ក្រុមហ៊ុនម៉ាឡេស៊ី ដែលបើកភោជនីយដ្ឋាន KFCនៅកម្ពុជាបានប្រកាសថា ក្រុមហ៊ុនរកស៊ីរួមគ្នានេះ បានខាតបង់ជិត៣០.០០០ដុល្លារនៅក្នុងត្រីមាសទី១នៃឆ្នាំនេះ ទោះជាប្រាក់ចំណូលបានកើនឡើងក៏ដោយ។
នៅក្នុងរបាយការណ៍ប្រចាំត្រីមាសទី១ផ្ញើទៅកាន់ផ្សារមូលបត្រម៉ាឡេស៊ី ក្រុមហ៊ុន QSR Brands Bhd ដែលជាម្ចាស់ភាគហ៊ុនធំនៅក្នុងក្រុមហ៊ុនរកស៊ីរួមគ្នា ជាមួយក្រុមហ៊ុន រ៉ូយ៉ាល់ គ្រុប (Royal Group) បានឲ្យដឹងថា មុខជំនួញរបស់ខ្លួននៅក្នុងប្រទេសកម្ពុជាបានរងការខាតបង់ចំនួន២៨៦.០០០ដុល្លារនៅក្នុងត្រីមាសទី១នៃឆ្នាំ២០១២នេះ។
ក៏ប៉ុន្ដែ ការខាតបង់នេះ គឺតិចជាងការខាតបង់ក្នុងត្រីមាសទី១នៃឆ្នាំ២០១១ ពេលខ្លួនខាតបង់ប្រមាណ៣៨០.០០០ដុល្លារ។ ដោយឡែក ប្រាក់ចំណេញសរុបរបស់ក្រុមហ៊ុន QRS Brands បានធ្លាក់ចុះចំនួន៨ភាគរយក្នុងរយៈពេលបីខែដំបូងនៃឆ្នាំនេះ បើធៀបទៅនឹងរយៈពេលដូចគ្នាកាលពីឆ្នាំមុន។
ក្រុមហ៊ុននេះ បានលើកឡើងនៅក្នុងរបាយការណ៍របស់ខ្លួនផ្ញើទៅកាន់ផ្សារមូលបត្រ ម៉ាឡេស៊ី កាលពីថ្ងៃអង្គារថា “ការធ្លាក់ចុះប្រាក់ចំណេញនេះ ភាគច្រើន គឺដោយសារតែការខាតបង់របស់ក្រុមហ៊ុន KFC Cambodia និងដោយសារតែការធ្លាក់ចុះប្រាក់ចំណូលរបស់ក្រុមហ៊ុន KFC Holdings (Malaysia) Bhd”។
របាយការណ៍នេះបានឲ្យដឹងទៀតថា ប្រាក់ចំណូលរបស់ក្រុមហ៊ុន KFC Cambodia បានកើនឡើងដល់ប្រមាណ៩៨៥.០០០ដុល្លារ នៅក្នុងត្រីមាសទី១នៃឆ្នាំនេះ គឺកើន១៩ភាគរយ បើប្រៀបធៀបទៅនឹងរយៈពេលដូចគ្នានេះនៅក្នុងឆ្នាំ២០១១។
កាលពីឆ្នាំ២០១១ ក្រុមហ៊ុន QSR Brands បានអះអាងថា ថ្លៃមាន់ អគ្គិសនី ប្រេងសាំង និងការយកពន្ធខ្ពស់ ព្រមទាំងកង្វះបុគ្គលិកជំនាញ គឺជាមូលហេតុចម្បងនៃការខាតបង់របស់ខ្លួន។
តំណាងក្រុមហ៊ុន QSR Brands និងក្រុមហ៊ុន រ៉ូយ៉ាល់ គ្រុប មិនអាចទាក់ទងសំុការអត្ថាធិប្បាយបានទេ។ក្រុមហ៊ុនរកស៊ីរួមគ្នា ដែលមានឈ្មោះថាKampuchea Food Corporation នេះ ត្រូវបានបង្កើតឡើងក្នុងឆ្នាំ២០០៨ ជាមួយដើម ទុន១,៥លានដុល្លារ ដោយក្រុមហ៊ុន QSR Brands មានភាគហ៊ុន៥៥ភាគរយ៕
ប្រែសម្រួលដោយ ហួង កុកទៀន