អំឡុងពិធីសម្ពោធរោងចក្រស្រាបៀរថ្មីរបស់ខ្មែរ ដែលចំណាយទឹកប្រាក់៦០លានដុល្លារ លោកនាយករដ្ឋមន្ត្រី ហ៊ុន សែន បានលើកទឹកចិត្តសាធារណជនឲ្យជួយប្រទេស ដោយពិសាស្រាបៀរឲ្យបានច្រើនទៀត។
លោក ហ៊ុន សែន បានមានប្រសាសន៍អំឡុងពិធីសម្ពោធរោងចក្រផលិតស្រាបៀរមួយនៅក្នុងសង្កាត់ជើងឯក ខណ្ឌដង្កោ ថា “កុំភ្លេចណា ផឹកមួយកំប៉ុង ឬមួយដប រដ្ឋត្រូវយកប៉ុន្មាន?”។
លោក ហ៊ុន សែន បានមានប្រសាសន៍ថា រដ្ឋយកពន្ធតម្លៃបន្ថែម១០ភាគរយ អាកពិសេស២០ភាគរយ សម្រាប់ស្រាបៀរមួយកំប៉ុង ឬមួយដប ដែលលក់ក្នុងស្រុក ដូច្នេះពិសាស្រាបៀរអាចជួយប្រទេសជាតិបាន។ លោក ហ៊ុន សែន បានមានប្រសាសន៍ថា “ ដូច្នេះ ផឹកមួយកំប៉ុង រដ្ឋយកពន្ធ៣០ភាគរយ។ ប្រាក់ដែលយើងទទួលពីចំណូលនេះអាចប្រើ ដើម្បីកសាងហេដ្ឋារចនាសម្ពន្ធ ឬប្រើសម្រាប់បើកប្រាក់ខែឲ្យគ្រូបង្រៀន វេជ្ជបណ្ឌិត និងមន្ត្រីរាជការ ដូចជា កងកម្លាំងប្រដាប់អាវុធជាដើម”។
លោកមានប្រសាសន៍បន្ថែមថា “ អ្នកមកចូលរួមនៅទីនេះ ថាទេ រោងចក្រនេះមិនមានផលប្រយោជន៍អីដល់អញផង។ មិនមែនអ៊ីចឹងទេ”។លោកនាយករដ្ឋមន្ត្រីបានលើកឡើងអំពីសារៈសំខាន់នៃស្រាបៀរ ដែលផលិតថ្មីៗរបស់ក្រុមហ៊ុនស្រាបៀរខ្មែរ គឺស្រាបៀរកម្ពុជា (Cambodia Beer)។
លោក ហ៊ុន សែន បន្ដថា “ ខ្ញុំសូមបញ្ជាក់បន្ដិចថា ហេតុអ្វីបានជាយើងត្រូវផលិតស្រាបៀរនេះឡើង។ យោងតាមរបាយការណ៍របស់លោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល បានឲ្យដឹងថា នេះជារោងចក្រទី៦ហើយ ដែលផលិតស្រាបៀរ លក់នៅក្នុងប្រទេសរបស់យើង ប៉ុន្ដែវាប្លែក បើប្រៀបធៀបទៅនឹងរោងចក្រផ្សេងទៀត ពីព្រោះវាជាស្រាបៀរចេញពីរោងចក្រខ្នាតធំ ហើយផលិតដោយដើមទុនខ្មែរសុទ្ធសាធទាំងអស់”។
ដោយដាក់រូបប្រាសាទព្រះវិហារ ជានិមិត្តសញ្ញារបស់ខ្លួន ស្រាបៀរកម្ពុជា បានចាប់ផ្ដើមផលិតកាលពីខែវិច្ឆិកា ហើយបាននិងកំពុងផ្សព្វផ្សាយអំពីរោងចក្រស្រាបៀរខ្នាតធំនេះ នៅទូទាំងប្រទេស។
លោក ហ៊ុន សែន ក៏បានអំពាវនាវដល់សហគមន៍ នៅជុំវិញរោងចក្រស្រាបៀរនោះឲ្យជួយថែរក្សារោងចក្រនេះផង។ លោក ហ៊ុន សែន បានមានប្រសាសន៍ថា “ អ្នកនៅជិតខាងកន្លែងនេះក៏ត្រូវការពាររោងចក្រផង បើខូចរោងចក្រ និងបាត់បង់រោងចក្រ យើងក៏ទទួលផ្នែកណាមួយនៃការបាត់បង់ចំណូលដែរ”។
លោកនាយករដ្ឋមន្ត្រីក៏បានអំពាវនាវ ដល់បណ្ដារោងចក្រផលិតស្រាបៀរ និងអាជីវកម្មផ្សេងៗទៀត ធ្វើយ៉ាងណាឲ្យផលិតផលរបស់ខ្លួនឈានដល់និយាមអន្ដរជាតិ។
លោកបានមានប្រសាសន៍ថា “ ពេលនេះយើងមិនគួរបង្កើតផលិតផលក្នុងស្រុកសម្រាប់តែទីផ្សារក្នុងស្រុករបស់យើងនោះទេ ក៏ប៉ុន្ដែយើងក៏ជំរុញឲ្យក្រុមហ៊ុននាំចេញស្រាបៀររបស់ខ្លួនទូទាំងសាកលលោកផងដែរ”។
លោក ស៊ុយ សែម រដ្ឋមន្ត្រីក្រសួងឧស្សាហកម្ម បានលើកឡើងនៅឯពិធីនោះដែរថា ចំណូលសរុបដែលកម្ពុជាទទួលបានពីអាហារកែច្នៃ និងការនាំចេញស្រាបៀរនៅក្នុងឆ្នាំ២០១១ មានជាង១ពាន់លានដុល្លារ ដែលក្នុងនោះផលិតផលស្រាបៀរក្នុងស្រុកមានប្រហែល៤០០លានដុល្លារ។
លោក លាង ឃុន ប្រធានរោងចក្រស្រាបៀរខ្មែរ ថ្លែងអំណរគុណដល់លោក ហុ៊ន សែន អំឡុងសុន្ទរកថាគាំទ្ររបស់លោក។លោកបានមានប្រសាសន៍ថា “ ការបង្កើតរោងចក្រស្រាបៀរនេះ គឺកើតឡើងដោយសារតែការដឹកនាំដ៏មានទេពកោសល្យ និងប្រកបដោយគតិបណ្ឌិតរបស់លោកនាយករដ្ឋមន្ត្រី ហ៊ុន សែន”។ លោកបានមានប្រសាសន៍បន្ថែមទៀតថា រោងចក្រនេះនឹងផលិតស្រាបៀរ៥០លានលីត្រ ក្នុងមួយឆ្នាំ ដោយប្រើឧបករណ៍ផលិតនាំចូលពីអាល្លឺម៉ង់។ លោកក៏បានមានប្រសាសន៍ផងដែរថា រោងចក្រនេះនឹងជួលបុគ្គលិកចំនួន១.៥០០នាក់ ដោយផ្ទាល់ និងផ្ដល់ការងារដោយប្រយោលចំនួន៥.០០០ទៀត។
លោក លាង ម៉េង ប្រធានក្រុមហ៊ុន ជីបម៉ុងគ្រុប ដែលបង្កើតរោងចក្រស្រាបៀរខ្មែរ បានមានប្រសាសន៍តាមទូរស័ព្ទថា លោក ហ៊ុនសែន គាំទ្ររោងចក្រស្រាបៀរ របស់លោក ក៏ប៉ុន្ដែ លោកបានបន្ថែមថា លោកនាយករដ្ឋមន្ត្រីមិនមានភាគហ៊ុនណាមួយក្នុងក្រុមហ៊ុននេះ ក្រៅតែពីរង់ចាំមើលរោងចក្រកម្ពុជារីកដុះដាលឡើងប៉ុណ្ណោះ។
លោក លាង ម៉េង បានមានប្រសាសន៍ថា “គាត់គ្រាន់តែចង់គាំទ្រវិនិយោគិនទាំងអស់ឲ្យចូលមករកសុីក្នុងប្រទេសកម្ពុជា ហើយនេះជាអ្វីដែលលោកនាយករដ្ឋមន្ត្រីចង់គាំទ្របណ្ដាក្រុមហ៊ុនក្នុងស្រុក។ លោកមិនមែនជាវិនិយោគិននោះទេ”។ លោកបានមានប្រសាសន៍ថា ស្រាបៀរកម្ពុជា កំពុងត្រូវនាំចេញទៅជប៉ុន និងមានគម្រោងពង្រីកការនាំចេញទៅប្រទេសអាល្លឺម៉ង់ បារំាង និងសហរដ្ឋអាមេរិក។
លោក អុឹម មករា អ្នកគ្រប់គ្រងនៅរោងចក្រស្រាបៀរកម្ពុជា ប្រចាំខេត្តសៀមរាប ដែលផលិតស្រាបៀរដូច Anchor Beer ABC Stout និងស្រាបៀរ Tiger Beer បានមានប្រសាសន៍ថា លោកមិនជំទាស់នឹងការផ្សព្វផ្សាយរបស់លោក ហ៊ុន សែន អំពីស្រាបៀរកម្ពុជា ដែលជាគូប្រជែងថ្មីនេះឡើយ។ ប្រជាពលរដ្ឋនឹងជ្រើសរើសស្រាបៀរ ដែលពួកគេ ចង់ពិសារ។
លោកបានមានប្រសាសន៍ថា “ វាមិនបញ្ហាទេ ដែលលោកនាយករដ្ឋមន្ត្រី ហ៊ុន សែន លើកឡើងអំពីស្រាបៀរកម្ពុជានោះ។ ពួកគេនឹងគិតខ្លួនឯង”។ លោក ជាង គ័នជូ ប្រធានផ្នែកលក់ប្រចាំតំបន់ប្រចាំក្រុមហ៊ុនខេមប្រ៊ូ (Cambrew) របស់ ស្រាបៀរអង្គរ បដិសេធមិនធ្វើអត្ថាធិប្បាយ
អំពីសុន្ទរកថារបស់លោក ហ៊ុន សែន ឡើយ។ ស្រាបៀរអង្គរ ជាស្រាបៀរនាំមុខគេនៅ កម្ពុជា និងជាស្រាបៀរ ដែលមានទំនាក់ទំនងបំផុតជាមួយប្រទេសនេះ៕
ប្រែសម្រួលដោយ ចេវ ប៊ុននី