ក្រុមមន្ត្រីបានថ្លែងនៅឯពិធីសិក្ខាសាលាមួយនៅរាជធានីភំ្នពេញកាលពីម្សិលមិញថា ក្រុមមន្ត្រីមកពីច្រកទ្វារព្រំដែន កំពង់ផែនិងអាកាសយានដ្ឋាននៃប្រទេសកម្ពុជាបានដំឡើងប្រព័ន្ធកុំព្យូទ័រកាលពីម្សិលមិញ ដែលមានលទ្ធភាពអាចបញ្ចូលព័ត៌មានស្តីពីបទឧក្រិដ្ឋអន្តរជាតិ ដែលជាផ្នែកនៃគម្រោងមួយគាំទ្រដោយនគរបាលអន្តរជាតិ និងសហភាពអឺរ៉ុប។
លោក កែវ វណ្ណថនប្រធានការិយាល័យនគរបាលអន្តរជាតិកម្ពុជាបានថ្លែងថា ប្រព័ន្ធចែករំលែកព័ត៌មានរបស់ស្ថាប័ននគរបាលអន្តរជាតិ ត្រូវបានដំឡើងនៅតាមការិយាល័យនគរបាលអន្តោប្រវេសន៍ចំនួនប្រាំបីនៅទូទាំងប្រទេស។ លោកបានបន្តថា “នៅពេលណាព័ត៌មានលម្អិតបានដាក់បញ្ចូលក្នុងប្រព័ន្ធកុំព្យូទ័រនេះហើយ ដូចជាលិខិតឆ្លងដែនក្លែងក្លាយវានឹងបង្ហាញថាក្លែងក្លាយ ព័ត៌មានទាក់ទងនឹងជនដែលគេតាមរកចាប់ខ្លួននឹងបង្ហាញឡើងផងដែរ ហើយព័ត៌មានទាក់ទងនឹងរថយន្តចោរប្លន់ឬលួច ក៏នឹងប្រាប់ឲ្យដឹងផងដែរ”។
លោកបន្ថែមថា ប្រសិនបើអាជ្ញាធរបានប្រទះឃើញជនសង្ស័យជាឧក្រិដ្ឋជនណាម្នាក់ពួកគេនឹងស្នើឲ្យប្រទេសនោះបញ្ជាក់ព័ត៌មានលម្អិត ហើយចាប់ខ្លួនជននោះតែម្តង។លោកវណ្ណថនបានថ្លែងថា មានបទឧក្រិដ្ឋប្រហែលជាង៣០លានករណីដែលបានកើតឡើងនៅក្នុងប្រទេសចំនួន១៩០ត្រូវបានកត់ត្រាទុកក្នុងប្រព័ន្ធទិន្នន័យនេះ ហើយលោកបានថ្លែងថា មានឧក្រិដ្ឋជនដែលនគរបាលអន្តរជាតិកំពុងតាមរកចាប់ខ្លួនប្រហែល៨០.០០០នាក់ និងរថយន្តដែលចោរបានប្លន់ ឬលួចប្រហែលប្រាំពីរលានគ្រឿងក៏ដាក់បញ្ចូលក្នុងប្រព័ន្ធទិន្នន័យនេះផងដែរ។
ប្រព័ន្ធនេះបានដំឡើងនៅអាកាសយានដ្ឋានអន្តរជាតិភ្នំពេញអាកាសយានដ្ឋានខេត្ត សៀមរាប ច្រកទ្វារព្រំដែនចាំយាមនៅក្រុងខេត្តកោះកុង ក្រុងប៉ោយប៉ែតតាមព្រំដែនកម្ពុជា-ថៃ នៅក្រុងបាវិតនៅព្រំដែនកម្ពុជា-វៀតណាម នៅកំពង់ផែក្រុងព្រះសីហនុ និងនៅស្នងការដ្ឋាននគរបាលខេត្តសៀមរាប ។
សហភាពអឺរ៉ុបបានផ្តល់ជំនួយជាទឹកប្រាក់៧៩.០០០ដុល្លារសម្រាប់ទិញកុំព្យូទ័រថ្មី ដើម្បីដំណើរការទិន្នន័យនេះ និងបណ្តុះបណ្តាលបុគ្គលិកឲ្យចេះប្រើប្រព័ន្ធនេះ។លោកស្រីឃិនណាមីយាតជិត (Khina Myat Chit) ជាមន្ត្រីមកពីរដ្ឋលេខាធិការដ្ឋានអាស៊ានបានថ្លែងថា គម្រោងនេះត្រូវបានស្នើឡើងពីដំបូងជាគម្រោងសាកល្បងនៅប្រទេសកម្ពុជា និងនៅប្រទេសវៀតណាម ប៉ុន្តែ គម្រោងនេះអាចនឹងពង្រីកទៅប្រទេសជាសមាជិកអាស៊ានដទៃទៀត។
លោកស្រីបានបន្តទៀតថា ប្រព័ន្ធទិន្នន័យនេះអាចជួយស្វែងរកមនុស្ស ដែលមានប្រវត្តិពាក់ព័ន្ធនឹងបទល្មើសផ្លូវភេទ ដែលលោកស្រីបានថ្លែងថា ជាបញ្ហាកំពុងតែកើតមានឡើងនៅក្នុងប្រទេសកម្ពុជា និងនៅប្រទេសផ្សេងៗទៀតក្នុងតំបន់។
លោកស្រីមានប្រសាសន៍បន្ថែមទៀតថា“ឧក្រិដ្ឋកម្មឆ្លងដែនផ្សេងៗទៀតដូចជាការរួមភេទជាមួយកុមារ ក៏អាចដាក់បញ្ចូលក្នុងប្រព័ន្ធនេះបានដែរ”។ ទោះជាយ៉ាងណាលោក នាងបូរ៉ាទីណូ អ្នកសម្របសម្រួលអង្គការសិទ្ធិមនុស្សអាដហុក ប្រចាំខេត្តកោះកុង បានថ្លែងថាប្រព័ន្ធទិន្នន័យថ្មីនេះអាចរារាំងឧក្រិដ្ឋជន មិនឲ្យចូលក្នុងប្រទេសកម្ពុជាបាន ប្រសិនបើមន្ត្រីប្រើប្រាស់ប្រព័ន្ធនេះមិនពុករលួយ។ លោកថ្លែងបន្តថា“អ្នកមានលុយអាចសូកប៉ាន់មន្ត្រីធ្វើការនៅច្រកទ្វារព្រំដែនទាំងនេះបាន”៕
ប្រែសម្រួលដោយឃិន ណៃ