មន្ត្រីម្នាក់បាននិយាយថា ទាហានកម្ពុជាឈរជើងនៅក្នុងខេត្តបន្ទាយមានជ័យ កាលពីល្ងាចថ្ងៃពុធ បានបាញ់ព្រមានទៅលើយន្តហោះថៃមួយគ្រឿង ដែលគាត់បានគិតថាហោះលើទឹកដីកម្ពុជាដោយខុសច្បាប់។
លោកអ៊ុកកែវរតនៈអ្នកនាំពាក្យរបស់សាលាខេត្តបន្ទាយមានជ័យ បានមានប្រសាសន៍ថា យន្តហោះថៃមួយគ្រឿងកំពុងហោះពីខេត្តសៀមរាបទៅកាន់ក្រុងបាងកក ប៉ុន្តែគេឃើញយន្តហោះនោះ ហោះឆ្លងកាត់ខុសពីធម្មតា។
លោកបានមានប្រសាសន៍ថា “ វាជាយន្តហោះថៃមួយគ្រឿងដឹកអ្នកដំណើរ មិនមែនជាយន្តហោះយោធាថៃនោះទេ”។ លោកមានប្រសាសន៍បន្តថាទាហានម្នាក់បានឃើញយន្តហោះនោះ ហោះឆ្លងកាត់លើទឹកដីកម្ពុជា ហើយបានបាញ់គំរាមជាច្រើនគ្រាប់។ លោកបន្ថែមថាករណីនេះជាការភាន់ច្រឡំ ពីព្រោះយន្តហោះនោះហាក់បីដូចជាហោះតាមបណ្តោយព្រំដែនដោយមិនហោះកាត់ព្រំដែនទេ។
លោក កែវរតនៈបានមានប្រសាសន៍ថា ក្រុមហ៊ុនអាកាសចរណ៍របស់ថៃ ដែលគេមិនបញ្ចេញឈ្មោះនិងជាម្ចាស់យន្តហោះនោះបានធ្វើការសុំទោស ចំពោះការហោះហើរខុសផ្លូវដែលធ្លាប់ហោះ ធម្មតា។ លោកបានបន្ថែមថា “ ពួកគេប្រាប់យើងថាក្រុមហ៊ុនអាកាសចរណ៍ថៃ បានប្រាប់យើងថា ពេលនោះ យន្តហោះកំពុងហោះហើរខុសផ្លូវ”។
លោកឧត្តមសេនីយ៍ត្រី សូ ចាន់ហេង មេបញ្ជាការកងវរសេនាតូចលេខ៥១នៃកងយោធពលខេមរភូមិន្ទ ដែលមានមូលដ្ឋានក្នុងខេត្តបន្ទាយជ័យមានប្រសាសន៍ថា “យន្តហោះនោះបានហោះ លើដែនអាកាសកម្ពុជានៅម៉ោង៦និង៣០នាទីល្ងាច ហើយយើងបាញ់ព្រមានទៅលើអាកាស១៨គ្រាប់”។
លោកឧត្តមសេនីយ៍ត្រីចាន់ហេង មានប្រសាសន៍ថា ទាហានរូបនេះមិនបានដឹងច្បាស់អំពីប្រភេទយន្តហោះនោះទេ ប៉ុន្តែ បាន
សម្រេចចិត្តប្រើអាវុធប្រឆំាងយន្តហោះ២៣មីលីម៉ែត្រដើម្បីព្រមានអ្នកបើកយន្តហោះ
នោះថាខ្លួនកំពុងហោះក្នុងទឹកដីកម្ពុជា។
គេនៅមិនទាន់ច្បាស់ថាមានអ្នកដំណើរប៉ុន្មាននាក់នៅលើយន្តហោះនៅឡើយទេ ឬយន្តហោះនោះជាប្រភេទយន្តហោះអ្វីដែរ។
មន្ត្រីម្នាក់នៅឯក្រុមហ៊ុនអាកាសចរណ៍
បាងកកអ៊ែរវ៉េប្រចាំខេត្តសៀមរាបដែលបដិសេធមិនព្រមប្រាប់ឈ្មោះដោយសារខ្លួនមិនត្រូវបានអនុញ្ញាតឲ្យនិយាយប្រាប់អ្នកយកព័ត៌មាន បាននិយាយថាទោះបីយន្តហោះ
របស់ក្រុមហ៊ុនអាកាសចរណ៍របស់ខ្លួនបានហោះហើរពីក្រុងបាងកកមកខេត្តសៀមរាប
កាលពីម្សិលមិញក៏ដោយក៏មិនមានអ្វីកើតឡើងចំពោះក្រុមហ៊ុនអាកាសចរណ៍បាងកកអ៊ែរវេ៉ដែរ៕
(រាយការណ៍បន្ថែមដោយ Simon Lewis)
ប្រែសម្រួលដោយឃិនណៃ