មន្ត្រីនគរបាលឃុំបាននិយាយកាលពីម្សិលមិញថា ការវាយប្រហារដោយគ្រាប់បែកមួយក្នុងស្រុកស្នួល ខេត្តក្រចេះ កាលពីយប់ថ្ងៃអាទិត្យ បានធ្វើឲ្យកម្មករសំណង់វ័យក្មេងពីរនាក់រងរបួសធ្ងន់។
លោកសុងងយនាយរងប៉ុស្តិ៍នគរបាលឃុំបានមានប្រសាសន៍ថា“ក្មេងប្រុសឈ្មោះ សួនកុសលអាយុ១៤ឆ្នាំ រងរបួសភ្លៅធ្ងន់ធ្ងរនិងយុវជនឈ្មោះ ចែមវាសនាអាយុ១៨ឆ្មាំត្រូវរបួសជើង”។ លោកមានប្រសាសន៍ថា “ជនរងគ្រោះ ត្រូវអំបែងគ្រាប់បែកកែច្នៃមួយគ្រាប់ អំឡុងពេលផ្ទុះ។ អំឡុងពេលវាយប្រហារដោយគ្រាប់បែកនោះ ជនសង្ស័យក៏បានប្រើកាំភ្លើងអាការបស់ខ្លួនបាញ់អស់៤២គ្រាប់ទៅលើកម្មករដែរ ប៉ុន្តែមិនត្រូវពួកគេ”។លោកក៏បានមានប្រសាសន៍ដែរថា កម្មករពីរនាក់នេះបាននិយាយថាពួកគេមិនពាក់ព័ន្ធក្នុងជម្លោះណាមួយដែលអាចនាំឲ្យមានការវាយប្រហារបែបនេះទេ។
ពេលដែលយុវជនទាំងនេះកំពុងរៀបចំចូលដំណេកនៅម៉ោងប្រហែល១១យប់នៅក្នុងខ្ទមឈើ ប្រក់ស្លឹកមួយនៅឯការដ្ឋានសំណង់ ស្រាប់តែមានអ្នកគប់គ្រាប់បែកចូល ហើយជនដៃដល់មិនស្គាល់មុខម្នាក់ក៏បានបើកការបាញ់ប្រហារតែម្តង។ គ្មាននរណាម្នាក់ត្រូវគ្រាប់កាំភ្លើងទេ ប៉ុន្តែគ្រាប់បានត្រូវចំគ្រឿងចក្រឈូសឆាយដីមួយគ្រឿង និងរថយន្តមួយគ្រឿងទៀត នៅក្បែរទីនោះ។
លោក កុសល មានប្រសាសន៍ថា“ យើងកំពុងស៊ើបអង្កេត និងតាមរកចាប់ខ្លួនជនសង្ស័យ”។លោកបានមានប្រសាសន៍បន្ថែមថា ជនរងគ្រោះទាំងពីរនាក់នេះ ត្រូវបានក្រុមហ៊ុន Hoeu Rai Sin ជួលមកស្ថាបនាផ្លូវមួយខ្សែ សម្រាប់ចម្ការកៅស៊ូរបស់ខ្លួន៕
ប្រែសម្រួលដោយ ចេវប៊ុននី