ក្រុមមន្ត្រីបាននិយាយកាលពីម្សិលមិញថា រថយន្ដមួយគ្រឿងដឹកសកម្មជន “ អាវក្រហម” ចូលមកក្នុងប្រទេសកម្ពុជាសម្រាប់កិច្ចប្រជុំនាចុងសប្ដាហ៍ បានប៉ះជាមួយនឹងម៉ូតូមួយគ្រឿង និងបានសម្លាប់អ្នកបើកម៉ូតូ និងធ្វើឲ្យរបួសអ្នកធ្វើដំណើរជាមួយ។
គ្រោះថ្នាក់នេះបានកើតឡើងកាលពីព្រលប់ថ្ងៃសុក្រនៅលើផ្លូវជាតិលេខ៦ក្នុងស្រុកពួក ខេត្តសៀមរាប។ លោក ជឹម សុវណ្ណ នាយការិយាល័យនគរបាលចរាចរខេត្តថ្លែងថា លោកមិនបានស្គាល់ឈ្មោះជនរងគ្រោះទាំងពីរនាក់នោះទេ ប៉ុន្តែថា អ្នកទាំងពីរមានអាយុខ្ទង់២០ឆ្នាំ។
“[រថយន្ដនិងម៉ូតូ] កំពុងបើកបរស្របទិសគ្នា ហើយនៅពេលអ្នកបើកម៉ូតូបត់ឆ្វេងគាត់មិនបានងាកមើលខាងក្រោយ។ រថយន្ដក៏បុកគាត់ស្លាប់មួយរំពេច” លោក សុវណ្ណ មានប្រសាសន៍ដូច្នេះ ដោយបានបន្ថែមថា អ្នកជិះពីក្រោយពុំបានរងរបួសធ្ងន់ទេ។
លោក សុវណ្ណ បានមានប្រសាសន៍យ៉ាងដូច្នេះថា នគរបាលនៅកន្លែងកើតហេតុបានសន្និដ្ឋានថា គ្រោះថ្នាក់នោះគឺជាកំហុសរបស់ អ្នកបើកម៉ូតូ “ ពីព្រោះគាត់បើកបរដោយធ្វេសប្រហែស” និងថា គ្មាននរណាម្នាក់ត្រូវចាប់ខ្លួននោះទេ ទោះបីជាក្រុមហ៊ុនរថយន្ដថៃព្រមទទួលចេញថ្លៃរៀបចំបុណ្យសពក៏ដោយ។ ក្នុងទីក្រុងសៀមរាប មានគ្រោះថ្នាក់ចរាចរណ៍ប្រាំមួយលើកក្នុងអំឡុងវិស្សមកាលចុងសប្ដាហ៍ ដោយមានមនុស្សស្លាប់បីនាក់និងរបួស១១នាក់៕
ប្រែសម្រួលដោយ ហម សុផាណ្ណា