ភូមិនៅក្នុងខេត្តក្រចេះ ជាទីដែលក្មេងស្រីជំទង់ម្នាក់ ត្រូវបានកម្លាំងសន្តិសុខរបស់រដ្ឋាភិបាលបាញ់ស្លាប់កាលពីថ្ងៃពុធនេះ នៅតែបិទមិនឲ្យក្រុមអ្នកសង្កេតការណ៍ឯករាជ្យណាចូលឡើយ កាលពីថ្ងៃសុក្រ ដោយធ្វើឲ្យបុគ្គលិកសិទ្ធិមនុស្សមានកង្វល់ថា រដ្ឋាភិបាលបានអនុវត្តច្បាប់អាជ្ញាសឹកក្នុងតំបន់នោះ។ ចាប់តាំងពីក្មេងស្រី ហេង ចន្ថា អាយុ១៤ឆ្នាំ ត្រូវបានបាញ់ស្លាប់ ពេលនាងរកកន្លែងលាក់ខ្លួនពីកម្លាំងប្រដាប់អាវុធសម្រុកចូលទៅក្នុងតំបន់នេះ ដើម្បីចាប់ខ្លួនអ្នកភូមិពាក់ព័ន្ធក្នុងជម្លោះដីធ្លីមក ប្រជាជនជាង៦០០គ្រួសារត្រូវបណ្តេញចេញពីភូមិប្រមា ស្រុកឆ្លូង។
ភាគច្រើននៃអ្នកភូមិ ដែលត្រូវបណ្តេញចេញរាប់រយនាក់ ដែលអាជ្ញាធរចោទថាបានបង្កើតចលនាអបគមន៍នោះ ត្រូវបានអនុញ្ញាតឲ្យត្រឡប់ទៅខេត្តកំពង់ចាមវិញកាលពីថ្ងៃសុក្រ ជាទីដែលពួកគាត់ភាគច្រើនធ្លាប់រស់នៅ មុនពេលប្តូរមកខេត្តក្រចេះ។ ពលរដ្ឋចំនួន៣៦០គ្រួសារទៀត ត្រូវអាជ្ញាធរអនុញ្ញាតឲ្យបន្តរស់នៅក្នុងតំបន់នេះ បន្ទាប់ពីក្រុមមន្ត្រីរដ្ឋាភិបាលបានកំណត់ថាជាប្រជាជនចាស់នៅក្នុងតំបន់នេះ។
លោក អំ សំអាត អ្នកគ្រប់គ្រង់បច្ចេកទេសប្រចាំអង្គការសិទ្ធិមនុស្សលីកាដូ បានថ្លែងថា “រដ្ឋាភិបាលកំពុងតែអនុវត្តច្បាប់អាជ្ញាសឹក ដោយប្រើកម្លាំងប្រដាប់អាវុធ ដើម្បីបណ្ដេញប្រជាពលរដ្ឋ ពាក់ព័ន្ធក្នុងជម្លោះដីធ្លី ដ៏អូសបន្លាយនេះ”។ លោកបានមានប្រសាសន៍ថា “ ការប្រើ កម្លាំងប្រដាប់អាវុធនៅក្នុងភូមិប្រមា គឺជាសារមួយគំរាមកំហែងដល់ពលរដ្ឋដទៃទៀត ដែលពាក់ព័ន្ធក្នុងជម្លោះដីធ្លីនៅកន្លែងផ្សេងទៀត ដើម្បីបំបិទមាត់ បើមិនអ៊ីចឹងទេរដ្ឋនឹងអនុវត្តច្បាប់អាជ្ញាសឹក”។ ច្បាប់អាជ្ញាសឹក ជាទូទៅត្រូវយកមកប្រើ ហើយយោធាត្រូវបានដាក់ពង្រាយ ពេលកម្លាំងសន្ដិសុខមិនអាចរក្សាសន្ដិសុខ និងសណ្ដាប់ធ្នាប់សាធារណៈនៅទីនោះបាន។
បើទោះជាខំចោទអ្នកភូមិថា ជា “ ក្រុមធ្វើអបគមន៍” និងខំព្យាយាមការពារចំពោះការប្រើប្រាស់កម្លាំងថា ត្រឹមត្រូវតាមច្បាប់ តែទាហាន កងរាជអាវុធហត្ថ និងនគរបាលប្រដាប់អាវុធរាប់រយនាក់ នៅបន្តបណ្ដេញអ្នកភូមិ ដែលគ្មានអាវុធ ដោយសម្អាងថា មានការគំរាមកំហែងចំពោះស្ថិរភាពរបស់រដ្ឋក៏ដោយ ក៏លោក ស ចំរ៉ុង អភិបាលខេត្តក្រចេះបានមានប្រសាសន៍កាលពីថ្ងៃសុក្រថា តំបន់នេះមិនស្ថិតក្រោមច្បាប់អាជ្ញាសឹកទេ។
លោក ចំរ៉ុង បានមានប្រសាសន៍ថា “ យើងបានបើកប្រតិបត្តិការធំមួយ ដើម្បីរក្សាសណ្ដាប់ធ្នាប់នៅក្នុងតំបន់នេះ មិនមែនដើម្បីបង្ហាញសាច់ដំុរបស់យើងឲ្យប្រជាពលរដ្ឋខ្លាចនោះទេ។ បើទោះជាតំបន់នេះត្រូវបិទក៏ដោយ ក៏វាមិនមែនជាសង្គ្រាមឡើយ ក៏ប៉ុន្ដែ វាជាប្រតិបត្តិការមួយធ្វើឡើង ដើម្បីជួយសង្គ្រោះអ្នកស្រុក ដែលត្រូវបានគំរាមយកប្រាក់ ដោយក្រុមអនាធិបតេយ្យ”។
ចាប់តាំងពីការចាប់ផ្ដើមធ្វើប្រតិបត្តិការកាលពីថ្ងៃពុធមក អ្នកយកព័ត៌មាន និងបុគ្គលិកសិទ្ធិមនុស្ស រាប់ទាំងបុគ្គលិកមកពីការិយាល័យឧត្តមស្នងការសហប្រជាជាតិទទួលបន្ទុកសិទ្ធិមនុស្សផងត្រូវបានទាហានបដិសេធមិនឲ្យចូលទៅតំបន់នោះឡើយ។
ជាផ្នែកមួយនៃវិធានការបង្ក្រាបទៅលើតំបន់នេះ បុរសបួននាក់ត្រូវបានចាប់ខ្លួនកាលពីថ្ងៃព្រហស្បតិ៍ ដោយសារតែបង្កអំពើហិង្សា។ ឈ្មោះ សេង តុង អាយុ៦១ឆ្នាំ ខាន់សារឿន អាយុ៤២ឆ្នាំ ម៉ា ចាង អាយុ៤៣ឆ្នាំ និងឈ្មោះ ប៊ុន ចន អាយុ៥៥ឆ្នាំ សុទ្ធតែត្រូវសមត្ថកិច្ចឃំុខ្លួននៅឯសាលាដំបូងខេត្តដើម្បីធ្វើការសាកសួរ។លោក សំអាត បានមានប្រសាសន៍ថា មកត្រឹមល្ងាចថ្ងៃសុក្រនេះ អ្នកភូមិសរុបប្រាំពីរនាក់ត្រូវបានចាប់ខ្លួន ដែលក្នុងនោះប្រាំមួយនាក់ត្រូវបានបញ្ជូនទៅសាលាដំបូងខេត្ត។
ខណៈដែលអាជ្ញាធរព័ទ្ធចាប់ ឬបណ្ដេញអ្នកភូមិ គ្មានការលើកឡើងណាមួយអំពីការស៊ើបអង្កេតថា តើក្មេងស្រីអាយុ១៤ឆ្នាំម្នាក់ត្រូវបានបាញ់សម្លាប់នៅក្នុងភូមិប្រមា ខណៈដែលនាងកំពុងលាក់ខ្លួននៅក្រោមផ្ទះរបស់នាងយ៉ាងណាដែរឬទេ។
អាជ្ញាធរបានអះអាងថា កម្លាំងប្រដាប់អាវុធរាប់រយនាក់ ដែលបានចូលទៅក្នុងភូមិប្រមា ត្រូវបង្ខំឲ្យផ្ទុះអាវុធ ដោយសារតែអ្នកភូមិប្រដាប់ស្នា សម្រាប់បាញ់សត្វ។ ទោះជាយ៉ាងនេះក្ដីគ្មានទាហាន នគរបាល ឬកងរាជអាវុធហត្ថ ដែលចូលរួមក្នុងប្រតិបត្តិការនោះបានរងរបួសឡើយ។
គណៈកម្មាធិការប្រព្រឹតិកម្មនៃអង្គការសមាគមការពាសិទ្ធិមនុស្សកម្ពុជាកាលពីថ្ងៃសុក្រ បានចេញនូវសេចក្ដីថ្លែងការណ៍មួយ ដោយហៅប្រតិបត្តិការនេះថា “ ជាការប្រើកម្លាំងមិនត្រឹមត្រូវ” នឹងបានបញ្ជាក់ថា ឧបទ្ទវហេតុនេះជាករណីទីបួនហើយនៅឆ្នាំនេះ ដែលក្នុងនោះកម្លាំងយោធា និងកម្លាំងសន្ដិសុខបានប្រើគ្រាប់បាញ់ប្រឆាំងនឹងជនស៊ីវិល ដែលគ្មានអាវុធ។
គណៈកម្មាធិការនេះបានលើកឡើងថា “វាជាការភ្ញាក់ផ្អើលចំពោះអាជ្ញាធររបស់រដ្ឋបាត់បង់ម្ចាស់ការលើកងកម្លាំងយោធា និងនគរបាលរបស់ខ្លួន។ ការអន្ដរាគមន៍របស់កម្លាំងប្រដាប់អាវុធរបស់រដ្ឋជួសមុខឲ្យក្រុមហ៊ុនឯកជនមួយ គឺមិនត្រូវបានច្បាប់នោះទេ និងជាការរំលោភរដ្ឋធម្មនុញ្ញរបស់ព្រះរាជាណាចក្រកម្ពុជា”។
គណៈកម្មានេះបានឲ្យដឹងថា “ ដូច្នេះយើងសូមអំពាវនាវដល់លោកនាយករដ្ឋមន្ត្រី ហ៊ុន សែន និងមន្ត្រីរដ្ឋាភិបាលផ្សេងទៀតសូមប្រកាន់ខ្ជាប់នូវអំណាចរបស់ខ្លួន ដើម្បីបញ្ឈប់ការប្រើកម្លាំងខុសច្បាប់ ប្រឆាំងនឹងប្រជាពលរដ្ឋ ដោយសារអភិបាលខេត្តស្ថិតក្រោមឥទ្ធិពលរបស់ក្រុមហ៊ុនឯកជន។ វាជាសិទ្ធិរបស់រដ្ឋក្នុងការប្រើកម្លាំងយោធា ហើយនាំខ្លួនបុគ្គលណាម្នាក់ ដែលរំលោភអំណាចរបស់ខ្លួន ដោយសារតែហេតុផលលុយកាក់ ដើម្បីឲ្យតុលាការផ្តន្ទាទោស”។
គណៈកម្មាធិការនេះក៏បានលើកឡើងផងដែរថា អាជ្ញាធរគួរតែស៊ើបអង្កេតដោយឯករាជ្យភ្លាម ចំពោះការសម្លាប់ក្មេងស្រីអាយុ១៤ឆ្នាំ។អ្នកភូមិប្រមា ដែលមិនត្រូវបានបណ្ដេញចេញបាននិយាយកាលពីថ្ងៃសុក្រថា ពួកគេនៅតែភ័យខ្លាច ហើយកំពុងតែរស់នៅក្រោមការតាមដានរបស់យោធាដ៏តឹងតែងមួយ។
អ្នកស្រី ហ៊ួយ ហ៊ុន ម្ដាយមីងរបស់នាង ហេង ចន្ថា ដែលត្រូវបានបាញ់ស្លាប់កាលពីថ្ងៃពុធ បានមានប្រសាសន៍ថា “ ខ្ញុំខ្លាចណាស់មិនហ៊ានដើរជុំវិញភូមិទេ ពីព្រោះខ្ញុំខ្លាចគេបាញ់សម្លាប់”។ អ្នកស្រី ហ៊ួយ ហ៊ុន បានមានប្រសាសន៍ថា សពក្មួយស្រីរបស់អ្នកស្រីត្រូវបានកប់ នៅក្រោយផ្ទះ កាលពីថ្ងៃព្រហស្បតិ៍ ហើយគ្រួសារសពមិនទាន់ហ៊ានដាក់ពាក្យបណ្ដឹងទៅអាជ្ញាធរទេ ដោយសារខ្លាចមានការតាមព្យាបាទនៅពេលក្រោយ៕
ប្រែសម្រួលដោយ ចេវ ប៊ុននី