ធនាគារ អេស៊ីលីដាភីអិលស៊ីបានប្រកាសកាលពីថ្ងៃសុក្រថា ខ្លួនបានបង្កើនទុនក្្នុងធនាគាររបស់ខ្លួន ពោលគឺចំនួនទឹកប្រាក់សរុបដែលខ្លួនមាន សម្រាប់ចំណាយទូទៅ បាន២៨ភាគរយដើម្បីឲ្យឡើងដល់១១៣,១៦លានដុល្លារ។
លោកអុិនចាន់នីប្រធាននាយកប្រតិបត្តិធនាគារ អេស៊ីលីដា ភីអិលស៊ី បានមានប្រសាសន៍កាលពីម្សិលមិញថា ធនាគារនេះនឹងប្រើប្រាស់ទុនបន្ថែមនេះ ដើម្បីបង្កើនចំនួនទឹកប្រាក់សម្រាប់ផ្តល់ឥណទានដល់អតិថិជនរបស់ខ្លួនព្រមទាំងបង្កើតសាខាចំនួនបីកន្លែងបន្ថែមទៀត ជាការឆ្លើយតបទៅនឹងតម្រូវការនៅតាមបណ្តាខេត្តនៃប្រទេសកម្ពុជា។
លោកបានមានប្រសាសន៍ថា “ការបង្កើនទុននេះមានគោលបំណង ដើម្បីពង្រីកវិសាលភាពនៃការប្រើប្រាស់សេវាធនាគារ ក្នុងពេលដែលអតិថិជនមួយភាគធំត្រូវចំណាយពេលជាងកន្លះម៉ោង ក្នុងការធ្វើដំណើរទៅកាន់សាខានានា”។លោកបានមានប្រសាសន៍បន្ថែមទៀតថា ធនាគារ អេស៊ីលីដា ភីអិលសីុ
គ្រោងនឹងបង្កើតសាខា១៨កន្លែងបន្ថែមលើសាខាដែលមានស្រាប់ទាំង២៣៥កន្លែង នៅតាមបណ្តាខេត្តមួយចំនួននៅដំណាច់ឆ្នាំនេះ។ចំនួនទឹកប្រាក់សម្រាប់ផ្តល់ឥណទានរបស់ធនាគារ អេស៊ីលីដា ភីអិលស៊ី នៅដំណាច់ត្រីមាសដំបូងនៃឆ្នាំនេះ បានកើនដល់១,១ពាន់លានដុល្លារ ពោលគឺបានកើនឡើង៤១,២៧ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន។ ប្រាក់ចំណេញសរុបបានកើនឡើងពី១១,៣៩លានដុល្លារកាលពីឆ្នាំមុន មកជាង១៦លានដុល្លារក្នុងឆ្នាំ២០១២។
របាយការណ៍ហិរញ្ញវត្ថុ ដែលធនាគារអេស៊ីលីដា ភីអិលស៊ី បានចេញផ្សាយ បានបង្ហាញថាធនាគារក៏នឹងប្រើប្រាស់ទុនបន្ថែមនេះ ដើម្បីវិនិយោគបន្ថែមលើសេវាប្រើប្រាស់ម៉ាស៊ីនដកប្រាក់ដោយស្វ័យប្រវត្តិ (ATM)ផងដែរ។ ដោយប្រើប្រាស់ទុនបន្ថែមនេះដែរ ធនាគារពាណិជ្ជមួយនេះគ្រោងនឹងអភិវឌ្ឍសេវាធនាគារតាមឧបករណ៍ចល័ត និងបើកសាខាដំបូងរបស់ខ្លួននៅប្រទេសមីយ៉ាន់ម៉ា ក្នុងឆ្នាំក្រោយទៀតផង។
របាយការណ៍ហិរញ្ញវត្ថុដដែលនេះមានខ្លឹមសារថា “ធនាគារ អេស៊ីលីដា ភីអិលស៊ីទទួលបាននូវកំណើន នៃប្រាក់ចំណេញសរុបក្រោយពីបានបង់ពន្ធឲ្យរដ្ឋាភិបាលរួចពីជាង៤៧៥.០០០ដុល្លារ នៅក្នុងឆ្នាំ២០១១ មក៤៩.៣៥៣,៣៥៦ដុល្លារ ក្នុងឆ្នាំ២០១១។ យោងតាមធនាគារជាតិនៃកម្ពុជា និងបន្ថែមលើការអំពាវនាវកាលពីឆ្នាំ២០១១ ឲ្យសមាជិកភាគហ៊ុនរបស់ខ្លួន ដំឡើងទុនដល់ជាងបួនពាន់លានដុល្លារ ធនាគារ អេស៊ីលីដា ភីអិលស៊ីបាននិងកំពុងបង្កើនទុនបម្រុងកាតព្វកិច្ចរបស់់ខ្លួន ដោយរក្សាអត្រាចំណេញក្រោយការបង់ ពន្ធឲ្យស្ថិតក្នុងចន្លោះពី៥០ទៅ៦០ភាគរយ”៕
ប្រែសម្រួលដោយកង សុធា