នគរបាលបានឲ្យដឹងថា ក្មេងប្រុសអាយុ ប្រាំបួនឆ្នាំម្នាក់ និងបុរសម្នាក់បានស្លាប់ នៅពេលរថយន្តក្រុងមួយគ្រឿង បានបុកម៉ូតូរបស់ពួកគេ ក្នុងខេត្តបាត់ដំបង កាលពីថ្ងៃអង្គារ។ នេះគឺជាគ្រោះថ្នាក់ចរាចរណ៍រថយន្តក្រុងលើកទី២ហើយនៅក្នុងខេត្តបាត់ដំបងក្នុងរយៈពេលពីរថ្ងៃជាប់ពាក់ព័ន្ធនឹងរថយន្តក្រុងរបស់ក្រុមហ៊ុនដឹកអ្នកដំណើររិទ្ធិ មុនី។
លោក ណូយ វុទ្ធី មន្ត្រីព័ត៌មានគ្រោះថ្នាក់ចរាចរណ៍ខេត្តបាត់ដំបង បានមានប្រសាសន៍ថា បុរសម្នាក់ឈ្មោះ ថាន់ ថា អាយុ២៥ឆ្នាំ និងក្មេងប្រុសម្នាក់ឈ្មោះ ទិត ទេព អាយុប្រាំបួនឆ្នាំ បានស្លាប់ភ្លាម នៅពេលរថយន្តក្រុងរិទ្ធិ មុនី បានបុកម៉ូតូរបស់ពួកគេ។
លោកបានបន្តថា ជនរងគ្រោះទំាងពីរនាក់ជាអ្នកជិតខាងនឹងគ្នា រស់នៅក្នុងឃុំបឹងព្រីងស្រុកថ្មគោល កន្លែងគ្រោះថ្នាក់ចរាចរណ៍នេះកើតឡើងតែម្តង។ លោក ណូយ វុទ្ធី បានមានប្រសាសន៍ថា “អ្នកបើកបរថយន្តក្រុងបើកបរលឿនពេក ក៏ជ្រុលទៅបុកម៉ូតូនោះ ដែលកំពុងបើកបរបញ្ច្រាសទិសគ្នាចំពីមុខពេញទំហឹង។ នេះជាកំហុសរបស់អ្នកបើកបរ ពីព្រោះគាត់បើកបរលើចំណែកផ្លូវរបស់គេ ហើយបានបើកបរក្នុងល្បឿនលឿនទៀតផង។ លោកបានឲ្យដឹងថា អ្នកបើបរបានរត់គេចចេញពីកន្លែងកើតហេតុ ហើយអ្នកនៅលើរថយន្តក្រុងគ្មាននណាម្នាក់រងគ្រោះនោះទេ។ លោក ម៉ា តារា អ្នកគ្រប់គ្រងក្រុមហ៊ុនរិទ្ធិ មុនី ប្រចាំខេត្តបាត់ដំបង បានបញ្ជាក់ថា រថយន្ត
ក្រុងរបស់ក្រុមហ៊ុនលោក ពិតជាបានជួបគ្រោះថ្នាក់ចរាចរណ៍មែន ដោយលោកបានលើកឡើងថា រថយន្តក្រុងនេះចេញដំណើរពីរាជធានីភ្នំពេញ ទៅកាន់ក្រុងប៉ោយប៉ែត និងដឹកអ្នកដំណើរក្នុងស្រុក និងអ្នកដំណើរបរទេស។
ទោះបីជានគរបាលបានទម្លាក់កំហុសនេះទាំងស្រុងទៅលើ អ្នកបើកបរក៏ដោយ ក៏លោក ម៉ា តារា បានមានប្រសាសន៍ថា វាឆាប់ពេកហើយដែលថា នរណាជាអ្នកខុសនៅក្នុងឧបទ្ទវហេតុនេះ។ លោកបានលើកឡើងថា “ យើងរង់ចាំមើលការសើុបអង្កេតរបស់នគរបាលលើរឿងនេះសិន។ នគរបាលនឹងសម្រេចថា នរណាជាអ្នកខុស និងនរណាជាអ្នកត្រូវ”។
កាលពីថ្ងៃច័ន្ទ រថយន្តក្រុងរបស់ក្រុមហ៊ុន រិទ្ធិ មុនី ដែលនគរបាលបានប្រាប់ថា បានបើកបរក្នុងល្បឿនលឿននោះ បានបុកគ្រឿងចក្រឈូសឆាយដីពីក្រោយ នៅក្នុងស្រុកសង្កែ ខេត្តបាត់ដំបង។ អ្នកត្រួតពិនិត្យសំបុត្ររថយន្ដក្រុង ដែលមានអាយុទើបតែ១៧ឆ្នាំនោះបានស្លាប់នៅក្នុងគ្រោះថ្នាក់រថយន្ដក្រុងនេះ ហើយមនុស្សបួននាក់ផ្សេងទៀតរងរបួស។
រថយន្ដក្រុងបស់ក្រុមហ៊ុនដឹកអ្នកដំណើររិទ្ធិ មុនី និងដៃគូរបស់ខ្លួន គឺក្រុមហ៊ុនផារ៉ាម៉ោន អង្គរ អិុចប្រេស្សនោះ (Paramount Angkor
Express) បានជាប់ពាក់ព័ន្ធនៅក្នុងគ្រោះថ្នាក់ចរាចរណ៍បីលើកក្នុងខែកុម្ភៈ និងខែមីនា ដោយបណ្ដាលឲ្យមនុស្សបីនាក់ស្លាប់ និងមនុស្សជាង៥០នាក់ទៀតរងរបួស។
លោក ម៉ា តារា បានបង្វែរសំណួរទាំងអស់ អំពីសុវត្ថិភាពនៃរថយន្ដក្រុងរបស់ ក្រុមហ៊ុនទៅលោក សាន វិចិត្រ អ្នកគ្រប់គ្រងទូទៅទាំងនៅក្រុមហ៊ុនរិទ្ធិ មុនី និងក្រុមហ៊ុន ផារ៉ាម៉ោន ដែលគេមិនអាចទាក់ទងបាន។
កាលពីខែមីនា មន្ដ្រីមួយរូបបានលើកឡើងថា រដ្ឋាភិបាលបានចេញគោលនយោបាយចំនួនបី ព្រមានដល់ក្រុមហ៊ុនរថយន្ដក្រុងថា នឹងបិទក្រុមហ៊ុនរថយន្ដក្រុងទាំងនោះ ប្រសិនបើពួកគេមិនធ្វើតាមការព្រមាន ចំពោះការបង្កឲ្យមានអ្នករបួស និងអ្នកស្លាប់នោះ។
នៅពេលសួរកាលពីម្សិលមិញអំពីគ្រោះថ្នាក់ចរាចរណ៍នាពេលថ្មីៗនេះ ដែលបង្កដោយក្រុមហ៊ុនដឹកអ្នកដំណើរ រិទ្ធិ មុនី នោះ លោក ហ៊ឹម យ៉ាន ប្រធាននាយកដ្ឋានសណ្ដាប់ ធ្នាប់សាធារណៈក្រសួងមហាផ្ទៃបានថ្លែងថា “យើងកំពុងតែធ្វើការលើរឿងនេះ”។លោកស្រី សាន់ សុជាតា អ្នកគ្រប់គ្រងកម្មវិធីសុវត្ថិភាពចរាចរណ៍ផ្លូវគោកនៃអង្គការ ជនពិការអន្ដរជាតិ ប៊ែលហ្សុិក បានលើកឡើងថា គ្រោះថ្នាក់ចរាចរណ៍ភាគច្រើនក្នុងប្រទេសច្រើនកើតឡើងដោយការបើកហួសល្បឿន។
លោកស្រី បានមានប្រសាសន៍ថា “ យើងត្រូវតែដោះស្រាយដើម្បីកាត់បន្ថយគ្រោះថ្នាក់ចរាចរណ៍តាមរយៈការត្រួតពិនិត្យលើការបើកបរហួសល្បឿន។ យើងត្រូវការកន្លែងត្រួតពិនិត្យការបើកបរហួសល្បឿនឲ្យបានត្រឹមត្រូវ”៕
ប្រែសម្រួលដោយ ស៊ា ស៊ុយឈាង