30 C
Phnom Penh

សាលាដំបូង​ខេត្តក្រចេះ សាក​សួរ​អ្នកភូមិដែលត្រូវ​បានចាប់ខ្លួនចំនួន​​​ប្រាំបីនាក់​​​នៅ​​​ស្រុកឆ្លូង

ដោយ ឌឹ ខេមបូឌា ដេលី

បទវិភាគ

មន្ដ្រី​តុលាការ​បាន​មាន​ប្រសាសន៍​ថាកាល​​​​ពីម្សិលមិញសាលា​ដំបូង​ខេត្ត​ក្រចេះ​​​​បាន​បញ្ចប់​ការ​សាក​សួរ​អ្នក​ភូមិ​ប្រាំបី​នាក់​ ដែល​ត្រូវ​បាន​ចោទ​ប្រកាន់​​ថា​ បានជាប់​​ពាក់​ព័ន្ធ​នឹង​អ្វី​ដែលក្រុម​​មន្ដ្រី​​អះអាង ​ថាជា​ចលនា​​​​អបគមន៍​។

លោក​ចៅ​ក្រម​ស៊ើប​សួរ​ ចុកងួនបាន​មាន​​​​ប្រសាសន៍ថាអ្នក​ភូមិ​ទាំង​ប្រាំ​បី​នាក់​ត្រូវ​បាន​សាក​សួរ​កាល​ពី​ថ្ងៃ​អង្គារ​ និង​ថ្ងៃ​ពុធហើយ​​​ម្នាក់​ៗ​​​ប្រឈម​នឹង​​បទ​ចោទ​ប្រកាន់​ប្រាំបី​ករណី​ ពី​បទ​បះបោរ​ប្រឆាំង​នឹង​អាជ្ញា​ធរ ​ធ្វើ​កុបកម្ម​ និង​ការញុះ​ញង់។ លោក​ចៅ​ក្រមចុកងួន​ បាន​បន្ថែម​ថា“​ ខ្លះ​ប្រព្រឹត្ត​បទ​ល្មើស​ ហើយអ្នក​ខ្លះ​ទៀត​​​​បាន​ចូល​រួម​កុបកម្ម​”។ លោក​បាន​បន្ថែម​​​ថាលោក​មិន​អាច​បញ្ជាក់​ពី​បទ​ល្មើសជាប់​សង្ស័យ​​ទាំង​នេះ​បាន​ទេពីព្រោះ​មាន​បញ្ហា​ស្មុគ​ស្មាញ​​ច្រើន​​​​​​ពេក​។

​អ្នក​ភូមិ​ដែល​បាន​ចាប់​ខ្លួន​កាល​ពី​សប្ដាហ៍​មុន​ នៅ​ក្នុង​ប្រតិបត្តិការ​បង្ក្រាប​​ដ៏​ធំមួយ​របស់​កង​កម្លាំង​ចម្រុះ​នៅ​ភូមិ​ប្រមាក្នុង​ស្រុក​ឆ្លូង​។កង​កម្លាំង​ប្រដាប់​អាវុធ​២០០​នាក់​មាន​នគរបាល​ កង​រាជ​អាវុធ​ហត្ថ​ និង​ទាហាន​ បាន​សម្រុក​ចូល​ទៅ​​ភូមិ​​នេះ​តាមបទ​បញ្ជា​របស់​ក្រសួង​មហា​ផ្ទៃ​ ដែល​បញ្ជូន​កង​កម្លាំង​​ទាំង​នោះ​ទៅ​បង្ក្រាប​នូវ​អ្វីដែល​​​គេ​​​ចោទ​​​ប្រកាន់​​​ថាជា​​ចលនា​បំបែកខ្លួន​។ក្មេង​ស្រីអាយុ​១៤​ឆ្នាំ​​ម្នាក់​ត្រូវបាន​បាញ់​ស្លាប់​នៅក្នុង​អំឡុង​ពេល​​​​​ប្រតិ​បត្តិការ​េនះ​ ទោះ​បី​ជា​អ្នក​ភូមិ​មិន​មាន​អាវុធ​នៅ​ក្នុង​ដៃ​ក៏ដោយ​ ហើយ​ក្រុម​អង្គការ​​​​សិទ្ធិ​មនុស្ស​បាន​និយាយ​ថាការ​​​អះអាង​​​​

ពី​ចលនាអបគមន៍​នេះ​គឺជា​លេស ​​ដើម្បី​​​បណ្ដេញ​​​​ប្រជា​ពល​រដ្ឋ​៦០០​គ្រួសារ​ ដែល​​ជាប់​ពាក់​ព័ន្ធ​នៅ​ក្នុងជម្លោះ​​ដីធ្លី​​ជា​មួយក្រុម​ហ៊ុន​​ចម្ការកៅស៊ូ​កាស៊ូទីម​ (Casotim)។​ បន្ថែម​ពី​លើ​អ្នក​ភូមិ​ ដែល​ត្រូវ​បាន​ចោទ​ប្រកាន់​ទាំង​ប្រាំបី​នាក់​នេះ​ ​នគរបាល​​កំពុង​ស្វែង​រក​អ្នក​ភូមិ​ប្រាំ​នាក់​ទៀតដែល​ជាប់​​ចោទ​​​​ថា​ ជា​អ្នក​ដឹក​នាំ​ចលនា​អបគមន៍​នេះ​។

លោក​ ហុកផល្លាជា​មេធាវីការ​ពារអ្នក​ភូមិ​​​​ទាំង​​​​ប្រាំ​បីនាក់​ តាង​នាម​​ឲ្យ​អង្គការ​សិទ្ធិ​​​មនុស្ស​អាដហុក​បាន​ថ្លែង​​កាល​ពី​ម្សិល​មិញ​ថាការ​​​​ចោទ​ប្រកាន់​ចំពោះ​​អ្នក​ភូមិ​ទាំង​នេះ​ហាក់​​​​ដូចជា​​មិនត្រឹមត្រូវទេហើយ​​បដិសេធ​ចំពោះ​ការ​ចោទ​ប្រកាន់​ ដែល​ថា​ អ្នក​​​​ភូមិ​ទាំង​​​​នេះ​​ជាប់​ពាក់​ព័ន្ធ​នឹង​​ចលនា​អបគមន៍​។ លោក​បាន​មាន​ប្រសាសន៍ថា“បើសិន​ជា​ពួក​គេ​ពិត​ជា​បាន​បង្កើត​តំបន់​អបគមន៍​មែន​នោះពួក​គេ​ត្រូវ​តែ​មាន​កម្លាំង​ច្រើន​ មាន​លុយ​និង​មាន​សព្វាវុធ​។ប៉ុន្ដែ​ពួក​គេ​គ្រាន់​​​​តែ​​​​មាន​បំណង​ធ្វើ​ស្រែ​តែ​ប៉ុណ្ណោះ​”។

ទោះបី​អ្នក​ភូមិ​មិនមាន​អាវុធ​ក្នុង​ដៃ​ក៏​​​ដោយ​ ក៏​ពួក​គេ​មាន​ឧបករណ៍​ដូច​ជា​ ពូថៅកាំបិត​ផ្គាក់​ និង​ស្នា ​នៅ​អំឡុងពេល​កង​កម្លាំង​សន្ដិសុខ​ធ្វើ​ប្រតិបត្តិការនេះ​ដែរ​។ក្រុម​មន្ត្រី​បាននិយាយថាការ​ផ្ទុះ​អាវុធ​បាន​កើត​ឡើង​នៅ​ពេល​អ្នក​ភូមិ​វាយ​ប្រហារ​លើ​ពួក​គេ​។

លោក​ ផល្លា​ បាន​ថ្លែង​ថាអ្វីដែល​គេ​ហៅ​ថាអាវុធ​នោះតាម​ពិត​គឺ​ជា​ឧបករណ៍​​ចាំ​បាច់​សម្រាប់​កសិករ​ ដែល​រស់​នៅក្នុង​តំបន់​ដាច់​ស្រយាល​។លោក​​បញ្ជាក់​ថា“ពួក​គេ​មិនមាន​កម្លាំងដែល​​អាច​ផ្ដួល​រំលំរដ្ឋាភិបាល​បាន​ទេ​។

ពួក​គេជា​កសិករ​។ពួក​គេ​ត្រូវ​ការសម្ភារៈដើម្បី​ការ​ពារ​ខ្លួន​ប្រឆាំងនឹងសត្វសាហាវ​ ដូច្នេះ​ពួក​គេ​មាន​ ពូថៅកាំបិតនិង​ស្នា​ជារឿង​​​ធម្មតា​​​​​​។អ្នកដែលរស់​​នៅក្នុង​ព្រៃ​ត្រូវ​ការ​​​សម្ភារៈ​​​បែបនេះ​ ដើម្បី​ការ​ពារ​ខ្លួន​”។ខណៈ​ពេល​​អ្នកភូមិ​ទាំង​ប្រាំបី​នាក់​ត្រូវ​បាន​​ចាប់​ខ្លួន​តាម​ការ​​អះអាង​ថាបាន​ធ្វើ​​កុបកម្ម​នោះ​ មិន​មាន​ការ​សើុប​អង្កេត​ជា​សាធារណៈ​អំពី​ការ​ស្លាប់​របស់​ក្មេង​ស្រី​ជំទង់​ឈ្មោះ ហេងចន្ថា ​ឡើយ​។នៅក្នុង​សេចក្ដី​ថ្លែង​ការណ៍រួម​មួយ​ចេញ​កាល​ពី​ម្សិល​មិញ​ ​អង្គការ​សិទ្ធិ​​​មនុស្ស​ចំនួន​បី​​បាន​​​ផ្ដោត​លើ​សិទ្ធិ​​ស្ត្រីនិង​​​កុមារ​ ហើយ​បាន​អំពាវ​នាវ​ឲ្យ​មាន​ការ​ស៊ើប​អង្កេត​ឲ្យ​បាន​ហ្មត​​​់​​​ចត់​។

អង្គការ​សីលការ (Silaka) អង្គការ​ជំនួយ​ផ្លូវ​​ច្បាប់​ដល់​កុមារ​និង​​ស្ត្រីនិង​អង្គការ​យេនឌ័រនិង​អភិវឌ្ឍន៍ដើម្បី​កម្ពុជាបាន​សរសេរនៅ​ក្នុង​សេចក្ដី​ថ្លែង​ការណ៍ថា “ហេង​ ចន្ថាគឺ​ជា​មនុស្ស​តែ​ម្នាក់​គត់​ដែលបានស្លាប់នៅ​ក្នុង​ពេល​ប៉ះ​ទង្គិច​គ្នានោះ។យើង​សូម​អំពាវ​នាវ​ឲ្យ​​រាជរ​​​ដ្ឋាភិបាល​កម្ពុជា​​ធ្វើ​ការ​​ស៊ើប​អង្កេត​ដោយ​មិន​លម្អៀង​ ដើម្បី​ឲ្យ​ដឹង​ពី​មូល​ហេតុ​​បាញ់​សម្លាប់ជនរងគ្រោះ​រូបនេះ។បើ​មិន​ដូច្នេះ​ទេ ​សាធារណជន​មិន​សូវ​មាន​​ជំនឿ​ថា ​រដ្ឋាភិបាល​​អាចទប់​ស្កាត់​​បទ​​ល្មើស​​បែប​នេះ​បាន​ឡើយ៕

ប្រែសម្រួល​ដោយឃិនណៃ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស