កាលពីម្សិលមិញ ក្រុមកសិករចិញ្ចឹមក្រពើបាននិយាយថា ការកើនឡើងនូវក្រុមអ្នកជួញដូរសត្វក្រពើ ដែលកំពុងជួញដូរក្រពើដោយគ្មានលិខិតអនុញ្ញាត និងការនាំចេញក្រពើទៅវៀតណាម បានបណ្តាលឲ្យតម្លៃក្រពើធ្លាក់ចុះជាងពាក់កណ្តាល បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។
លោក លួន ណាម ប្រធានសមាគមកសិករចិញ្ចឹមក្រពើ ដែលមានក្រពើចំនួន៦០០ក្បាល នៅក្នុងខេត្តសៀមរាប បាននិយាយថា តម្លៃក្រពើ បានធ្លាក់ចុះចំនួន៥៥ភាគរយ គឺធ្លាក់ចុះមកនៅត្រឹមតែ១២ដុល្លារសម្រាប់កូនក្រពើមួយក្បាល បើប្រៀបធៀបទៅនឹងខែដូចគ្នាកាលពីឆ្នាំមុន។
ការធ្លាក់ចុះនូវតម្លៃក្រពើនេះ បណ្តាលមកពីការកើនឡើងក្រុមអ្នកចិញ្ចឹម និងអ្នកជួញដូរក្រពើខុសច្បាប់ ចាប់តាំងពីរដ្ឋាភិបាលបានប្រកាសឲ្យដឹងអំពីផែនការពង្រីកការចិញ្ចឹមក្រពើរបស់ប្រទេសកម្ពុជា កាលពីឆ្នាំមុន ដោយណែនាំក្រុមអាជ្ញាធរខេត្តឲ្យបង្កើតការិយាល័យជាច្រើន ដើម្បីឲ្យក្រុមកសិករចិញ្ចឹមក្រពើអាចដាក់ពាក្យស្នើសុំលិខិតអនុញ្ញាតដឹកជញ្ជូនសត្វក្រពើរបស់ពួកគាត់បានពីខេត្តមួយទៅខេត្តមួយទៀត។ អាជ្ញាធរមូលដ្ឋានក៏មានបំណងផ្តល់ព័ត៌មានដល់ក្រុមកសិករ អំពីរបៀបដាក់ពាក្យស្នើសុំលិខិតអនុញ្ញាតផងដែរ។លោក លួន ណាម បាននិយាយថា “យើងយល់ឃើញថា មានឈ្មួញរាប់រយនាក់ ដែលគ្មានលិខិតអនុញ្ញាតមកពីមន្ទីរនិងក្រសួង។ អ្នកទាំងនោះកំពុងតែជួញដូរសត្វក្រពើដោយខុសច្បាប់ ហើយកំពុងតែធ្វើឲ្យតម្លៃក្រពើធ្លាក់ចុះដល់កម្រិតទាបបំផុត ដែលមិនធ្លាប់មាន”។ លោកបានបន្ថែមទៀតថា ការជួញដូរសត្វក្រពើស្ទើរតែទាំងអស់ គឺទៅប្រទេសវៀតណាម ខណៈដែលការនាំចេញក្រពើទៅប្រទេសថៃបានថយចុះ ដោយសារតែកសិករចិញ្ចឹមក្រពើនៅប្រទេសថៃបានចាប់ផ្តើមបង្កើនការចិញ្ចឹមក្រពើ។
លោក ហេង សុវណ្ណារ៉ា អនុប្រធាននាយកដ្ឋានអភិរក្សក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា កាលពីសប្តាហ៍មុន រូបលោកបានទទួលពាក្យបណ្តឹងជាច្រើនពីសំណាក់ក្រុមកសិករចិញ្ចឹមក្រពើ ដែលមានការព្រួយបារម្ភអំពីការកើនឡើងនៃក្រុមអ្នកចិញ្ចឹម និងឈ្មួញជួញដូរក្រពើខុសច្បាប់។ លោកបានបន្តដូច្នេះទៀតថា “ខ្ញុំបានបញ្ជូនអ្នកជំនាញមួយក្រុមឲ្យទៅធ្វើការស៊ើបអង្កេតបញ្ហានេះហើយ ហើយយើងកំពុងតែធ្វើការដើម្បីស្វែងរកបន្ថែមទៀត” ដោយលោកបន្ថែមថា មានកសិករចិញ្ចឹមក្រពើសរុបចំនួន៥០០នាក់ដែលមានលិខិតអនុញ្ញាតនៅទូទាំងប្រទេសកម្ពុជា។
ខណៈដែលមានកសិករចិញ្ចឹមក្រពើរាប់រយនាក់នៅក្នុងប្រទេសកម្ពុជា មានតែកសិដ្ឋានចិញ្ចឹមក្រពើចំនួនប្រាំមួយប៉ុណ្ណោះ ដែលបានចុះបញ្ជីជាមួយអនុសញ្ញាស្តីពីការធ្វើពាណិជ្ជកម្ម ព្រៃឈើ និងសត្វព្រៃជិតផុតពូជហៅថា (CITES) នៅទីក្រុងហ្សឺណែវ នេះគឺជាកិច្ចព្រមព្រៀងអន្តរជាតិមួយ ដែលធ្វើឡើងរវាងរដ្ឋាភិបាល ដែលត្រូវបានបញ្ចូលជាធរមាន ដើម្បីធានាថា ការធ្វើពាណិជ្ជកម្មសត្វព្រៃ និងរុក្ខជាតិលក្ខណៈអន្តរជាតិ មិនមានការគំរាមកំហែងដល់ជីវិតរុក្ខជាតិ និងសត្វព្រៃជិតផុតពូជទាំងនោះទេ។
កសិដ្ឋានចិញ្ចឹមសត្វក្រពើទាំងប្រាំមួយនេះ ដែលកសិដ្ឋានមួយចំនួន គឺជាកសិដ្ឋានរបស់លោកស្រី មាស ស៊ីថន ជាភរិយារបស់លោក ណៅ ធួក ប្រធានរដ្ឋបាលជលផល កំពុងតែចិញ្ចឹមក្រពើមួយចំនួន ប៉ុន្តែ ត្រូវបានគេដឹងថា គឺជាកសិដ្ឋានដ៏សំខាន់ ដែលទិញកូនក្រពើភ្ញាស់នៅក្នុងប្រទេសកម្ពុជា៕ ប្រែសម្រួលដោយ ហួង កុកទៀន