27 C
Phnom Penh

កម្ម​ករ​៣០០​នាក់​នាំ​គ្នា​តវ៉ា​នៅ​ឯរោង​ចក្រ​ដំឡើង​ទោ​ចក្រ​យាន​យន្ត​ ហុង​ដា ក្នុង​ខណ្ឌពោធិ៍សែនជ័យ

ដោយ ឌឹ ខេមបូឌា ដេលី

បទវិភាគ

តំណាង​សហជីព​បាន​ឲ្យ​ដឹងកាលពី​ថ្ងៃ​ពុធ​ថា​ កម្មករ​ប្រមាណ​៣០០​នាក់​មក​ពី​រោង​ចក្រក្នុង​រាជ​ធានី​ភ្នំ​ពេញ​មួយ​កន្លែង​ ដែល​ដំឡើង​ទោ​ចក្រយាន​យន្ត​ ហុង​ដា​ បាន​ធ្វើ​បាតុកម្ម​កាល​ពី​ថ្ងៃ​ពុធ​ ដើម្បី​ទាម​ទារ​ឲ្យ​រោង​ចក្រ​​​​ទទួល​យក​​តំណាង​សហជីព​របស់​ពួកគេ​ចូល​ធ្វើ​ការ​ជា​ធម្មតា​វិញ​ តាម​បទ​បញ្ជា​របស់​ក្រុម​ប្រឹក្សា​អាជ្ញា​កណ្តាល។

លោក យឿង​ សុភារ៉ា​ មន្ត្រី​ផ្នែកច្បាប់​នៅ​សហភាព​ការ​ងារ​កម្ពុជា​បាន​​ឲ្យ​ដឹង​ថា​ សហភាព​ការ​ងារ​កម្ពុជា​ បាន​ជួយ​ជ្រោម​ជ្រែង​ក្នុង​ការ​បង្កើត​សហជីព​ថ្មី​មួយ​កាល​ពី​ខែ​ធ្នូ​កន្លង​ទៅ​នេះ​នៅ​ឯ​ក្រុម​ហ៊ុន​ Honda​ NCX ក្នុងខណ្ឌ​ពោធិ៍​សែន​ជ័យ​ ដោយហៅ​សហជីពថ្មី​នេះ​ថា​ សហជីព​នយោ​ជិត​ប្រជា​ធិប​តេយ្យ​ក្រុម​ហ៊ុន​អិុន​ស៊ី​អុិក្ស (Democratic Employee Union of NCX Company)។​ ប៉ុន្តែ​បន្ទាប់​ពីបាន​បង្កើត​សហជីព​ថ្មី​នេះ​រួច​មក​ មេដឹក​នាំ​សហជីព​ អគ្គ​លេខាធិការ​ ព្រម​ទាំង​សកម្ម​ជន​សហជីព​ពីរ​នាក់​ទៀត​ ត្រូវ​បាន​បណ្តេញ​ចេញ​​ពី​ការ​​ងារ​។

លោក​ គុណ​ រី​ អនុ​ប្រធាន​សហជីព​ថ្មី​នេះ​ បាន​លើក​ឡើង​​ថា​ ប្រធាន​រដ្ឋ​បាល​រោង​ចក្រ​ បាន​ជំទាស់​នឹង​បទ​បញ្ជា​ ដែល​ចេញ​ដោយ​ក្រុម​ប្រឹក្សា​អាជ្ញា​កណ្តាល​កាល​ពី​ខែ​មីនា​ ដែលបញ្ជា​ឲ្យ​រោង​ចក្រ​ទទួល​យកតំណាង​​សហ​ជីព​ចំនួនបួន​នាក់​ចូល​ធ្វើ​ការ​វិញ។

ក្រុម​កម្មករ​ក៏​កំពុង​តែ​ធ្វើ​បាតុកម្ម​ទាម​ទារ​ ឲ្យ​គេ​ទទួល​យកលោក​ អ៊ុច​ សុភាព​ ជា​អតីត​មេដឹក​នាំ​សហជីព​មួយ​ផ្សេង​ទៀត​ចូល​មក​ធ្វើ​ការ​នៅ​រោង​ចក្រ​នេះវិញដែរ។​ លោក​ គុណ​ រី​ បាន​ឲ្យដឹង​ថា​ លោក​ អ៊ុច​ សុភាព ត្រូវ​​បាន​​បណ្តេញ​ចេញ​ដោយ​សារ​តែ​ក្រុម​ហ៊ុន​មាន​ការ​រើស​អើង​ចំពោះ​រូប​គាត់។

លោក​ គុណ​ រី​ បាន​និយាយបន្ថែមទៀត​ថា “គោល​បំណង​ចម្បង​របស់​យើង​គឺ​ ទាម​ទារ​ឲ្យ​គេ​ទទួល​យក​អ្នក​ទាំង​ប្រាំ​​នេះ​​ចូល​មក​ធ្វើ​ការ​​ក្នុង​រោង​ចក្រ​ជាធម្ម​តា​វិញ”  ដោយ​លោក​បាន​​បន្ថែមទៀត​ថា​ ការ​ទាម​ទារ​ផ្សេងៗ​ទៀត​ពី​សំណាក់​​ក្រុម​កម្មករ​ រួម​មាន​ប្រាក់​ឈ្នួល​បន្ថែម​ចំនួ​នប្រាំ​ដុល្លារ​ ព្រមទាំង​ទឹក​ប្រាក់​ក្នុង​មួយ​ខែ​ចំនួន​២០​ដុល្លារ​ទៀត​ សម្រាប់​រយៈ​​ពេល​១៨​ខែ​ ជូន​ដល់​ស្ត្រី​ ដែល​ទើប​តែ​សម្រាលកូន​រួច។

លោក​ អ៊ុច​ សុភា​ព បាន​បន្ថែម​ទៀត​ថា​ សហភាព​ការ​ងារ​កម្ពុជា​បាន​ចេញ​សេចក្តី​បញ្ជាក់​មួយ​ ដោយ​ស្នើសុំ​ឲ្យ​មាន​ការ​ចរចា​គ្នា​ជាមួយ​ក្រុម​ហ៊ុន​ Honda NCX​ កាល​ពី​ថ្ងៃ​ទី​​៩​ ​ខែ​ឧ​សភា​ ប៉ុន្តែ​ក្រុម​ហ៊ុន​បាន​ព្រងើយ​កន្តើយ​នឹង​សំណើនេះ។

លោក​បាន​និយាយ​ថា​ “ក្រុម​ហ៊ុនរើស​អើងចំពោះ​សហជីព​ និង​កម្មករ​ ដែល​ហ៊ាន​ទាមទារផលប្រយោជន៍​សម្រាប់​ក្រុម​កម្មករ​ដែល​ធ្វើ​ការ​នៅ​រោង​ចក្រនេះ​ ដោយ​បាន​បណ្តេញ​ពួក​គេ​ និងបិទ​សិទិ្ធ​មិនឲ្យពួកគេនិយាយ​ស្តី​”។

លោក​ អាត់​ សេងនី​ ប្រធាន​រដ្ឋ​បាល​រោង​ចក្រ​​បាន​លើក​ឡើង​ថា​ រោង​ចក្រ​បដិសេធ​មិន​​ព្រម​ទទួល​យក​​តំណាង​សហ​ជីព​​ឲ្យចូល​ធ្វើ​ការ​វិញ​ ដោយ​សារ​តែ​បច្ចុប្បន្ន​នេះសង្វាក់​​ផលិត​កម្ម​បាន​ធ្លាក់​ចុះ។

លោក​ សេងនី​ បាន​និយាយ​ថា​ “​ក្រុម​ប្រឹក្សា​​​អាជា្ញ​កណ្តាល​ចង់​ឲ្យ​យើង​ទទួល​យក​អ្នក​ទាំង​នេះ​ត្រឡប់​មក​វិញ​ ប៉ុន្តែ​តើ​ឲ្យ​យើង​ទទួល​យក​ពួក​គេ​មក​វិញ​ម្តេច​កើត​ទៅ​ បើ​តម្រូវ​ការ​ផលិត​ផល​របស់​យើងកំពុងតែ​ធ្លាក់​ចុះ​ ហើយ​សង្វាក់​ផលិត​កម្ម​របស់​យើង​ទៀត​សោត​ក៏​ថយ​ចុះ​ដែរ​នោះ?”

លោក​ សេងនី​ បាន​បន្ថែម​ទៀត​ថា ​ការ​ចរចាគ្នា​​បាន​ប្រព្រឹត្តទៅ ​កាល​ពីថ្ងៃ​ពុធ​ នៅ​ឯ​សាលា​រាជ​ធានី​ភ្នំ​ពេញ​ រវាង​ក្រុម​ហ៊ុន​ និង​តំណាង​សហជីព​ចំនួន​ប្រាំ​មួយ​នាក់​ ក៏ប៉ុន្តែ​ពំុបាន​ទទួល​លទ្ធ​ផលជា​ផ្លែ​ផ្កា​ទេ​ ហើយ​ការ​ចរចាគ្នា​នឹង​បន្ត​ដល់ពេល​ក្រោយទៀត៕

ប្រែ​សម្រួល​ដោយ​ ហួង​ កុកទៀន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស