28 C
Phnom Penh

ម្ចាស់​អគារខ្ពស់​ ហ្គោល ថៅវើ ៤២ជាន់​ កំពុងដោះ​ស្រាយ​ជម្លោះ

ដោយ ឌឹ ខេមបូឌា ដេលី

បទវិភាគ

បុគ្គលិកជាប់​ពាក់​ព័ន្ធ​នឹង​ដំណើរ​ការ​សាង​សង់​បាន​ឲ្យ​ដឹង ​កាល​ពី​ម្សិល​មិញ​ថា​ ម្ចាស់​​គម្រោង​សាងសង់​អគារ​ខ្ពស់​ហ្គោល ថៅវើ ​កម្ពស់​៤២​ជាន់​ (Gold Tower 42) ដែល​មាន​ទំហំទឹក​ប្រាក់រហូតដល់​២៤០​លាន​ដុល្លារ​នៅក្នុង​រាជធានី​ភ្នំពេញ បាន​ចាប់​ផ្តើម​ដោះ​ស្រាយ​ជម្លោះ​ជាមួយ​ក្រុម​ហ៊ុន ​​ទទួលម៉ៅការ​​សាង​សង់​គម្រោង​នេះ​តាម​រយៈក្រុម​​​អាជ្ញា​កណ្ដាល​ ដើម្បី​ចាប់​ផ្ដើម​ការ​ងារ​សាង​សង់​ឡើង​វិញ​ បន្ទាប់​ពី​ការ​សាងសង់របស់​គម្រោង​​នេះ​ត្រូវ​បាន​ផ្អាក​កាល​ពី​ខែ​កញ្ញា​ ឆ្នាំ​២០១០​ ដោយ​សារ​តែ​ការ​លក់មិនបាន​ប្រាក់​គ្រប់​គ្រាន់​ ហើយ​មាន​ការ​ចំណាយ​លើស​។

​លោក​ លី ​ស៊ុនហ៊ុម ​(Lee Sun-hum) នាយក​​ប្រចាំ​ប្រទេស​របស់​ក្រុម​ហ៊ុន​ យុនវូ ​ខេម​បូឌា (Yon Woo Cambodia Co. Ltd)   ដែលជា​ក្រុម​ហ៊ុន​​ម្ចាស់​អគារ ហ្គោល ថៅវើ កម្ពស់៤២​ជាន់​ បានថ្លែង​ថា​  ការ​ដោះ​ស្រាយ​ជម្លោះដោយ​អាជ្ញា​កណ្ដាល​នៅ​ក្នុង​ទី​ក្រុង​សេអ៊ូល បាន​ចាប់​ផ្ដើម​ធ្វើ​ឡើង​កាល​ពី​ឆ្នាំ​ទៅ​ ជា​មួយ​ក្រុម​ហ៊ុន​វិស្វកម្ម​ និង​សំណង់​ហានីល​ (Hanil Engineering and Construction Co. Ltd) ដែលជា​ក្រុម​ហ៊ុន​ទទួល​កិច្ច​សន្យាម៉ៅ​ការ​សាង​សង់​អគារ​ខ្ពស់​ មាន​ទី​តាំង​នៅ​ចំណុច​ប្រសព្វ​រវាង​មហា​វិថី​ព្រះ​សីហនុ ​និង​មហាវិថី​ព្រះ​មុនីវង្ស។

ក្រុម​ហ៊ុន​ហានីល​ បាន​បញ្ចុះ​បឋម​សិលា​បើកការដ្ឋាន​សាង​សង់​កាល​ពី​​ខែ​មីនា ឆ្នាំ​២០០៨​ ហើយ​បាន​ចាប់​ផ្ដើម​ដំណើរ​ការ​សាង​សង់​អគារ​ខ្ពស់​ជាង​គេ​នៅ​ក្នុងរាជធានី​ភ្នំពេញ​។ ប៉ុន្ដែ​អគារ​ ហ្គោល ថៅវើ កម្ពស់​៤២​ជាន់​ ត្រូវ​បាន​ផ្អាក​ទៅ​វិញ​កាល​ពី​ខែ​កញ្ញា​ឆ្នាំ​២០១០​ នៅ​ពេល​តម្លៃ​អចលន​ទ្រព្យ​របស់​​ប្រទេស​កម្ពុជា​ធ្លាក់​ចុះ​ ដោយ​បង្ក​ឲ្យ​គម្រោង​អភិវឌ្ឍន៍ អចលនទ្រព្យ​ក្រុម​ហ៊ុន​មកពីប្រទេស​កូរ៉េខាង​ត្បូង​ មួយ​ចំនួន​រួម​មាន​​គម្រោង​អភិ​វឌ្ឍ​ន៍កាំកូ ​ស៊ីធី (Camko City)​ ដែល​ចំណាយ​​ទឹក​ប្រាក់​សរុប២.០០០​លាន​ដុល្លារ នៅ​ក្នុង​ខណ្ឌ​ឫស្សីកែវ​ បាន​ផ្អាក​ដំណើរ​​ការ​សាង​សង់​របស់ខ្លួន។

លោក ​លី​ បាន​ឲ្យ​ដឹង​កាល​ពី​ម្សិល​មិញ​ថា​  “ ​និយាយ​អំពី​ករណី​នេះ​ ខ្ញុំ​កំពុង​តែ​រង់​ចាំ​លទ្ធផល​ដោះ​ស្រាយ​ពី​ប្រទេស​កូរ៉េ​ ដោយ​យើង​សង្ឃឹម​ថា ​អាច​ដោះ​ស្រាយ​បាន​ចប់​នៅ​​ចុង​ខែ​ឧសភា​នេះ។ពេល​​ដោះ​ស្រាយ​ចប់ហើយ​ យើង​នឹង​ខិត​ខំ​ចាប់​ផ្ដើមដំណើរ​ការ​ [សាង​សង់​] ទៀត​ ប៉ុន្ដែ​យើង​ចាំបាច់​ត្រូវ​តែ​ទទួល​បាន​ដំណោះ​ស្រាយ​ពី​ប្រទេស​កូរ៉េ​ជាមុន​សិន​”។

លោក យូ ​ជឹង​ហ៊ូន ​(Yoo Jeoung-Hoon) មេធាវី​របស់​ក្រុមហ៊ុនជីបយុង និងជីស៊ុង (Jipyong & Jisung) ដែល​ជា​ក្រុមហ៊ុន​តំណាង​ឲ្យ​ក្រុម​ហ៊ុន​យុនវូ​ និង​ក្រុមហ៊ុន ​វិនិយោគ​អចលនទ្រព្យ ​ដេហាន ​(Daehan Real Estate Investment Trust)​ និងជាក្រុមហ៊ុន ដែលបាន​ផ្ដល់​

ប្រាក់​ឲ្យ​ក្រុម​ហ៊ុនយុនវូ ដើម្បី​សាង​សង់​អគារ​ខ្ពស់ ​ហ្គោល​ ថៅវើ កម្ពស់​៤២​ជាន់នេះ​​បាន​មាន​ប្រសាសន៍ថា​ កូន​ក្ដី​របស់​លោក​បាន​ផ្ដួច​ផ្ដើម​ដោះ​ស្រាយ​ជម្លោះជាមួយ​ក្រុម​ហ៊ុន ហានីល ​ដោយអាជ្ញា​កណ្ដាល​។

លោក​ ជឹង ​ហ៊ូន​ បាន​លើក​ឡើង​ថា “​ករណី​​នេះ​…​ កំពុងរង់ចាំដំណោះ​​ស្រាយ​របស់ក្រុម​អាជ្ញា​កណ្ដាល​ ដែល​បាន​បង្កើត​ និង​ផ្ដួច​ផ្ដើម​ឡើង​ ដោយ​ក្រុម​ហ៊ុនយុនវូ​ ចាប់​តាំង​ពី​ដំបូង​ម៉្លេះ គឺមិនមែន​តាមរយៈ​ក្រុម​ហ៊ុន​ ហានីល​ ទេ ហើយ​ការ​ដោះ​ស្រាយ​ជម្លោះ​នៅ​ក្រុម​អាជ្ញា​កណ្ដាល​នេះ​ ​ធ្វើ​ឡើង​ដោយសារតែ​ក្រុម​ហ៊ុន​ ហានីល ​មិន​អាច​សាង​សង់​បាន​”។

កិច្ច​សន្យា​រវាង​ក្រុម​ហ៊ុនយុនវូ ​និង​ក្រុម​ហ៊ុនហានីល បាន​ចែង​ថា ក្រុម​ហ៊ុន យុនវូ​ យល់​ព្រម​បង់​ប្រាក់ឲ្យ​ក្រុម​ហ៊ុន ហានីល ​សរុប​ចំនួន​១៣០​លាន​ដុល្លារ ដើម្បី​សាងសង់​អគារ​ ហ្គោល​ ថៅវើ កម្ពស់​៤២​ជាន់​ ចំណែក​ឯ​ចំណាយ​នៅ​សេស​សល់​លើគម្រោង​សាង​សង់​ចំនួន​១១០​លាន​ដុល្លារទៀត ​គឺ​ក្រុម​ហ៊ុន​ ហានីល ​ត្រូវ​ប្រមូល​ពីការ​លក់​អគារនេះ ។

​​​ជំនួយ​ការ​ម្នាក់​របស់​លោក​ ហុងជូន ប៉ាក នាយក​គ្រប់គ្រង​ប្រចាំ​ប្រទេស​​ក្រុម​ហ៊ុន​ដែហាន ​ (Daehan)​ ដែល​បាននិយាយក្នុង​​​​​លក្ខ​​ខណ្ឌ​​មិន​បញ្ចេញ​ឈ្មោះ​​​ដោយ​លោក​មិន​ត្រូវ​បាន​អនុញ្ញាត​​​ឲ្យ​និយាយ​ជា​សាធារណៈ បាន​ថ្លែង​ថា មានតែ​៥៥​ភាគ​រយ​ប៉ុណ្ណោះនៃផ្ទះ​សរុប​ទាំងអស់ក្នុង​អគារ ដែល​​ត្រូវ​បាន​លក់​ចេញ ​​​ហើយ​​អ្នក​ទិញ​មួយ​ចំនួន​​ក៏​​បាន​ខក​ខាន​ក្នុង​ការ​បង់​ប្រាក់​ទៀត​​ ​។

លោក​បាន​និយាយ​ថា “ គ្មាន​ប្រាក់​គ្រប់​គ្រាន់​ទេ​​ តាមរយៈការលក់​ផ្ទះនៅ​ក្នុង​ អគារ​  ហើយ​​​​ក្រុម​ហ៊ុនយុន​​វូ ​​​មិន​​​​បាន​​​​ចេញ​​​​ថ្លៃ​សាង​សង់​​​ឡើយ”។លោកបន្ថែមថា “​នៅ​ក្នុង​ស្ថាន​ភាព​បែប​នេះ ក្រុម​ហ៊ុន ​​ហានីល មាន​កាតព្វកិច្ច​បង់​ប្រាក់​ដើម្បី​សាង​សង់​បង្ហើយ អគារ​នេះ ​ពី​ព្រោះ​បើ​យោង​តាម​កិច្ច​សន្យា គឺ​ជាការ​ទទួល​ខុស​ត្រូវ​របស់​ក្រុម​ហ៊ុន​សាង​សង់​”។

អ្នកគ្រប់​គ្រង​ម្នាក់​​នៅ​ក្រុម​ហ៊ុន​​ហានីល​​ ក្នុង​រាជ​ធានី​ភ្នំ​ពេញ​ ដែល​និយាយ​​ក្នុង​លក្ខ​ខណ្ឌ​មិនចេញឈ្មោះ ដោយ​សារ​តែ​គាត់​មិន​ត្រូវ​បាន​អនុញ្ញាត​ឲ្យនិយាយ​ប្រាប់ប្រព័ន្ធ​ផ្សព្វ​ផ្សាយ​នោះ​ បាន​​លើក​​​ឡើង​​​ថា វិបត្តិ​ហិរញ្ញ​វត្ថុ​នៅ​លើពិភពលោក គឺ​ជា​​មូល​ហេតុ​នាំឲ្យ​ផ្អាក​ការ​ងារ​​​សាងសង់។            លោក​បាន​បន្ថែម​ថា “ ដូច​អ្នក​ដឹង​ស្រាប់​ហើយ​ថា វិបត្តិ​សេដ្ឋ​កិច្ច​ពិភពលោក​​​ជះ​ផល​ប៉ះ​ពាល់​យ៉ាង​ខ្លាំ​ង​មក​លើ​ទី​ផ្សារ ​ដូច្នេះ​ការ​លក់​​​អគារ​ផ្ទះល្វែង និង​​​អគារ​​​ខុនដូរ​​ បាន​ជួប​ការ​លំបាក​ជា​ខ្លាំង​។ វា​ពិត​​​ជា​​បាន​ធ្វើ​ឲ្យ​ប៉ះ​ពាល់​ដល់​ក្រុម​ហ៊ុន​​​ហានីល​​​​មែន”​។

ទោះជា​យ៉ាងណាក៏ដោយ លោក​​បន្ថែម​​ថា ក្រុមហ៊ុននេះ​នៅ​តែ​ចង់​បន្ត​សិទ្ធិ​សាង​សង់​​អគារGold Tower 42 ​​​​នេះ​ដដែល​។  បច្ចុប្បន្ន​ ដោយ​សាង​សង់បាន​​​ត្រឹម​​​​តែ​​កម្ពស់​៣១ជាន់នោះ អគារ​ Gold Tower 42 បាន​ក្លាយ​ជា​​​​​​​​​​ឧទាហរណ៍ជាក់ស្តែង​​​​​​នៃ​ការ​ចំណាយ​​​​​​​​​​​​​​​​​​ដោយ​ប្រ​ថុយ​ប្រ​ថាន​​​នៅ​​លើទីផ្សារ​​​​អចល​ន​ទ្រព្យ​​​​ ដែលបាន​កើត​ឡើង​​​​ក្នុង​​​ប្រទេស​កម្ពុជា​ ​​មុន​​​ពេល​​​​មាន​​វិបត្តិ​ហិរញ្ញ​វត្ថុ​ពិភពលោក​ និងបាន​ធ្វើ​ឲ្យ​ប៉ះ​ពាល់​ដល់​ប្រទេស​កម្ពុជា​ កាលពី​ឆ្នាំ​២០០៩។​

លោក ឈិន ជិនតុង (Chhin Jin-tong) ដែល​​បាន​កក់​​ប្រាក់​ចំនួន​១,១លាន​ដុល្លារ​​​សម្រាប់​​​​​លក់​​រាយ​​បន្ត ដែល​មាន​​​ផ្ទៃ​​​​​៤០០​ម៉ែត្រ​ក្រឡា នៅ​ជាន់​ទី​១​​នៃ​​អគារ​ Gold Tower 42 ​បាន​និយាយកាលពីម្សិលមិញ​ថា លោក​​​​​​មិនទាន់​​​​ដឹង​អំពី​ស្ថាន​ភាព​នៃ​គម្រោង​នេះ​ និង​ការ​វិនិយោគ​របស់លោក​នៅឡើយ​​ទេ​​។

លោក​ ឈិន ជិនតុង បាន​​​លើក​ឡើង​​​ថា ​“ យើង​បាន​ប្រមូល​វិនិយោគិន​ប្រាំមួយ​ ឬ​ប្រាំពីរ​នាក់​ផ្សេង​ទៀត​ ដើម្បី​តវ៉ា ប៉ុន្ដែ​យើង​មិន​ទាន់​បានដាក់ពាក្យបណ្តឹង​ទៅ​តុលា​ការ​នៅ​ឡើយ​ទេ ពីព្រោះ​វា​ត្រូវ​ចំណាយ​ប្រាក់​អស់​ច្រើន​ពេក”។

លោក​បាន​បន្ថែម​ថា លោក​មិន​ដឹង​អំពី​ដំណើរការការងារនៅ​ទី​​ក្រុង​សេអ៊ូល ទេ។   លោក​ ម៉ាធ្យូ រ៉េនដល ​(Mathew Rendall) សមាជិកក្រុមមេធាវី Sciaroni & Associates ​​​​​​​​ជាក្រុម​​ប្រឹក្សា​ផ្នែក​ច្បាប់ ​បាន​មាន​ប្រសាស​ន៍​ថា អ្នក​ទិញ​ទំនង​ជា​នឹង​ទទួលបាន​សំណង​ពី​ការ​វិនិ​យោគ​របស់ខ្លួន​ ប្រសិន​បើ​ពួកគេ​សម្រេច​​​ចិត្ត​​​ប្តឹងឡើង​តុលាការ។

លោក​បាន​មានប្រសាសន៍ថា “តាម​ច្បាប់​របស់កម្ពុជា​ វិនិយោគិន​​​ទាំង​​នេះ​​បាន​បង់​ប្រាក់​​​​​រួច​​​ហើយ​​​ ហើយ​ក្រុម​​ហ៊ុន​យន់​វូ ​​​​ត្រូវ​​ទទួល​ខុស​​ត្រូវ​​។ បើ​​ឡើង​តុលាការ​​អាច​នឹង​ចំណាយ​​ប្រាក់​អស់​​​ច្រើន​​ ប៉ុន្ដែ ពួកគេ​​​​មាន​​រឿងក្ដី ​ដែល​សង្ឃឹមច្រើន​​ថា អាចឈ្នះបាន​​​​​។ ចំពោះ​ករណីនៃការងើបឡើងវិញ វាជារឿងមិនច្បាស់ លាស់នៅឡើយ និងមិនដឹង​ថាបានប្រាក់​​នឹង​​បាន​​​មក​ពីណា ដើម្បី​​បន្តការងារសាងសង់​”។

លោកមានប្រសាសន៍ថា “បើ​ដាក់​ពាក្យ​បណ្ដឹង​នៅ​ក្នុង​ប្រទេស​កម្ពុជា អាច​នឹងមាន​ឱកាស​សម្រាប់​អ្នក​ទិញ ​ប៉ុន្ដែ ​​​​ជា​ក់​ស្តែង​​​​​​​រឿង​នេះស្ថិត​នៅ​ក្នុង​ប្រទេស​កូរ៉េ ​​​​​ឯណោះ​វិញ​ទេហើយ​​​​​ធ្វើឲ្យ​អ្នក​ទិញ​នៅក្នុងប្រទេសកម្ពុជា​មិន​អាចដឹងអំពីការងារពាក់ព័ន្ធនឹង​ផល​ប្រយោជ​ន៍របស់​ពួកគេ​​ឡើយ​”។

តម្លៃ​ភាគ​ហ៊ុនរបស់​ក្រុមហ៊ុន​ហានីល​​នៅ​លើ​ទី​ផ្សារ​ហ៊ុន​ក្នុងប្រទេសកូរ៉េ គិត​មក​​ទល់​​​នឹង​ថ្ងៃ​​ម្សិល​មិញនេះ បាន​ធ្លាក់​ចុះ​​​ចំនួន​​៥១,៦៨​ភាគរយ គឺស្មើនឹង១,៣០​ដុល្លារ ក្នុងមួយហ៊ុន៕

(រាយ​ការ​ណ៍បន្ថែម​ដោយ ហ៊ុល រស្មី)

ប្រែសម្រួលដោយ ហួង កុកទៀន

និង​ តែម សុខុម

           

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស