31.4 C
Phnom Penh

រដ្ឋា​ភិបាល​ថ្លែង​ថា​​​​ ឯក​អគ្គរាជ​​​ ទូត​​​កម្ពុជា​ប្រចាំ​ទីក្រុង​ម៉ានីល​​​បាន​បញ្ចប់​បេសកកម្ម​របស់ខ្លួន​

ដោយ ឌឹ ខេមបូឌា ដេលី

បទវិភាគ

ដើម្បី​ពន្យល់បកស្រាយ​អំ​ពី​មូល​​​ហេតុដែលឯកអគ្គរាជទូតកម្ពុជា​ ប្រចាំ​​​ប្រទេស​​​​ហ្វីលីពីន​មិន​បាន​ឆ្លើយ​តប​​តាម​ការ​កោះ​​​ហៅរបស់រដ្ឋាភិបាល​ក្រុង​ម៉ានីលឲ្យ​លោក​​​បញ្ជាក់​អំពីការ​ធ្វើ​អត្ថាធិប្បាយ​រិះគន់​ប្រទេស​ហ្វីលីពីន​ ​ក្រសួង​ការ​បរទេស​​​កម្ពុជាបាន​ថ្លែង ​កាល​ពីម្សិលមិញ​ថាឯក​អគ្គ​រាជទូតកម្ពុជាគឺ​​​​លោកហូសសេរីធញ្ញបាន​បញ្ចប់​បេស​ក​​​កម្ម​​​របស់​លោក​ហើយ​។

ប្រទេសហ្វីលីពីន​បាន​និង​កំពុង​រង់ចាំ​ការ​ឆ្លើយតប​ពីលោកសេរីធញ្ញអស់​រយៈពេល​មួយ​សបា្តហ៍​កន្លង​មក​ហើយ​បន្ទាប់​ពីលោក​ត្រូវ​បាន​មន្ត្រី​ក្រសួង​ការ​បរទេស​ហ្វីលីពីន​​កោះហៅ​ កាលពី​ថ្ងៃទី៣០​ ខែកក្កដា ដើម្បី​ឲ្យ​លោក​ពន្យល់​អំពី​សេចក្តី​ថ្លែង​ការណ៍​ជា​សា​ធារណរបស់​លោករិះគន់​​​ចំពោះ​​​ការ​អត្ថា​ធិប្បាយរបស់​មន្ត្រី​ហ្វីលីពីន​ម្នាក់​ ដែល​បាន​​​ធ្វើឡើង​នៅ​ឯកិច្ចប្រជុំ​កំពូល​អាស៊ាន​នៅ​រាជ​​​ធានី​ភ្នំពេញ​​ កាល​ពីខែមុន។នៅ​ក្នុង​សេចក្តី​ថ្លែង​ការណ៍​នោះ ​លោកឯក​អគ្គ​​​រាជទូត​​​កម្ពុជា​ បាន​ចោទ​ប្រកាន់​ប្រទេស​ហ្វីលីពីននិង​ប្រទេស​វៀតណាម​ថាបានយក​​​សេចក្តី​ថ្លែង​ការណ៍​រួម​មក“ធ្វើជាវិទ្ធង្សនានិង​ធ្វើជាចំណាប់ខ្មាំង”ព្រមទាំងបាន​ចោទ​ប្រកាន់​មន្ត្រី​ហ្វីលីពីន​ពី​បទ​ “មាន​​​ឧបាយ​​​កលវៀច​​​វេ ​​កេងយក​​​ចំណេញ​​​ និង​​​បំផ្លើស​”ដើម្បី​ឲ្យ​គេ​​​​ចាប់​អារម្ម​​ណ៍មក​លើ​​ខ្លួន​តែ​ប៉ុណ្ណោះ​​​។

លោកកុយគួងអ្នក​នាំ​ពាក្យ​ក្រសួង​ការ​បរទេស​បាន​សរសេរ​​ក្នុង​សារ​មួយ​​ថា“ឥឡូវ​នេះ​អាណតិ្ត​របស់​លោក​ឯកអគ្គរាជទូត​បាន​ចប់​ហើយ។ដូច្នេះ​ប្រទេស​ហ្វីលីពីន​ត្រូវ​រង់​ចាំ​ឯកអគ្គរាជទូត​ថ្មី​”។ នៅ​ពេល​សួរថាតើ​អាណត្តិរបស់​លោកសេរីធញ្ញ​ បាន​បញ្ចប់​ទៅ​​នៅ​ពេលណាដែរហើយ​ឯក​អគ្គរាជទូត​ថ្មី​នឹង​ត្រូវ​ទៅជំនួស​រូបលោក​ពេលណាលោកកុយគួងបាន​ឆ្លើយ​​​តប​ថា“អាណតិ្ត​​របស់​លោក​បាន​បញ្ចប់​​ក្នុង​​​ពេលថ្មី​ៗនេះ”។

លោកសេរីធញ្ញបាន​ជូនសារតាំង​ដល់​ហ្វីលីពីន​ កាលពីខែកក្កដាឆ្នាំ​២០១០ ​​​ដែល​​​​មាន​​​​រយៈ​ពេលជិត​ពីរឆ្នាំ​កន្លង​មក​ហើយ​​​។ ក្រសួង​ការ​បរទេស​ និង​ស្ថានទូត​កម្ពុជា​ប្រចាំ​នៅ​ក្រុង​ម៉ានីល​ បាន​រក្សាភាព​ស្ងៀ​​​មស្ងាត់​​​​ក្នុងសបា្តហ៍​កន្លង​មក​នេះ​​​ដោយ​​​មិន​​​បកស្រាយចំពោះចម្ងល់ពាក់ព័ន្ធនឹងការ​កោះ​​​ហៅ​ឯក​អគ្គរាជទូត​កម្ពុជា​​ប្រ​ចាំ​ទីក្រុង​ម៉ានីលនេះ។

ហេតុការណ៍ទាក់​ទង​នឹងការទូត​ចុង​ក្រោយ​​​​បំផុត ​ដែល​បាន​កើត​ឡើង​រវាង​ប្រទេស​​​កម្ពុជា​​​ និង​ប្រទេស​ហ្វីលីពីន​នេះ​ បាន​ធ្វើ​ឲ្យ​ប្រទេស​ជាច្រើនកំពុង​យក​ចិត្ត​ទុក​ដាក់​​ថាតើប្រទេសកម្ពុជា​នឹង​ដោះស្រាយ​បញ្ហា​ជម្លោះ​​​​ដែន​ទឹក​ដ៏​ស្មុគ​ស្មាញ​ និង​ក្តៅ​គគុកក្នុង​សមុទ្រ​ចិន​ខាង​ត្បូង​ជាមួយ​ប្រទេស​​ចិន ​ដោយ​​​​វិធីណា​​​ ក្នុង​នាម​​ជា​ប្រធាន​អាស៊ាន​។

ក្នុង​អំឡុង​ពេលប្រជុំ​អាស៊ាន​ កាលពី​ខែ​​​កក្កដាប្រទេស​ជា​សមាជិក​អាស៊ាន​ទាំង​អស់​ បាន​ពិភាក្សា​គ្នា​អំពី​វិធី​ដោះស្រាយ​ជម្លោះ​រវាង​ប្រទេស​ជាសមាជិក​អាស៊ាន​មួយចំនួននិងប្រទេសចិន​។នៅ​ទី​បញ្ចប់​នៃ​កិច្ចប្រជុំ​នោះគឺ​​មិន​ទទួលបាន​កិច្ច​ព្រម​ព្រៀង​ទេនិង​មិន​អាច​ចេញ​សេចក្តី​ថ្លែងការណ៍​រួម​បាន​​​ឡើយ ​ដែល​នេះ​ជា​ប្រវត្តិសាស្រ្ត​លើក​ដំបូង​របស់​ខ្លួន​ នា​រយៈពេល​៤៥ឆ្នាំ​ ​ដែល​ខក​ខាន​មិន​បាន​ចេញ​សេចក្តីថ្លែងការណ៍រួម​។

ក្រុម​អ្នក​វិភាគ​បាន​លើក​ឡើង​ថាប្រទេស​​​កម្ពុជា​បានព្យាយាម​គេច​មិន​ឲ្យ​មាន​បញ្ហា​ជា​​​មួយ​ប្រទេសចិន​ ក្នុងការ​ដោះស្រាយ​ជម្លោះ​ដែន​សមុទ្រចិន​ខាង​ត្បូង​។ ប្រទេសហ្វីលីពីន​​ថ្លែងកាល​​​ពីម្សិល​​​មិញ​​​ថា ​​​ខ្លួន​រំពឹង​ថានឹងបានជួបជាមួយឯក​អគ្គរាជ​​​ទូតកម្ពុជា​។ លោករ៉ាអ៊ូលហឺណាន់​ដេស (Raul Hernandez) អ្នក​នាំ​ពាក្យ​ក្រសួង​ការបរទេស​ប្រទេស​​​​​ហ្វីលីពីន​បានថ្លែងថា“យើង​នឹង​រង់ចាំឯក​អគ្គរាជ​ទូត​កម្ពុជា​ឆ្លើយ​តប​នឹង​ការ​អញ្ជើញ​របស់​យើង​”។ ​

លោកហឺណាន់​ដេស ថ្លែង​​ថាមន្ត្រីស្ថានទូតកម្ពុជាមិន​អាច​ទាក់​ទង​បានទេ ​​ចាប់​តាំង​ពី​ថ្ងៃអង្គារ ​សបា្តហ៍មុន​​​មក​​នៅ​ពេល​ដែល​​លោកភារ​​​ធារីទូត​ បាន​ប្រាប់​ថាលោក​​ឯក​អគ្គរាជទូត​ សេរីធញ្ញមាន​ជំងឺ។ លោកមានប្រសាសន៍ថា“យើង​សង្ឃឹម​ថា នៅ​ពេល​លោក​ជា​ពី​ជំងឺ​ លោក​​នឹង​មកជួប​យើងយើង​សង្ឃឹមថា​ លោកនឹង​ជា​សះ​​​ស្បើយ​​​​ក្នុង​ពេល​ឆាប់​ៗនេះ​ ដើម្បី​ឲ្យ​លោក​ពន្យល់​​ និង​បញ្ជាក់​ប្រាប់​យើង​អំពី​សេចក្តី​ថ្លែងការណ៍របស់​លោក​។យើង​សង្ឃឹមថាក្នុងនាម​ជាអ្នក​ការ​ទូត​ម្នាក់​ លោក​​ដឹងថាលោក​​​​ ត្រូវ​ធ្វើយ៉ាង​ដូចម៉្តេច​​ ហើយលោក​ដឹង​ថានៅ ពេល​ណា​រដ្ឋាភិបាលម្ចាស់ផ្ទះ​បាន​កោះ​ហៅ​អ្នក​ការទូត​ណា​ម្នាក់​ ពួក​គេ​តែង​តែ​មក​ជួប​​​​ជជែក​ជាមួយរដ្ឋាភិបាល​នៃ​​ប្រទេស​នោះ”​៕

ប្រែសម្រួលដោយ​ ឃិនណៃ

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស