ក្រុមអ្នកអង្កេតការណ៍បោះឆ្នោតឯករាជ្យបានធ្វើសេចក្តីរាយការណ៍កាលពីម្សិលមិញថា ដោយមិនមានភាពខុសប្រក្រតីធ្ងន់ធ្ងរអំឡុងពេលបោះឆ្នោតឃុំ-សង្កាត់កាលពីថ្ងៃទី៣ ខែមិថុនានោះ ការផ្តល់មូលនិធិសម្រាប់ធ្វើយុទ្ធនាការ មិនស្មើភាពគ្នារវាងគណបក្សចូលរួមប្រកួតប្រជែង និងការគ្រប់គ្រងមិនបានល្អនូវបញ្ជីឈ្មោះបោះឆ្នោតពីសំណាក់គណៈកម្មាធិការជាតិរៀបចំការបោះឆ្នោត (NEC) ដែលស្ថិតនៅក្រោមឥទ្ធិពលរបស់គណបក្សប្រជាជនកម្ពុជា បានធ្វើឲ្យការបោះឆ្នោតមិនសូវសេរីនិងយុត្តិធម៌។
លោកធនសារាយ ប្រធានក្រុមប្រឹក្សានាយកនៃគណៈកម្មាធិការសម្រាប់ការបោះឆ្នោតដោយសេរីនិងយុត្តិធម៌ ហៅកាត់ថាខុមហ្វ្រែល បានមានប្រសាសន៍ថា“ការគ្រប់គ្រងការបោះឆ្នោតរបស់គណៈកម្មាធិការជាតិរៀបចំការបោះឆ្នោត (គ.ជ.ប) ធានាថា មានការបោះឆ្នោតដោយសម្ងាត់ និងធានាថាមានដំណើរការរលូននៅថ្ងៃបោះឆ្នោត”។
លោកបានមានប្រសាសន៍អំឡុងពេលធ្វើសិក្ខាសាលាមួយដើម្បីចេញផ្សាយរបាយការណ៍វាយតម្លៃចុងក្រោយរបស់គណៈកម្មាធិការខុមហ្វ្រែលថា“ទោះជាយ៉ាងណា មានកិច្ចការជាច្រើន ដែលត្រូវធ្វើដើម្បីធានាថា ការបោះឆ្នោតនៅក្នុងព្រះរាជាណាចក្រកម្ពុជាធ្វើឡើងដោយសេរីនិងយុត្តិធម៌”។ នៅក្នុងការវាយតម្លៃនោះ គណៈកម្មាធិការខុមហ្វ្រែលបានចាត់ទុកបញ្ហាបញ្ជីឈ្មោះបោះឆ្នោត ដែលកើតមានជាទូទៅចំពោះអ្នកបោះឆ្នោតដែលរិះគន់គណបក្សកាន់អំណាច និងឥទ្ធិពលរបស់អាជ្ញាធរមូលដ្ឋានថាជាបញ្ហាធំក្នុងចំណោមបញ្ហាធំៗ ដែលបង្កការលំបាកដល់ដំណើរការបោះឆ្នោត។
ភាពខុសគ្នាខ្លាំងរវាងម៉ោងផ្សព្វផ្សាយតាមរលកធាតុអាកាសហិរញ្ញវត្ថុ និងធនធានរបស់រដ្ឋ បានធ្វើឲ្យគណបក្សប្រជាជនកម្ពុជាមានប្រៀបច្រើនជាងគេ។ លោកធនសារាយបានមានប្រសាសន៍ថា“ដោយសារតែខ្វះច្បាប់ពាក់ព័ន្ធនឹងការផ្ដល់ហិរញ្ញវត្ថុសម្រាប់ធ្វើយុទ្ធនាការនោះ គណ
បក្សប្រជាជនកម្ពុជា មានលទ្ធភាពចំណាយប្រាក់យ៉ាងច្រើនសន្ធឹកសន្ធាប់ រីឯគណបក្សនយោបាយផ្សេងៗទៀតគ្មានធនធានហិរញ្ញវត្ថុសម្រាប់ការធ្វើយុទ្ធនាការរបស់ខ្លួនទេ”។
យោងតាមលទ្ធផលបឋមពីការបោះឆ្នោតកាលពីថ្ងៃទី៣ខែមិថុនា គណបក្សប្រជាជនកម្ពុជាដណ្ដើមបានអាសនៈមេឃុំ ចៅសង្កាត់ ចំនួន១.៥៩២អាសនៈគណបក្ស សមរង្ស៊ីឈ្នះបានតំណែងមេឃុំចៅសង្កាត់ចំនួន២២អាសនៈហើយគណបក្សសិទ្ធិមនុស្សទទួលបាន១៨អាសនៈ។គណបក្សហ្វុ៊នស៊ិនប៉ិច និងគណបក្ស នរោត្តមរណឫទ្ធិមិនបានសូម្បីតែមួយអាសនៈ។
គណៈកម្មាធិការខុមហ្វ្រែលបា៉ន់ប្រមាណថាគណបក្សប្រជាជនកម្ពុជាបានចំណាយអស់៩.០០០ដុល្លារសម្រាប់ឃុំសង្កាត់ប្រកួតប្រជែងនីមួយៗដែលចំនួននេះស្មើនឹងបួនដងនៃការចំណាយរបស់គណបក្ស សមរង្ស៊ី ហើយស្មើនឹង៣០ទៅ៤៥ដងនៃការចំណាយរបស់គណបក្សសិទ្ធិមនុស្សគណបក្ស នរោត្តមរណឫទ្ធិនិងគណបក្សហ្វុ៊នស៊ិនប៉ិច។
គណៈកម្មាធិការខុមហ្វ្រែលរួមជាមួយអ្នកសង្កេតការណ៍បោះឆ្នោតផ្សេងៗទៀត និងសមាជិកគណបក្សប្រឆាំង បានប្រើប្រាស់សិក្ខាសាលាកាលពីម្សិលមិញ នេះដើម្បីអំពាវនាវជាថ្មីម្ដងទៀតឲ្យមានកំណែទម្រង់របស់គណៈកម្មាធិការជាតិរៀបចំការបោះឆ្នោត ដែលបច្ចុប្បន្ននេះមានសុទ្ធតែអតីតសមាជិកគណបក្សប្រជាជនកម្ពុជា។
លោកសំគន្ធាមីប្រធានរដ្ឋបាលរបស់គណៈកម្មាធិការនិកហ្វិកបានថ្លែងថា“ពួកគេចាំបាច់ត្រូវតែផ្លាស់ប្ដូរគណៈកម្មាធិការជាតិរៀបចំការបោះឆ្នោត ហើយវានឹងមិនមានភាពប្រសើរឡើងទេ ប្រសិនបើគណៈកម្មាធិការជាតិរៀបចំការបោះឆ្នោតមិនផ្លាស់ប្ដូរទេនោះ”។
លោកទេពនីថាអគ្គលេខាធិការគណៈកម្មាធិការជាតិរៀបចំការបោះឆ្នោតបានច្រានចោលការរិះគន់ទាំងនេះ ដោយបានថ្លែងថាវាគ្មានអ្វីប្លែកទេ។ ទោះជាយ៉ាងណាលោកបានទទួលស្គាល់ ថាមិនទាន់មានភាពសុក្រឹតទេដោយលោកបានគូសបញ្ជាក់ថាការចុះឈ្មោះត្រួតគ្នាក្នុងបញ្ជីឈ្មោះបោះឆ្នោតនៅតែជាឧបសគ្គ។លោកបានមានប្រសាសន៍ថា“ខ្ញុំទទួលស្គាល់ថាមានកំហុសខ្លះៗដែរ”៕
ប្រែសម្រួលដោយ តែមសុខុម