យោងតាមមន្ត្រីមូលដ្ឋានបានឲ្យដឹងថាកងរាជអាវុធហត្ថខេត្តស្ទឹងត្រែង កាលពីថ្ងៃអង្គារ បានឃាត់ខ្លួនមន្ត្រីមួយរូប ធ្វើការនៅទីស្ដីការគណៈរដ្ឋមន្ត្រី និងស្វាមីរបស់គាត់ ពីបទព្យាយាមបោកប្រាស់កម្មវិធីផ្ដល់ប័ណ្ណកម្មសិទ្ធិដីធ្លីមួយ ដែលលោកនាយករដ្ឋមន្ត្រី ហ៊ុន សែនបានប្រកាសកាលពីខែមុន។
វាគឺជាលើកទី២ហើយក្នុងសប្ដាហ៍នេះ ដែលអាជ្ញាធរបានចាប់ខ្លួន ឬឃាត់ខ្លួនមន្ត្រី ដោយសង្ស័យថាបានបំពានផែនការផ្តល់ប័ណ្ណកម្មសិទ្ធិដីធ្លីចាប់តាំងពីលោក ហ៊ុនសែន បានប្រកាស កាលពីពាក់កណ្ដាលខែមិថុនាមក។
លោក ឱ បូរិនមេបញ្ជាការកងរាជអាវុធហត្ថខេត្តបានមានប្រសាសន៍ថា លោកស្រីមាស សុខុនដែលធ្វើការនៅការិយាល័យកិច្ចការច្បាប់នៃទីស្ដីការគណៈរដ្ឋមន្ត្រី និងស្វាមីរបស់គាត់ ត្រូវបានឃាត់ខ្លួន តាមបញ្ជាផ្ទាល់ពីលោកអភិបាលខេត្ត ឡូយ សុផាត កាលពីថ្ងៃអង្គារពីបទ“ញុះញង់”។លោកបានមានប្រសាសន៍ថា “យើងបានឃាត់ខ្លួនពួកគាត់តាមការបញ្ជាផ្ទាល់ពីលោកអភិបាលខេត្ត [កាលពីថ្ងៃអង្គារ] ។ពេលនេះ
ពួកគាត់កំពុងស្ថិតនៅទីបញ្ជាការរបស់យើង។ ដំបូង យើងបានឃាត់ខ្លួនមនុស្សចំនួន១៣នាក់ រួមទាំងប្ដីប្រពន្ធពីរនាក់នេះផង ប៉ុន្ដែ យើងបានដោះលែង១១នាក់ឲ្យត្រឡប់ទៅផ្ទះវិញ។ ពេលនេះ មានតែប្ដីប្រពន្ធពីរនាក់នេះប៉ុណ្ណោះ ដែលយើងកំពុងសាកសួរដោយសារតែពួកគាត់បានធ្វើការញុះញង់”។
លោក ផឹក សុបិន អភិបាលក្រុងស្ទឹងត្រែងបានមានប្រសាសន៍ថា លោកស្រី មាស សុខុន ត្រូវបានឃាត់ខ្លួននៅពេលប្រឈមជាមួយនឹងក្រុមនិស្សិតស្ម័គ្រចិត្ត ដែលកំពុងអនុវត្តផែនការរបស់លោកនាយករដ្ឋមន្ត្រី។
កាលពីថ្ងៃទី១៤ ខែមិថុនា លោក ហ៊ុនសែនបានប្រកាសផែនការលម្អិតមួយ ដែលអាចធ្វើឲ្យអ្នកភូមិរាប់មុឺនគ្រួសារ ដែលកំពុងរស់នៅលើដីព្រៃរបស់រដ្ឋ ក្នុងតំបន់ដីសម្បទានសេដ្ឋកិច្ច និងអតីតព្រៃសម្បទានទទួលបានប័ណ្ណកម្មសិទ្ធិដីធ្លី។ចាប់តាំងពីពេលនោះមក និស្សិតស្ម័គ្រចិត្ត១.១០០នាក់ ត្រូវបានបញ្ជូនទៅទូទាំងប្រទេស ដើម្បីជួយវាស់វែងដីនៅតាមតំបន់នានា។
លោកផឹក សុបិនបានថ្លែងថាលោកស្រី មាស សុខុន គឺជាមនុស្សម្នាក់ក្នុងចំណោមមនុស្សមួយចំនួន ដែលបានកាប់ឆ្ការដីព្រៃដោយខុសច្បាប់នៅតាមបណ្ដោយផ្លូវជាតិលេខ៧ ក្នុងបំណងដើម្បីចាប់យកដីរដ្ឋ កាលពីជាងប្រាំឆ្នាំមុន មុនពេលអាជ្ញាធរមូលដ្ឋានបានបណ្ដេញពួកគេចេញ កាលពីឆ្នាំ២០០៧។
លោកបានមានប្រសាសន៍ទៀតថា នៅពេលលោកស្រី មាស សុខុន បានឮពីគម្រោងផ្ដល់ប័ណ្ណកម្មសិទ្ធិដីធ្លីថ្មីរបស់លោកនាយករដ្ឋមន្ត្រី លោកស្រីក៏បានប្រមូលគ្នីគ្នាមួយចំនួនក្នុងគោលបំណងទាមទារយកដីនោះមកវិញ។ ប៉ុន្ដែនៅពេលនិស្សិតស្ម័គ្រចិត្តទាំងនេះបានទៅដល់ និងមិនព្រមចុះហត្ថលេខាទទួលស្គាល់លោកស្រីក្នុងគម្រោងនេះ ស្រាប់តែលោកស្រីមាសសុខុន កើតក្ដីក្ដៅក្រហាយ ដោយសួរនាំពីសិទ្ធិអំណាចរបស់ពួកនិស្សិត។
លោកបានមានប្រសាសន៍ថា “ទង្វើរបស់គាត់ជាការប្រមាថដល់ក្រុមនិស្សិតរបស់យើងនៅពេលគាត់សុំមើលលិខិតបញ្ជាបេសកកម្មរបស់ពួកគេ ហើយបានសួរថាអ្នកណាជាអ្នកបញ្ជាពួកគេឲ្យមក។គាត់ធ្វើដូចជាមិនអើពើនឹងគម្រោងកំណែទម្រង់ដីធ្លីថ្មីៗនេះរបស់នាយករដ្ឋមន្ត្រីអ៊ីចឹង។និស្សិតទាំងនេះពាក់មួកកាតិប និងស្លៀកពាក់ឯកសណ្ឋានដែលមានស្លាកសញ្ញាក្រសួងរៀបចំដែនដី នគរូបនីយកម្ម និងសំណង់ហេតុអ្វីបានជាគាត់នៅតែសួរទៀត?”។
ហេតុការណ៍នេះកើតឡើងបន្ទាប់ពីនាយប៉ុស្ដិ៍នគរបាលឃុំមួយរូប និងនាយប៉ុស្ដិ៍រងរបស់គាត់ នៅក្នុងខេត្តរតនគិរីត្រូវបានព្យួរការងារនៅក្នុងករណីដាច់ដោយឡែកមួយចាប់តាំងពីថ្ងៃអាទិត្យមក ពីបទទាមទារប្រាក់ពីអ្នកភូមិក្នុងមូលដ្ឋាន ដែលចង់មានឈ្មោះនៅក្នុងកម្មវិធីផ្ដល់កម្មសិទ្ធិដីធ្លីនេះ។ មន្ត្រីទាំងពីររូបនេះក៏ត្រូវបាននាំខ្លួនទៅធ្វើការសាកសួរដែរ។ លោកអ៊ូចឡេង សកម្មជនសិទ្ធិមនុស្សជាយូរមកហើយ ដែលធ្វើការអំពីបញ្ហាដីធ្លី បានមានប្រសាសន៍ថាការចាត់វិធានការទៅលើមន្ត្រីប្រព្រឹត្តល្មើសនឹងគោលនយោបាយដីធ្លី ដែលជាវិស័យពោរពេញទៅដោយអំពើពុករលួយខ្លាំងនោះ ជារឿងមិនធម្មតាឡើយ។
លោកបានមានប្រសាសន៍ថា ពេលនេះអាជ្ញាធរប្រហែលជាប្រុងប្រយ័ត្ន ជាពិសេសដោយសារការព្រួយបារម្ភថាប្រសិនបើមន្ត្រីមិនត្រូវបានចាប់ខ្លួនពីបទបំពានបទបញ្ជារបស់លោក ហ៊ុន សែន ដែលត្រូវបានប្រកាសជា សាធារណៈទេនោះ “ប្រជាពលរដ្ឋនឹងលែងមានជំនឿលើនាយករដ្ឋមន្ត្រីទៀតហើយ”៕
(រាយការណ៍បន្ថែមដោយ Zsombor Peter)
ប្រែសម្រួលដោយតែមសុខុម