32 C
Phnom Penh

លោក​នាយករដ្ឋមន្ដ្រី ហ៊ុន សែន​ អំពាវនាវឲ្យប្រទេស​ G 8​ ធ្វើ​ឲ្យ​តម្លៃ​​ស្បៀង​អាហារ​មាន​ស្ថិរភាព​

ដោយ ឌឹ ខេមបូឌា ដេលី

បទវិភាគ

​ដោយ​ភ្លេច​ការ​សន្យា​កាល​ពី​លើក​មុន​​​ថា ​​មិន​​ថ្លែងសុន្ទរកថា​ជា​សាធាណ​ៈ​ នៅ​មុន​ការ​បោះ​ឆ្នោត​ឃំុ​-សង្កាត់​នា​ខែ​ក្រោយ​នោះ​លោក​​​​ ហ៊ុន​ សែន​ បាន​ថ្លែង​សុន្ទរកថាបើកសន្និសីទ​មួយ​ ដែល​មាន​រយៈ​ពេលពីរ​ថ្ងៃ​ស្តីពី​សន្តិសុខ​ស្បៀងអាហារ​​ និង​អាហារូប​​ត្ថម​្ភនៅ​ក្នុង​រាជ​ធានីភ្នំពេញ​​កាល ​ពី​​ម្សិលមិញ។

នៅ​ឯ​សន្និសីទ​រៀប​ចំ​ដោយ​ក្រុម​ប្រឹក្សា​អភិវឌ្ឍន៍​កសិកម្ម​ និង​ជនបទ​ ដោយ​មាន​ការ​ឧបត្ថម្ភ​​ពី​អង្គការ​ក្រៅ​រដ្ឋាភិបាល​អន្ដរជាតិ​មួយ​ចំនួន​នេះ លោក ហ៊ុន សែនបាន​មាន​ប្រសាសន៍ថា កង្វះ​អាហា​រូប​ត្ថម្ភ​សម្រាប់​ម្ដាយ​ និង​កុមារ​អាច​រារាំងដល់​​ការ​វិវឌ្ឍផ្នែក​បញ្ញា​ស្មារតី​ ដែល​ជា​លទ្ធផល​អាចធ្វើ​ឲ្យ​ប៉ះ​ពាល់​ដល់​សេដ្ឋកិច្ច​ជាតិ​។​

លោកហ៊ុនសែន​ លើកឡើ​ង​ថា“យើង​​យល់​ច្បាស់​ថា អាហា​រូបត្ថម្ភ​របស់​ក្មេង​ និង​ម្ដាយ​ គឺ​មាន​សារៈសំខាន់​ចំពោះ​ការ​អភិវឌ្ឍ​មូល​ធន​មនុស្ស​  បង្កើន​លទ្ធភាព​ការ​ងារហើយ​​ធានា​ការ​រីក​ចម្រើន​របស់​កុមារ​”។

លោក​នាយក​រដ្ឋមន្ត្រី​បាន​មាន​ប្រសាសន៍​ទៀត​ថាខណៈ​ដែល​ប្រទេស​កម្ពុជា​នាពេល​បច្ចុប្បន្ន​មាន​ស្រូវ​លើស​ពី​តម្រូវ​ការ​ហើយ​​នោះ​ ប្រជា​ពលរដ្ឋ​ជា​ច្រើន​នៅ​តែ​ទទួល​រង​កង្វះ​អាហារូប​ត្ថម្ភ​ដដែល​ ដោយ​សារ​តែ​ទឹក​ផឹក​មិន​ស្អាត​ កង្វះ​អនាម័យ​ កង្វះ​វីតាមីននិង​កត្ដា​ផ្សេង​ៗ​ទៀត​។ លោក​ក៏បាន​សម្តែង​ការ​ព្រួយ​បារម្ភ​អំពី​ការ​ឡើង​ថ្លៃ​ប្រេង​ឥន្ធនៈ​ផង​ដែរ​ ពីព្រោះ​វា​​អាច​​​​​ធ្វើ​ឲ្យ​ប៉ះពាល់​ដល់​សន្ដិសុខ​ស្បៀង​អា​​​ហារ​​​ពិភពលោក​។

លោក​បាន​មាន​ប្រសាសន៍ថា “​ព័ត៌មាន​ដែល​ថា​ អាច​មាន​សង្គ្រាម​នៅ​ឈូង​សមុទ្រ​ពែក​ អាច​ធ្វើ​ឲ្យ​ប្រេង​ឡើង​ថ្លៃ​ ខណៈ​ពេលអ្នក​​​ផលិត​ស្បៀង​ តម្លៃស្បៀង​មិន​​ឡើង​ថ្លៃ​”។ លោក​បានបន្ថែម​ទៀត​ថា ប្រសិន​បើ​​តម្លៃ​ប្រេង​ឥន្ធនៈ​បន្ដ​ឡើង​ថ្លៃ​ បណ្ដាប្រទេស​ផលិត​​​​ស្បៀង​នឹង​បង្ខំ​ចិត្តដំឡើង​​ថ្លៃ​ស្បៀង​អាហារដែរ​ ដែល​ជា​លទ្ធផល​អាច​ធ្វើ​ឲ្យ​មាន​គ្រោះ​ទុរ្ភិក្ស​ និង​មនុស្ស​ស្លាប់​។

ដោយ​ធ្វើ​ការ​​អំពាវនាវ​ដោយ​ផ្ទាល់​ដល់​បណ្ដា​ប្រទេស​ឧស្សាហកម្ម​រីក​ចម្រើន​ទាំ​ង ប្រាំ​បី (G8) ដែល​បាន​​បញ្ចប់​​កិច្ច​ប្រជុំ​មួយ​នៅ​សហរដ្ឋ​អាមេរិក​កាល​ពី​ចុង​សប្ដាហ៍​កន្លង​ទៅ​នេះ​ ដែលនៅ​ទី​នោះ​​មានការ​ពិភាក្សា

​អំពី​សន្ដិសុខ​ស្បៀង​នោះ លោក​បាន​មាន​ប្រសាសន៍​ថា“​ក្នុង​នាម​ជានាយក​រដ្ឋមន្ដ្រី​នៃ​ប្រទេស​កម្ពុជា​ ខ្ញុំ​សូម​អំពាវ​នាវ​ដល់​​ពិភព​​លោក​ ដើម្បី​​ធ្វើ​សុខដុម​នីយកម្មរវាង​​តម្លៃ​ស្បៀង​ និង​តម្លៃ​ប្រេងសាំង​ ពី​ព្រោះ​បើ​មិន​ធ្វើ​អ៊ីចឹង​ នឹង​អាច​ធ្វើ​ឲ្យ​មិន​តុល្យភាព”។

លោក​ ហ៊ុន សែន​ បាន​មាន​ប្រសាសន៍​អំឡុង​ពេល​ថ្លែង​សុន្ទរកថា​កាល​ពី​ថ្ងៃ​ទី​១៦ខែ​ឧសភា​ថា លោក​នឹង​មិនថ្លែង​ទៅកាន់​សាធារណជន​ទេគឺ​រហូត​ដល់​ការ​បោះ​ឆ្នោត​ឃុំ-សង្កាត់​ ដែល​នឹង​ប្រព្រឹត្ត​ទៅ​នៅ​ថ្ងៃ​ទី​៣ខែ​មិថុនា។ លោក​ ហ៊ុន សែន​ បាន​ទទួល​ស្គាល់​ការ​ពិតនេះ​នៅ​ឯ​​សន្និសីទ​កាល​ពី​ម្សិលមិញនេះ​ ប៉ុន្ដែ​លោក​បាន​អះអាង​ថា សន្និសីទ​នោះ​គ្មាន​អ្វី​ពាក់​ព័ន្ធ​នឹង​ការ​បោះ​ឆ្នោត​នេះ​ទេ​។ លោក ហ៊ុន សែន ​បាន​មាន​ប្រសាសន៍ថា “ខ្ញុំ​មិន​បាន​ចុះ​តាមមូលដ្ឋាន​ ដើម្បី​សម្ពោធ ឬ​បើក​ការ​ដ្ឋានស្ថាបនា​អ្វី​ទេអំឡុងពេល​ធ្វើ​​យុទ្ធនាការ​​បោះ​ឆ្នោត​ ប៉ុន្ដែ​សិក្ខា​សាលា​នេះ​ត្រូវ​បាន​​ត្រៀម​រៀប​ចំ​ជាយូរ​មក​ហើយ​ ហើយវា​មិន​​ពាក់​ព័ន្ធ​នឹង​យុទ្ធនាការ​បោះ​ឆ្នោត​នោះ​ទេ”៕

(រាយការណ៍​បន្ថែ​មដោយ​ Kate Bartlett)

ប្រែសម្រួល​ដោយតែមសុខុម

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស