31 C
Phnom Penh

​នគរ​បាល​ចរាចរ​ចេញ​លិខិត​ផាក​ពិន័យ​តាម​​បទបញ្ជាថ្មី ​​ទៅ​ឲ្យ​រថយន្ត​តូច ​ធំ​ ជាពិសេស​រថយន្ដ​ក្រុង

ដោយ ឌឹ ខេមបូឌា ដេលី

បទវិភាគ

ចាប់​តាំង​ពី​មាន​ការ​ចេញ​​បទ​បញ្ជា​ថ្មី​​ឈប់​ឲ្យ​មាន​ការ​​​​​​ផាកពិន័យរថយន្ត​​​នៅ​នឹង​កន្លែង​​ ​កាល​ពី​ដើម​ខែ​នេះ​មក មន្ត្រី​ម្នាក់​បាន​លើក​ឡើង​កាល​ពី​ថ្ងៃ​អង្គារ​ថា នគរបាល​ចរាចរ​បាន​ចេញលិខិត​ផាក​ពិន័យ​ជាង​​២០០​សន្លឹក ​ឲ្យ​ទៅ​រថយន្ដ​​ និង​រថយន្ដ​ក្រុង​ដឹក​អ្នក​ដំណើរ​​រួច​​​ហើយ។

ចាប់​តាំង​ពី​ថ្ងៃ​ទី​១​ ខែ​ឧសភាមក បទ​បញ្ជា​ថ្មី​នេះ​ ត្រូវបានអនុវត្ត​នៅ​ទូទាំង​ប្រទេស​ ដោយ​តម្រូវ​ឲ្យ​នគរបាល​ចរាចរ​ចេញ​លិខិត​ឲ្យ​រថយន្ដ​តូច ​ធំ និង​រថយន្ដ​ក្រុង ទៅ​បង់​ប្រាក់​ពិន័យ​នៅ​ការិយាល័យ​នគរបាល​ក្នុង​រយៈ​​​​ពេល​​៣០​ថ្ងៃ។​

អនុសេនីយ៍ត្រី អុិន សាវឹង នាយ​រង​ផ្នែក​រដ្ឋបាល​នៃ​ការិយាល័យ​ចរាចរណ៍​​​ផ្លូវ​គោក​រាជ​ធានី​ភ្នំពេញ បានមាន​ប្រសាសន៍​ថា អ្នក​បើក​រថយន្ដ​តូច​ចំនួន​៥៤​នាក់​បាន​បង់​ប្រាក់​​ផាកពិន័យរួច​​ហើយ ប៉ុន្តែមិន​មាន​តួលេខអំ​​ពី​អ្នកបើកបរ​​ដែល​មិន​ទាន់​ទៅ​បង់​ប្រាក់​​ផាក​ពិន័យ​នោះ​ទេ។ លោក​ សាវឹង បាន​មានប្រសាសន៍ថា លិខិត​​ពិន័យ​ចំនួន​១៥៨​សន្លឹក​ ត្រូវ​បាន​ចេញ​​​ឲ្យ​ទៅ​រថយន្ដ​ក្រុង ឬរថយន្ត​ដែល​​មាន​​ចំណុះ​​​ជាង​​​​៣៥​​កៅ​អី​។​​លោក​បាន​មាន​ប្រសាសន៍​​​ថា ក្នុង​ចំណោម​លិខិត​ទាំង​នោះ ​មាន​លិខិត​ចំនួន​១០៨​ដែល​មិន​ទាន់​ឃើញ​អ្នក​បើក​បរ​ទៅ​បង់​ប្រាក់​​ពិន័យ។​ លោកបាន​បន្ថែមថា បទ​ល្មើស​ភាគ​ច្រើន​គឺជា​បទ​ល្មើស​បើក​បរ​ហួស​ល្បឿនកំណត់ ដែល​ម៉ាស៊ីន​ថតល្បឿន​ចាប់​យក​រូប​ភាព​បាន។​

អនុសេនីយ៍ត្រី​ សាវឹង បាន មាន​ប្រសាសន៍​ថា ក្រុម​ហ៊ុនដឹក​ជញ្ជូន​ រិទ្ធិ មុនី បាន​ទទួល​លិខិត​ពិន័យ​ច្រើន​ជាង​គេ ប៉ុន្តែ​លោក​មិន​បានប្រាប់​ចំនួន​ច្បាស់​​ជាក់​លាក់​ទេ។ បន្ទាប់មក​គឺក្រុម​ហ៊ុន​ដឹក​អ្នក​ដំណើរ​ ភ្នំពេញសូរិយា ក្រុមហ៊ុន​ទេសចរណ៍ កាពីតូល និង​ក្រុម​ហ៊ុន ផារ៉ាម៉ោន អង្គរ អុិច​ប្រេស្ស ដែលជា​ដៃគូ​របស់​ក្រុមហ៊ុន រិទ្ធិ មុនី។

កាលពី​សប្ដាហ៍មុន រដ្ឋាភិបាល​បាន​​បញ្ជាក់​ថា ក្រុមហ៊ុន រិទ្ធិ មុនី និង​ក្រុម​ហ៊ុនទេសចរណ៍ កាពីតូល គឺជា​ក្រុមហ៊ុនដែល​មាន​គ្រោះថ្នាក់​ចរាចរណ៍​ច្រើន​ជាង​គេ​ក្នុង​ឆ្នាំនេះ។ ក្រុម​ហ៊ុន​រិទ្ធិ មុនី ត្រូវ​បាន​នគរបាល​ស្ដី​បន្ទោស​ក្នុង​ពេល​មាន​គ្រោះថ្នាក់​ពីរ​ករណី​កាល​ពី​សប្ដាហ៍មុន ដែលបានបណ្ដាល​ឲ្យ​ប្រជាពល​​រដ្ឋ​បីនាក់​ស្លាប់​ នៅ​ក្នុង​ខេត្ត​បាត់​ដំបង។ លោក សាន វិចិត្រ អ្នក​ចាត់​ការ​ទូ​ទៅ​របស់​​​​ក្រុម​ហ៊ុន​ រិទ្ធិ មុនី និង​ក្រុម​ហ៊ុន ផារ៉ាម៉ោន បាន​បដិសេធ​មិន​ធ្វើ​​អត្ថាធិប្បាយទេ។

លោក វ៉ន ពៅ ប្រធានសមាគម​ប្រជា​ធិប​តេយ្យឯករាជ្យនៃសេដ្ឋកិច្ច​ក្រៅ​ប្រព័ន្ធ​​​ ដែល​ជា​បណ្ដាញអ្នក​រត់​​ម៉ូតូឌុប និង​អ្នក​រត់​​រ៉ឺម៉កម៉ូតូ បាន​មានប្រសាសន៍ថា ​លិខិត​ពិន័យ​ដែល​បាន​ចេញ​ឲ្យ​​អ្នក​បើក​បរ​យានយន្ដ​នោះ នៅ​មាន​ចំនួនតិច​ណាស់។​ លោក​បាន​អះអាង​ថា អំពើ​​ពុក​រលួយ​នៅ​ថ្នាក់​ក្រោមដែ​ល​បាន​ធ្វើ​ការ​ផាក​​ពិន័យ​នៅ​នឹង​កន្លែង​នោះ នៅ​តែ​បន្ដ​​​​​​​កើត​​​​មាន​ដដែល។​

លោក វ៉ន ពៅ បាន​មាន​ប្រសាសន៍​ថា “ខ្ញុំ​គិតថា យើង​មិន​អាច​បញ្ឈប់​អំពើ​ពុក​រលួយ​របស់​​នគរ​បាល​ចរាចរ​បាន​ទេ ពីព្រោះប្រាក់​បៀវត្សរ៍របស់ពួកគាត់​តិច​ណាស់ ហើយ​ពួក​គាត់​ត្រូវ​ការ​ប្រាក់​សម្រាប់ផ្គត់​ផ្គង់​គ្រួសារ និង​សូក​ប៉ាន់​ចៅហ្វាយ​នាយរបស់​ពួកគាត់​”។ លោក ហេង ចាន់ធារី ប្រធាន​ការិយាល័យ​នគរ​បាល​ចរាចរជើង​គោករាជធានី​ភ្នំពេញ​បានមាន​ប្រសាសន៍​​​ថា ប្រជាពល​រដ្ឋ​គួរ​តែ​ដាក់ពាក្យ​​បណ្ដឹង ប្រសិន​បើ​ពួកគាត់​​​ឃើញ​​​មន្ត្រីនគរបាល​ចរាចរណាម្នាក់ប្រព្រឹត្ត​​ល្មើស​ច្បាប់។​

លោក​​មាន​ប្រសាសន៍ថា “ ប្រជា​ពល​​រដ្ឋ​ដែល​បាន​ល្មើសច្បាប់​ចរចរណ៍ និង​ត្រូវ​បាន​ពិន័យក្នុង​ករណី​ណាមួយ ត្រូវ​តែ​ទាម​ទារ​យក​​លិខិត​ផាក​ពិន័យនោះ ពី​ព្រោះខ្ញុំបាន​ប្រាប់​មន្ត្រី​របស់​ខ្ញុំ​​ឲ្យ​ចេញ​លិខិត​ផាក​ពិ​ន័យ​”៕

  ប្រែ​សម្រួល​ដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស