បុគ្គលិកក្រុមហ៊ុនម្នាក់បានឲ្យដឹងកាលពីថ្ងៃច័ន្ទថា ម្ចាស់ក្រុមហ៊ុនខេមបូឌា យេលឡូ ផេក (Cambodia Yellow Pages) បានចុះកិច្ចព្រមព្រៀងជាផ្លូវការ ដើម្បីលក់ភាគហ៊ុនចំនួន៥១ភាគរយ ទៅឲ្យក្រុមហ៊ុនសាខារបស់ក្រុមហ៊ុនសិក្សាស្រាវជ្រាវ និងបច្ចេកវិទ្យា (CBSA Bhd) របស់ប្រទេសម៉ាឡេស៊ី ក្នុងកិច្ចព្រមព្រៀងមួយ ដែលមានទឹកប្រាក់ចំនួន២,០៤លានដុល្លារ។
តាមការបង្ហាញកាលពីសប្តាហ៍មុនពីសំណាក់ក្រុមហ៊ុន CBSA ដែលត្រូវបានលាតត្រដាងនៅលើទីផ្សារមូលបត្រគូឡាឡាំពួ(Kuala Lumpur Stock Exchange) បានឲ្យដឹងថា ផលប្រយោជន៍របស់ក្រុមហ៊ុន ខេមបូឌា យេឡូ ផេក នឹងត្រូវបានផ្ទេរពីក្រុមហ៊ុន ខេម វ៉ាយភី ខូអិលធីឌី (Cam YP Co. Ltd) ទៅឲ្យក្រុមហ៊ុន ស៊ីប៊ីអេសអេ អុីនធើណេសិនណល អេសឌីអេន ប៊ីអេឆឌី CBSA International Sdn Bhd (CIBS) ជាក្រុមហ៊ុនសាខារបស់ក្រុមហ៊ុន CBSA ដោយសារការរកបានពីឥណទានរបស់ធនាគារអភិវឌ្ឍន៍អាស៊ី (ADB) ក្នុងទឹកប្រាក់ចំនួន១,៤២លានដុល្លារ ឬ៧០ភាគរយ។
តាមការលាតត្រដាងលើផ្សារមូលបត្របានឲ្យដឹងដូច្នេះថា “ការទិញយកភាគហ៊ុននេះ នឹងធ្វើឲ្យក្រុមហ៊ុន CBSA មានលទ្ធភាពពង្រីកសៀវភៅបញ្ជីរាយឈ្មោះស្ថាប័នរបស់ខ្លួន ព្រមទាំងការផ្សព្វផ្សាយពាណិជ្ជកម្មមុខជំនួញនៅក្នុងតំបន់បាន ហើយវាក៏ស្របគ្នានឹងយុទ្ធសាស្ត្រពង្រីកមូលដ្ឋានរបស់ក្រុមហ៊ុន CBSA នៅទូទាំងតំបន់អាស៊ីអាគ្នេយ៍ផងដែរ។ កិច្ចព្រមព្រៀងគ្នានឹងមានដំណើរការរហូតដល់ត្រីមាសទី៣ក្នុងឆ្នាំនេះ។
ក្រុមហ៊ុន ខេម វ៉ាយភី នឹងរក្សាទុកភាគហ៊ុនចំនួន៤៩ភាគរយ ចំណែកបុគ្គលសំខាន់ៗមួយចំនួន ដូចជានាយកប្រតិបត្តិ លោក គីម ជេមមេសស្តាដ (Kim Gjemmestad)ជាដើម នឹងនៅគ្រប់គ្រងក្រុមហ៊ុននេះដដែល។ លោក ជេមមេសស្តាដ បានចាប់ផ្តើមបង្កើតសៀវភៅបញ្ជីរាយឈ្មោះស្ថាប័ន លើកដំបូងក្នុងឆ្នាំ១៩៩៩ ដោយបានហៅសៀវភៅនេះថា សៀវភៅបញ្ជីរាយឈ្មោះស្ថាប័ន” (Business Directory) មុនពេលលោកទទួលបានសិទ្ធិបើកធ្វើប្រតិបត្តិការ ក្រោមឈ្មោះ យេលឡូ ផេក (Yellow Pages) ឬសៀវភៅទំព័រលឿងនៅក្នុងឆ្នាំ២០០១។
អ្នកស្រី ឡាយ សុភាព អ្នកគ្រប់គ្រងទូទៅក្រុមហ៊ុន ខេម វ៉ាយភី បានឲ្យដឹងតាមអុីម៉េលកាលពីថ្ងៃច័ន្ទថា “ ក្រុមហ៊ុន CBSA នឹងនាំយកមកជាមួយនូវប្រតិបត្តិការលំដាប់ថ្នាក់ពិភពលោក ហើយក្រុមហ៊ុននេះកំពុងរីកចម្រើនយ៉ាងឆាប់រហ័សនៅទូទាំងតំបន់អាស៊ីអាគ្នេយ៍ដោយផ្តល់ផលប្រយោជន៍ដល់ទាំងអ្នកផ្សព្វផ្សាយ ទាំងអ្នកប្រើប្រាស់”។
សៀវភៅ Yellow Pages ត្រូវបានបោះពុម្ពចំនួន២០.០០០ក្បាល ដោយបានបញ្ចូលបញ្ជីរាយឈ្មាះស្ថាប័នក្នុងស្រុកចំនួន១៣.០០០ស្ថាប័ន នៅពេលដែលសៀវនេះត្រូវបានបោះពុម្ពលើកដំបូងកាលពីឆ្នាំ២០០១។
អ្នកស្រីបានឲ្យដឹងថា នៅពេលសៀវភៅបញ្ជីរាយឈ្មោះសា្ថប័នសម្រាប់ឆ្នាំ២០១២-២០១៣ត្រូវបានរៀបចំរួចរាល់ នៅក្នុងខែតុលាខាងមុខនេះ ក្រុមហ៊ុននឹងបង្កើនចំនួនបោះពុម្ពដល់ទៅពីរដង ហើយបញ្ចូលបញ្ជីឈ្មោះស្ថាប័នក្នុងស្រុកប្រមាណ២៥.០០០ស្ថាប័ននៅលើទំព័រសៀវភៅនេះ។
គេហទំព័រ Yellow Pages ក៏ត្រូវបានដំណើរការកាលពីឆ្នាំ១៩៩៩ដែរ ដោយស្ថិតនៅក្រោមការគ្រប់គ្រងរបស់ក្រសួងប្រៃសណីយ៍និងទូរគមនាគមន៍ នៅមុនពេលចុះកិច្ចសន្យាផ្ទេរទៅក្រុមហ៊ុន ខេម វ៉ាយភីឆ្នាំ២០១១។ បច្ចុប្បន្ន គេហទំព័រនេះមានអ្នកមើលប្រមាណ១៥០.០០០នាក់ក្នុងមួយខែ។
យោងតាមការបង្ហាញនៅលើផ្សារមូលបត្រនៅក្នុងប្រទេសម៉ាឡេស៊ី បានឲ្យដឹងថា លទ្ធផលនៃការធ្វើសវនកម្មហិរញ្ញវត្ថុកាលពីឆ្នាំមុនរបស់ក្រុមហ៊ុន ខេម វ៉ាយភី បង្ហាញឲ្យថា បន្ទាប់ពីបង់ពន្ធរួចក្រុមហ៊ុនទទួលបានប្រាក់ចំណេញចំនួន២៣១.៤៦៧ដុល្លារ ព្រមទាំងមានទ្រព្យសកម្មតម្លៃ៦១.១៤៦ដុល្លារ៕
ប្រែសម្រួលដោយ ហួង កុកទៀន