កូនប្រុស និងបងប្អូនប្រុសរបស់ក្រុមមេខ្លោងអបគមន៍ បាននិយាយកាលពីម្សិលមិញថា នគរបាលរាប់សិបនាក់ កំពុងតាមចាប់ខ្លួនមេខ្លោងអបគមន៍ពីររូបនៅខេត្តក្រចេះបានមកឡោមព័ទ្ធផ្ទះពីរខ្នងរបស់សាច់ញាតិពួកគេនៅក្នុងខេត្តកំពង់ចាម អស់រយៈពេលជិត១២ម៉ោង កាលពីម្សិលមិញ ដែលពេលនោះបានគំរាមអ្នកនៅក្នុងផ្ទះទៀតផង។
ការចោទប្រកាន់ថា ជាចលនាអបគមន៍នៅក្នុងខេត្តក្រចេះនេះ ត្រូវបានអាជ្ញាធរប្រើប្រាស់ ដើម្បីជួយសម្រាលដល់សកម្មភាពបង្ក្រាបរបស់កម្លាំងប្រដាប់អាវុធរាប់រយនាក់ ដែលបានសម្រុកចូលទៅក្នុងភូមិប្រមា ស្រុកឆ្លូង កាលពីសប្តាហ៍មុន។ក្នុងប្រតិបត្តិការនេះកម្លាំងសន្តិសុខបានបាញ់ស្លាប់ក្មេងស្រីអាយុ១៤ឆ្នាំម្នាក់។
ឈ្មោះ ប៊ុនថេតជាបងប្អូនរបស់លោកប៊ុនរដ្ឋានិងជាកូនប្រុសរបស់លោកប៊ុនឆនដែលអ្នកទាំងពីរត្រូវនគរបាលកំពុងតាមចាប់ខ្លួន បានមានប្រសាសន៍ថានគរបាលបានចាប់ផ្តើមឡោមព័ទ្ធផ្ទះពីរខ្នងនៅក្នុងស្រុកមេមត់ម៉ោងប្រហែល១២អធ្រាត្រថ្ងៃអង្គារ។ តែគ្មានជនសង្ស័យណាម្នាក់នៅក្នុងផ្ទះនោះទេ។
លោកប៊ុនថេតបានមានប្រសាសន៍ថា “ ពួកគេគោះទ្វារ ហើយយើងភ័យណាស់នៅពេលពួកគេមកដល់ និងព័ទ្ធផ្ទះរបស់យើង។ ពួកគេបានគំរាមពួកយើង ហើយព្យាយាមចូលក្នុងផ្ទះរបស់យើងដោយគ្មានដីកាពីតុលាការ”។ លោកបន្ថែមថា នគរបាលមិនអាចចូលផ្ទះរបស់លោកទេប៉ុន្តែ បានចូលផ្ទះរបស់លោកប៊ុនឆននៅម៉ោងប្រហែលជា៦ព្រឹក។ លោក ប៊ុន ថេត មានប្រសាសន៍ថានគរបាលប្រមាណ២០នាក់បានឈរជើងនៅតាមផ្ទះនីមួយៗនិងនៅទីនោះរហូតដល់ម៉ោង១១ព្រឹក នៅេពលព្រះរាជអាជ្ញាអមសាលាដំបូងខេត្តមកដល់ ដោយកាន់ដីកាមកជាមួយផង។លោក ប៊ុន ថេត បន្ថែមថា “ ពួកគេបានដើររុករើតាមផ្ទះប៉ុន្តែរកមិនឃើញអ្វីទេ”។
លោកអែមកុសលអធិការនគរបាលស្រុកមេមត់ បានមានប្រសាសន៍ថា លោកជាប់រវល់មិនអាចធ្វើអត្ថាធិប្បាយបានទេ ប៉ុន្តែលោក រៀល សុភិន ព្រះរាជអាជ្ញាអមសាលាដំបូងខេត្ត បានបញ្ជាក់បន្ថែមខ្លះដែរ។ លោកបានបញ្ជាក់ថា “ នគរបាលមិនបានគំរាមកំហែងទេ ពួកគេគ្រាន់តែព័ទ្ធផ្ទះ
ប៉ុណ្ណោះ។ខ្ញុំចុះមកស្រុកមេមត់ដើម្បីអនុវត្តដីកាចាប់ខ្លួនរបស់សាលាដំបូងខេត្តក្រចេះ ដោយស្វែងរកចាប់ខ្លួនឈ្មោះ ប៊ុន រដ្ឋា និងឈ្មោះប៊ុនឆន។ យើងគ្រាន់តែសង្ស័យថាពួកគេនៅទីនោះ ប៉ុន្តែគ្មានលទ្ធផលទេ”។
លោកអានភិនមន្ត្រីអង្កេតរបស់អង្គការសិទ្ធិមនុស្សអាដហុក ប្រចាំខេត្តកំពង់ចាមថ្លែងថា ពួកគេដឹងអំពីស្ថានភាពនេះ ហើយកំពុងស៊ើបអង្កេត។ លោកបន្ថែមថា“ អាជ្ញាធរមិនគួររំខាន និងគំរាមអ្នកភូមិទេ”។
អ្នកភូមិដែលមានវត្តមានអំឡុងការបង្ក្រាបកាលពីសប្តាហ៍មុន បានផ្តល់សេចក្តីរាយការណ៍តាមទូរស័ព្ទផ្សេងគ្នាអំពីព្រឹត្តិការណ៍នេះ នៅពេលបុគ្គលិកសិទ្ធិមនុស្សបានលើកឡើងថាពួកគេនៅតែតស៊ូ ដើម្បីដោះស្រាយនូវអ្វីដែលបានកើតឡើង។
ឈ្មោះ ស៊ី សុខគា អាយុ២២ឆ្នាំ និយាយថា “ខ្ញុំបានឃើញទាហានបញ្ជាឲ្យបុរសខ្លះដោះអាវ និងស្រាតខោ ហើយក្រោយមករឹបអូស យកលុយ និងទូរស័ព្ទរបស់ពួកគេ រួចដាក់ខ្នោះពួកគេ ប៉ុន្តែខ្ញុំមិនបានឃើញគេគំរាមស្ត្រីទេ”។ សុគា ដែលបងថ្លៃរបស់គាត់់ឈ្មោះ ទូច រាម ត្រូវបានចាប់ខ្លួនរួចហើយ បានរំឭកអំពីអ្នកភូមិដែលរត់គេចចេញមិនហ៊ាននៅជិតកងកម្លាំងសន្តិសុខទេ ហើយថា ជាស្ថានការណ៍ដ៏ឃោរឃៅ។
សុខ គា ថ្លែងថា “ខ្ញុំបានឃើញទាហានចាប់ខ្លួនអ្នកភូមិបួននាក់ ហើយវាយពួកគេ និងឃើញអ្នកភូមិរត់គេចចេញពីអាជ្ញាធរ។ សកម្មភាពរបស់ទាហានឃោរឃៅណាស់”។
អ្នកខ្លះនិយាយក្នុងលក្ខខណ្ឌអនាមិក ពីព្រោះពួកគាត់ព្រួយបារម្ភពីសុវត្ថិភាពរបស់ខ្លួនថា ទាហានបានដុតផ្ទះរបស់ពួកគាត់ចោល។ លោក អំ សំអាត អ្នកគ្រប់គ្រងបច្ចេកទេស អង្គការលីកាដូ បានថ្លែងថា “យើងទើបទទួលបានដំណឹងថា ខ្ទមរបស់ប្រជាពលរដ្ឋខ្លះត្រូវបានដុតបំផ្លាញចោល។ យើងមិនទាន់បានដឹងពិតប្រាកដថា តើផ្ទះទាំងនោះត្រូវបានដុតបំផ្លាញមែន ឬអត់នោះទេ….។យើងនឹងចុះអង្កេតហេតុការណ៍ជាក់ស្ដែងនៅទីនោះ ក្នុងសប្ដាហ៍នេះ ឬ នៅសប្ដាហ៍ក្រោយ”។
លោក សំអាត ថ្លែងថា លោកកំពុងពិនិត្យមើលរបាយការណ៍និយាយអំពីស្ត្រីមួយចំនួនត្រូវបានបង្ខំឲ្យដោះអាវចេញ នៅពេលទាហានឆែកឆេររកឯកសារ និងបុរសខ្លះត្រូវបានបង្ខំឲ្យដោះអាវ និងស្រាតខោទៀតផង។
លោកបានថ្លែងយ៉ាងដូច្នេះថា “ ប្រសិនបើវាជាករណីដូចដែលបានរាយការណ៍មកមែន នោះវាគឺជាការរំលោភបំពានសិទ្ធិមនុស្សយ៉ាងធ្ងន់ធ្ងរ។ ទោះបីជាពួកគាត់បានធ្វើអ្វីខុសក៏ដោយ ក៏ពួកគាត់មិនគួរត្រូវបានបង្ខំឲ្យដោះសម្លៀកបំពាក់យ៉ាងដូច្នោះដែរ”។ លោកបានបន្ថែមថា សកម្មភាពបង្ក្រាបនោះ គឺជាការរំលោភសិទ្ធិមនុស្ស។ លោកបានសង្កត់ធ្ងន់ថា “នៅពេលយើងអនុវត្តបែបនោះ វាអាចបណ្ដាលឲ្យប្រជាពលរដ្ឋស្លូតត្រង់ស្លាប់បាន”៕
ប្រែសម្រួលដោយ ចេវ ប៊ុននី
និង ហម សុផាណ្ណា