កាលពីម្សិលមិញ លោកនាយករដ្ឋមន្ត្រីហ៊ុន សែនបានមានប្រសាសន៍ថាលោកមិនខ្វល់ចំពោះផែនការរួបរួមគ្នារវាងគណបក្សរាជានិយម ហ៊្វុនសិុនបិុច និងគណបក្ស នរោត្តមរណឫទ្ធិ ដែលបានបរាជ័យនោះឡើយ ហើយបានបន្ទោសព្រះអង្គរម្ចាស់ នរោត្តម រណឫទ្ធិ ចំពោះការបរាជ័យនេះ។
ផែនការរួបរួមគ្នានេះបានជាប់គាំង កាលពីដើមខែមិថុនានេះក្រោយពីលោកញឹកប៊ុនឆៃប្រធានប្រតិបត្តិរបស់គណបក្ស ហ្វុ៊នស៊ិនប៉ិច បានចោទប្រកាន់គណបក្ស នរោត្តម រណឫទ្ធិថាត្រូវបានបំបែកចេញជាពីរក្រុម។ ចំណែកព្រះអង្គម្ចាស់ នរោត្តម រណឫទ្ធិវិញបានឆ្លើយតបដោយអះអាងថា លោក ញឹក ប៊ុនឆៃ តែងតែមានបំណងធ្វើឲ្យខូចដំណើរការរួបរួមគ្នានេះទោះបីជាបានចុះកិច្ចព្រមព្រៀងជាមួយគ្នារួចហើយ ដោយមានការជូនពរពីលោក ហ៊ុន សែន នៅឯវិមាន សន្តិភាព កាលពីថ្ងៃទី២៤ ខែឧសភា ក្តី។
លោក ហ៊ុន សែន បានមានប្រសាសន៍អំឡុងពេលថ្លែងសុន្ទរកថា ទៅកាន់និស្សិតនៅឯកោះពេជ្រថា“ប្រសិនបើគណបក្សរាជានិយម ហ៊្វុនសិុនបិុច ហើយនិងគណបក្សនរោត្តម រណឫទ្ធិ មិនអាចរួបរួមគ្នាបាន ក៏ខ្ញុំនៅតែសប្បាយចិត្ត ពីព្រោះវាស្រេចតែទៅលើពួកគេទេ។ខ្ញុំមិនខ្វល់ឡើយ ហើយខ្ញុំថែមទាំងដឹងរឿងនេះទៀតផង”។
លោកនាយករដ្ឋមន្ត្រីហាក់ដូចជាចោទប្រកាន់គណបក្ស នរោត្តម រណឫទ្ធិ ថាចង់រួបរួមគ្នាជាមួយគណបក្ស ហ្វុ៊នស៊ិនប៉ិច ដើម្បីរិះគន់រដ្ឋាភិបាល។លោកក៏បានសំដៅដល់ការអត្ថាធិប្បាយ នៅក្នុងសន្និសីទកាសែតមួយធ្វើឡើងដោយព្រះអង្គម្ចាស់នរោត្តមរណឫទ្ធិ នៅឯដំណាក់របស់ព្រះអង្គកាលពីសបា្តាហ៍មុនផងដែរ ដែលអំឡុងពេលនោះព្រះអង្គម្ចាស់មានបន្ទូលថា គណបក្សប្រជាជនកម្ពុជាអនុញ្ញាតឲ្យគណបក្សសិទិ្ធមនុស្សទិតៀនខ្លាំងៗដោយមិនមានការស្តីបន្ទោស។
ព្រះអង្គម្ចាស់បានអះអាងថា“ គណបក្សនរោត្តម រណឫទ្ធិ ចង់ធ្វើតាមគណបក្សសិទិ្ធមនុស្ស ដើម្បីជេរប្រមាថរដ្ឋាភិបាលកប់ៗមាត់។ ប្រសិនបើពួកគេមិនអាចជេរប្រមាថរដ្ឋាភិបាលបានមួយរយភាគរយដូចគណបក្សសិទ្ធមនុស្សទេ ក៏ពួកគេអាចជេរបាន៥០ភាគរយដែរ ក្នុងគណបក្សដែលរួបរួមគ្នានោះ”។ លោក ហ៊ុន សែនក៏បានលើកឡើងដែរថាលោកបានព្រមានលោក ញឹក ប៊ុនឆៃ អំពីព្រះអង្គម្ចាស់ នរោត្តមរណឫទ្ធិ ដែលចង់ចូលរួមឡើងវិញជាមួយគណបក្ស ហ៊្វុនសិុនបិុចពីព្រោះគណបក្សនេះនឹងត្រូវបណ្តេញចេញពីជួររដ្ឋាភិបាល។
លោកបានថ្លែងថា“ខ្ញុំបានប្រាប់លោកញឹក ប៊ុនឆៃ ហើយថា លោកត្រូវតែធ្វើការសម្រេចចិត្តដោយខ្លួនឯង។ ថ្ងៃដែលមនុស្សនេះចូលរួមជាមួយ ហ៊្វុនសិុនបិុច គឺជាពេលដែល ហ៊្វុនសិុនបិុច នឹងត្រូវចាក់ចេញពីរដ្ឋាភិបាល… ហេតុអ្វីបានជាពួកគេជេរគ្នា?”៕ ប្រែសម្រួលដោយលីដារ៉ូ