32 C
Phnom Penh

ស្ត្រី​​​ភាគ​​​ច្រើន​​ជាប់​​​ឆ្នោតក្រុមប្រឹក្សា​​​ឃុំ-សង្កាត់ ប៉ុន្ដែ​​​ទំនង​​​ជាមិន​​​សម្រេចបានតាម​​​គោល​​​ដៅ​​​គ្រោង​​​ទុក

ដោយ ឌឹ ខេមបូឌា ដេលី

បទវិភាគ

អ្នក​​​ឃ្លាំមើលដំណើរ​​​ការ​​​បោះ​​​ឆ្នោត​​​ម្នាក់​​​បាន​​​លើកឡើង​​​កាលពិ​​​ម្សិលមិញ​​​ថា ចំនួនស្ត្រី​​​ដែល​​​បាន​​​ជាប់​​​ឆ្នោត​​​តំណែ​​​ង​​​សមាជិក​​​ក្រុម​​​ប្រឹក្សា​​​ឃុំ-សង្កាត់ក្នុង​​​ការ​​​បោះ​​​ឆ្នោត​​​ឃុំ​​​-សង្កាត់ កាល​​​ពី​​​ខែ​​​មុន​​​ បាន​​​កើន​​​ឡើង​​​ត្រឹម​​​២៣​​ ភាគ​​​រយដូច្នេះ​​​ហើយ​​​​ទើប​​​មាន​​​ការ​​​កត់​​​សម្គាល់​​​ថា ប្រ​​​ទេស​​កម្ពុជា​​​នៅ​​​តែ​​​មិន​​​ទាន់​​​សម្រេច​​​តាម​​​គោល​​​ដៅ​​​អភិវឌ្ឍន៍​​​សហស្សវត្សរ៍របស់​​​ខ្លួន​​​សម្រាប់​​​តំណាង​​​ស្ត្រី​​​ ដែល​​​បាន​​​ជាប់​​​ឆ្នោត។

លោកគល់បញ្ញានាយក​​​ប្រតិបត្តិ​​​នៃ​​​គណៈ​​​​​​កម្មាធិការ​​​សម្រាប់​​​ការ​​​បោះ​​​ឆ្នោត​​​ដោយ​​​សេរី​​​ និង​​​យុត្តិធម៌បាន​​​មាន​​​ប្រសាសន៍​​​ថាស្ត្រីជា​​​សមាជិក​​​ក្រុមប្រឹក្សាចំនួន​​​២.០៣៨​​​នាក់ ​​​បាន​​​ជាប់​​​ឆ្នោតនិង​​​ស្ត្រី​​​មេឃុំ-សង្កាត់ចំនួន​​​៩៤​​​នាក់​​​ត្រូវ​​​បាន​​​តែង​​​តាំង​​​កាលពី​​​ខែ​​​មុនដែល​​​​​​​​​​​​ចំនួននេះ​​​បានកើន​​​ឡើង​​​ ដោយ​​​កាលពី​​​ឆ្នាំ​​​២០០៧មាន​​​ស្ត្រីជា​​​សមាជិក​​​ក្រុម​​​ប្រឹក្សា​​​ ឃុំ-សង្កាត់​​​ត្រឹម​​​តែ​​​១.៦៦២នាក់និង​​​ស្ត្រី​​​ជា​​​មេឃុំ-ចៅសង្កាត់​​​​​​ចំនួន​​​៦៧​​​នាក់ប៉ុណ្ណោះ​​​។ ​​​ប៉ុន្តែនៅ​​​មាន​​​តំណែងមេឃុំ-ចៅសង្កាត់ចំនួន​​​១.៦៣៣​​​កៅអី​​​ទៀត​​​ ដែល​​​ត្រូវ​​​ដណ្ដើមយក​​​។​​​

លោក​​​ បញ្ញា​​​ បាន​​​មាន​​​ប្រសាសន៍ថាស្ត្រី​​​បាន​​​កាន់​​​តំណែង​​​១៨​​​ភាគរយ​​​នៃតំណែង​​​សមាជិក​​​ក្រុម​​​ប្រឹក្សាឃុំ-សង្កាត់​​​ គឺនៅទាប​​ជាង​​​គោល​​​ដៅ​​​អភិវឌ្ឍន៍​​​សហស្សវត្សរ៍​​​ឆ្នាំ​​​២០១៥ ​​​ដែល​​​ត្រូវ​​​សម្រេច​​​ឲ្យ​​​បាន​​​២៥ភាគ​​​រយ​​​នោះ​​​។​​​

លោក​​​បាន​​​មាន​​​ប្រសាសន៍ថា“រដ្ឋាភិបាល​​​បា​​​ន​​​កំណត់​​​គោល​​​ដៅ​​​មួយដើម្បីសម្រេច​​​ឲ្យ​​​បាន​​​២៥​​​ភាគ​​​រយត្រឹម​​​ឆ្នាំ​​​២០១៥។ប៉ុន្ដែ​​​ ពេល​​​នេះ​​​យើង​​​សម្រេច​​​បាន​​​ប្រ​​​ហែល​​​១៨​​​ភាគ​​​រយ​​​​​​​​​។នៅមានគម្លាត​​​ធំណាស់​​​ ខ្ញុំ​គិត​​​ថា ​​​រដ្ឋាភិបាល​​​មិន​​​អាច​​​សម្រេច​​​ គោល​​​ដៅ​​​អភិវឌ្ឍន៍​​​​​​សហស្សវត្សរ៍របស់​​​ខ្លួនបាន​​​ទេ”។

លោក​​​ បញ្ញាបាន​​​មានប្រសាសន៍ថាវិធី​​​តែ​​​មួយ​​​គត់​​​ដែល​​​ប្រ​​​ទេស​​​កម្ពុជា​​​អាច​​​សម្រេច​​​គោល​​​ដៅ​​​អភិវឌ្ឍន៍​​​របស់​​​ខ្លួនបាន​​​គឺ​​​ទាល់​​​តែ​​​អស់​​​លោក​ជាបុរសដែល​​​ជាប់​​​ឆ្នោត​​​នោះ ​​​បោះ​​​បង់​​​តំណែងសមាជិក​​​ក្រុម​​​ប្រឹក្សាឃុំ-សង្កាត់​​​របស់​​​ខ្លួនហើយ​​​ឲ្យស្ត្រី​​​ឡើង​​​កាន់​​​តំណែង​​​​​​ជំនួស​​​វិញ។ឧទាហរណ៍ បន្ទាប់​​​ពី​​​ការ​​​បោះ​​​ឆ្នោត​​​ឃុំ-សង្កាត់​​​ឆ្នាំ​​​២០០៧ ​​​ស្ត្រី​​​កាន់​​​តំណែង​​សមាជិក​​​ក្រុម​​​ប្រឹក្សា​​​ឃុំ-សង្កាត់​​​មាន​​​ចំនួន​​​ប្រហែល១៤,៥ ភាគរយ ដែល​​​តួលេខ​​​នោះ​​​បាន​​​កើន​​​ឡើង​​​ដល់​​​១៦​​​ភាគរយដោយ​​​សារតែ​​​សមាជិក​​​ក្រុមប្រឹក្សា​​​ឃុំ-សង្កាត់​​​នោះ​​​ត្រូវ​​​បាន​​​ជំនួស​ ដោយ​​​ស្ត្រី មុន​​​ពេល​​​ការ​​​បោះ​​​ឆ្នោត កាល​​​ពី​​​ខែ​​​មុន​​​នេះ។

យោង​​​តាមលោកជាម យៀប​​​ សមា​ជិកសភា​​​មកពីគណបក្សប្រជាជនកម្ពុជា ​​​ឲ្យ​​​ដឹង​​​ថាបេក្ខ​​​ជន​​​ស្ត្រី​​​មក​​​ពី​​​គណបក្ស​​​កាន់​​​អំណាច​​​ ដែល​​​​​​​បាន​​​ឈ្នះ​​​ឆ្នោត​​នោះបាន​​​កាន់​​​​​​តំណែងក្រុម​​​ប្រឹក្សា​​​ឃុំ-សង្កាត់​​​ចំនួន​​​១.៧៨១​​​អាសនៈ​​​។ ​​​លោក​​​បាន​​​មាន​​​ប្រសាសន៍ថាលោក​​​មិន​​​បាន​​​ដឹង​​​ថាតើ​​​ស្ត្រី​​​ជាមេ​​​ឃុំ-ចៅសង្កាត់ប៉ុន្មាន​​​នាក់​​​ទេ​​​ ដែល​​​ត្រូវ​​​បាន​​​​​តែង​​​តាំង​​​ក្រោយ​ពីការ​​​បោះ​​​ឆ្នោត​​មក។

លោក​​​បាន​​​មាន​​​ប្រសាសន៍ថា“សមាជិក​​​ក្រុម​​​ប្រឹក្សា​​​ឃុំ-សង្កាត់​​​របស់​​​យើង​​​បាន​​​កើន​​​ឡើងមែន ​​​បើប្រៀប​​​ធៀប​​​នឹង​​​ឆ្នាំ​​​២០០៧”​​​។ យោង​​​តាម​​​លោកយឹមសុវណ្ណអ្នក​​​នាំ​​​ពាក្យ​​គណ​​​បក្ស​​​ សមរង្ស៊ីបាន​​​ឲ្យ​​​ដឹង​​​ថា ​​​គណបក្ស​​​ សមរង្ស៊ីអាច​​​ទទួល​​​បាន​​​តំណែង​​​មេឃុំ-ចៅសង្កាត់​​​សម្រាប់​​​ស្ត្រីទទួលបានតែ​​​មួយ​​​អាសនៈទេប៉ុន្ដែតំណែង​​​សមាជិក​​​ក្រុម​​​ប្រឹក្សា​​​ឃុំ-សង្កាត់​​​ ទទួលបាន​​​ចំនួន​​​២៣៧​​​ អាសនៈ​​​។លោក​​​​​​បន្ថែម​​​ថាគោល​​​ដៅ​​​អភិវឌ្ឍន៍​​​​​​សហស្សវត្សរ៍មិន​​​អាចសម្រេចបានទេ​​​។

លោក​​​បាន​​​មាន​​​ប្រសាសន៍ថា“ខ្ញុំ​​​គិតថាវា​​​មិន​​​អាច​​​ទៅ​​​រួច​​​ទេដោយ​​​សារតែការអប់​​​រំ ​​​សុខភាពនិង​​​លទ្ធភាព​​​ទទួួល​​​ព័ត៌មាន​​​សម្រាប់​​​ស្ត្រី​​​នៅ​​​មាន​​​កម្រិត​​​ទាបណាស់។ចំណែក​​​ឯ​​ការ​​​បំភិត​​​បំភ័យនិង​​​ការ​​​គំរាម​​​កំហែងផ្នែក​​​នយោបាយ​​​វិញមាន​​​សភាព​​​ខ្លាំង​​​ក្លា។នៅ​​​លើ​​​ ក្រដាស​​​ [រដ្ឋា​​​ភិបាល] គោរព​​​សិទ្ធិ​​​មនុស្ស ប៉ុន្ដែ​​​ធាតុពិត… ពួកគេមិន​​​អាច​​​សម្រេចគោល​​​ដៅ​​​អភិវឌ្ឍន៍​​​សហស្សវត្សរ៍​នោះទេ”។

យោង​​​តាម​​​លោកបញ្ញាបាន​​​ឲ្យ​​​ដឹង​​​ថា ​​​គណបក្ស​​​សិទ្ធិ​​​មនុស្ស​​​ឈ្នះបាន​​​១៨​​​ឃុំ​​​ក្នុង​​​ការ​​​បោះ​​​ឆ្នោត​​​ ហើយ​​​មានចំនួន​​​ស្ត្រីតែ១២​​នាក់​​​ប៉ុណ្ណោះដែល​​​ទទួល​​​បាន​​​តំណែង​សមាជិក​​​ក្រុម​​​ប្រឹក្សា​​​ឃុំ-សង្កាត់។

លោក​​​បាន​​​មាន​​​ប្រសាសន៍ថា“ជួន​​​កាល​​​ខ្ញុំ​​​មាន​​​អារម្មណ៍ថាពួក​​​គេ​​​មិន​​​យល់និងមិនដឹង​​​ច្បាស់​​​អំពី​​​សមធម៌​​​យេនឌ័រសម្រាប់​​តំណាង​​​ ដែល​​​បាន​​​ជាប់​​​ឆ្នោត​​​នៅ​​​ថ្នាក់​​​ឃុំ-សង្កាត់​​​នោះទេ”។ ប៉ុន្ដែលោក​​​ យ៉ែមបុញ្ញឫទ្ធិ​​​ អគ្គលេខា​​​ធិការ​​​​​​គណបក្ស​​​សិទ្ធិ​​​មនុស្ស បាន​​​មាន​​​ប្រាសាសន៍ថា ​​​នេះ​​​មិន​​​មែន​​​ជា​​​បញ្ហា​​​នោះទេ។ លោក​​​បាន​​​មាន​​​ប្រសាសន៍ថា“ពួកគេ​​​ត្រូវ​​​បាន​​​បណ្ដុះ​​​បណ្ដាល​​​ កាល​​​ពី​​​សប្ដាហ៍​​​មុន​​​ហើយ ហើយ​​​យើ​​​ងក៏​​លើក​​​ទឹក​​​ចិត្ត​​​ស្ត្រី​​​ឲ្យ​​​ចូល​​​រួម​​​ក្នុង​​​ឆាក​​​នយោបាយ​​​ដែរ៕

ប្រែ​​​សម្រួល​​​ដោយ ហម សុផាណ្ណា​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស