការបង្កើតច្បាប់ការពារស្រ្តី។
លោកស្រី ម៉ែនសំអន បានមានប្រសាសន៍ថា “ព្រះរាជាណាចក្រកម្ពុជាតែងតែមានវិធានការការពារស្រ្តី និងធានាឲ្យមានយុត្តិធម៌សម្រាប់ពួកគេជាពិសេសពាក់ព័ន្ធនឹងការប្រើអំពើហិង្សាលីេស្ត្រី”។
លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានបដិសេធមិនធ្វើអត្ថាធិប្បាយអំពីការជាប់ពាក់ព័ន្ធរបស់លោកស្រីនៅក្នុងការផ្តល់ប្រាក់សំណងដល់ស្ត្រីទាំងនេះទេ។ ទោះជាយ៉ាងណាលោក ផៃ ស៊ីផាន បានមានប្រសាសន៍ថាអាជ្ញាធរមិនគួរប្រើកម្លាំងបង្ក្រាបការតវ៉ាទេទោះពួកគេជាបុរសឬស្រ្តីក៏ដោយ។
លោក ផៃស៊ីផានបានមានប្រសាសន៍បន្ថែមទៀតថា“ពេលដែលស្រ្តីប៉ះទង្គិចជាមួយកងកម្លាំងប្រដាប់អាវុធឬនគរបាល នោះនគបាលមានតួនាទីការពារសណ្តាប់ធ្នាប់។ច្បាប់គឺជាច្បាប់ មនុស្សគ្រប់រូបត្រូវតែគោរពច្បាប់”៕
(រាយការណ៍បន្ថែមដោយ Kate Bartlett)
ប្រែសម្រួលដោយស៊ាស៊ុយឈាង