អៀង សារី អតីតរដ្ឋមន្ត្រីក្រសួងការបរទេសរបបខ្មែរក្រហម ដែលកំពុងឡើងសវនាការកាត់ទោសចំពោះការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ត្រូវបានបញ្ជូនទៅមន្ទីរពេទ្យមិត្តភាពខ្មែរ- សូវៀត ក្នុងរាជធានីភ្នំពេញកាលពីម្សិលមិញ បន្ទាប់ពីគាត់ បានត្អូញត្អែរថា មានការលំបាកដកដង្ហើម។ វេជ្ជបណ្ឌិតមួយរូបនៅឯមន្ទីរពេទ្យនេះបានឲ្យដឹងថា អៀង សារី វ័យ៨៦ឆ្នាំ ត្រូវបានពិនិត្យឃើញថា មានជំងឺរលាកទងសួត ហើយត្រូវបានបញ្ជូនទៅមន្ទីរពេទ្យ។
លោក ជឿង យ៉ាវយ៉េន(Cheoung Yav Yen) អនុប្រធានមន្ទីរពេទ្យមិត្តភាពខ្មែរ-សូវៀត បានមានប្រសាសន៍ថា “ អៀង សារី មានជំងឺផ្ដាសាយ និងរលាកទងសួត បន្ថែមពីលើជំងឺបេះដូងរបស់គាត់ ដែលកើតមានស្រាប់”។ លោកបានបន្ថែមទៀតថា ស្ថានភាពជំងឺ អៀង សារី ប្រសើរឡើងតាមរយៈការព្យាបាល ហើយបច្ចុប្បន្ននេះកំពុងស្ថិតនៅក្នុងសភាពធម្មតា។
នេះជាលើកទី១ហើយ ដែលអៀង សារីចូលមន្ទីរពេទ្យអំឡុងពេលបើកសវនាការកាត់ទោសគាត់ ដែលបានចាប់ផ្ដើមកាលពីខែវិច្ឆិកា ឆ្នាំ២០១១។ ចាប់តាំងពីគាត់ត្រូវបានចាប់ខ្លួននៅក្នុងខែវិច្ឆិកា ឆ្នាំ២០០៧មក អៀង សារី ត្រូវបានបញ្ជូនទៅមន្ទីរពេទ្យចំនួន១០ដង ហើយតាមការវិនិច្ឆ័យជាច្រើនដងរកឃើញថា មានឈាមនៅក្នុងទឹកនោមរបស់គាត់។ កាលពីឆ្នាំ២០០៨គាត់បានសម្រាកព្យាបាលជំងឺនេះនៅក្នុងមន្ទីរពេទ្យអស់រយៈពេលពីរសប្តាហ៍ ស្របពេលនេះដែរ គាត់ក៏មានជំងឺបេះដូង និងជំងឺចុកចង្កេះផងដែរ។
វ័យចាស់ជរា ព្រមទាំងសុខភាពមិនល្អរបស់ជនសង្ស័យជាប់ចោទពីបទឧក្រិដ្ឋកម្មសង្គ្រាមរូបនេះ ជាការក្រើនរំឭកដល់ក្រុមមន្ត្រីសាលាក្តីខ្មែរក្រហមឲ្យខិតខំធ្វើការឲ្យទាន់ពេលវេលា ព្រមទាំងដំណើរការរឿងក្តីព្រហ្មទណ្ឌប្រឆាំង នួន ជា អៀង សារី និងខៀវ សំផន ឲ្យបានឆាប់។
ទោះបីជាមានវត្តមានក្នុងសាលាក្តីកាលពីព្រឹកម្សិលមិញ អំឡុងពេលសាកសួរលោក ពាន ឃាន អតីតអ្នកនាំសារខ្មែរក្រហមក៏ដោយ ក៏ អៀង សារី បានអវត្តមានវិញ បន្ទាប់ពីពេលបាយថ្ងៃត្រង់រួច ដោយសារមេធាវីការពារក្តីរបស់គាត់បានស្នើឲ្យគេបញ្ជូនគាត់ទៅកាន់មន្ទីរពេទ្យ ដើម្បីពិនិត្យខុសភាព។ សំណើនេះត្រូវបានលោក និល ណុន ប្រធានអង្គជំនុំជម្រះយល់ព្រម។
លោក ឡាស អូលសុន(Lars Olson) អ្នកនាំពាក្យសាលាក្តីមានប្រសាសន៍ថា “គាត់ត្រូវបានគេបញ្ជូនទៅកាន់មន្ទីរពេទ្យ ដោយសារលំបាកដកដង្ហើម ហើយគាត់នឹងស្នាក់នៅទីនោះយ៉ាងហោចណាស់ក៏ដល់ថ្ងៃស្អែកដែរ ហើយនៅពេលនោះ គាត់ត្រូវគ្រូពេទ្យពិនិត្យឡើងវិញ”។
នៅពេលដំណើរការជំនំុជម្រះកាលពីម្សិលមិញឈានចូលដល់ទីបញ្ចប់ លោកចៅក្រម និល ណុន មានប្រសាសន៍ថា មិនមានព័ត៌មានថ្មីៗអំពីស្ថានភាពរបស់ អៀង សារី ទេ ហើយនៅតែមិនមានព័ត៌មាននេះរហូតដល់ថ្ងៃច័ន្ទ ជាពេលដែលសំណុំរឿង០០២ចាប់ដំណើរការឡើងវិញនៅសាលាក្ដី។
លោកបានមានប្រសាសន៍បន្ថែមទៀតថា “ យើងនឹងពិនិត្យមើលលិខិតបញ្ជាក់សុខភាពរបស់គាត់នៅថ្ងៃច័ន្ទ មុនពេលនីតិវិធីចាប់ផ្ដើមបន្ដទៀត”។ទោះជា អៀង សារី អវត្តមានពីសាលាក្ដីក៏ដោយ ក៏ការសាកសួរ លោក ពាន ឃាននៅតែបន្ដដែរ។
ដោយមើលទៅទំនងជាមានសុខភាពប្រសើរជាងកាលពីពេលបង្ហាញខ្លួនរបស់គាត់ចំនួនពីរលើកកាលពីដើមខែនេះ ដោយការបង្ហាញខ្លួនលើកក្រោយនេះ មានរយៈ
ពេលតែមួយម៉ោងប៉ុណ្ណោះ ដោយសារតែគាត់មានសុខភាពមិនល្អនោះ លោក ពាន ឃាន អតីតអ្នកនាំសាររបស់ កុយ ធួន លេខាបក្សភូមិភាគឧត្ដរ បានប្រាប់លោក តារីក អាប់ឌុលហាក់ (Tarik Abdulhak) ជំនួយការជាន់ខ្ពស់ព្រះរាជអាជ្ញាថា គាត់ចាំបានពីកិច្ចប្រជុំនានា ដែលគេធ្វើឡើងក្នុងបរិវេណមន្ទីរក-១ ក-២ ឬក-៣ របស់របបខ្មែរក្រហម នៅក្នុងរាជធានីភ្នំពេញ ដែលត្រូវបានរៀបចំដោយ ឈឹម សំអោក ហៅ ប៉ាង ប្រធានមន្ទីរសន្ដិសុខស-៧១។
លោក ពាន ឃាន ជាជនជាតិដើមភាគតិចមកពីខេត្តរតនគិរី បានចូលរួមជាមួយខ្មែរក្រហមនៅក្នុងឆ្នាំ១៩៦៦ ពេលគាត់មានអាយុ១៦ឆ្នាំ ហើយបាននាំសំបុត្រពីមេដឹកនាំមួយទៅមេដឹកនាំមួយទៀតរបស់របបខ្មែរក្រហមអស់រយៈពេលជាច្រើនឆ្នាំ។ បច្ចុប្បន្ននេះ គាត់មានអាយុ៦២ឆ្នាំ មានមុខរបរជាជាងឈើរស់នៅក្នុងខេត្តតាកែវ។
លោក ពាន ឃាន និយាយថា “ នៅក្នុងកិច្ចប្រជំុមួយនៅឯបុរីកីឡា ខ្ញុំបានឃើញមេដឹកនាំជាន់ខ្ពស់មួយចំនួនមកចូលរួមកិច្ចប្រជុំនោះ” ដោយគាត់បន្ថែមថា ឈ្មោះ ប៉ាង ហើយនឹងចុងចោទ ខៀវ សំផន ក៏មានវត្តមាននៅទីនោះដែរ។ ដូច្នេះ ខ្ញុំអាចសន្និដ្ឋានបានថា កិច្ចប្រជុំនេះប្រាកដជាសំខាន់ជាងកិច្ចប្រជុំមុនៗ ដែលឈ្មោះ ប៉ាង តែងតែធ្វើជាប្រធាន”។
លោកបាននិយាយថា គេបានអញ្ជើញគាត់ទៅចូលរួមកិច្ចប្រជុំបែបនេះ ដែលផ្ដោតលើ “ វិធីកសាងប្រទេស បង្កើតសហករណ៍ បង្រៀនប្រជាជនកុំឲ្យសប្បាយភ្លេចខ្លួន”។គាត់បានឲ្យដឹងថា “ខ្លឹមសារនៃកិច្ចប្រជុំនេះសំខាន់ជាងកិច្ចប្រជុំធម្មតា ដោយសារតែយើងត្រូវបានគេក្រើនរំឭកអំពីមាគា៌នយោបាយ អំពីរបៀប…ធ្វើឲ្យប្រទេសរីកចម្រើន ហើយធានាថា ប្រជាជនមានអាហារហូបគ្រប់គ្រាន់”។
គាត់បានបន្ថែមថា “ខ្ញុំមិនអាចនិយាយអំពីបញ្ហាទាក់ទងនឹងការការពារជាតិឲ្យស៊ីជម្រៅបានទេ ប៉ុន្ដែ គេបានអប់រំយើងឲ្យការពារប្រទេសកុំឲ្យមានការឈ្លានពានពីខាងក្រៅ។ គេបានប្រាប់ឲ្យយើងធានាថា កុំឲ្យពួកចក្រពត្តិអាមេរិកវិលត្រឡប់មកវិញបាន”។សវនាការនេះនឹងបន្តនៅថ្ងៃច័ន្ទទៀត៕
ប្រែសម្រួលដោយ ហួង កុកទៀន