26 C
Phnom Penh

សាលារាជធានី​​​ភ្នំពេញនិយាយ​​​ការ​​​ពារ​​​គម្រោង​​​បឹង​​​កក់ ដោយ​​​​​​វាយ​​​ប្រហារ​​​ក្រុម​​​អ្នករិះ​​​គន់​​

ដោយ ឌឹ ខេមបូឌា ដេលី

បទវិភាគ

សាលា​រាជ​ធានី​ភ្នំ​ពេញ​ បាន​លើក​ឡើង​ក្នុង​​​​សេចក្ដី​ប្រកាសមួយ​ កាលពី​ម្សិល​មិញ​ថាការ​​​ចាក់​ខ្សាច​់​បំពេញ​បឹង​កក់និង​ការ​បណ្ដេញ​អ្នក​ភូមិ​រាប់​ពាន់​នាក់​ចេញ​ ជាការ​ចាំ​បាច់​ក្នុង​ការ​លុប​បំបាត់​ “ស្រី​ពេស្យា​ និង​ភេរវករ​”ដែល​​​ចូល​​​ចិត្តរស់នៅ​ក្នុង​តំបន់​នេះ។

ក្នុង​សេចក្ដី​ប្រកាសមួយចេញ​ផ្សាយលើ​គេហ​ទំព័រ​សាលា​រាជធានី​ ​លើក​ឡើង​ពីទិដ្ឋ​ភាព​​​ច្បាប់ ​សង្គម ​សេដ្ឋកិច្ច​ និង​បរិស្ថាន ដោយ​​វែក​ញែក​​​ថាមន្ត្រី​សាលាក្រុង​គ្មាន​ជម្រើស​ទេ ប៉ុន្ដែ​​​ ត្រូវ​តែ​ចាក់​បំពេញ​បឹង​ ហើយប្រគល់​​ទៅ​ឲ្យក្រុមហ៊ុន​ស៊ូកាគូអុីនដែលជា​ក្រុមហ៊ុន​ឯក​ជន​របស់​លោក​ ឡៅ​ ម៉េងឃិនសមាជិក​ព្រឹទ្ធសភាមកពី​គណ​បក្ស​ប្រជាជន​កម្ពុជា។

សាលារាជ​ធានី​បាន​លើក​ឡើង​ថា“ដោយ​​​សារការជួលស្នាក់នៅចម្រុះពីសំណាក់ប្រជាពលរដ្ឋគ្រប់ប្រភេទ បានប្រែក្លាយទីតាំងនេះទៅ​​ជាតំបន់អសន្តិសុខជាជម្រកនៃឧក្រិដ្ឋជនភេរវកម្មគ្រឿងញៀនពេស្យាចារក្រុម​​​បង​​​តូច ​​​បងធំ”។ ជា​លទ្ធផល​ បឹងកក់​ ទទួល​រង​នូវ “ការ​បាត់​​​បង់ទំនៀមទម្លាប់ប្រពៃណី វប្ប​ធម៌​ខ្មែរ”។

ការ​ស្ដី​បន្ទោស​ភាគ​ច្រើន​របស​់​សាលា​រាជធានី​ គឺ​ផ្ដោត​លើ​ទេសចរសម្ពាយដែល​ធ្វើ​​​​ ឲ្យ​តំបន់នេះ​មាន​កេរ្ដិ៍​ឈ្មោះ​មិនល្អ។សំណង់​អនាធិបតេយ្យ​នៅ​​ក្នុង​តំបន់នេះ​ក៏​​ធ្វើ​ឲ្យ​វា​​​មាន​​​​ការ​លំបាក​ក្នុង​ការ​ពន្លត់​អគ្គិភ័យ​ ដោយ​សារ​តែ​ផ្លូវ​ចង្អៀត​ ហើយ​កាក​សំណល់​​​ពុល​​​បាន​​​​ធ្វើ​ឲ្យផ្ទៃ​ទឹក​បឹង​នេះ​មាន​កំហាប់​ក្រាស់​។

