មន្ត្រីរដ្ឋាភិបាលបដិសេធដាច់អហង្ការចំពោះពាក្យចចាមអារា៉មថា លោក ជា ស៊ីមប្រធានព្រឹទ្ធសភាបានទទួលមរណភាព កាលពីម្សិលមិញ ចំណែកឯប្រធានអង្គរក្សរបស់លោកជា ស៊ីម បានមានព្រមានថា ខុទ្ទកាល័យរបស់លោកនឹងប្តឹងអ្នកទាំងឡាយណា ដែលផ្សព្វផ្សាយព័ត៌មានមិនពិតនេះ។
ការបដិសេធនេះធ្វើឡើង ដើម្បីឆ្លើយតបទៅនឹងភាពរំជើបរំជួល ដែលចាប់ផ្តើមបង្ហោះតាមគេហទំព័រប្រព័ន្ធផ្សព្វផ្សាយព័ត៌មានសង្គម កាលពីព្រឹកម្សិលមិញដោយអះអាងថា លោកជា ស៊ីម បានទទួលមរណភាពកាលពីថ្ងៃទី៤ ខែសីហា បន្ទាប់ពីបានព្យាបាលនៅក្នុងប្រទេសសិង្ហបុរី។គេហទំព័រខេអាយ (KI) របស់បក្សប្រឆាំង កាលពីថ្ងៃសៅរ៍ ក៏បាន ផ្សព្វផ្សាយអត្ថបទមួយ អះអាងថា លោកជា ស៊ីម បានទទួលមរណភាពហើយ។
ដោយហៅការប្រកាស តាមគេហទំព័រហ្វេសប៊ុក (Facebook)ថា ជា “ ពាក្យចចាមអារា៉ម” លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានបញ្ជាក់ថា លោកប្រធានគណបក្សប្រជាជនកម្ពុជា មានសុខភាពល្អទេ។ លោក ផៃ ស៊ីផាន បានមានប្រសាសន៍ថា “ លោកមិនអីទេ”។នៅពេលសួរថា តើលោក ជា ស៊ីម ឈឺឬយ៉ាងណា លោក ស៊ីផាន មានប្រសាសន៍ថា ជាធម្មតា មនុស្សចាស់ឈឺតែអ៊ីចឹង។
នៅក្នុងសារផ្ញើតាមទូរស័ព្ទ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានលើកឡើងអំពីលោក ជា ស៊ីម ថា “ លោកមានសុខភាពល្អទេ” ក៏ប៉ុន្តែលោកមិនបរិយាយល្អិតល្អន់ឡើយ លោកឧត្តមសេនីយ៍ទោនគរបាលសេដ្ឋកិច្ច ជា សុមេធី កូនប្រុសរបស់លោក ជា ស៊ីម ក៏បានបញ្ជាក់ដែរថា លោកឪពុករបស់លោកមិនអីទេ។
លោក ជា សុមេធី បានមានប្រសាសន៍ថា “អរគុណច្រើនចំពោះបណ្តាញសារព័ត៌មាន ដែលបានព្រួយបារម្ភចំពោះសា្ថានភាពសុខភាពឪពុករបស់ខ្ញុំ។ ពេលនេះសុខភាពរបស់គាត់មិនអីទេ”។
នៅខាងក្រៅគេហដ្ឋានរបស់លោកជា ស៊ីម នៅក្នុងខណ្ឌចំការមន គេឃើញមានរថយន្តប្រណីតៗរាប់សិបគ្រឿង កាលពីព្រឹកម្សិលមិញ ប៉ុន្តែបានចាកចេញទៅត្រឹមពេលរសៀល។ លោក ជា ស៊ីម ជាឥស្សរជនវ័យចំណាស់ជាងគេបំផុតក្នុងចំណោមឥស្សរជនរបស់គណបក្សប្រជាជនកម្ពុជា ដែលរាប់ទាំងលោកនាយករដ្ឋមន្ត្រី ហ៊ុន សែន និងលោក ហេង សំរិន ប្រធានរដ្ឋសភា។
កាលពីឆ្នាំទៅ សុខភាពលោក ជា ស៊ីម មិនល្អទេ។ លោក ជា ស៊ីម ដែលមានអាយុ៨០ឆ្នាំមិនបានបង្ហាញមុខជាសាធារណៈ ហើយបានអញ្ជើញទៅប្រទេសសិង្ហបុរីជាច្រើនលើក ដើម្បីសម្រាកព្យាបាលជំងឺ។ ប៉ុន្តែ មន្ត្រីរដ្ឋាភិបាលបានសម្រាលស្ថានភាពនេះ ដោយអះអាងថា ការធ្វើដំណើររបស់លោកទៅប្រទេសសិង្ហបុរី ជាការព្យាបាលជំងឺធម្មតាទេ។
លោកឧត្តមសេនីយ៍ឯក យឹម លាង ប្រធានអង្គភាពអង្គរក្សរបស់លោក ជា ស៊ីម មានប្រសាសន៍ឆ្លើយតបនឹងពាក្យចចាមអារ៉ាមនេះថា“ ប្រសិនបើនរណាមើលស្រាលលើជីវិតរបស់សម្តេច សម្តេចសូមឲ្យពួកគេមានអាយុវែងជាង១០០ឆ្នាំ”។ លោកឧត្តមសេនីយ៍ឯក យឹម លាង ដែលជានាយករងខុទ្ទកាល័យលោក ជា ស៊ីម បានមានប្រសាសន៍ថាខុទ្ទកាល័យកំពុងតាមដានព័ត៌មាននេះ ចាប់តាំងពីគេបានបង្ហោះនៅតាមគេហទំព័រខេអាយ កាលពីថ្ងៃសៅរ៍។
លោកមានប្រសាសន៍ថា“ យើងដឹងថាគេហទំព័រខេអាយ បានផ្សព្វផ្សាយពាក្យចចាមអារា៉មនេះ ពីរបីថ្ងៃហើយ…។ ពេលនេះ នគរបាលរបស់យើងកំពុងតាមចាប់ខ្លួនអ្នកបង្កើតពាក្យចចាមអារ៉ាមនេះ”។ លោកបានបន្ថែមថាអាជ្ញាធរបានកំណត់មុខសញ្ញាទៅលើសមាជិក គណបក្សប្រឆំាងម្នាក់នៅអាមេរិក និងបុគ្គលម្នាក់នៅក្នុងរាជធានីភ្នំពេញ។ លោកឧត្តមសេនីយ៍ឯក យឹម លាង បានមានប្រសាស៍ថា “ ខុទ្ទកាល័យរបស់ខ្ញុំកំពុងចាត់វិធានការលើករណីនេះ”។ គេហទំព័រ ខេអាយ ទំនងជាមិនភ្ញាក់ផ្អើលនឹងការព្រមានចាត់វិធានការតាមផ្លូវតុលាការទេ។
តំណាងរបស់គេហទំព័រនេះម្នាក់ បានលើកឡើងក្នុងសារមួយថា “ នេះមិនមែនជាការគំរាមកំហែងលើកដំបូង និងក៏មិនមែនជាលើកចុងក្រោយដែរ ចេញមកពីភ្នំពេញនោះ។ ប្តឹងយើងទៅ ប៉ុន្តែយើងគិតថា វា
មិនងាយទេសម្រាប់រដ្ឋាភិបាលក្រុងភ្នំពេញ ដើម្បីនាំខ្លួនយើងទៅឲ្យតុលាការកាត់ទោសនោះ។រឿងសម្ងាត់និយាយអំពីសុខភាពរបស់ឥស្សរជនរបស់ប្រទេសកម្ពុជា ពាក្យចចាមអារា៉មនេះ នឹងត្រូវល្បីសុសសាយ”៕
ប្រែសម្រួលដោយ ចេវ ប៊ុុននី