ប្រធានភូមិថ្លុកត្របែក មកពីគណបក្សប្រជាជនកម្ពុជា នៅក្នុងឃុំភ្នំបាត ក្នុងខេត្តកណ្តាល ដែលបានបដិសេធមិនអនុញ្ញាតឲ្យសមាជិកគណបក្សសិទ្ធិុមនុស្ស ដែលជាគណបក្សប្រឆាំង ប្រើផ្លូវធំកាត់តាមទីប្រជុំជនឡើយ ដោយសារតែការប្រើពាក្យសម្តីគ្រោតគ្រាតរបស់ពួកគេ ប្រឆាំងគណបក្សរបស់គាត់ នៅមុនពេលបោះឆ្នោតឃុំ-សង្កាត់កាលពីដើមខែនេះ។
លោកប្រធានភូមិ ចេង សុខុម បានមានប្រសាសន៍តាមទូរស័ព្ទកាលពីម្សិលមិញថា“ខ្ញុំបានហាមមនុស្សទាំងនេះ មិនឲ្យប្រើផ្លូវនេះ ពីព្រោះពួកគេមិនបានថ្លែងអំណរគុណអ្នកកសាងផ្លូវនេះទេ”។ លោកបានពន្យល់ថាផ្លូវនេះត្រូវបានក្រាលក្រួសក្រហមកាលពីឆ្នាំមុនជាមួយមូលនិធិឃុំចំនួន៤លានរៀល។
លោក សុខុម បានចេញបញ្ជានេះដំបូងនៅឯកិច្ចប្រជុំថ្នាក់ភូមិមួយកាលពីសប្តាហ៍មុន និងបាននិយាយពីរឿងនេះម្តងទៀត នៅឯពិធីបុណ្យមួយក្នុងមូលដ្ឋានកាលពីថ្ងៃសៅរ៍។ លោកបានលើកឡើងថា “ខ្ញុំគ្រាន់តែចង់លើកឡើងពាក្យសម្តីទាំងនេះ ដើម្បីកុំឲ្យមានការរិះគន់ ពីព្រោះអ្នកទាំងនោះតែងតែរិះគន់យើង មុនពេលបោះឆ្នោត និងរិះគន់ថា គណបក្សប្រជាជនកម្ពុជា គឺជាអាយ៉ងរបស់វៀតណាម”។
អ្នកភូមិម្នាក់ឈ្នោះ រឿន ធី ដែលគាំទ្រគណបក្សសិទ្ធិមនុស្ស នៅក្នុងការបោះឆ្នោតនេះ បានមានប្រសាសន៍ថា គាត់បានឮថាលោក សុខុមចេញបញ្ជានេះ។គាត់បាននិយាយថា “ ប្រធានភូមិរូបនេះ ពិតជាបានហាមអ្នកគាំទ្រគណបក្សសិទ្ធិមនុស្ស មិនឲ្យប្រើផ្លូវក្នុងមូលដ្ឋាននេះមែន។ខ្ញុំគិតថា ប្រធានភូមិរូបនេះខឹងនឹងខ្ញុំ ពីព្រោះខ្ញុំបានចូលរួមជាមួយគណបក្សសិទ្ធិមនុស្សសម្រាប់យុទ្ធនាការបោះឆ្នោតនេះ”។
លោក អ៊ូ ចាន់រិទ្ធ ជាប្រធានក្រុមការងាររបស់គណបក្សសិទ្ធិមនុស្សនៅក្នុងខេត្តនេះបានមានប្រសាសន៍ថាការគំរាមកំហែងបែបនេះពីមន្ត្រីមូលដ្ឋានរបស់គណបក្សប្រជាជនកម្ពុជា គ្មានអ្វីថ្មីនោះទេ។
លោកបានមានប្រសាសន៍ថា “ខ្ញុំបានឭភាសាេនះច្រើនលើកហើយ។ ខ្ញុំគិតថា វាជាការធម្មតាទេសម្រាប់យើង ពីព្រោះពួកគេតែងតែគំរាម និងបំភិតបំភ័យដូច្នេះ”។ទោះជាធម្មតា ឬក៏មិនធម្មតាក៏ដោយ លោកម៉ែន មករាអ្នកសម្របសម្រួលរបស់អង្គការសិទ្ធិមនុស្សអាដហុកប្រចាំខេត្តនេះបានថ្លែងថា ផ្លូវសាធារណៈបែបនេះ មិនមែនជាកម្មសិទ្ធិរបស់បក្សណាមួយនោះទេ ហើយនរណាក៏អាចប្រើផ្លូវនេះបានដែរ។
លោកបានមានប្រសាសន៍ថា “ប្រធានភូមិរូបនេះមិនគួរប្រើអំណាចរបស់ខ្លួន ហាមឃាត់អ្នកដទៃនោះទេ ពីព្រោះពួកគេជាអ្នកគាំទ្រគណបក្សនយោបាយ ពីព្រោះការធ្វើដូច្នេះជាការខុសច្បាប់ និងការរើសអើងផ្នែកនយោបាយ”។ លោក ជាម យៀប សមាជិកសភាគណបក្សប្រជាជនកម្ពុជា បានមានប្រសាសន៍ថាលោកសង្ស័យចំពោះការអះអាងរបស់គណបក្សសិទ្ធិមនុស្ស។ លោកបានមានប្រសាសន៍ថា “ ខ្ញុំគិតថាអាជ្ញាធរមូលដ្ឋានរបស់គណបក្សប្រជាជនកម្ពុជារបស់យើង មិនបានធ្វើដូចដែលគណបក្សប្រឆាំងចោទនោះទេ”។ លោកបានមានប្រសាសន៍បន្ថែមទៀតថា ហើយបើទោះជាពួកគេបានធ្វើដូច្នេះមែន វាទំនងជាការលេងសើចប៉ុណ្ណោះ។ គណបក្សប្រជាជនកម្ពុជា បានទទួលជ័យជម្នះក្នុងការបោះឆ្នោតឃំុ-សង្កាត់កាលពីថ្ងៃទី៣ ខែមិថុនា ដោយទទួលបានមុខតំណែងចៅសង្កាត់និងមេឃំុជាង១.៦០០។គណបក្ស
សិទ្ធមនុស្ស ដែលចូលរួមក្នុងការបោះឆ្នោតឃំុ-សង្កាត់ជាលើកដំបូងរបស់ខ្លួន ទទួលបាន១៨អាសនៈ៕
ប្រែសម្រួលដោយចេវប៊ុននី