30 C
Phnom Penh

ក្រសួង​ព័ត៌មាន​ហាម​​ប្រាមមិន​ឲ្យ​ ស្ថានីយ​វិទ្យុ​​​ផ្សាយអំ​ពី​​ភាព​មិន​ ប្រក្រតី​នៃ​ដំណើរ​ការ​បោះ​ឆ្នោត​​

ដោយ ឌឹ ខេមបូឌា ដេលី

បទវិភាគ

មន្ត្រី​មួយ​រូប​បាន​មានប្រសាសន៍​ថា ក្រសួង​ព័ត៌មាន​បាន​ចេញ​បទ​បញ្ជា​មិន​ឲ្យ​ស្ថានីយវិទ្យុ​ក្នុង​ស្រុក​​ចាក់ផ្សាយបន្ដ​នូវ​កម្មវិធី​ពី​​វិទ្យុ​ ដែល​​គាំទ្រ​ដោយ​សហរដ្ឋមេរិក និយាយ​​​អំពី​​ការ​បោះ​ឆ្នោត​នៅ​ចុង​សប្ដាហ៍​នេះទេ។

វិទ្យុ​សំឡេង​​សហរដ្ឋអាមេរិក​ (VOA) ដែល​ជា​​វិទ្យុ​​ផ្លូវ​ការ​​របស់​រដ្ឋា​ភិបាលអាមេរិក​និង​វិទ្យុ​អាស៊ី​សេរី (RFA) ដែល​ជា​ស្ថានីយ​វិទ្យុ​មួយ​​ឧបត្ថម្ភ​មួយ​ផ្នែក​ដោយ​រដ្ឋាភិបាល​អាមេរិក​ ដែរ​នោះ សុទ្ធ​តែ​មាន​គម្រោង​ផ្សាយ​​ជា​ភាសាខ្មែរ​ ត្រូវ​ផ្អាកការ​ផ្សាយ​របស់​ខ្លួន​ដោយ​គ្មាន​ការ​ជូន​ដំណឹង​ឡើយ​។

លោកប៊ុតបូវុធអគ្គនាយក​នៃអគ្គ​​នាយក​ដ្ឋាន​ព័ត៌មាន​ និង​សោតទស្សន៍​របស់​ក្រសួង​ព័ត៌មាន មាន​ប្រសាសន៍​កាល​ពី​ម្សិល​មិញ​ថា មន្ត្រី​ក្រសួង​បាន​ស្នើ​កុំ​ឲ្យ​ស្ថានីយវិទ្យុ FM ក្នុង​ស្រុក​​​ផ្អាក​ការ​ចាក់​ផ្សាយ​​​កម្មវិធី​របស់​វិទ្យុ​សំឡេង​សហ​រដ្ឋ​អាមេរិក​ និង​អាស៊ីសេរី ព្រោះ​វិទ្យុ​ទាំង​ពីរ​ជា​វិទ្យុ​បរទេស​ ហេតុ​ដូច្នេះ​ហើយ​​ “វាមិន​ស្ថិត​នៅ​ក្រោម​ច្បាប់​របស់​យើង​ទេ​”។

លោកប៊ុតបូវុធបាន​លើក​ឡើង​ថា“​យើង​​ហាម​ឃាត់​មិន​ឲ្យ​ស្ថានីយវិទ្យុ​ទាំង​នេះ​ចាក់​​ផ្សាយ ​ពី​ព្រោះ​យើង​ខ្លាចថា វិទ្យុ​ទាំង​នេះ​នឹង​ផ្សាយ​ព័ត៌​មាន​លម្អៀង​អំពី​ដំណើរ​ការ​បោះ​ឆ្នោត​ឃុំ-សង្កាត់​េនះ​”។

លោក​បាន​មាន​ប្រសាសន៍​ថាមជ្ឈ​មណ្ឌល​ព័ត៌មាន​ស្ត្រី​កម្ពុជា​ វិទ្យុ​សម្បុក​​ឃ្មុំ​ វិទ្យុ​សារិកានិង​វិទ្យុ​ FM ៩០ក្នុង​រាជធានី​ភ្នំ​ពេញ​ ក៏​ដូច​ជាវិទ្យុ​អង្គរ​រដ្ឋាក្នុង​ខេត្ដ​សៀម​រាប​ ត្រូវ​បាន​គេ​ប្រាប់​មិន​ឲ្យ​ចាក់ផ្សាយ​ពី​កម្មវិធី​របស់​វិទ្យុ​អាស៊ីសេរី ឬវិទ្យុ​សំឡេងសហរដ្ឋ​អាមេរិកនៅ​​ថ្ងៃ​សៅរ៍​ និង​ថ្ងៃ​អាទិត្យ​នេះទេ​។

លោកខៀវសួនអគ្គនាយក​វិទ្យុ​ FM​៩០​ដែល​ជា​តំណាង​តែ​មួយ​គត់នៅ​ក្នុង​ចំណោម​​ស្ថានីយវិទ្យុ​​ទាំង​នេះ​ បាន​យល់​ព្រម​ធ្វើ​អត្ថា​ធិប្បាយអំ​ពី​បទ​បញ្ជា​របស់​រដ្ឋាភិបាល​ បាន​មានប្រសាសន៍​ថា ស្ថានីយវិទ្យុ​របស់​លោក​គ្មាន​​ជម្រើស​ក្រៅ​ពី​​​ធ្វើ​តាម​​​សំណើ​របស់​ក្រសួង​ព័ត៌មាននោះទេ​។ លោក​បា​ន​មាន​ប្រាសាសន៍​ថា “ ​ប្រសិន​យើង​មិន​ព្រម​បិទ​ គេ​នឹង​ប្រើ​កម្លាំង​បិទ​ដោយ​ផ្ទាល់​”។

លោកហ៊ួតវុទ្ធីប្រធាន​ការិយាល័យ​ប្រចាំ​​នៅកម្ពុជា​របស់​វិទ្យុ​អាស៊ីសេរី ​ មានប្រសាសន៍​ថាលោកប៊ុតបូវុធបាន​ប្រាប់​លោក​ថាកម្មវិធី​​

របស់​វិទ្យុ​អាស៊ីសេរី “ ជ្រៀត​ជ្រែក​ដល់​ការ​បោះ​ឆ្នោត​ឃុំ-សង្កាត់”។

លោកគ្រីសដេឈឺត (Chris Decherd) ប្រធាន​វិទ្យុ​សំឡេង​​សហរដ្ឋអាមេរិក​ផ្នែក​​ភាសាខ្មែរ​ ​មាន​ប្រសាសន៍​ថា ក្រសួង​ព័ត៌​មាន​

មិន​បាន​ទាក់​ទង​លោក​ដោយ​ផ្ទាល់​​អំពី​បទ​បញ្ជា​មិន​ឲ្យ​ចាក់​ផ្សាយ​​​កម្មវិធី​របស់​វិទ្យុ​​សំឡេង​​សហរដ្ឋ​អាមេរិក​នោះ​ទេ​។

លោក ដេឈឺត បាន​លើក​ឡើង​កាល​ពី​ម្សិល​មិញ​ថា “ វាស្ថិត​នៅក្រៅ​ការ​គ្រប់​គ្រង​របស់​យើង​។ថ្ងៃ​នេះ​​ជា​ថ្ងៃ​សំខាន់​មួយ​សម្រាប់​​

ប្រទេស​កម្ពុជា​នៅក្នុង​ការ​កសាង​ស្ថាប័ណ្ណ​នេះ​ជាយូរ​មក​ហើយ​ និង​ដំណើរ​ការ​កសាង​លទ្ធិ​​ប្រជា​ធិបតេយ្យ​។យើង​មាន​កម្មវិធី​សំខាន់​

សម្រាប់​ផ្សាយ​នៅ​យប់​នេះ​ ហើយ​ការ​ផ្សាយ​នេះ​មាន​បំណង​បម្រើ​ប្រជាជន​កម្ពុជា​​ដូច្នេះហើយ​វា​ជា​រឿង​គួរឲ្យ​សោក​ស្ដាយ​ណាស់​ប្រសិន​បើ​កម្មវិធី​នេះ​មិន​ត្រូវ​បាន​​​​ផ្សាយ​ឲ្យ​ប្រជា​ពលរដ្ឋកម្ពុជា​បាន​ដឹង​ទេនោះ​”។

លោក ដេឈឺត បាន​លើក​ឡើង​ថា វិទ្យុ​សំឡេង​សហរដ្ឋអាមេរិក​នឹង​នៅ​តែ​ផ្សាយ​តាម​​​រលក​ធាតុ​អាកាស​កម្ពស់ទាប​ និង​កម្ពស់​​មធ្យម​​នៅ​ទូ​ទាំង​ប្រទេស​កម្ពុជា ប៉ុន្ដែ​លោក​បាន​បន្ដ​ថាជាង​ពាក់​កណ្ដាល​នៃ​ប្រជា​ពលរដ្ឋ​កម្ពុជា​​​ស្ដាប់​វិទ្យុ​សំឡេងសហរដ្ឋ​អាមេរិកតាម​រ​យៈ​ស្ថានីយវិទ្យុ​ FM ។

លោកសៀនម៉ាកអុិន​តុស (Sean McIntosh)​​​​​​ អ្នក​នាំ​ពាក្យ​ស្ថាន​ទូត​សហរដ្ឋ​អាមេរិក​ប្រចាំ​រាជធានី​ភ្នំពេញ​ បាន​លើក​ឡើង​តាម​អីុ​ម៉េល​ថា ស្ថាន​ទូត​សហរដ្ឋ​អាមេរិក​ “កំពុង​ប្រមូល​ព័ត៌មាន​ទាំង​អស់​អំពី​​ស្ថាន​ការណ៍​នេះ​”។

កាល​ពី​ព្រឹក​ម្សិល​មិញវិទ្យុ​សំឡេង​ប្រជា​ធិបតេយ្យ (VOD) ដែល​ជា​វិទ្យុ​របស់​​​មជ្ឈ​មណ្ឌល​សិទ្ធិ​មនុស្ស​កម្ពុជា​ បាន​ចាប់​ផ្ដើម​​ផ្សាយ​​ផ្ទាល់​រយៈ​ពេល​បួន​ម៉ោង​កន្លះ​ គឺ​​នៅ​ម៉ោង​៥ និង៣០ព្រឹក​តាម​វិទ្យុ​សារិការ​FM ១០៦.៥ក្នុង​រាជធានី​ភ្នំពេញ​ ប៉ុន្ដែ​ការ​​ផ្សាយ​ផ្ទាល់​នេះ​ត្រូវ​បាន​កាត់​ផ្ដាច់​ទៅ​​វិញ​នៅ​ម៉ោង​៨និង​៣៥​នាទី​ព្រឹក។

លោក អៀត ដារ៉ាវុធ និពន្ធ​នាយក​ជាន់​ខ្ពស់​វិទ្យុ​សំឡេងប្រជាធិបតេយ្យ​បានថ្លែង​ថា “ក្រសួង​ព័ត៌មាន​បាន​ទូរស័ព្ទ​ប្រាប់​យើង​ឲ្យ​បញ្ឈប់​ការ​ផ្សាយ​អំពី​ភាព​មិន​ប្រក្រតីនៃការ​បោះ​ឆ្នោត​ ដូច​ជា​ប្រជា​ពលរដ្ឋ​​រក​មិន​​​ឃើញ​ឈ្មោះ​របស់​ពួក​គាត់​នៅ​​មជ្ឈ​មណ្ឌល​បោះ​ឆ្នោត​ ហើយ​មាន​ជន​ជាតិ​វៀត​ណាម ដែល​មិន​និយាយ​ខ្មែរ​ច្បាស់​ទៅ​បោះ​ឆ្នោត​”។

លោក​ ប៉ាងួនទៀងនាយក​គ្រប់​គ្រង​វិទ្យុ​សំឡេង​ប្រជា​ធិបតេយ្យ​បាន​លើក​ឡើង​ថាការ​ចាក់​ផ្សាយមួយ​ផ្សេង​ទៀត​​កាល​ពី​ព្រឹក​ម្សិល​មិញ​ តាម​វិទ្យុ​អង្គរ​រដ្ឋា​ ក្នុង​ខេត្ត​សៀម​រាប​ ក៏​ត្រូវ​បាន​លុប​ចោល​ដែរ​ ដោយ​​លោកកែវ រដ្ឋា ម្ចាស់​ស្ថានីយវិទ្យុ​នេះ​បាន​អះអាង​ថាអង់តែន​ស្ថានីយវិទ្យុ​របស់​លោក​ខូច​។

លោកប៊ុតបូវុធបាន​មាន​ប្រសាសន៍​ថាក្រសួង​របស់​លោក​មិន​បាន​ហាម​វិទ្យុ​សំឡេង​ប្រជាធិបតេយ្យ​មិន​ឲ្យ​ធ្វើ​ការ​ផ្សាយ​នោះ​ទេ​ ប៉ុន្ដែ​ក្រសួង​របស់​លោក​បាន​ស្នើ​ឲ្យ​ពួក​គេ​បញ្ឈប់​ការ​ផ្សាយ​​រិះគន់​ចំពោះ​​គណៈកម្មាធិការ​ ​ជាតិ​រៀប​ចំការ​បោះ​ឆ្នោត​ (គ.ជ.ប)​។លោក​បាន​បន្ថែម​ថា វិទ្យុ​សំឡេង​ប្រជា​ធិបតេយ្យ​មិន​​គួរ​ផ្សាយ​ព័ត៌មាន​អំពី​ការ​បណ្ដេញ​​ប្រជា​ពល​រដ្ឋ​ចេញ​ពី​សហគម​ន៍បឹង​កក់​ និង​សហគមន៍​​បុរី​កីឡា ​នៅ​ពេល​ជិត​ដល់​ថ្ងៃ​បោះ​ឆ្នោត​ឃុំ-សង្កាត់​នោះទេ។

លោក ទេព នីថា អគ្គលេខាធិការ​គណៈ​កម្មាធិការ​ជាតិ​រៀប​ចំការ​បោះ​ឆ្នោត​បាន​មាន​ប្រសាសន៍​ថា វាជាការ​ត្រឹម​ត្រូវ​ហើយ​ក្នុង​​ការហាម​ឃាត់​ការ​ផ្សាយ​ណា​ ដែល​អាច​បង្ក​ឲ្យ​មាន​ការ​យល់​ច្រឡំ​ អំឡុង​ការ​បោះ​ឆ្នោត​ឃុំ-សង្កាត់​។

លោក​បាន​លើក​ឡើង​ថា “ខ្ញុំ​ដឹង​ថា វិទ្យុ​ពីរ​ទៅ​បី​បាន​ផ្សាយ​ព័ត៌មាន​អវិជ្ជមានជា​ច្រើនអំពី​​រដ្ឋាភិបាល​ ដែល​ជា​ព័ត៌​មាន​លម្អៀង​។ ខ្ញុំ​គិត​ថា ក្រសួង​ព័ត៌មាន​អនុវត្ត​តាម​​គោល​ការ​ណ៍គ.ជ.ប”។

លោក ហង្ស ពុទ្ធា ប្រធាន​គណៈកម្មាធិ​ការ​​​អព្យាក្រឹត​​ និង​មិន​លម្អៀង​សម្រាប់​ការ​បោះ​ឆ្នោត​ដោយ​សេរី​នៅ​​កម្ពុជា​​​មាន​ប្រសាសន៍​ថាបម្រាម​មិន​ឲ្យ​ចាក់​​ផ្សាយព័ត៌​មាន​តាម​វិទ្យុ​​េនះ​គឺជា​ការ​ចាប់​ពិរុទ្ធ​។    លោក​បាន​មាន​ប្រសាសន៍​ថា “ [ស្ថានីយ​វិទ្យុ​ទាំង​​េនះ​] មិន​លម្អៀង​នោះ​ទេ​។ស្ថានីយ​​ទាំង​នោះ​ផ្ដោត​លើ​វិជ្ជាជីវៈរបស់​ខ្លួន​”។

លោកហង្សពុទ្ធាបាន​បន្ថែម​ថាស្ថានីយ​វិទ្យុ​ និង​ស្ថានីយទូរទស្សន៍ផ្សេង​ៗ​ទៀត​ដែល​​មិន​បាន​បញ្ឈប់​ការ​ផ្សាយ​របស់​ខ្លួន​អំពី​ការ​បោះ​ឆ្នោត​ឃុំ-សង្កាត់នោះ​ “​ផ្សាយតែ​សកម្ម​ភាព​របស់​រដ្ឋាភិបាល​ និង​សកម្មភាព​របស់​គណបក្ស​កាន់​អំណាច​តែ​ប៉ុណ្ណោះ”៕

ប្រែ​សម្រួល​​ដោយ​ ស៊ាស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស