មន្ត្រីម្នាក់បានលើកឡើងថា ស្ត្រីកម្ពុជាម្នាក់ដែលត្រូវបាននាំទៅព្យាបាលនៅមន្ទីរពេទ្យ បន្ទាប់ពីទទួលរងនូវការវាយដំ និងការរំលោភបំពានយ៉ាងធ្ងន់ធ្ងរ ខណៈពេលធ្វើជាអ្នកបម្រើតាមផ្ទះនោះ នឹងបន្តស្នាក់នៅក្នុងប្រទេសម៉ាឡេសីុដើម្បីចូលរួមដំណើរការតាមផ្លូវច្បាប់ប្រឆាំងនឹងថៅកែជនជាតិម៉ាឡេសីុ រហូតដល់ដំណើរការចប់រួចរាល់។
ជនជាប់ចោទឈ្មោះតាន់ ម៉ុងហូ៊វ៉ៃ អាយុ៣៦ឆ្នាំ និងប្រពន្ធឈ្មោះ អេង ឡាយសាងអាយុ៣៦ឆ្នាំត្រូវបានចោទប្រកាន់កាលពីថ្ងៃអង្គារ ពីបទរំលោភបំពានលើរាងកាយរបស់ជនរងគ្រោះឈ្មោះ ជា ផល្លា អាយុ២៨ឆ្នាំនិងតាមការសង្ស័យថា បានបង្ខំនាងឲ្យសីុលាមក និងផឹកទឹកនោមខ្លួនឯង។
លោក ឆាយ កុសល លេខាទី២នៅស្ថានទូតខ្មែរប្រចាំទីក្រុងគូឡាឡាំពួបានថ្លែងកាលពីម្សិលមិញថា នាង ផល្លា ត្រូវបានអនុញ្ញាតឲ្យស្នាក់នៅក្នុងប្រទេសម៉ាឡេសីុរហូតដល់ចប់ការកាត់ទោសប្តីប្រពន្ធមួយគូនេះនិងទទួលសំណងនៅក្នុងតុលាការម៉ាឡេសីុរួចរាល់ហើយសិន។ លោកបានបន្តថា “ស្ថានទូតកម្ពុជាបានអនុញ្ញាតឲ្យនាងស្នាក់នៅដើម្បីឲ្យគេអាចដំណើរការរៀបចំឯកសារប្តឹងទៅតុលាការ”។ លោកបានបន្ថែមថា នាង ផល្លា បានទូរស័ព្ទជួបគ្រួសាររបស់នាងនៅក្នុងប្រទេសកម្ពុជាកាលពីម្សិលមិញ ។
លោក កុសល មិនអាចស្មានដឹងថាត្រូវចំណាយពេលយូរប៉ុណ្ណានោះទេទម្រាំនាងផល្លាអាចត្រឡប់ទៅកម្ពុជាវិញ។ ប្តីប្រពន្ធនេះត្រូវបានអនុញ្ញាតឲ្យរស់នៅក្រៅឃំុបណ្តោះអាសន្ន និងមិនទាន់បានកំណត់កាលបរិច្ឆេទសម្រាប់បើកសវនាការជំនំុជម្រះរឿងក្តីរបស់ពួកគេនៅឡើយទេ។
លោក កុយ គួង អ្នកនាំពាក្យក្រសួងការបរទេសកម្ពុជាបានថ្លែងថា នាង ផល្លា ត្រូវវះកាត់ថ្គាម ដែលរងរបួសធ្ងន់ដោយសារថៅកែ វាយ។លោកបានបន្ថែមថា “ ថ្គាមគាត់វៀច។គាត់មិនអាចទទួលទានអាហារបានទេ”។
ក្រុមហ៊ុនខេមបូឌា លេប័រ ស៊បប្លាយ (Cambodian Labor Supply Pty) ក្នុងរាជធានីភ្នំពេញបានជ្រើសរើសនាង ផល្លា ឲ្យទៅធ្វើការក្នុងប្រទេសម៉ាឡេសីុ ហើយការងាររបស់នាងក្នុងប្រទេសម៉ាឡេសីុនោះត្រូវបានទីភ្នាក់ងារស្រីុ ម៉ាវ៉ា (Sri Mawar agency)ជាអ្នករកឲ្យ។ ក្រុមហ៊ុនម៉ាឡេសីុនេះបានរកឃើញថា នាងផល្លាត្រូវបានគេរំលោភបំពានមុនពេលចប់កិច្ចសន្យាការងាររយៈពេលពីរឆ្នាំជាមួយគ្រួសារនេះ ហើយនាងត្រូវត្រឡប់មកកម្ពុជាវិញ។
លោក អាន ប៊ុនហាក់ ប្រធានសមាគមភ្នាក់ងារជ្រើសរើសពលករកម្ពុជាបានថ្លែងថា ក្រុមកហ៊ុននឹងចេញថ្លៃព្យាបាលនិងជួយទារប្រាក់សំណងពីគ្រួសារនេះឲ្យនាង។
លោក ជែមស៍ កូសេន “ (James Kosen)នាយកគ្រប់គ្រងក្រុមហ៊ុន ខេមបូឌា លេប័រស៊បប្លាយ បានថ្លែងថា ក្រុមហ៊ុនកំពុងសើុបអង្កេតរឿងនេះដោយផ្ទាល់។ នៅពេលសួរថា តើក្រុមហ៊ុនគួរតែមានប្រព័ន្ធសើុបអង្កេតការរំលោភបំពានបែបនេះឲ្យបានឆាប់ឬយ៉ាងណានោះ លោក កូសេន បានលើកឡើង ថា ក្នុងករណីជាច្រើន ការរំលោភបំពានបែបនេះមិនមានរយៈពេលយូរដូចករណីរបស់នាង ផល្លានោះទេ។
លោកបានអះអាងថា “ កម្រមានអ្នកណាត្រូវគេធ្វើបាប ហើយស៊ូនៅទ្រាំទទួលរងការរំលោភបំពានបែបនោះណាស់ ពីព្រោះមានឱកាសអាចរត់គេចខ្លួនច្រើនណាស់”។ កាលពីខែតុលា លោកនាយករដ្ឋមន្ត្រី ហ៊ុន សែន បានចេញបញ្ជាឲ្យផ្អាកជាបណ្តោះអាសន្ននូវការបញ្ជូនពលករកម្ពុជាទៅធ្វើការនៅប្រទេសម៉ាឡេសីុ។
ប៉ុន្តែ នៅតែមានពលករកម្ពុជាប្រហែល៥០.០០០នាក់ដែលកំពុងធ្វើការនាពេលបច្ចុប្បន្នជាស្ត្រីបម្រើតាមផ្ទះនៅប្រទេសម៉ាឡេសីុ នេះបើយោងតាមលោក មឿន តុលាប្រធានកម្មវិធីការងារនៅមជ្ឈមណ្ឌលអប់រំច្បាប់សម្រាប់សហគមន៍។ គ្រួសារជាច្រើនបានបាត់ទំនាក់ទំនងជាមួយកូនស្រីរបស់ខ្លួន ដែលកំពុងធ្វើការនៅក្នុងប្រទេសមា៉ឡេសីុ។
កាលពីម្សិលមិញ លោក មឿន តុលា បានជំរុញឲ្យរដ្ឋាភិបាលម៉ាឡេសីុនិងកម្ពុជាយកចិត្តទុកដាក់បន្ថែមទៀត ដើម្បីការពារស្រ្តីអ្នកបម្រើទាំងនោះ។ លោកបានថ្លែងថា “ រដ្ឋាភិបាលទាំងពីរកំពុងព្យាយាមបង្កើតកម្មវិធីត្រួតពិនិត្យស្ត្រីទាំងនោះ ប៉ុន្តែរដ្ឋាភិបាលទាំងពីរធ្វើការនេះយឺតយ៉ាវណាស់”៕
ប្រែសម្រួលដោយ ហម សុផាណ្ណា