សាលារាជធានីភ្នំពេញកាលពីម្សិលមិញបានបដិសេធ ចំពោះការអះអាងដែលបានផ្សាយតាមប្រព័ន្ធអុីនធើណិតថាពហុកីឡាដ្ឋានជាតិអូឡាំពិកក្នុងរាជធានីភ្នំពេញ ដែលមានចំណាស់៤៨ឆ្នាំមកហើយនឹងត្រូវគេវាយកម្ទេចចោលទាំងស្រុង។
លោក ប៉ា សុជាតិវង្ស អភិបាលរងសាលារាជធានីបានមានប្រសាសន៍ថា“នឹងពុំមានការវាយកម្ទេចពហុកីឡាដ្ឋានជាតិអូឡាំពិកនេះចោលទេ”។ គេហទំព័រជាច្រើន បានផ្សព្វផ្សាយសេចក្តីរាយការណ៍ថាពហុកីឡាដ្ឋានជាតិ ដែលគូរប្លង់ដោយលោក វណ្ណ ម៉ូលីវណ្ណ ស្ថាបត្យករកម្ពុជាដ៏ល្បីឈ្មោះនោះអាចនឹងត្រូវគេវាយចោល សម្រាប់គម្រោងអភិវឌ្ឍន៍មួយរបស់សាជីវកម្មវិនិយោគទុនកម្ពុជាក្រៅប្រទេស(OCIC) ។
លោកសុជាតិវង្សបានមានប្រសាសន៍ថាប្រសិនបើមានរឿងអ្វីកើតឡើងមែននោះសាលារាជធានីនឹងធ្វើការ ដើម្បីអភិរក្សពហុកីឡាដ្ឋានដ៏សំខាន់នេះ។ លោកថ្លែងថា“យើងកំពុងតែពិភាក្សាអំពីផែនការកែលម្អប្រចាំឆ្នាំនិងការជួសជុលពហុកីឡាដ្ឋាននេះដូចជាកន្លែងអង្គុយជាដើម”។
លោក ទូច សំណាង អ្នកគ្រប់គ្រងគម្រោងរបស់ក្រុមហ៊ុន OCIC បានមានប្រសាសន៍ថាក្រុមហ៊ុនដែលបានចុះកិច្ចសន្យាជួលដីទំហំ៦,២ហិកតា ក្នុងខណ្ឌប្រាំពីរមករានៅប៉ែកឦសាននៃពហុកីឡាដ្ឋានរយៈពេល៩៩ឆ្នាំនោះ គ្រោងនឹងចំណាយថវិកាចំនួន២៥០លានដុល្លារ ដើម្បីសាងសង់អគារមួយកម្ពស់៥៥ជាន់អគារពីរទៀតកម្ពស់៣៦ជាន់ និងអគារមានកម្ពស់ស្មើនឹងពាក់កណ្ដាលអគារខាងលើចំនួនប្រាំមួយអគារផ្សេងទៀត នៅខាងជើងពហុកីឡាដ្ឋាននេះ។
លោកបានមានប្រសាសន៍បន្ដទៀតថាគម្រោងអភិវឌ្ឍន៍នេះ មានទាំងផ្សារទំនើបអគារពាណិជ្ជកម្មហាងទំនិញមជ្ឈមណ្ឌលពាណិជ្ជកម្ម និងសណ្ឋាគារផងដែរ ប៉ុន្ដែលោកបានទទូចថាក្រុមហ៊ុនមិនមានគម្រោងវាយកម្ទេចពហុកីឡាដ្ឋាននេះទេ។
លោកឆាលស៍វណ្ណ (Charles Vann) អនុប្រធានប្រតិបត្តិនៃធនាគារកាណាឌីយ៉ា ដែលជាកម្មសិទិ្ធរបស់ OCIC ដែរនោះបានមានប្រសាសន៍ថា “នោះគឺមិនមែនជារឿងពិតនោះទេ។ទាំងនោះគ្រាន់តែជាពាក្យចចាមអារ៉ាមប៉ុណ្ណោះ”។លោកបានបន្ថែមទៀតថា OCIC នឹងចេញព័ត៌មានថ្មីៗពាក់ព័ន្ធនឹងគម្រោងនេះនៅសប្ដាហ៍ក្រោយ។សាជីវកម្ម OCIC កំពុងរៀបចំគម្រោងអភិវឌ្ឍន៍ដ៏ធំមួយ ដែលនឹងចំណាយថវិកាចំនួន ៣.០០០លានដុល្លារសម្រាប់ការអភិវឌ្ឍតំបន់ជ្រោយចង្វា លើផ្ទៃដីទំហំ៤០ហិកតាដែលក្នុងនោះរួមមានទីលានកីឡាដែលក្រុមហ៊ុននេះបានចាត់ទុកថាជា “ពហុកីឡាដ្ឋានជាតិអូឡាំពិក”។
សព្វថ្ងៃ ពហុកីឡាដ្ឋានជាតិអូឡាំពិក គឺជាកន្លែងមួយ ដែលចេញចូលកម្សាន្ដបានតិចតួចប៉ុណ្ណោះដោយអ្នករស់នៅក្នុងរាជធានីភ្នំពេញអាចប្រើប្រាស់ទីលានវាយតិន្នីសអាងហែលទឹក និងទីលានទំនេរធំៗសម្រាប់ហាត់ប្រាណ។
វាក៏ជាទីកន្លែងសម្រាប់ការប្រកួតកីឡាបាល់ទាត់ជាហូរហែនិងជាកន្លែងសម្រាប់រៀបចំកម្មវិធីកីឡាផ្សេងៗទៀតផងដែរ។ លោក ដេវីដ ជច (David George) ប្រធានប្រចាំប្រទេសរបស់ក្រុមហ៊ុនអចលនទ្រព្យ CB Rechard Elllis បានមានប្រសាសន៍ថា “ការវាយកម្ទេចពហុកីឡាដ្ឋាននេះប្រាដកជានឹងមានផលប៉ះពាល់ដល់ទំនាក់ទំនងសាធារណៈ។
ទោះបីជាពហុកីឡាដ្ឋាននេះមិនត្រូវបានគេប្រើប្រាស់ច្រើនក៏ដោយ ក៏ប្រជាពលរដ្ឋចូលចិត្ត និងចង់ឃើញវានៅទីនេះរហូត”។ លោកបន្ថែមថាទំនងជាអ្នកវិនិយោគទុន ឬអ្នកជួលបន្តនឹងមានការរួញរានឹងគម្រោងនេះ។ លោកបានមានប្រសាសន៍ថា “ប្រសិនបើពួកគេវាយកម្ទេចពហុកីឡាដ្ឋាននេះចោលហើយជំនួសដោយអ្វីមួយផ្សេងទៀតនោះប្រជាពលរដ្ឋនឹងគិតថា វាជាកន្លែងដែលពីមុនធ្លាប់ជាពហុកីឡាដ្ឋាន”៕
ប្រែសម្រួលដោយ ហម សុផាណ្ណា