ដោយសារនៅតែមានការងឿងឆ្ងល់អំពីជោគវាសនា របស់ស្ថានីយវិទ្យុសម្បុកឃ្មុំដែលជាវិទ្យុឯករាជ្យក្រោយពីការចាប់ខ្លួនម្ចាស់វិទ្យុនេះរួចមក កាលពីម្សិលមិញ មន្ត្រីរដ្ឋាភិបាលម្នាក់បានលើកឡើងថា មិនមានគម្រោងបិទស្ថានីយវិទ្យុនេះទេ ថ្វីបើវិទ្យុនេះនៅតែមានគោលជំហររិះគន់គណបក្សកាន់អំណាចក៏ដោយ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានផ្ញើសារមួយ ដោយមិនបានបញ្ជាក់ច្បាស់លាស់ថា “ មិនមានគម្រោងបិទស្ថានីយវិទ្យុនេះទេ”។
កាលពីថ្ងៃអាទិត្យ លោក ម៉ម សូណង់ដូ ម្ចាស់វិទ្យុសម្បុកឃ្មុំត្រូវបានចាប់ខ្លួននៅឯផ្ទះរបស់លោកនៅក្នុងរាជធានីភ្នំពេញ តាមការចោទប្រកាន់នានា ទាក់ទងទៅនឹងអ្វីដែលគេហៅថា ជាចលនាអបគមន៍ក្នុងខេត្តក្រចេះ។ លោក ម៉ម សូណង់ដូ អាយុ៧១ឆ្នាំអាចមានទោសជាប់ពន្ធនាគាររហូតដល់១៥ឆ្នាំពីបទធ្វើកុបកម្មតែមួយ ហើយការចាប់ខ្លួនលោកធ្វើឲ្យមានកំហឹងពីសំណាក់អង្គការសិទ្ធិមនុស្សជាច្រើន ដែលបានហៅការចោទប្រកាន់នោះថា មិនត្រឹមត្រូវ និងជាការវាយប្រហារចំពោះសេរីភាពនៃការបញ្ចេញមតិ។
អង្គការឃ្លាំមើលសិទ្ធិមនុស្ស (Human Rights Watch) ចេញសេចក្ដីថ្លែងការណ៍មួយកាលពីម្សិលមិញថា “ ការចោទប្រកាន់ចំពោះអ្នករិះគន់ គឺជារឿងធម្មតានៃទីភ្នាក់ងារសម្ងាត់ និងឃោសនារបស់លោក ហ៊ុន សែន ជាច្រើនទសវត្សរ៍មកហើយ”។
អង្គការឃ្លាំមើលសិទ្ធិមនុស្ស ដែលមានមូលដ្ឋាននៅបុរីញូវយ៉កនេះ លើកឡើងថា “ ការចាប់ខ្លួនលោក សូណង់ដូ ក៏ជាការវាយប្រហារស្ថានីយវិទ្យុសម្បុកឃ្មុំផងដែរ។ វិទ្យុនេះ គឺជាវេទិកាដ៏សំខាន់មួយសម្រាប់លើកស្ទួយសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសកម្ពុជា”។
ក្លឹបអ្នកសារព័ត៌មានបរទេសប្រចាំកម្ពុជា (OPCC) បានហៅការចាប់ខ្លួន និងការចោទប្រកាន់នេះថា “ ជាការកើនឡើងគួរឲ្យបារម្ភ នៃការចាត់វិធានការប្រឆាំងនឹងប្រព័ន្ធផ្សព្វផ្សាយ និងការបញ្ចេញមតិដោយសេរី។ ក្លឹបអ្នកសារព័ត៌មាននេះបានលើកឡើងថា ខ្លួនមានកង្វល់យ៉ាងខ្លាំងដោយសារថាការចាប់ខ្លួន ការឃុំខ្លួន និងការចោទប្រកាន់លោក ម៉មសូណង់ដូ អាយុ៧១ឆ្នាំ ពីបទល្មើសដែលអាចមានទោសជាប់ក្នុងពន្ធនាគារអស់រយៈពេលរាប់ទសវត្សរ៍នេះ ហាក់ដូចជាករណីបង្ក្រាបប្រព័ន្ធផ្សព្វផ្សាយ និងសេរីភាពនៃការបញ្ចេញមតិដូច្នេះដែរ”។
នៅឯស្ថានីយវិទ្យុសម្បុកឃ្មុំ បុគ្គលិកបានថ្លែងថា ពួកគេមិនមានគម្រោងបញ្ឈប់ការផ្សាយនោះទេ ហើយក៏មិនខ្លាចផ្សព្វផ្សាយពីព័ត៌មាននានាដែរ។ ប៉ុន្ដែ ពួកគេទទួលស្គាល់ថាបើសិនជាមិនមានវត្តមានលោក ម៉ម សូណង់ដូ ទេ ប្រជាប្រិយភាពរបស់វិទ្យុនេះអាចនឹងមានការផ្លាស់ប្តូរ។
លោកស្រី ឌឹន ផាន់ណារ៉ា ភរិយារបស់លោក ម៉ម សូណង់ដូ និងជានាយិការងស្ថានីយវិទ្យុសម្បុក ឃ្មុំមានប្រសាសន៍ថា“ យើងនៅតែមានជំហ៊រក្នុងការផ្សាយព័ត៌មានដូចពីពេលមុនដដែល។ ប៉ុន្ដែ យើងមិនមានសំឡេងរបស់គាត់ទេ”។ស្ថានីយវិទ្យុនេះកំពុងមានបញ្ហាថវិកាក្នុងអំឡុងការចាប់ខ្លួនលោក ម៉ម សូណង់ដូ។
លោកស្រីបានមានប្រសាសន៍បន្ថែមទៀតថា “ យើងមិនមានការគំរាមកំហែងពីរដ្ឋាភិបាលឲ្យបិទវិទ្យុនេះទេ ប៉ុន្ដែ យើងប្រឈមនឹងកង្វះថវិកាសម្រាប់គាំទ្រដំណើរការរបស់វិទ្យុនេះ”។ លោកស្រី សួន ចន្ធី ប្រធានរដ្ឋបាលបានអះអាងថា ការផ្សាយនៅតែបន្ដក្នុងអំឡុងពេលអវត្តមានរបស់លោក ម៉ម សូណង់ដូ។
លោកស្រី សួន ចន្ធី បានមានប្រសាសន៍បន្ថែមទៀតថា “ ស្ថានីយវិទ្យុនេះនៅតែបន្ដការផ្សាយដូចធម្មតា”។ លោក ឡៅ ម៉ុងហៃ អ្នកវិភាគនយោបាយឯករាជ្យបានលើកឡើងថា លោកមិនគិតថា រដ្ឋាភិបាលបិទវិទ្យុនេះេទ ប៉ុន្ដែ លោកឆ្ងល់ថាតើវិទ្យុនេះនឹងដំណើរបានឬអត់ទេបើគ្មានការគ្រប់គ្រងពីលោក ម៉ម សូណង់ដូ នោះ។
លោក ម៉ម សូណង់ដូ ត្រូវបានគេស្គាល់ចំពោះកម្មវិធីហៅទូរស័ព្ទចូលរបស់អ្នកស្តាប់ ព្រមទាំងការដោះស្រាយបញ្ហានានាដូចជាជម្លោះដីធ្លី និងការគោរពច្បាប់នៅក្នុងប្រទេសជាដើម។ លោក ម៉ុងហៃ បានមានប្រសាសន៍បន្ដថា “ ខ្ញុំជឿថា ភរិយារបស់លោក និងបុគ្គលិកទាំងអស់របស់លោក អាចចាត់ចែងដំណើរការវិទ្យុនេះបាន ប៉ុន្តែ យើងរង់ចាំមើលសិន។
ដោយសារអវត្តមានសំឡេងរិះគន់ រដ្ឋាភិបាលប្រហែលជាសប្បាយចិត្ត និងនៅស្ងៀមស្ងាត់នៅពេលដែលមិនមានការរិះគន់ខ្លាំងៗចំពោះពួកគេនោះ។ លោកមានប្រសាសន៍ទៀតថា “ មិនត្រឹមតែមន្ត្រីជាន់ខ្ពស់ប៉ុណ្ណោះទេ ដែលស្តាប់វិទ្យុសម្បុកឃ្មុំ ទោះបីប្រជាពលរដ្ឋថ្នាក់ក្រោមនិងអ្នកបោះឆ្នោតក៏ស្តាប់វិទ្យុនេះដែរ។ ប៉ុន្ដែវិទ្យុនេះត្រូវការមនុស្សម្នាក់ដូចលោក ម៉ម សូណង់ដូ ដើម្បីបញ្ចេញទស្សនទាក់ទាញអ្នកស្តាប់”។
កាលពីខែមិថុនា លោកនាយករដ្ឋមន្ត្រី ហ៊ុន សែន បានភ្ជាប់លោក ម៉ម សូណង់ដូ ទៅនឹងចលនាអបគមន៍ក្នុងខេត្តក្រចេះ ដោយហៅគាត់ថា ជាមេដឹកនាំដែលបាន “ បង្កើតរដ្ឋក្នុងរដ្ឋ ហើយបានបិទភូមិមួយចោល”។ នៅពេលដែលអង្គការសិទ្ធិមនុស្សនានាបានចាត់ទុកការអះអាងរបស់រដ្ឋាភិបាលអំពីចលនាអបគមន៍ថាជាលេស ដើម្បីបណ្ដេញប្រជាពលរដ្ឋចេញពីតំបន់ ហើយការបណ្តេញចេញនេះ បានបណ្ដាលឲ្យកុមារីម្នាក់ត្រូវបានបាញ់សម្លាប់នោះ រដ្ឋាភិបាលបានអះអាងថា ការបង្ក្រាបរបស់ខ្លួនគឺជាការចាំបាច់។
ទោះជាយ៉ាងណា ការភ្ជាប់លោក ម៉ម សូណង់ដូ ទៅនឹងការបណ្ដេញចេញនៅក្នុងខេត្តក្រចេះនោះ កើតឡើងបន្ទាប់ពីមានសេចក្តីរាយការណ៍ដ៏ចម្រូងចម្រាសតាមវិទ្យុសម្បុកឃ្មុំ ដែលនៅក្នុងសេចក្តីរាយការណ៍នោះ លោក ម៉ម សូណង់ដូ បានរាយការណ៍អំពីមនុស្សមួយក្រុមតូចដែលប៉ុនប៉ងដាក់ពាក្យបណ្ដឹងទៅតុលាការឧក្រិដ្ឋកម្មអន្ដរជាតិនៅទីក្រុងឡាអេ ប្តឹងលោកនាយករដ្ឋមន្ត្រី ហ៊ុន សែន៕
ប្រែសម្រួលដោយ ឃិន ណៃ