សាលា​រាជ​ធានី​ក៏ចោទ​ប្រកាន់​អតីត​អ្នក​ភូមិនៅ​ក្នុង​តំបន់​នេះដែល​រាប់ពាន់​នាក់​ក្នុង​ចំណោម​នោះ​ ត្រូវ​បាន​បណ្ដេញ​ចេញ​ដោយ​​​​​ហិង្សានិង​ចោទថាបាន​ទន្ទ្រាន​លើ​ដីរដ្ឋ​  ដោយ​​​​សាង​សង់​លំនៅ​ដ្ឋាន​នៅ​លើ​ទឹក​។ហើយ​​​ខណៈ​​​ដែល​គ្រួសារ​ប្រជា​ពល​រដ្ឋ​ ដែល​ត្រូវ​បាន​បណ្ដេញ​ចេញ​ជា​ច្រើន​តវា៉​អំពី​បញ្ហា​ហិរញ្ញ​វត្ថុ​ចាប់​តាំង​ពីមានការ​បណ្ដេញ​ពួកគេ​ សាលា​រាជធានី​បាន​លើក​ឡើង​ថាស្ថាន​ភាព​ក្រីក្រ​ កខ្វក់​ និង​ដ៏តាន​តឹង​នៅ​បឹងកក់​ បាន​ធ្វើ​ឲ្យ​អ្នក​ស្រុក​គ្មាន​ឱកាស​ធ្វើ​ឲ្យជីវិត​​​ខ្លួន​ឯង​​បាន​ប្រសើរឡើយ។

សេចក្ដី​ប្រកាស​នេះក៏បាន​អះអាង​ ដោយ​​​​ចម្រូង​ចម្រាសថាបឹង​ដែល​មាន​ផ្ទៃ​១០៤​​​ហិកតាគ្មាន​តួនាទី​ជួយបង្ហូ​រ​ទឹក​ភ្លៀង​ធម្មជាតិ​ក្នុង​ក្រុង​ ដែលអាច​ធ្វើ​ឲ្យ​មាន​ទឹក​ជំនន់​បាច​សាច​ក្នុង​រាជ​ធានី​ភ្នំពេញនោះទេ​។​​​

ក្នុង​ករណី​នេះ​ សាលា​រាជ​ធានី​លើកឡើង​អំពីការ​សិក្សា​របស់បារាំងដែល​គ្មាន​​ចុះ​កាល​បរិច្ឆេទ ដែល​បាន​រក​ឃើញ​ថា បឹងកក់​មិន​មែន​ជាកន្លែងស្តុក​ទឹក​ក្នុង​ក្រុង​ និង​កា​រសិក្សា​មួយ​ទៀត​រយៈ​ពេលយូរមកហើយ ដោយ​ទី​ភ្នាក​់ងារ​សហ​ប្រតិបត្តិការ​ជប៉ុន (JICA) ដែល​ជា​ទូ​ទៅ​ មិន​បាន​លើក​ឡើង​អំពី​បឹង​នេះ​។

ទោះ​ជា​យ៉ាង​ណា​  សាលា​រាជធានី​មិន​បាន​រាប់​បញ្ចូល​ភស្ដុ​តាង​ថ្មី​ៗ​បន្ថែម​ទៀត​ ដែល​បង្ហាញ​ថា តាម​ពិត​ទៅ​បឹង​កក់​មាន​តួនាទី​យា៉ង​សំខាន់​មួយ​ក្នុង​ការ​ស្រូប​ទឹក​ភ្លៀង​ រាប់​ទាំង​ការ​សិក្សា​ឯក​រាជ្យ​មួយ​ក្នុង​ឆ្នាំ​២០០៨​ ដោយ​ជល​វិទូ​អូស្ត្រាលី ដែល​បាន​ហៅ​ការ​ជន់​លិច​ ដែល​គេ​រំពឹង​ទុក​ពី​ការ​ចាក់​បំពេញ​បឹងកក់​នោះ“ មិន​អាច​ទទួល​យក​បាន​ឡើយ”​ ហើយ​បាន​ជំរុញ​ឲ្យ​រដ្ឋាភិបាល​ពិចារណា​ឡើង​វិញ​។

កាលពី​ខែមុន​ លោក​ វណ្ណ ម៉ូលីវណ្ណ ជា​ស្ថាបត្យករ​ដ៏​លេច​ធ្លោ​របស់​ប្រទេស​​កម្ពុជាក៏​បាន​សង្កត់​ធ្ងន់​ផង​ដែរ ដោយហៅ​ការ​បាត់​បង់​បឹង​នេះថាជា​ “គ្រោះ​ថ្នាក់​”សម្រាប់​ការ​គ្រប់គ្រង​ការ​​បង្ហូរ​ទឹក​ចេញ​នៅ​ក្នុង​រាជ​ធានី​។លោក ម៉ូលីវណ្ណ បាន​មាន​ប្រសាសន៍ថា ការ​សិក្សា​ដែលខំបញ្ចុះបញ្ចូលរដ្ឋាភិបាល​កុំ​ឲ្យ​ចាក់​ខ្សាច់​ក្នុង​បឹង​នេះ កើត​មាន ​ចាប់​តាំង​ពីដើម​​ទសវត្សរ៍​ឆ្នាំ​១៩៩០មក។ លោក  សេងសូឡាឌីមន្ត្រី​ផ្នែក​គម្រោង​ប្រចាំ​អង្គការ​ JICAដែល​បាន​ចំណាយប្រាក់រាប់មុឺនដុល្លារក្នុង​ការ​កាត់​បន្ថយ​ការ​ជន់​លិច​នៅ​តាម​ផ្លូវ​ក្នុង​រាជ​ធានី​ ក៏បាន​លើក​ឡើង​កាលពី​ខែមុន​ផង​ដែរថា ការ​សិក្សា​មួយ​ចំនួន​បាន​ផ្ដោត​លើ​ផល​​​​ប្រយោជន៍​នៃការ​រក្សា​ការពារ​បឹងកក់​។

លោក​បាន​មាន​ប្រសាសន៍ថា“ការ​សិក្សាមួយ​ចំនួន​បាន​ផ្ដល់​អនុសាសន៍​ ដោយ​រក្សា​​ការ​ពារ​បឹង​នៅ​ក្នុង​រាជ​ធានី​ ដើម្បី​រក្សា​ប្រព័ន្ធ​លូបង្ហូរ​ទឹក​ឲ្យបាន​សមរម្យ”​។ សាលារាជធានី​បាន​បដិសេធ​មិន​ធ្វើ​អត្ថា​ធិប្បាយអំពីការ​សិក្សា​ទាំង​នោះទេ​ កាល​ពី​ម្សិល​មិញ។ សាលា​រាជ​ធានី​ក៏បាន​ចេញ​សេចក្ដី​ប្រកាស​​លើក​ទី​២ផង​ដែរ​កាលពី​ម្សិល​មិញ​ ដោយ​រិះ  គន់​ “អង្គការ​ក្រៅ​រដ្ឋា​ភិបាល​ ជន​បរទេស​ និង​ សកម្ម​ជន​សិទ្ធិ​មនុស្ស​ជ្រុល​និយម”​ ដោយ​បាននាំឲ្យ​អ្នក​តវ៉ា​នៅ​បឹង​កក់​ ជាប់​ពន្ធនាគារ​។​​​

កាលពី​ថ្ងៃ​ទី​២២ ខែ​ឧសភា ​ស្ត្រី​បឹង​កក់​ចំនួន​១៣​នាក់ ត្រូវ​បាន​ចាប់​ខ្លួនក្នុង​ការ​តវ៉ា​ចំពោះកា​របំពេញ​ដី​នៅ​ក្នុង​បឹង​នេះ។ពីរ​ថ្ងៃ​ក្រោយ​មក​ សាលា​ដំបូង​រាជធានី​ភ្នំ​ពេញ​បាន​ចោទ​ប្រកាន់ និង​ផ្ដន្ទាទោស​ស្ត្រីទាំង​នេះ ឲ្យ​ជាប់ពន្ធនាគារ​រយៈពេល​ពីរ​ឆ្នាំ​កន្លះ។អ្នក​តវ៉ា​ពីរ​នាក់ទៀត​ ត្រូវបាន​ចាប់ឃុំខ្លួនក្នុងពន្ធនាគារ​​ដោយសារតវ៉ានៅ​ក្រៅ​តុលាការ ​ ប៉ុន្ដែ​ត្រូវបាន ដោះលែងជា​បណ្ដោះ​​អាសន្ន​កាលពី​ថ្ងៃ​សុក្រ។

សាលារាជ​ធានី​ បាន​ស្ដី​​បន្ទោស​ជន​​​ បរទេសនិង​អង្គការ​ក្រៅ​រដ្ឋាភិបាល​ដោយមិនបញ្ចេញ​ឈ្មោះ​​ច​ំពោះ​ស្ថាន​ភាព​ស្ត្រី​​ជាប់​ពន្ធនាគារ​។ សាលា​រាជធានី​បានលើក​ឡើងថា “កូន​ៗរបស់ពួកគាត់​នឹក​ពួកគាត់​ចាប់​តាំង​ពី​ពួកគាត់​ជាប់​ពន្ធនាគារ​ ពីព្រោះ​ពួកគេ​ស្ដាប់​ និង​ធ្វើ​​តាម​បញ្ជា​ពី​ជន​បរទេស​ និង​អង្គការ​ក្រៅ​រដ្ឋាភិបាល​ទាំង​នោះ”។

លិខិតដដែលនេះបន្តថា“ តាម​​ពិត ​ស្ត្រី​ប្រាំ​បួន​នាក់ ក្នុង​ចំណោម​ស្ត្រី​ជាប់​ពន្ធនាគារ​ទាំង​នោះ​បាន​ទទួល​ដី​ និង​ប័ណ្ណ​កម្ម​សិទ្ធិ​របស់​ខ្លួន​នៅ​​ក្នុង​សហ​គមន៍​បឹងកក់​រួច​ហើយ។ ប៉ុន្ដែ ព្រោះ​តែ​ពួកគាត់​យល់​ខុស​ជាយូរ​មក​ហើយ​ ដោយ​សារ​តែ​ជន​បរទេស​ និង​អង្គការ​ក្រៅរដ្ឋា​ភិបាល​​ទាំង​នោះ ឲ្យជំទាស់នឹងរដ្ឋា​ភិបាល​ និង​សាលា​រាជ​ធានី”។​

ក្នុង​សម្តី​ចំអក​មួយ​ សាលា​រាជ​ធានី​បាន​ជំរុញ​ឲ្យ​ “ជើងឯកខាងលទ្ធិ​ប្រជា​ធិបតេយ្យ​” ឲ្យ​រកវិធី​ការ​ពារតាម​ផ្លូវ​ច្បាប់​ដល់ស្ត្រី​ទាំង​នោះ​។សេចក្តី​ប្រកាស​នេះ​ក៏​បាន​លើក​ឡើង​​ ផង​ដែរ​ថា“ធ្វើ​ដូច្នេះ​ គ្រាន់ជាការ​ប្រើ​ប្រាស់រួចហើយទុកស្ត្រី​ទាំង​នេះ​ឲ្យរងាឯកា។នេះ​​គឺ​ជាអំពើអមនុស្ស​ធម៌ និងជា​ការ​មិន​​ទទួល​ខុស​ត្រូវ”។

សាលា​រាជ​ធានី​ក៏​បាន​​ចោទ​ក្រុម​អ្នក​រិះ​គន់​ផង​ដែរថា បាន​ប្រើវិធីគំរាមកំហែង ​និង​មិន​ទទួលស្គាល់ការពិត​។សេចក្តី​ប្រកាស​នេះ​លើក​ឡើង​ថា “ពួកគេ​បាញ់​មុន​ រួច​ទើប​​សួរ​ជាក្រោយ​ ហើយ​ជា​រឿយៗ​ ពួក​គេ​តែង​តែ​បាញ់​ដោយ​មិន​បាច់សួរ​នាំទេ។ពួក​គេ​គិត​ថាពួក​គេ​មាន​គ្រាប់​កាំភ្លើង​ប្រាក់​”។ អ្នកស្រីសែនទូចដែល​បាត់​បង់​ផ្ទះ​របស់​អ្នក​ស្រី​នៅ​បឹង​កក់ បាន​បដិសេធ​ចំពោះ​ការ​វែក​ញែក​របស់​សាលា​រាជ​ធានី។

ខណៈ​ដែល​តំបន់​នេះ​ ប្រហែល​ជា​​មិន​ចម្លែកបើនិយាយអំពី​ស្រី​ពេស្យា​ និង​អ្នក​ជួញ​ដូរ​គ្រឿង​ញៀន​នាពេលកន្លងមកនេះ អ្នក​ស្រី​ ទូច បាន​លើក​ឡើង​ថា ពួក​គេបាន​សម្រុក​ចូលមកក្នុងតំបន់នេះជាក្រុម ពីព្រោះ​នគរ​បាល​មូល​ដ្ឋាន​ដក​ចេញ​ពី​តំបន់​នោះនៅពេល​ ​ក្រុម​ហ៊ុនស៊ូកាគូអុីនទទួលបាន​សិទ្ធិ​គ្រប់​គ្រ​ង​សហគមន៍​នេះ។ អ្នក​ស្រី​​បាន​និយាយថា “បរិយា​កាស​​ចាប់ផ្តើមមិន​ល្អ​ អ្នក​ជួញ​ដូរ​គ្រឿង​ញៀននិង​ចោរបាន​កើត​ឡើង​នៅ​ពេល​ក្រុម​ហ៊ុនស៊ូកា​គូអីុនបាន​ទៅ​អភិវឌ្ឍតំបន់​បឹង​កក់​នេះ”។

អ្នកស្រីយ៉ម​ បុប្ផាដែល​ជា​អ្នក​ស្រុក​បឹង​កក់​ម្នាក់​ទៀត បាន​មាន​ប្រសាសន៍ថា ការលើក ​ឡើងរបស់​សាលា​រាជ​ធានី​ ចោទ​​ប្រកាន់អំពី តំបន់​នេះមិន​មាន​អ្វី​គួរ​ឲ្យ​ចម្លែក​នោះ​ទេ។​អ្នក​ស្រី​​​ថ្លែងថា “អ្វីៗ​ទាំង​អស់​នេះ​ ដូចជា​ អ្នក​ជួញ​ដូរ​គ្រឿង​ញៀន ស្រី​ពេស្យា កើតឡើង​គ្រប់​កន្លែង​ទាំង​អស់​។ ហេតុ​​​អ្វី​បាន​ជា​គេ​  និយាយថា កើត​ឡើង​តែ​នៅ​​តំបន់​បឹង​កក់​?”។ អ្នក​ស្រីបុប្ផាក៏​បាន​បដិសេធ​ផង​ដែរ​ថាអ្នក​តវ៉ា​មិន​មែន​ជា​ឧបករណ៍​រៀបចំឡើងដោយ​អង្គការ​ក្រៅ​រដ្ឋា​ភិបាល​នោះ​ទេ។

អ្នក​ស្រី​បាន​លើក​ឡើង​ថា”គ្មាន​ឧបាយ​កល​របស់​អង្គការ​ក្រៅ​រដ្ឋា​ភិបាលឯណា​ជំរុញ​ឲ្យ​យើង​ធ្វើ​ការ​តវ៉ា​នោះ​ទេពីព្រោះ​វា​ផ្ទះ​របស់​ពួក​យើង​ មិន​មែន​ជា​ផ្ទះ​របស់​អង្គការ​ក្រៅ​រដ្ឋា​ភិបាល​ទេ”។

លោកអៀង​ វុទ្ធីអ្នក​នាំ​ពាក្យ​របស់​អង្គការ​ក្រៅ​រដ្ឋា​ភិបាល​ក្នុង​ស្រុក​មួយឈ្មោះ​ Equitable Cambodia ដែល​ជំនួស​សា​ខា​អង្គការ​ក្រៅ​រដ្ឋា​ភិបាល​កម្ពុជា​ ឈ្មោះស្ពានទៅកាន់សន្តិភាពដែល​ពេល​នេះ​ក្ស័យ​ធន់​ទៅ​ហើយ​នោះបាន​មាន​ប្រសាសន៍ថាអង្គការ​ទាំង​នេះដូចជា​អង្គការ​របស់​លោក​ដែរគ្រាន់​តែ​ណែនាំ​អ្នក​ស្រុក​បឹង​កក់​ប៉ុណ្ណោះ។  លោក​បាន​ថ្លែង​ថា”យើង​បង់ឲ្យប្រាកដ​ថាពួក​គេ​មិន​រង​គ្រោះ​ថ្នាក់​ទេហើយ​ណែនាំ​ពួក​គេ​អំពី​សិទ្ធិ​របស់ខ្លួន”។

រដ្ឋា​ភិបាល​សឹង​តែ​ស្ងាត់​ស្ងៀម​អំពី​អនាគត​របស់​បឹង​កក់ដោយ​បានចេញ​តែផ្សាយ​សេចក្តី​លម្អិតនិងបង្ហាញផ្ទាំងគំនូររៀបរាប់​អំពី​ប៉ម​ការិយាល័យ​ដ៏​ធំនិង​វីឡាដែល​ក្រុម​ហ៊ុន​ ស៊ូកាគូអីុនមាន​ផែន​កសាងនៅលើើអតីតដីបឹងនេះហើយបដិសេធ​មិន​ព្រម​និយាយ​ជាមួយអ្នកកាសែតទេ៕ ប្រែ​សម្រួល​ដោយចេវប៊ុននី​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស