តំណាងប្រចាំតំបន់របស់អង្គការសហប្រជាជាតិទទួលបន្ទុកគ្រឿងញៀនខុសច្បាប់បានលើកឡើង កាលពីម្សិលមិញថាកំណើនចំនួនមនុស្ស ដែលត្រូវបានចាប់ខ្លួននៅក្នុងប្រទេសកម្ពុជាពីបទល្មើសគ្រឿងញៀន ជាការព្រួយបារម្ភមួយ និងត្រូវការការស៊ើបអង្កេត។
ចំនួននៃការចាប់ខ្លួនមនុស្សពាក់ព័ន្ធនឹងគ្រឿងញៀន ដែលត្រូវបាននគរបាលកម្ពុជារាយការណ៍នោះ បានកើនឡើងពី៨៦៤ករណីក្នុងឆ្នាំ២០១០ដល់២.៣៨១ករណីក្នុងឆ្នាំ២០១១ នេះបើយោងតាមការិយាល័យអង្គការសហប្រជាជាតិទទួលបន្ទុកគ្រឿងញៀននិងបទឧក្រិដ្ឋ (UNODC)។
លោកហ្គារីឡេវិស (Gary Lewis)តំណាង UNODC ប្រចាំតំបន់អាស៊ីខាងកេើត និងប៉ាស៊ីហ្វិកបានថ្លែងថា “ ខ្ញុំបារម្ភណាស់អំពីចំនួននៃការចាប់ខ្លួនមនុស្ស ដែលបានកើតឡើង។ ការកើនឡើងបីដងនៃចំនួនមនុស្សដែលត្រូវបានចាប់ខ្លួន “ បង្ហាញឲ្យយើងដឹងនូវអ្វីមួយ ហើយរឿងនេះធ្វើឲ្យយើងព្រួយបារម្ភ”។
លោក ឡេវិស បានមានប្រសាសន៍ថាការកើនឡើងនេះបង្ហាញពីភាពល្អប្រសើរក្នុងការអនុវត្តច្បាប់ ឬការកើនឡើងខ្ពស់ជាងមុននៃបទល្មើសគ្រឿងញៀន។ ទោះជាយ៉ាងនេះក្ដី លោកថ្លែងថា “ វាអាចមានន័យថាមានហេតុផលផ្សេងទៀត ចំពោះការចាប់ខ្លួនមនុស្សពីបទរក្សាទុក និងប្រើប្រាស់ព្រមទាំងជួញដូរគ្រឿងញៀន”។
លោកឡេវិសបានលើកឡើងនៅក្រៅសិក្ខាសាលាតំបន់មួយស្ដីអំពីគម្រោងរបស់ UNODCដែលមានឈ្មោះថា ការត្រួតពិនិត្យការផលិតគ្រឿងញៀន ការវិភាគ ការរាយការណ៍ និងនិន្នាការថា UNODC នឹងត្រួតពិនិត្យតួលេខនេះ។
លោកដេវិដហាឌីង (David Harding)ទីប្រឹក្សា បច្ចេកទេសទទួលបន្ទុកគ្រឿងញៀននៅឯអង្គការក្រៅរដ្ឋាភិបាលមិត្តសំឡាញ់អន្ដរជាតិ ដែលទាក់ទងដោយផ្ទាល់ជាមួយអ្នកប្រើប្រាស់គ្រឿងញៀននៅតាមផ្លូវក្នុងរាជធានីភ្នំពេញ បានថ្លែងថា មានគោលការណ៍ច្បាស់លាស់មួយដើម្បីបង្កើនការចាប់ខ្លួនជនល្មើសគ្រឿងញៀនថ្នាក់ទាប ព្រោះពួកគេអាចបណ្ដាលឲ្យមានផលប៉ះពាល់។
លោកហាឌីងបានថ្លែងថា“ គោលនយោបាយភូមិឃុំមានសុវត្ថិភាពឆ្នាំ២០១០ បានធ្វើឲ្យមានការកើនឡើងយ៉ាងខ្លាំងក្នុងការចាប់ខ្លួនមនុស្សពាក់ព័ន្ធនឹងគ្រឿងញៀន”។ លោកបានមានប្រសាសន៍ថាការបង្ក្រាបនេះបានធ្វើឲ្យកាន់តែមានការលំបាក ចំពោះអង្គការក្រៅរដ្ឋាភិបាល ដែលមានបំណងផ្ដល់សេវាកាត់បន្ថយគ្រោះថ្នាក់ ដែលចុះទៅជួយអ្នកប្រើប្រាស់គ្រឿងញៀន។
លោកបានថ្លែងថា “មានការប្រឹងប្រែងជាច្រើនក្នុងការគ្រប់គ្រងបញ្ហាគ្រឿងញៀន ក៏ប៉ុន្ដែ មិនមានការប្រឹងប្រែងច្រើនក្នុងការគ្រប់គ្រងបញ្ហាសុខភាពនោះទេ។មានការលំបាកកាន់តែខ្លាំងក្នុងការទំនាក់ទំនងជាមួយអ្នកប្រើប្រាស់គ្រឿងញៀនជាប្រចាំ”។
លោកខៀវសុភ័គអ្នកនាំពាក្យក្រសួងមហាផ្ទៃបានបញ្ជាក់ថា ការចាប់ខ្លួនមនុស្សពាក់ព័ន្ធនឹងគ្រឿងញៀនគឺជាការសមហេតុផល ព្រោះនគរបាលចាប់ខ្លួនតែជនសង្ស័យណា នៅពេលដែលខ្លួនមានភស្ដុតាង ហើយបានលើកឡើងថាការកើនឡើងនៃការចាប់ខ្លួននេះ គឺដោយសារតែការកើនឡើងនៃសកម្មភាពខុសច្បាប់។ លោកឧត្តមសេនីយ៍ឯកខៀវសុភ័គ មានប្រសាសន៍ថា “ អ្នកអាចចាប់ត្រីបានច្រើនពីព្រោះមានត្រីច្រើននៅក្នុងទឹក។ ដូច្នេះយើងអាចនិយាយបានថា មានបទល្មើស ច្រើននោះជាមូលហេតុដែលយើងចាប់មនុស្សបានកាន់តែច្រើន”៕
ប្រែសម្រួលដោយ ចេវ ប៊ុននី