28 C
Phnom Penh

សមត្ថ​កិច្ច​ដក​​ហូត​គ្រឿង​​ចក្រ​​​ឈូស​ឆាយជាច្រើនគ្រឿង​​ពី​​មេឃុំគណ​បក្ស​ប្រ​​ជា​​ជន​កម្ពុជា

ដោយ ឌឹ ខេមបូឌា ដេលី

បទវិភាគ

​​​គ្រឿង​​ចក្រ​​ឈូស​​​ឆាយ​​១២​​គ្រឿង​​ក្នុង​​ចំណោម​​២៩​​គ្រឿង​​​ ដែល​​កម្លាំង​​កង​រាជ​អាវុធ​​​​​ហត្ថ​ដក​ហូត​​ក្នុង​ខេត្ត​​កំពង់​ធំ​ អំឡុង​​​​​​ការ​​​​​ឆ្មក់​​បង្ក្រាប​​របស់​​​​​​កង​រាជ​​អា​វុធ​​ហត្ថ​​​​​កាលពី​ថ្ងៃ​ច័ន្ទ​​ទៅ​លើ​អាង​​ស្តុក​ទឹក​​​ខុស​​ច្បាប់​​នៅ​​បឹង​ទន្លេ​​សាប​​​​នោះត្រូវ​​បាន​រឹប​អូស​ពី​សហគម​ន៍​កសិកម្ម​មួយកន្លែង​​​គ្រប់​​គ្រង​ដោយ​មេឃុំ​​​ទើប​ជាប់​ឆ្នោត​ថ្មី​​​ម្នាក់​មកពីគណ​​បក្ស​​ប្រជា​​ជន​កម្ពុជា​។

លោកពាញប៉ុល ​ប្រធាន​សហគមន៍​ស្រែ​​​ប្រាំងបាន​​​ជាប់​ឆ្នោត​​​​​​​ជា​​​មេ​​ឃុំ​​​​នៅក្នុង​​ការ​​បោះ​ឆ្នោតឃុំ​-សង្កាត់​កាល​​ពី​​ខែ​​មុន​ ប៉ុន្តែ​មិន​ទាន់​​ស្បថ​ចូល​កាន់​​តំ​ណែង​​នៅឡើយ​ទេ។ ​លោក​បាន​មាន​​ប្រ​សាសន៍​ថាលោក​គិតថា ​លោក​​​កំពុង​​​​ជួសជុល​​អាង​​ស្តុក​ទឹក​​ដែល​​មិន​ស្ថិត​​នៅ​​​ក្នុង​តំបន់​ការពារ​។

លោក​បាន​មាន​ប្រ​​សាសន៍​ថា“នៅក្នុង​ឃុំ​របស់​ខ្ញុំ​ យើង​​មិន​​បាន​​​​ឈូស​​ឆាយ​​​​​​​​​ធ្វើ​​អាង​ស្តុក​ទឹក​​​​​នៅក្នុង​តំបន់​៣នោះ​ឡើយ។គ្រឿង​​ចក្រ​ឈូស​ឆាយ​ទាំង​​នោះ​​ជួ​​ល​ពី​រាជ​ធានីភ្នំ​ពេញ…។

​​ខ្ញុំ​​គិតថា ​​ខ្លួន​​ខ្ញុំ​​ផ្ទាល់​និង​​អ្នក​ភូមិ​ទាំង​​​​នោះ​​​មិន​​បាន​ធ្វើ​​អ្វី​​ខុស​​ច្បាប់​​ឡើយ។យើង​​ចង់​ឲ្យ​​អាជ្ញាធរ​​ដោះ​​ស្រាយ​រឿង​នេះពីព្រោះ​​យើង​​​ចង់​ជួស​ជុល​​​ទំនប់​អាង​ស្តុក​​​ទឹក​​​​​របស់​​​យើង​​អំឡុង​រដូវ​វស្សានេះ”។ លោក​​​​បាន​​​លើក​​ឡើង​​ទៀត​​​​​ថា ​​មិន​​​​គួរ​​ដក​​​​ហូត​​​​​គ្រឿង​​​ចក្រ​​​​​នៅក្នុង​​តំបន់​១​​និង​តំបន់​​២​​​ទេពីព្រោះ​​វា​​នៅ​​​ឆ្ងាយ​​ពី​​បឹង​​​ និង​​​​អាច​អនុញ្ញាត​​ឲ្យ​​ធ្វើ​អាងស្តុក​​​ទឹក​​​​បាន​។

គ្រឿង​​ចក្រ​​​ចំនួន​​​២៩​គ្រឿង​​ត្រូវ​​បាន​​ដក​ហូត​អំឡុង​ប្រតិ​​បត្តិ​​ការ​រយៈពេល​​​​បួន​​​​​ថ្ងៃ​នេះ​​​នៅក្នុង​​ស្រុក​ស្ទោង​ ក្នុង​​​គោល​​​បំណង​​បង្ក្រាប​អាងស្តុក​​ទឹក​​​ទាំង​​​នេះ​ដែល​​ត្រូវ​បន្ទោស​​​ចំពោះ​​ការ​​ធ្វើ​​ឲ្យ​ធ្លាក់​​ចុះ​បរិមាណ​ត្រី។ ​​​គួរ​​បញ្ជាក់​​​​ថា ​​​​​​​មាន​​​​​​បម្រាម​​​​​​មិន​​​ឲ្យ​​​សង់​អាងស្តុក​​​​ទឹក​​​​ទាំង​​​នេះ​​​​​​​​​ទេ​​ចាប់​​តាំង​​ពី​ឆ្នាំ​​២០០៩​​មក​។​

យោង​តាម​​​លោក​ឧត្តម​សេនីយ៍​ត្រី​ ហង្សថុល ​​មេ​​បញ្ជា​ការ​​​កង​រាជ​​អាវុធ​​ហត្ថ​​​​​ខេត្ត​​​​​បាន​ឲ្យ​​ដឹង​ថា ​​កម្លាំង​​សមត្ថ​​​កិច្ច​​​​​កំពុង​ស្រាវ​​ជ្រាវ​​រក​​គ្រឿង​​​​ចក្រ​​មួយចំនួន​ទៀត​ដែលគេ​​ប្រើ​​នៅ​​​ក្នុង​​​ការ​សង់​​អាងស្តុក​ទឹក​ខុស​ច្បាប់​​ជុំ​វិញ​​បឹង​ទន្លេ​​​សាប​។​

លោក​​​បាន​មាន​​ប្រ​​សាសន៍ថា ​អ្នក​​បើក​​បរ​​​​គ្រឿង​​​ចក្រ​បួន​នាក់ដែល​​​ត្រូវ​បាន​ចាប់​​ខ្លួន​​នៅ​​​ក្នុង​​ការ​​បង្ក្រាប​កាល​​ពី​ថ្ងៃ​​ច័ន្ទ​​​នោះត្រូវ​​បាន​​​ដោះ​លែង​​​​វិញ​​ហើយ ប៉ុន្តែ​​ត្រូវ​​​បាន​​​​ចាត់​ទុក​ជា​​​​សាក្សី​។លោក​​បាន​បន្ត​​ថា“សូម​​បញ្ជាក់​​ថា ​តំបន់៣​​គឺ​​​ជា​តំបន់​​​​ហាម​​ឃាត់”។

លោក​​ ជាតិ​​ ស៊ីវុត្ថា ​​ប្រ​ធាន​មន្ទីរ​​​​​ធន​​​ធាន​ទឹក​​​​​​​​ខេត្ត​បាន​មាន​ប្រ​​សាសន៍​ថា ​ម្ចាស់​អាង​​ស្តុក​​​ទឹក​​​​​​​ម្នាក់​​ឈ្មោះ ​ធាងធា ​ទទួល​​បាន​ការ​អនុញ្ញាត​ឲ្យ​​​​​​ឈូស​​ឆាយនៅ​​​​ក្នុង​​តំបន់​​​២កាល​​​ពីខែ​​​មេសាប៉ុន្តែ​​ថាលោកធា ​បាន​ចាប់​​ផ្តើម​​​​​​​​​​ឈូស​​ឆាយសង់​​​អាងស្តុក​​​​ទឹកមួយ​​​​ស្ងាត់​ៗ​​​​ក្នុង​​តំបន់​​៣។

លោក​​បានមាន​​​ប្រ​​​សាសន៍​​ថា“អាជ្ញា​​ធរ​​ខេត្ត​​របស់​​យើង​​​​​បាន​ហាម​ឃាត់​​​គាត់​​ពីរ​​​បី​​​ដង​​​រួច​​​មក​​ហើយប៉ុន្តែ​​​​គាត់​មិន​​គោរព​តាម​​ការ​​សម្រេច​របស់​យើង​​ទេ​​​ ដូច្នេះ​ហើយ​​​​​បាន​​​ជា​​​ពេល​​នេះ​​ យើង​​​​ធ្វើ​​​ការ​​​​​បង្ក្រាប​​​ថ្នាក់​​ជាតិ​​តែ​​ម្តង​​ទៅ​​”។

លោក ​​ឃុន ​ប៊ុនហូ ​មេ​​បញ្ជា​​ការ​​​កង​​រាជ​​អា​​វុធ​​ហត្ថ​​ស្រុ​ក​​ស្ទោង​​​​​​ បាន​មាន​ប្រ​​សាសន៍​​ថាកំពុងមាន​ការ​​ស្រាវ​​​ជ្រា​វរក​​គ្រឿង​​ចក្រ​​​បន្ថែម​​​ទៀត​​។លោក​​​​​​លើក​​ឡើង​ទៀត​​ថា “​​ប្រសិន​​​​​បើ​​​​​យើង​​​ប្រ​​មូល​​ភស្តុតាង​​​​និង​​ឯក​សារ​​​​បាន​គ្រប់​​គ្រាន់យើង​​នឹង​​បញ្ជូន​​​​​ករណី​នេះ​ទៅ​​តុលាការ​​”៕

ប្រែ​សម្រួល​ដោយ​​​ តែមសុខុម​​​

                 

 

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស