29 C
Phnom Penh

សាលារាជធានី​ភ្នំពេញ​បង្កើត​ក្រុម​ការ​ងារ​ដើម្បី​សាង​សង់​រូប​សំណាករបស់​លោក ជា វិជ្ជា

ដោយ ឌឹ ខេមបូឌា ដេលី

បទវិភាគ

លោក ជា មុនី ប្រធាន​សហជីព​សេរី​កម្មករ​​​​បាន​លើក​ឡើង​ កាល​ពី​ម្សិល​មិញ​ថា សាលា​រាជធានី​ភ្នំពេញ​ បាន​បង្កើត​ក្រុម​ការ​ងារមួយ រួម​មាន​មន្ត្រី​សាលា​រាជធានី​ភ្នំពេញ​ចំនួន​​​​ប្រាំពីរ​រូប និង​សមា​ជិក​សហជីព​សេរី​កម្មករ​មួយ​ចំនួន​ ដើម្បី​រៀប​ចំ​សាងសង់​រូប​សំណាក​របស់​លោក ជា​ វិជ្ជា ដែល​ត្រូវ​​​បាន​​​ឃាត​​​ករ ​បាញ់​សម្លាប់។

លោក ជា វិជ្ជា អតីតប្រធាន​សហជីព​សេរី​កម្មករ​ដ៏​ល្បី​ឈ្មោះ​ត្រូវ​បានឃាតករ​បាញ់​សម្លាប់​ទាំង​ថ្ងៃ​នៅ​ក្បែរ​វត្ត​លង្កា កាល​ពី​ខែ​មករា​ ឆ្នាំ​២០០៤​។ ជន​សង្ស័យ​ពីរ​នាក់​ត្រូវ​បានតុលាការ​ចោទ​ប្រកាន់ពី​បទ​មនុស្ស​ឃាត ប៉ុន្ដែ​គេ​​ចាត់ទុក​ថា ជា​អ្នក​រង​គ្រោះ​ជំនួស​គេ​ ហើយ​ចាប់​តាំង​ពី​នោះមក ​​អ្នក​​​ទាំង​​​ពីរ​​​ត្រូវ​​​​បាន​តុលាការដោះ​លែង​ ឲ្យនៅ​ក្រៅ​ឃុំ​​​បណ្តោះអាសន្ន​ ដើម្បី​​រង​ចាំ​លទ្ធផល​នៃ​ការ​ស៊ើប​អង្កេត​សាជាថ្មី​។

ប្រធាន​សហជីព​សេរីកម្មករបាន​ព្យាយាម​បញ្ចុះ​បញ្ចូលរដ្ឋាភិបាល​ អស់​រយៈពេល​ប្រាំ​​​បីឆ្នាំ​មក​ហើយ​ ដើម្បី​សុំ​ការអនុញ្ញាត​សាង​សង់​រូប​សំណាក​របស់​លោក ជា វិជ្ជា​ ហើយ​ទីបំផុត ​លោកនាយក​រដ្ឋមន្ត្រី ហ៊ុន សែន បាន​យល់​ព្រម​តាមសំណើ​​នេះ​ កាល​ពី​ខែ​មករា គឺ​ប៉ុន្មាន​ខែ​មុន​ការ​បោះ​ឆ្នោត​ឃុំ-សង្កាត់​ក្នុង​ឆ្នាំ​នេះ​មក​ដល់​។

លោក ជា មុនី ​ប្អូន​ប្រុស​របស់​លោក ជា វិជ្ជា បាន​មាន​ប្រសាសន៍ថា ក្រុម​ការ​ងារ​ត្រូវ​បាន​បង្កើ​ត​ឡើង​បន្ទាប់​ពី​មាន​កិច្ច​ប្រជុំ​ចំនួន​ពីរ​លើកជាមួយ​លោក​ កែប ជុតិមា អភិបាល រាជ​ធានី​ភ្នំពេញ​ កាល​ពី​ខែ​មករា និង​ខែ​កុម្ភៈ​ក្នុង​ឆ្នាំ​២០១២នេះ។ លោកបាន​លើក​ឡើង​ថា “ការ​សាង​សង់​នេះ​នឹង​ចាប់​ផ្ដើម​មិនឲ្យហួស​ឆ្នាំ​នេះ​ទេ​។ រូប​សំណាក​នេះ​នឹង​ក្លាយ​ជា​រូប​សំណាក​ប្រវត្តិ​សាស្ត្រ​សម្រាប់​ជាតិ​ កម្មករ​ កម្មការិនី​កាត់​ដេរ​ និង​សម្រាប់​សាធារណជន​ទាំង​អស់​”។

លោក ជា​  មុនី បាន​មាន​ប្រសាន៍​ថា  រូប​សំណាក​នេះ​នឹង​ត្រូវ​បង្កើត​ឡើង​ដូច​រូប​រាង​បង​ប្រុស​របស់​លោកបេះបិទ ដែល​មាន​កម្ពស់​១,៦៨​ម៉ែត្រ​នោះ​​។ លោកក៏បាន​បន្ដ​ដែរ​ថា រូប​សំណាក​នេះ​នឹង​ដាក់​ពី​លើ​ជើង​ទម្រ​ធ្វើ​អំពី​ថ្មម៉ាប ឬ​ក៏​លោហៈ ​មាន​កម្ពស់​មួយ​ម៉ែត្រ។ ប្រធាន​សហជីព​សេរីកម្មករ​នឹង​អំពាវ​នាវ​ដល់​កម្មករ​ កម្មការិនី​រោងចក្រកាត់​ដេរ​ សមា​ជិក​សង្គមស៊ីវិល​ និង​រដ្ឋាភិបាល​ ដើម្បី​សុំ​ជំនួយជា​ថវិកា​ ដែលមាន​ទឹក​ប្រាក់​ប្រមាណ​៤.០០០​ដុល្លារ​សហរដ្ឋអាមេរិក​សម្រាប់​ការ​សាង​សង់​រូប​សំណាក​​នេះ​។

លោក ជា មុនី បាន​លើក​ឡើង​ថា តាំង​ពី​យូរ​មក​ហើយ ​ទឹក​ប្រាក់​​ប្រមាណ​៣៥០​ដុល្លា​សហរដ្ឋមេរិក​ត្រូវ​បាន​ជួយ​ចូលរួម​ចំណែក​ ដោយ​គណបក្ស​ សម រង្ស៊ី និង​លោក សារ៉ូ ស៊ីវុត្ថា អតីត​ប្រធាន​ចលនា​យុវជន ​ដើម្បី​លទ្ធិ​ ប្រជាធិបតេយ្យ។ លោក​បាន​បន្ដ​ទៀត​ថា “ យើង​នៅ​មិន​ទាន់​និយាយ​ជា​មួយ​សាលារាជ​ធានី​ភ្នំពេញ​នៅ​ឡើយ​ទេថាតើ​សាលា​រាជធានី​ភ្នំពេញ​អាច​ជួយ​ចូលរួម​ចំណែកបាន​​ចំនួន​ប៉ុន្មាន​នោះ​ទេ ដើម្បី​ជួយ​ដល់​ខ្ទង់​ចំណាយ​នេះ​”។

លោក យឹម សុវណ្ណ អ្នក​នាំ​ពាក្យ​គណ​បក្ស​ សម រង្ស៊ី បាន​មាន​ប្រសាសន៍​ថា មិន​ចាំ​បាច់​មាន​ក្រុម​ការ​ងារ​មក​ជួយ​នោះ​ទេ​ ដោយ​លោក​បាន​លើក​ឡើង​ថា ក្រុម​ការ​ងារ​នឹងធ្វើ​ឲ្យ​ដំណើរ​ការ​នៃ​ការ​សាង​សង់​អូស​បន្លាយ​ពេល​វេលា​ទៅ​វិញ​ទេ​។ លោកបាន​បន្ដថា “ ប្រសិន​បើ​គេ​មាន​ឆន្ទៈ​នយោបាយពិតប្រាកដ​ ដើម្បីសាង​សង់​រូប​សំណាក​នេះ​ពិត​មែន​នោះ​ វាពិត​ជា​ត្រូវ​បាន​សាងសង់​ឡើង​យ៉ាង​ឆាប់​រហ័ស​”៕

(រាយ​ការណ៍បន្ថែម​ដោយ Dene-Hern Chen)

ប្រែសម្រួល​ដោយ  ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស