កម្មករ​​​រាប់​​​ពាន់​​​នាក​​​់​​​មកពីរោងចក្រកាត់ដេរ អេសអិល សន្យាថា ​​​នឹង​​​បន្ដធ្វើ​​​​កូដ​​​កម្ម​​​ក្នុងសង្កាត់បឹងទំពុន

កម្មករ​​​រោង​​​ចក្រ​​​កាត់ដេរ​​​ កាល​​​ពី​​​ថ្ងៃ​​​សៅរ៍​​​ បាន​​​បិទ​​​ផ្លូវ​​​លេខ​​​៣៧១ ​​​ក្នុង​​​ខណ្ឌ​​​មាន​​​ជ័យ​​​រាជធានី​​​ភ្នំពេញ​​​ នៅក្នុង​​​ថ្ងៃទី​​​២ ​​​នៃ​​​កូដ​​​កម្ម​​​ហើយថ្ងៃនេះ ពួកគេបាន​​​និយាយថា ពួកគេ​នឹង​​​បន្ដ​​​ធ្វើ​​​កូដកម្មទៀត ​​​ប្រសិន​​​បើ​​​អ្នក​​​គ្រប់​​​គ្រង​​​រោង​​​ចក្រ​​​មិន​​​យល់​​​ព្រម​​​តាម​​​ការទាម​​​ទារ​​​របស់​​​ខ្លួនទេនោះ។

លោក អាត់ ធន់ ប្រធាន​​​សម្ពន្ធ​​សហជីព​ប្រជាធិបតេយ្យកម្មករកាត់ដេរ​​​កម្ពុជា ​​​​​​បាន​​​មាន​​​ប្រសាសន៍ថា ក្នុងពេល​​​ធ្វើ​​​កូដ​​​កម្ម កាល​ពី​​​ថ្ងៃ​​​សៅរ៍ កម្មករ​​​រោង​​​ចក្រ​​​កាត់​​​ដេរ​​​មក​​​ពី​​​រោង​​​​ចក្រ ​​​អេសអិល ជាង​​​៣.000​​​នាក់​​​ ​​​បាន​​​នាំគ្នាបិទ​​​ផ្លូវ​​​មិន​​​ឲ្យ​​មាន​ចរាចរណ៍ឆ្លងកាត់បាន​​​ នៅក្នុង​​​សង្កាត់បឹង​​​ទំ​​​ពុន​​​ចាប់តាំង​​​ពី​​​ម៉ោង​​​២​​​រសៀល រហូត​​​ដល់ម៉ោង​​​៤ល្ងាច។

បន្ថែម​​​លើ​​​ការ​​​ទាម​​​ទារ​​​ប្រាក់​​​បន្ថែម​​​១០​​​ដុល្លារ​​​ក្នុង​​​មួយ​​​ខែ សម្រាប់​​​ថ្លៃ​​​ធ្វើ​​​ដំណើរ​​​ ១៥​​​ដុល្លារ ​​​សម្រាប់​​​ថ្លៃ​​​ជួល​​​ផ្ទះ និង​​​​​​៥​​​ដុល្លារ​​​បន្ថែម​​​លើ​​​ប្រាក់​​​បៀវត្សរ៍ប្រ​​​ចាំ​​​ខែនោះ ក្រុម​​​កម្មករ​​​ក៏​​​បាន​​​តវ៉ា​​​ចំពោះ​​​ការ​​​សម្រេចរបស់​​​ក្រុម​​​ហ៊ុនដែល​​​បានបញ្ឈប់​​​​សមាជិក​​​សហជីពរបស់​​​ខ្លួន​កាលពី​​​សប្ដាហ៍​​​មុន​​​ផង​​​ដែរ។

លោក អាត់ ធន់​​​ បាន​​​មាន​​​ប្រសាសន៍​បន្ថែម​ទៀត​​​ថា​ “គាត់​​​មិន​​​បាន​​​ធ្វើ​​​អ្វី​​​ខុសទេ។​​​ យើង​​​​​​ធ្វើ​​​កូដ​​​កម្ម​​​ពីព្រោះ​​​ក្រុម​​​ហ៊ុន​​​មិន​​​អនុញ្ញាតឲ្យ​​​មន្ត្រី​​​របស់​​​យើង​ដែលក្រុម​ហ៊ុន​បានបញ្ឈប់​នោះ ត្រឡប់មក​​​ធ្វើ​​​ការ​​​វិញ”។ លោកក៏បានមានប្រសាសន៍ឲ្យដឹង​​​ផង​ដែរ​ថា  មានកម្មករសរុប​​​ចំនួន​​​៦.៥០០​​​នាក់​​​​គ្រោងជួប​ជុំ​គ្នា​ធ្វើ​​​កូដកម្ម​​​នៅ​​​ថ្ងៃ​​​នេះ នៅក្នុង​​​កន្លែង​ដដែល។ ហើយលោកបានមានប្រសាសន៍​​​ថា ​​​ ពួក​គេ​​​​ភាគច្រើនកំពុង​​​ខឹង​​​យ៉ាង​​​​ខ្លាំង បន្ទាប់​​​ពី​​​កូដ​​​កម្ម​​​ជាច្រើន​​​ថ្ងៃ​​​មក​​​នេះ។

ក្រុម​​​កម្មករដែលធ្វើកូដកម្មនេះ ​​​បាន​​​បិទ​​​ផ្លូវ​​​លេខ​​​៣៧១​​​​​​កាល​ពី​​​ថ្ងៃ​​​សុក្រ​​​ មុន​​​ពេល​​​ត្រូវ​​​បំបែក ​​​ដោយ​​​កម្លាំង​​​នគរ​​​បាល។ លោក​​​ អាត់ ធន់ ថែមទាំង​មានប្រសាសន៍ ​ព្រ​មានថា ​“វាអាច​ដែរ​​ថា ក្រុមកម្មករ​​​​​​តវ៉ា​ទាំងអស់នេះនឹង​​​ប្រើអំពើ​ហិង្សា ​ពី​ព្រោះ​កូដកម្ម​​​អហិង្សា​​​របស់ពួកគេមិន​​​អាចធ្វើ​​​អ្វីឲ្យ​​​ក្រុម​​​ហ៊ុន​​​ឆ្លើយ​តប​​​នឹង​​​ការ​​​ទាម​​​ទារ​​​របស់​​​ខ្លួនបាន”។

​​​​​​​​​​​​​​​​​​​​​លោក ជឹម ស៊ីថា អធិការនគរបាលរង​​​ខណ្ឌ​​​មាន​​​ជ័យ បាន​​​មាន​​​ប្រសាសន៍ថា កម្លាំងនគរ​​​បាល​​​ត្រូវ​បាន​​​ត្រៀម​​​សម្រាប់​ទប់​​​ទល់នឹង​​​កូដ​​​កម្ម​​​នៅ​​​​ថ្ងៃ​​​នេះ។លោក​​​ ជឹម ស៊ីថា បាន​​​មាន​​​ប្រ​សា​សន៍​ថា“យើង​​​បាន​​​ត្រៀម​​​កម្លាំង​​​រួច​​​ហើយ ដើម្បី​​​ទប់​​​ទល់​​​អ្នក​​​ធ្វើ​​​កូដកម្ម ប្រ​​​សិន​​​បើ​​​មាន​​​អំពើ​​​ហិង្សា​​​កើត​​​ឡើង”។

លោកបានមានប្រសាសន៍បន្ថែមទៀតថា “អ្ន​​​ក​​​ធ្វើ​​​កូដ​​​កម្ម​​ខ្លះស្រវឹង ហើយវា​​​មាន​ការ​​ ពិបាកក្នុង​​​ការ​និយាយ​ប្រាប់​ហេតុផល​​​ឲ្យ​​​ពួកគេ​​​នៅស្ងៀម​​​”។លោក អ៊ា ជីប​​​អ៊ាង អ្នក​​​គ្រប់​​​គ្រង​​​បុគ្គលិក​​​រោង​​​ចក្រ​​​កាត់​​​ដេរ​​​ អេសអិល បានមាន​​​ប្រសា​​សន៍​​​ថា ក្រុម​​​ហ៊ុន​​​នឹង​​​មិន​​​កែប្រែ​​​ប្រាក់​​​ឈ្នួល​​​សម្រាប់កម្មករ​​​ទេ។

លោក​​​បាន​​​មាន​​​ប្រសាសន៍​​​បន្ថែម​ថា “ខ្ញុំ​​​មិនដឹង​​​ថា ពួកគេ​​​ចង់បាន​​​អ្វី ​​​​​​និង​​​ត្រូវ​​​ការអ្វី​​​ឲ្យ​​​ពិត​​​ប្រា​​​កដ​​​នោះទេ”។  កាលពី​​​ថ្ងៃ​​​សុក្រ​​​ សាលា​​​ដំបូង​​​រាជធានី​​​ភ្នំពេញ បានបង្គាប់ឲ្យ​​​កម្មករ​​​ ដែល​​​ធ្វើកូដ​​​កម្ម​​​នេះ ​​​វិលត្រឡប់​​​ទៅ​​​ធ្វើការ​​​សិន​​​ ទម្រាំដល់​​​ក្រុម​​​ប្រឹក្សា​​​អាជ្ញាកណ្តាល​សម្រេច​​សេចក្តី​អំពីជម្លោះ​​​របស់​​​ពួកគេ​ជា មួយ​​​នឹង​​​អ្នក​​​គ្រប់​​​គ្រង​​​រោង​​​ចក្រ៕

       ប្រែ​​​សម្រួល​​​ដោយ ហម សុផាណ្ណា​​​​​​​​​