ដោយព័ត៌មានលម្អិតអំពីការបាញ់សម្លាប់លោកឈុតវុទ្ធីសកម្មជនបរិស្ថានកាលពីថ្ងៃទី២៦ ខែមេសា នៅមិនទាន់ច្បាស់លាស់នោះសាច់ញាតិ មិត្តភក្ដិ និងសហការីប្រមាណ៥០០នាក់បានជួបជុំគ្នានៅក្នុងខណ្ឌមានជ័យរាជធានីភ្នំពេញដើម្បីចូលរួមប្រារព្ធពិធីបុណ្យគម្រប់១០០ថ្ងៃរបស់លោក ឈុតវុទ្ធី។
កូនប្រុសរបស់លោក ឈុត វុទ្ធី ឈ្មោះចូវ ឧត្តមរស្មី អាយុ១៩ឆ្នាំ បានលើកឡើងអំឡុងពិធីបុណ្យនេះថា បើទោះជាសាលាដំបូងខេត្តកោះកុង បានសាកសួរសាក្សីចុងក្រោយក្នុងការបាញ់ប្រហារកាលពីខែមុននេះក៏ដោយ ក៏ខ្លួននៅមិនទាន់បានទទួលព័ត៌មានណាមួយអំពីរឿងក្ដីនេះនៅឡើយទេហើយនឹងបន្ដជំរុញឲ្យរដ្ឋាភិបាលឆ្លើយ។
ឧត្តមរស្មី បាននិយាយថា “ ខ្ញុំក្រៀមក្រំណាស់ ដែលតុលាការមិនបានផ្ដល់យុត្តិធម៌ ឬផ្ដល់សេចក្ដីលម្អិតណាមួយអំពីពេលវេលាត្រូវកាត់ទោសនោះ។ខ្ញុំបានស្នើឲ្យមន្ត្រីរដ្ឋាភិបាល និងមន្ត្រីតុលាការផ្ដល់ព័ត៌មាននេះភ្លាមៗនិងផ្ដល់យុត្តិធម៌ឲ្យគ្រួសាររបស់ខ្ញុំ”។
នៅថ្ងៃស្លាប់នោះ លោក វុទ្ធី ដែលជាអតីតនាយកអង្គការការពារធនធានធម្មជាតិ កំពុងតែស្វែងរកភស្ដុតាងអំពីការកាប់ឈើខុសច្បាប់នៅតាមជួរភ្នំក្រវាញ នៅក្នុងខេត្តកោះកុង ដែលពេលនោះ លោកប្រឈមមុខគ្នាជាមួយនឹងនគរបាល និងសន្ដិសុខ។
គណៈកម្មាធិការពិសេសមួយ ដែលធ្វើការស៊ើបអង្កេតឲ្យរដ្ឋាភិបាលក្នុងការបាញ់ប្រហារនេះ អះអាងថា មន្ត្រីកងរាជអាវុធហត្ថឈ្មោះ អុិន រតនា បានបាញ់សម្លាប់លោកឈុតវុទ្ធីបន្ទាប់ពីមានជម្លោះពាក្យសម្ដីផ្ទាល់ខ្លួន ហើយថាឈ្មោះប៉ែនបូរ័ត្នដែលជាសន្ដិសុខម្នាក់ប្រចាំក្រុមហ៊ុនកាប់ឈើក្នុងស្រុកមួយបានបាញ់សម្លាប់ អុិន រតនា នៅពេលដណ្ដើមកាំភ្លើងពីមន្ត្រីរូបនេះ។
ឈ្មោះ បូរ័ត្ន តាំងពីពេលនោះមក ត្រូវបានចោទប្រកាន់ពីបទសម្លាប់មនុស្សដោយអចេតនាហើយជននេះកំពុងត្រូវឃុំខ្លួនក្នុងពន្ធនាគារខេត្ត រង់ចាំការកាត់ទោស។
សកម្មភាពចុងក្រោយរបស់តុលាការគឺនៅថ្ងៃទី១៣ ខែមិថុនាដែលនៅពេលនោះខ្លួនបានសម្ភាសសាក្សីទីប្រាំពីរ និងជាសាក្សីចុងក្រោយ ដែលបានឃើញទិដ្ឋភាពនៃការបាញ់ប្រហារនោះ។ ទោះជាយ៉ាងនេះក្ដី អង្គការសិទ្ធិមនុស្សជឿថា មានសាក្សីច្រើនទៀត ដែលគួរតែសាកសួរផងដែរ។
លោកនាង បូរា៉ទីណូអ្នកសម្របសម្រួលរបស់អង្គការអាដហុក ប្រចំាខេត្តនេះបានមានប្រសាសន៍ថា “យោងតាមការស៊ើបអង្កេតរបស់យើង បានឲ្យដឹងថា សាក្សីពីរទៅបួនរូបមិនត្រូវបានកោះហៅមកសាកសួរទេ ហើយពេលនេះ យើងមិនដឹងថាតើ រឿងក្ដីនេះនឹងទៅដល់ដៃចៅក្រមសាកសួរ ឬក៏អត់ទេ”។ លោក បូរា៉ទីណូ មានប្រសាសន៍បន្ថែមទៀតថា “ យើងកំពុងតែស៊ើបអង្កេតរឿងក្ដីនេះដាច់ដោយឡែក ហើយនឹងជំរុញឲ្យមន្ត្រីតុលាការបន្ដចាត់ការក្ដីនេះថែមទៀត”។ ក្រុមមន្ត្រីសាលាដំបូងបានបដិសេធមិនធ្វើអត្ថាធិប្បាយ ឬមិនអាចទាក់ទងបានឡើយ។
អ្នកស៊ើបអង្កេតជាច្រើន បានលើកឡើងថា ខ្លួនមានការព្រួយបារម្ភចំពោះការស្លាប់នេះថា អាចក្លាយជាឧក្រិដ្ឋកម្មមិនអាចដោះស្រាយបាន នៅក្នុងចំណោមឧក្រិដ្ឋកម្មមុនៗ ដោយដៅមកលើអ្នករិៈគន់រដ្ឋាភិបាល ចំណែកឯអ្នកស៊ើបអង្កេតផ្សេងទៀតមានការងឿងឆ្ងល់ថា តើអាចប៉ះពាល់ធ្ងន់ធ្ងរដល់ការងាររបស់អង្គការក្រៅរដ្ឋាភិបាលដទៃទៀតដែរ ឬយ៉ាងណា៕
ប្រែសម្រួលដោយចេវ ប៊ុននី