និស្សិតស្ម័គ្រចិត្តជាង ៧០០នាក់ ស្លៀកពាក់ឯកសណ្ឋានទាហានប៉ារ៉ា កាលពីម្សិលមិញបានចាប់ផ្ដើមចេញដំណើរទៅវាស់វែងដី នៅក្នុងគម្រោងផ្ដល់ប័ណ្ណកម្មសិទ្ធិដីធ្លី ដែលត្រូវបានប្រកាសដោយលោកនាយករដ្ឋមន្ត្រី ហ៊ុនសែន កាលពីដើមខែនេះ។
លោក អឹុម ឈុនលឹម រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានប្រាប់អ្នកយកព័ត៌មាន បន្ទាប់ពីលោកថ្លែងសុន្ទរកថា ទៅកាន់និស្សិតស្ម័គ្រចិត្ត ដែលត្រៀមចេញដំណើរថា “ សម្រាប់ដំណាក់កាលដំបូង នៃគម្រោងផ្ដល់ប័ណ្ណកម្មសិទ្ធិដីធ្លី យើងប្រើនិស្សិតស្ម័គ្រចិត្តមកពីបណ្តាសាកលវិទ្យាល័យនានា ដើម្បីវាស់វែងដីធ្លី និងប្រមូលទិន្នន័យពីអ្នកភូមិ ដែលរស់នៅលើដីព្រៃរបស់រដ្ឋ និងនៅលើ [ដីសម្បទានសេដ្ឋកិច្ច]”។
ដោយចែកចេញជា៦១ក្រុមនិស្សិតស្ម័គ្រចិត្តស្លៀកឯកសណ្ឋានទាហានប៉ារ៉ាចំនួន៧៣៤នាក់ នឹងទៅជួយវាស់វែងដីចំនួន៤៨៦កន្លែង ហើយអ្នកជំនាញៗខាងផ្នែកវាស់វែងដីមកពីក្រសួងរៀបចំដែនដីនគរូបនីយកម្ម និងសំណង់ និងមន្ត្រីថ្នាក់ខេត្តចំនួន២៨១នាក់ នឹងចូលរួមក្នុងគម្រោងផ្ដល់ប័ណ្ណកម្មសិទ្ធិដីធ្លី ជូនអ្នកភូមិទាំងអស់ដែលរស់នៅលើដីសម្បទាន និងលើដីព្រៃរបស់រដ្ឋឲ្យចប់សព្វគ្រប់ត្រឹមរយៈពេលប្រាំមួយខែ។
និស្សិតស្ម័គ្រចិត្តចំនួន៣០០នាក់បន្ថែមទៀតនឹងចាប់ផ្ដើមរៀនអំពីរបៀបវាស់វែងដីនៅថ្ងៃនេះ ហើយនឹងត្រូវបញ្ជូនឲ្យទៅវាស់វែងដីនៅប៉ុន្មានថ្ងៃក្រោយទៀត។ លោកអឹុមឈុនលឹមបានលើកឡើងថានិស្សិតស្ម័គ្រចិត្ត នៅក្នុងគម្រោងផ្ដល់ប័ណ្ណកម្មសិទ្ធិដីធ្លី នឹងចំណាយពេលពីរខែ ដើម្បីវាស់វែងដីទំហំប្រហែល៣៥០.០០០ហិកតាដែលកាន់កាប់ដោយអ្នកភូមិចំនួន១០០.០០០គ្រួសាររស់នៅក្នុងខេត្តចំនួនប្រាំបី ដែលតែងតែមាន“ ជម្លោះដីធ្លីកើតឡើងច្រើន”។
លោករដ្ឋមន្ត្រីបានប្រាប់និស្សិតស្ម័គ្រចិត្ត ដែលបានទទួលវគ្គសិក្សាពីរបៀបវាស់វែងដី និងរបៀបប្រមូលទិន្នន័យនៅសប្ដាហ៍នេះពីអ្នកភូមិ ដែលទទួលរងផលប៉ះពាល់ដោយជម្លោះដីធ្លីថា “ការចុះបញ្ជីដីធ្លី ដើម្បីផ្ដល់ប័ណ្ណកម្មសិទ្ធិដីធ្លីទៅឲ្យអ្នកភូមិ គឺជាសិទ្ធិចម្បង ហើយតម្រូវឲ្យមានភាពហ្មត់ចត់ និងច្បាស់លាស់”។
លោករដ្ឋមន្ត្រីមានប្រសាសន៍បន្ថែមថា “ ការចេញប័ណ្ណកម្មសិទ្ធិដីធ្លី នឹងនាំមកនូវសុវត្ថិភាពដល់ការកាន់កាប់ដីធ្លី ដោយធ្វើឲ្យម្ចាស់កម្មសិទ្ធិដីធ្លីលែងព្រួយបារម្ភ និងមិនមានការភាន់ច្រឡំ”។
សម្រាប់និស្សិតស្ម័គ្រចិត្ត ដែលចេញដំណើរទៅកាន់ឃុំចំនួន៦៤ ក្នុងស្រុកចំនួន២៤ ដែលទទួលរងផលប៉ះពាល់ដ៏ធ្ងន់ធ្ងរ ដោយសារជម្លោះដីធ្លីនោះ ពួកគេនឹងជួបប្រទះការលំបាកក្នុងការវាស់វែងដីធ្លីជាងអ្នកដែលធ្លាប់មានបទពិសោធស្រាប់។
និស្សិតឈ្មោះស៊ីសិរីរតនីអាយុ២១ឆ្នាំជានិស្សិតមកពីវិទ្យាស្ថានបច្ចេកវិទ្យាកម្ពុជា បាននិយាយថា “ ខ្ញុំរំភើបណាស់ដែលបានជួយរដ្ឋាភិបាលក្នុងការផ្ដល់ប័ណ្ណកម្មសិទ្ធិដីធ្លីទៅឲ្យអ្នកភូមិ ពីព្រោះខ្ញុំមិនចង់ឮពីការតវ៉ាពាក់ព័ន្ធនឹងជម្លោះដីធ្លីទៀតទេ”។
ដោយនិយាយយ៉ាងខ្លីតាមទូរស័ព្ទបន្ទាប់ពីទៅដល់កន្លែង ដែលខ្លួននឹងធ្វើការវាស់វែងដីនៅខេត្តកំពត និស្សិត សិរីរតនី បាននិយាយថា គាត់ពិតជាចង់ចាប់ផ្ដើមសម្ភាសអ្នកភូមិ និងប្រមូលទិន្នន័យនៃការកាន់កាប់ដីធ្លីយូរមកហើយ នៅស្រុកជុំគិរីនៅថ្ងៃនេះ។
និស្សិត សិរីរតនីនិងនិស្សិតស្ម័គ្រចិត្តចំនួន២៣នាក់ផ្សេងទៀត ដែលត្រូវធ្វើការវាស់វែងដីក្នុងស្រុកនឹងចូលរួមវគ្គសិក្សារយៈពេលមួយខែពាក់ព័ន្ធនឹងការប្រើឧបករណ៍ក្នុងការកំណត់ទីតាំងភូមិសាស្ត្រ។
លោកអ៊ុកកែវរតនៈអ្នកនាំពាក្យសាលាខេត្តបានមានប្រសាសន៍ថា ក្នុងខេត្តបន្ទាយមានជ័យ មន្ទីររៀបចំដែនដី នគរូបនីយកម្មនិងសំណង់បានប្រញាប់ប្រញាល់រៀបចំកន្លែងសម្រាប់ទទួលនិស្សិតស្ម័គ្រចិត្តចំនួន៨០នាក់ ដែលបានទៅដល់ទីនោះ កាលពីម្សិលមិញ ហើយនិស្សិតទាំងនេះនឹងត្រូវឲ្យស្នាក់នៅក្នុងបរិវេណមន្ទីររយៈពេលពីរខែ។
លោក កែវរតនៈ បានមានប្រសាសន៍បន្ដទៀតថា“ ថ្ងៃស្អែកនិស្សិតស្ម័គ្រចិត្តនឹងជួបសម្ភាសជាមួយអ្នកភូមិ ដែលទទួលរងផលប៉ះពាល់ ដោយសារជម្លោះដីធ្លី ដើម្បីចាប់ផ្ដើមប្រមូលទិន្នន័យ អំពីប្រវត្តិនៃការកាន់កាប់ដីធ្លីជាយូរមកហើយ និងទំហំដីធ្លីដែលពួកគាត់បានអះអាង”។
នៅពេលបញ្ចប់ការប្រមូលទិន្នន័យភ្លាម ទិន្នន័យទាំងនេះនឹងត្រូវបញ្ជូនទៅកាន់លោកនាយករដ្ឋមន្ត្រី ដើម្បីសម្រេចធ្វើអនុបយោគដីរដ្ឋ ឲ្យទៅជាទីដែលអ្នកភូមិធ្លាប់បានរស់នៅ និងចេញប័ណ្ណកម្មសិទ្ធិដីធ្លីស្របច្បាប់ដល់ពួកគាត់៕
ប្រែសម្រួលដោយស៊ាស៊ុយឈាង