ព្រះអង្គម្ចាស់​នរោត្តម​ រណឫទ្ធិ ស្ដី​បន្ទោស​លោក​ ញឹក​ ប៊ុនឆៃ​

មុន​ពេល​រួមបញ្ចូលគ្នា​មិនទាន់ទាំង​ចាប់​ផ្ដើមផង​ ព្រះអង្គម្ចាស់​ នរោត្ដម​ រណឫទ្ធិកាល​​​​ពី​ម្សិល​មិញ​ បាន​ស្ដី​បន្ទោស​លោកញឹកប៊ុនឆៃប្រធាន​ប្រតិបត្តិ​គណបក្ស​ហ៊្វុន​ស៊ិនប៉ិចថា​​​បាន​​​ធ្វើឲ្យ​ខូចដំណើរការបង្រួប​បង្រួម​គ្នា​រវាងគណបក្ស​រាជា​និយមទាំងពីរដើម្បី​ចូល​​​រួម​​​ប្រកួត​​​​ប្រជែង​ក្នុង​ការ​បោះ​ឆ្នោត​ជាតិ​​​​​ឆ្នាំក្រោយ​។

ព្រះ​អង្គម្ចាស់​ នរោត្ដមរណឫទ្ធិមាន​បន្ទូលទៅកាន់អ្នក​យក​ព័ត៌មាន ​អំឡុង​ពេល​ធ្វើ​សន្និសីទ​កាសែត​​​​មួយ ​នៅ​ឯព្រះរាជដំណាក់​​​របស់​​​ព្រះអង្គ​ក្នុង​ខណ្ឌ​ចំការ​មន​ រាជធានី​ភ្នំពេញ​ថា  គឺលោក​ ញឹក​ ប៊ុនឆៃ [ប្រធាន​ប្រតិបត្តិ​គណ​​​បក្សហ៊្វុន​ស៊ិន​ប៉ិច​] ទេ​ ដែល​ជា​អ្នក​ធ្វើ​ឲ្យ​ខូច​ការរួម​បញ្ចូល​គ្នា​ មិន​មែន​ខ្ញុំ​ទេ ​​​ហើយ​ឥឡូវ​ការ​រួម​បញ្ចូល​គ្នា​នេះ​វា​បាន​ចប់​ទាំង​ស្រុង​ទៅ​ហើយ”។

ព្រះ​អង្គម្ចាស់​ រណឫទ្ធិ ​មាន​​ព្រះ​​​បន្ទូល​​ថា “ ​លោកញឹក​ ប៊ុនឆៃ​ បាន​បញ្ចប់​ការ​រួម​បញ្ចូល​គ្នា​នេះ​ទាំង​ស្រុងខ្ញុំ​មិន​បាន​ធ្វើ​រឿង​នេះ​ដោយ​​​​ខ្លួន​ខ្ញុំ​ផ្ទាល់​នោះ​ទេ​។ខ្ញុំ​នឹង​មិន​ជួប​ជាមួយ​លោកញឹកប៊ុនឆៃដើម្បី​ពិភាក្សា​អំពី​ការរួម​បញ្ចូល​គ្នា​នេះ​ទេ​”។

ព្រះអង្គម្ចាស់បាន​មាន​បន្ទូល​ថាព្រះអង្គនិង​លោក​នាយក​រដ្ឋ​មន្ត្រី​ ហ៊ុនសែនដែល​​​បានពិនិត្យមើលការ​ចុះ​ហត្ថលេខា ​លើ​កិច្ច​សន្យាស្តីពីការរួម​បញ្ចូល​គ្នា​នៅឯ​វិមាន​សន្ដិភាព​ កាល​ពី​ថ្ងៃ​ទី​២៤​ ខែ​ឧសភាបានទទួល​​​បរាជ័យ​​​ដោយសារ​លោក​ ញឹកប៊ុនឆៃដែលកាល​ពី​ដើម​សប្ដាហ៍​នេះ ​​បាន​ប្រាប់​អ្នក​យក​ព័ត៌មាន​ថាគណបក្ស​ នរោត្ដម​ រណឫទ្ធិបាន​ខ្វែង​​គំនិត​គ្នា​​ ជុំវិញការ​រួម​បញ្ចូល​គ្នា​ជា​មួយ​គណបក្ស​ហ៊្វុនស៊ិនប៉ិចដែរ​។

ព្រះអង្គម្ចាស់​ នរោត្ដមរណឫទ្ធិ ​មាន​បន្ទូល​ថា“​វា​មិន​មែន​លើក​ដំបូងទេ ​ចំពោះ​​​ការ​​​ព្យាយាមរួម​បញ្ចូល​គ្នា​រវាង​គណបក្ស​រា​​​ជា​​​និយម​ និង​អ្នកសីហនុនិយម ​ក្រោម​​ឈ្មោះ​​​ចលនាតស៊ូ​ហៅកាត់​ថាហ៊្វុន​ស៊ិនប៉ិចនោះ​​​ទេ​”។ព្រះអង្គ​​លើក​ឡើង​ថា“​ខ្ញុំ​បរាជ័យ… លោកនាយក​រដ្ឋមន្ត្រីហ៊ុនសែនក៏​​​​បរាជ័យដោយ​សារ​លោកញឹកប៊ុនឆៃ​ ដែរ”។

ព្រះអង្គម្ចាស់​ នរោត្ដមរណឫទ្ធិក៏នឹង​មិន​​​មានបំណង​រួម​បញ្ចូល​គ្នា​ទៀត​ដែរ​។ព្រះអង្គម្ចាស់​បាន​មាន​បន្ទូល​ថា“ខ្ញុំ​ខ្លាច​ក្រែង​ថាគណបក្ស​ទាំង​ពីរ​នេះ​មិន​អាច​រួម​បញ្ចូលគ្នា​បាន​ទេ​ ពី​ព្រោះ​គណបក្ស​រាជា​និយម​ ហ៊្វុន​ស៊ិនប៉ិចមាន​និន្នាការ​ម្ខាង​ រីឯគណបក្ស​ នរោត្ដម​ រណឫទ្ធិមាន​និន្នាការ​ម្ខាង​ទៀត​។

ព្រះអង្គម្ចាស់​ បន្ទាប់​មក​បាន​ប្ដូរ​ចំណាប់​អារម្មណ៍​របស់​ព្រះ​អង្គសំដៅ​ទៅ​រក​​​គណបក្ស​សិទ្ធិមនុស្សដែល​បាន​ឈ្នះ​តំណែង​ប្រធាន​ក្រុម​ប្រឹក្សា​ឃុំ-សង្កាត់​ចំនួន​១៨​ នៅក្នុង​ការ​បោះ​ឆ្នោត​ឃុំ-សង្កាត់​ កាល​ពី​ថ្ងៃ​ទី​៣​ ខែ​មិថុនានៅពេល​គណបក្ស​ នរោត្ដមរណឫទ្ធិរបស់​ព្រះអង្គ​មិន​បាន​ឈ្នះ​តំណែង​អ្វី​សោះ​នោះ​។

ព្រះអង្គបាន​មាន​បន្ទូល​ថា“ ​គណបក្ស​ ​​​នរោត្តមរណឫទ្ធិបាន​ចាញ់​នៅក្នុង​ការ​បោះ​ឆ្នោតឃុំ-សង្កាត់ទោះ​បី​ជា​យើង​បាន​ធ្វើ​សេចក្ដី​ថ្លែង​ការណ៍​រួម​មួយ [ជាមួយ​នឹង​គណបក្ស​ហ៊្វុន​ស៊ិនប៉ិច] ថា​យើង​នឹង​ជួយ​គ្នា​ទៅ​វិញ​ទៅ​មក​ក៏ដោយ​”។

ព្រះអង្គម្ចាស់រណឫទ្ធិបាន​សួរ​ថា“តើ​នរណា​ជា​អ្នក​ដណ្ដើម​សន្លឹក​ឆ្នោត​ពី​គណបក្ស​ នរោត្ដមរណឫទ្ធិ? លោក​ កឹមសុខា [ប្រធាន​គណបក្ស​សិទ្ធិមនុស្ស​] បាន​ដណ្ដើម​សន្លឹក​ឆ្នោត​ជា​ច្រើន​ ចំណែក​ឯ​គណបក្ស​ សមរង្ស៊ីនិង​គណបក្ស​ប្រជាជន​កម្ពុជាមិន​បាន​ដណ្ដើម​​​​សន្លឹក​​​​ឆ្នោត​ពី​គណបក្ស​ នរោត្ដមរណឫទ្ធិនោះ​ទេ”។ ដោយ​លើក​ឡើង​ពី​ការ​សហការ​គ្នា​រវាង​គណបក្ស​ប្រជាជន​កម្ពុជា​ និង​គណបក្ស​សិទ្ធិ​​​មនុស្សព្រះអង្គម្ចាស់​ នរោត្ដមរណឫទ្ធិបាន​មាន​បន្ទូល​ថាព្រះអង្គ​អាច​ជា​អ្នក​គាំទ្រដែល ​​​​ស្មោះ​ស្ម័គ្រ​ចំពោះ​​​លោក​នាយក​រដ្ឋមន្ត្រី​ហ៊ុន​ សែនជាង​លោកកឹមសុខា។

ព្រះអង្គម្ចាស់​ នរោត្ដមរណឫទ្ធិបាន​មាន​បន្ទូល​ថាការ​រួម​បញ្ចូល​គ្នា​ ដែល​គេ​សង្ឃឹម​ថាព្រះអង្គម្ចាស់​នឹង​ក្លាយ​ជា​មេដឹក​នាំ​ចលនាមួយ ​ដែល​ហៅ​ថា​ កាត់​ថា​ ហ៊្វុន​ស៊ិនប៉ិចម្ដង​​​​ទៀត​នោះ​ ព្រះអង្គម្ចាស់​នឹង​ងាក​មក​រក​ការ​គាំទ្រ​ចំពោះ​គណបក្ស​ប្រជាជន​កម្ពុជា​វិញ​ហើយ​នឹង​មិន​រិះ​គន់​រដ្ឋាភិបាល​ ដូច​គណបក្ស​សិទ្ធិមនុស្ស​នោះ​ទេ​។ ព្រះអង្គម្ចាស់​បាន​មានព្រះ​បន្ទូល​ថា “ ​លោកកឹមសុខាមាន​ប្រសាសន៍​ថាស៊ូស្លាប់​ជា​ខ្មែរ​ ប្រសើរ​ជាង​ធ្វើ​ជា​ឆ្កែ​បម្រើ​យួន​”។ នៅពេល​ទាក់​ទង​​តាម​ទូរស័ព្ទ​ កាល​ពី​ម្សិលមិញ​ លោកប៉ុលហំមអ្នក​នាំពាក្យ​គណបក្ស​សិទ្ធិមនុស្ស​ ​បដិសេធ​ចំពោះ​ការ​មាន​ទំនាក់​ទំនង​​គ្នា​ជា​មួយ​នឹង​គណបក្ស​កាន់​អំណាច​។ លោក​ ប៉ុលហំមបានមានប្រសាសន៍​ថា

“ ​គណបក្ស​ប្រជាជន​កម្ពុជាជា​គណបក្ស​កាន់​អំណាច​ រីឯ​គណបក្ស​សិទ្ធិ​មនុស្ស​ គឺ​ជា ​គណ​​​បក្ស​ប្រឆាំង។គោល​ដៅ​សំខាន់​របស់​យើង​ គឺដើម្បី​ទម្លាក់​គណបក្ស​ប្រជា​ជន​កម្ពុជា ​ពី​អំណាច​។ព្រះអង្គម្ចាស់​ នរោត្ដមរណឫទ្ធិ ​មាន​ បន្ទូល​អ្វី​តាម​តែ​ព្រះ​អង្គ​ចង់​​ ប៉ុន្ដែ​ យើង​មាន​គោល​ជំហរ​ច្បាស់​លាស់​។ខ្ញុំ​មិន​ដឹង​ថាហេតុ​អ្វី​បាន​ជា​ព្រះអង្គមាន​បន្ទូល​ថាដូច្នេះ​ទេ”។

កាល​ពី​រសៀល​ម្សិលមិញគណបក្សហ៊្វុន​ស៊ិនប៉ិចបាន​ឆ្លើយ​តប​ចំពោះ​ការ​លើក​ឡើង​របស់​ព្រះអង្គម្ចាស់​ នរោត្ដមរណឫទ្ធិដោយ​​​​​ចេញ​នូវ​សេចក្ដីថ្លែង​ការណ៍​របស់ខ្លួន​មួយ​។លោកញឹកប៊ុនឆៃ​ បាន​លើក​ឡើង​ថា “​ខ្ញុំ​សោក​ស្ដាយ​ណាស់ដែល​ព្រះអង្គម្ចាស់​ រណឫទ្ធិបាន​មាន​បន្ទូល​ថាការ​រួម​បញ្ចូល​គ្នា​បាន​បញ្ចប់​នោះ។គណបក្ស​ ហ៊្វុន​ស៊ិនប៉ិច​ មិន​បាន​បញ្ចប់​ការ​រួម​បញ្ចូល​គ្នា​នោះ​ទេ”៕

ប្រែសម្រួល​ដោយស៊ាស៊ុយឈាង

© 2012 – 2014, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.