មន្ត្រីបានថ្លែងថា កងរាជអាវុធហត្ថខេត្តកំពង់ធំ បានរឹបអូសគ្រឿងចក្រឈូសឆាយដីចំនួន២៩គ្រឿង និងបានចាប់ខ្លួនអ្នកបើកបរបួននាក់ ក្នុងប្រតិបត្តិការមួយមានរយៈពេលបួនថ្ងៃ ដើម្បីបញ្ឈប់ការសាងសង់អាងស្តុកទឹកខុសច្បាប់នៅតំបន់ជុំវិញបឹងទន្លេសាប ដែលបានបញ្ចប់កាលពីម្សិលមិញ។
អាងស្តុកទឹក ដែលបានប្រើសម្រាប់ស្តុកទឹកទុកធ្វើស្រែនៅរដូវប្រាំងនោះត្រូវបានគេស្តីបន្ទោសថា បានធ្វើឲ្យទិន្នផលត្រីថយចុះដោយសារតែការបំផ្លាញតំបន់ត្រីបង្កាត់ពូជយ៉ាងសំខាន់នៅតាមមាត់បឹង។ការសាងសង់អាងស្តុកទឹកនៅតាមមាត់បឹងទន្លេសាបនោះនៅតែមានជាហូរហែទោះបីជាមានការបង្ក្រាបពីក្រុមអាជ្ញាធរជាញឹកញាប់យ៉ាងណាក៏ដោយ ដើម្បីពង្រឹងការអនុវត្តបម្រាមឆ្នាំ២០០៩។
លោកឧត្ដមសេនីយ៍ត្រី ហង្ស ថុល បញ្ជាការកងរាជអាវុធហត្ថខេត្ត មានប្រសាសន៍ថាអាជ្ញាធរបានប្រទះឃើញគ្រឿងចក្រឈូសដីទាំងនេះនៅក្នុងឃុំចំនួនបីនៅក្នុងស្រុកស្ទោង ដែលបានប្រើសម្រាប់ធ្វើអាងស្តុកទឹក និងសម្រាប់ឈូសឆាយតំបន់ព្រៃលិចទឹកនៅក្នុងរដូវវស្សា។លោកបានបន្តថា “ ខ្ញុំមិនដឹងថាអ្នកណាជាអ្នកបញ្ជាពួកគេឲ្យធ្វើរឿងនេះ (ជីកអាងស្តុកទឹក) ទេ។ ឥឡូវនេះ យើងកំពុងស្វែងរកម្ចាស់អាងស្តុកទឹក និងម្ចាស់គ្រឿងចក្រទាំងនោះ។យើងកំពុងតែស៊ើបអង្កេតករណីទាំងនេះហើយ”។
លោក ថុល បានបន្តថា លោកឧបនាយករដ្ឋមន្ត្រី ប៊ិន ឈិន ប្រធានអាជ្ញាធរជាតិដោះស្រាយទំនាស់ដីធ្លីបានបញ្ជាដោយខ្លួនលោកផ្ទាល់ ឲ្យបើកប្រតិបត្តិការបង្ក្រាបនេះ។លោកឧត្ដមសេនីយ៍ត្រី ថុល បានមានប្រសាសន៍ថា “ មន្ត្រីថ្នាក់ខ្ពស់ម្នាក់បានបញ្ជាឲ្យធ្វើការបង្ក្រាបការធ្វើអាងស្ដុកទឹក ពីព្រោះនៅតំបន់នោះជាតំបន់រដ្ឋាភិបាលហាមឃាត់មិនឲ្យ [ជីកអាងស្ដុកទឹក]”។
កាលពីខែវិច្ឆិកា ឆ្នាំ២០០៩ទីស្ដីការគណៈរដ្ឋមន្ត្រីបានចេញបញ្ជា ដោយអំពាវនាវឲ្យលុបចោលសំណង់អាងស្ដុកទឹកមានទំហំរាប់ពាន់ហិកតា នៅក្នុងខេត្តចំនួនប្រាំមួយ ដែលមានព្រំប្រទល់ជាប់នឹងបឹងទន្លេសាប។កាលពីខែឧសភា ដោយសង្កេតឃើញថាមិនមានការរីកចម្រើន ក្នុងការអនុវត្តបទបញ្ជានោះ លោកនាយករដ្ឋមន្ត្រី ហ៊ុន សែន បានអំពាវនាវម្ដងហើយម្ដងទៀតឲ្យបំផ្លាញចោលអាងស្ដុកទឹកទាំងនោះ។
លោក ឃុន ប៊ុនហូ មេបញ្ជាការកងរាជអាវុធហត្ថស្រុកស្ទោង បានបញ្ជាក់ថា ប្រតិបត្តិការបង្ក្រាប ដែលបានរឹបអូសគ្រឿងចក្រចំនួនបួនគ្រឿង និងចាប់ខ្លួនអ្នកបើកបរបួននាក់នោះចាប់ផ្ដើម កាលពីថ្ងៃសុក្រ ហើយបានបញ្ចប់កាលពីម្សិលមិញ ក្នុងឃុំសំព្រោចម្សាក្រង និងឃុំចំណាក្រោម។
លោកបានបន្ដថាវាមិនច្បាស់ទេថាមានព្រៃលិចទឹកចំនួនប៉ុន្មានហិកតា ដែលត្រូវបានបំផ្លាញ និងរងផលប៉ះពាល់ដោយការឈូសឆាយដីនោះទេ។ លោកមានប្រសាសន៍ទៀតថា អ្នកបើកបរត្រាក់ទ័រ ដែលបានចាប់ខ្លួននោះបានប្រាប់នគរបាលថា ពួកគេត្រូវបានម្ចាស់ត្រាក់ទ័រជួលហើយពួកគេអះអាងថា មានច្បាប់អនុញ្ញាតពីមន្ទីរធនធានទឹក និងពីអាជ្ញាធរខេត្ដ។
លោកប៊ុនហូបានបន្ដទៀតថាលោកមិនអាចប្រាប់ឈ្មោះជនសង្ស័យ ដែលបានបញ្ជាឲ្យឈូសឆាយដីនោះទេ ដោយលោកបារម្ភថា អាចធ្វើឲ្យខូចការស៊ើបអង្កេត។ លោក ប៊ុនហូ មានប្រសាសន៍ថា “ វាជាការខុសច្បាប់ ហើយប្រឆាំងនឹងបទបញ្ជារបស់សម្ដេច [ហ៊ុន សែន]។យើងនឹងរៀបចំសំណុំរឿងបញ្ជូនទៅតុលាការ”។
លោកចាំ រដ្ឋាមន្ត្រីគម្រោងប្រចាំអង្គការជលផលហ្វែក (FACT) បានមានប្រសាសន៍ថារដ្ឋាភិបាលបានទទួលជោគជ័យក្នុងការលុបបំបាត់អាងស្ដុកទឹកធំៗ នៅក្នុងតំបន់នោះ។ លោកបន្ថែមថា “ បើតាមតំណាងរបស់យើងនៅក្បែរបឹងទន្លេសាប បាននិយាយថាសកម្មភាពខុសច្បាប់ជាច្រើនទាក់ទងនឹងការធ្វើអាងស្ដុកទឹកត្រូវបានបញ្ឈប់។ ប៉ុន្តែ នៅមានករណីខ្លះកើតឡើងដោយសារពួកគេនៅតែកាប់បំផ្លាញព្រៃលិចទឹកដើម្បីជីកប្រឡាយ ប៉ុន្តែ ប្រឡាយទាំងនោះមិនមានទំហំធំទេ”៕
(រាយការណ៍បន្ថែមដោយ Simon Lewis)
ប្រែសម្រួលដោយឃិនណៃ