នគរបាលបាននិយាយកាលពីថ្ងៃទី២៧ ខែឧសភាថា សាលាដំបូងខេត្តបាត់ដំបងបានចោទប្រកាន់គ្រូបង្រៀនម្នាក់នៅសាលាបឋមសិក្សាពីបទផលិត និងចែកចាយរូបភាពអាសអាភាស បន្ទាប់ពីជននេះបានបង្ហោះរូបថតអាក្រាតនៃអតីតមិត្តស្រីរបស់ខ្លួនលើទំព័របណ្តាញសង្គមហ្វេសប៊ុក។
លោកប៊ន វណ្ណារ៉ា នាយរងការិយាល័យនគរបាលប្រឆាំងការជួញដូរមនុស្សខេត្ត បានមានប្រសាសន៍ថាឈ្មោះ សោម វឌ្ឍន: អាយុ៤៦ឆ្នាំ ត្រូវបានចាប់ខ្លួននៅឯសាលាបឋមសិក្សាជើងទីងក្នុងឃុំធិបតី ស្រុកគាស់ក្រឡ ខេត្តបាត់ដំបង កាលពីថ្ងៃព្រហស្បតិ៍ បន្ទាប់ពីអតីតមិត្តស្រីអាយុ៣២ឆ្នាំរបស់ជននេះ បានដាក់ពាក្យបណ្តឹងទៅការិយាល័យនគរបាលប្រឆាំងការជួញដូរមនុស្សខេត្ត នៅពេលដែលជនរងគ្រោះបានឃើញរូបថតរបស់ខ្លួននៅក្នុងអីុនធើណិត។
លោក វណ្ណារ៉ា បានមានប្រសាសន៍ថា “ យើងបានចាប់ខ្លួនជននេះមួយថ្ងៃ បន្ទាប់ពីជនរងគ្រោះដែលរស់នៅភ្នំពេញ បានមកដាក់ពាក្យបណ្តឹងនៅការិយាល័យនគរបាលប្រឆាំងការជួញដូរមនុស្សខេត្តបាត់ដំបងរបស់យើងកាលពីថ្ងៃពុធ”។ លោក វណ្ណារ៉ា បានមានប្រសាសន៍បន្តថាឈ្មោះវឌ្ឍន: ឥឡូវនេះកំពុងជាប់ឃុំបណ្តោះអាសន្ននៅពន្ធនាគារខេត្ត បន្ទាប់ពីតុលាការបានចោទប្រកាន់ជននេះតាមមាត្រា៣៩នៃច្បាប់ប្រឆាំងការជួញដូរមនុស្ស ហើយលោកបានបន្តថា ជនល្មើសបានបង្ហោះរូបថតតាមអីុនធើណិតពីព្រោះជនល្មើសនៅតែស្រលាញ់ជនរងគ្រោះជាអតីតមិត្តស្រីនិងមិនយល់ព្រមឲ្យនាងរៀបការជាមួយបុរសផ្សេង។
លោក វណ្ណារ៉ាបានមានប្រសាសន៍ថា“ជនល្មើសបានសារភាពទទួលស្គាល់រាល់ទង្វើរបស់ខ្លួន ដែលខ្លួនបានធ្វើលើអតីតមិត្រស្រីរបស់ខ្លួនហើយបាននិយាយថាខ្លួនមានកំហឹង ដោយសារតែនាងបានរៀបការជាមួយបុរសម្នាក់ទៀតកាលពីខែមេសាដោយមិនបានទូរសព្ទប្រាប់ខ្លួនឲ្យដឹងជាមុនអំពីអាពាហ៍ពិពាហ៍នោះ”។
លោក វណ្ណារា បានបន្តថា “ជនល្មើសបានព្រមានជនរងគ្រោះថា ខ្លួននឹងបង្ហោះរូបថតនេះតាមអិុនធើណិត បើសិនជានាងរៀបការ។ជាដំបូងជននេះបានទូរស័ព្ទទៅជនរងគ្រោះហើយបានគំរាមនាងថាខ្លួននឹងបង្ហោះរូបថតនោះ ហើយគ្រោយមកបានផ្ញើរូបថតអាក្រាតសខ្មៅបួនសន្លឹកទៅកាន់ផ្ទះជនរងគ្រោះដោយដាក់អាស័យដ្ឋានក្លែងក្លាយ។ ឈ្មោះវឌ្ឍនៈបានទូរស័ព្ទទៅប្រាប់ជនរងគ្រោះថា ខ្លួនបានបង្ហោះរូបថតតាមអិុនធើណិតរួចហើយ ហើយក៏បានប្រាប់ទៅមិត្តភ័ក្រប្រាំនាក់របស់គាត់ឲ្យបើកមើលរូបភាពអាក្រាតនោះតាមអិុនធើណិតសទៀតផង។
នេះជាករណីទីបីហើយនៅក្នុងខេត្តបាត់ដំបងក្នុងឆ្នាំនេះដែលមានពាក់ព័ន្ធជាមួយគ្រូបង្រៀននិងជាមួយសិស្សដែលជាប់ពាក់ព័ន្ធពីបទប្រព្រឹត្តអំពើអាណាចារ។ (រាយការណ៍បន្ថែមដោយ គឹម ចាន់)
ប្រែសម្រួលដោយ ឃិន ណៃ