37 C
Phnom Penh

សមាជិក​ព្រឹទ្ធ​សភា​ព្យា​យាម​ដោះ​ស្រាយ​ រឿង​ក្តី​ចម្ការ​អំពៅ​​​ដោយ​ការ​បង់​​ប្រាក់​សំណង​

ដោយ ឌឹ ខេមបូឌា ដេលី

បទវិភាគ

អ្នក​ភូមិ និង​មន្ត្រី​មូល​ដ្ឋាន​ម្នាក់ បាន​និយាយ​​កាលពី​ម្សិល​មិញ​ថា លោក លី យ៉ុងផាត់ សមា​ជិក​ព្រឹទ្ធ​សភា​បាន​ចុ​ះទៅ​សួរ​សុខ​ទុក្ខ​ប្រជា​ពល​រដ្ឋ​ជា​ច្រើន​គ្រួសារ​ ដែល​ជាប់​ពាក់​ព័ន្ធ​នឹង​​វិវាទ​ដី​ធ្លី​ដ៏អូស​បន្លាយ​ជា​មួយ​ក្រុម​ហ៊ុន​ស្ក​រស​របស់​​ថៃ​ កាលពី​ថ្ងៃ​ច័ន្ទ​ ជាការ​ប៉ុនប៉ង ​ដើម្បី​បញ្ចុះ​បញ្ចូល​​​អ្នក​ភូមិ​ឲ្យ​ដក​ពាក្យ​បណ្តឹង​​របស់​ខ្លួន​ប្រឆាំង​នឹង​ក្រុម​ហ៊ុន​នេះ​។

ការ​ចុះ​សួរ​សុខទុក្ខ​នេះធ្វើ​ឡើង​ ខណៈ​ដែល​នៅ​ពេល​ថ្មីៗ​នេះ​​មាន​សម្ពាធ​​កាន់តែ​ខ្លាំង​ឡើង​ៗ​មក​លើ​ចម្ការ​អំពៅ​ ដែល​លោក​ លី យ៉ុង​ផាត់ ធ្លាប់​មាន​ភាគ​ហ៊ុន​មួយ​ដែរ​នោះ ដោយ​​មាន​​អង្គការ​ក្រៅ​រដ្ឋាភិបាល​នានា​ ជួយ​ ​ប្រជា​ពល​រដ្ឋ​រាប់​ពាន់​គ្រួសារ​​ ដែល​ប៉ះពាល់​ដោយ​សារ​​ចម្ការ​អំពៅ​ទាំង​នេះ​​ដើម្បី​ធ្វើ​​យុទ្ធ​នាការ​​មួយ​មាន​ឈ្មោះ​ថា យុទ្ធ​នាការ​​ស្ករ​ស​​ស្អាត​ស្អំ​​ ដោយ​សង្ឃឹម​ថា ពួកគេ​នឹង​ទទួល​បាន​ដី​នេះ​មក​វិញ​។ គ្រួសារ​ទាំង​នេះ​ចោទ​ក្រុម​ហ៊ុន​ចម្ការ​អំពៅ​ថា បាន​រំ​លោភ​​​សិទ្ធិ​កាន់​កាប់​ដី​ធ្លី​របស់ខ្លួន​ និង​មិន​ដោះស្រាយ​សំណង​​ឲ្យ​ពួកគេ​បាន​ត្រឹម​ត្រូវ​ឡើយ។

លោក ស សុង តំណាង​ប្រជា​ពល​រដ្ឋ​ចំនួន​២២០​គ្រួសារ​ ដែល​តាំង​ពី​ឆ្នាំ​២០០៧ បាន​ទាមទារ​ឲ្យ​ប្រគល់ដីទំហំ​១.៤៩០​ហិកតា នៅ​ក្នុង​ឃុំ​ជីខលើ ស្រុក​ស្រែ​អំបិល ដែល​ត្រូវបាន​ផ្ដល់​​ឲ្យ​ក្រុម​ហ៊ុន​ឧស្សាហកម្ម​ស្ករ​ស​កោះកុង ជា​ដី​សម្បទាន​សេដ្ឋកិច្ច​ បាន​មាន​ប្រសា​សន៍​ថា “ លោក​ លី យ៉ុងផាត់ បាន​មក​ទី​នេះ​ដោយ​ផ្ទាល់​​​ដើម្បី​បញ្ចុះ​បញ្ចូល​ដើម​ចោទ​ ឲ្យ​ដក​ពាក្យ​បណ្ដឹង​ប្តឹង​​ក្រុម​ហ៊ុន​ស្ករស​​នេះ​ជា​ថ្នូរ​នឹង​ប្រាក់​”។

លោក សុង បាន​មាន​ប្រសាសន៍​ថា សំណើ​​របស់​លោក លី យ៉ុង​ផាត់ គឺ​ជា​ផ្នែក​នៃ​ការ​ខិត​ខំ​​ប្រឹង​ប្រែង​រួម​ក្នុង​ការ​ជំរុញ​ឲ្យ​អ្នក​ភូមិ​ដក​ពាក្យ​បណ្ដឹង​ផ្លូវ​ច្បាប់​ទាក់​ទង​នឹង​គម្រោង​នេះ។ សាលា​ដំបូង​ខេត្ត​កោះ​កុង បាន​កោះ​ហៅ​​អ្នក​ភូមិ​ប្រាំ​ពីរ​នាក់ ដែល​ពាក់​ព័ន្ធ​នឹង​វិវាទ​ដីធ្លី​​នេះ មក​សាក​​សួរ​ពី​បញ្ហា​នេះ កាលពី​ថ្ងៃ​សុក្រ​ បន្ទាប់​ពី​ប្រជា​ពល​រដ្ឋ​ជា​ច្រើន​គ្រួសារ​បានដក​ពាក្យ​បណ្ដឹង​ពីការ​ទន្ទ្រាន​យក​ដី​របស់ខ្លួន​។ ការ​បើក​សវនាការ​​ដែល​គ្រោង​ធ្វើ​ឡើង​កាលពី​ថ្ងៃ​ទី​២៦ ខែ​កក្កដា ត្រូវ​បាន​ផ្អាក​បន្ទាប់​​ពី​ប្រជា​ពល​រដ្ឋ​១៥​គ្រួសារ​ បាន​ដក​ពាក្យ​បណ្ដឹង​​របស់ខ្លួន​ជា​បន្ដបន្ទាប់​ ដោយ​ទទួល​យក​ប្រាក់​មួយ​គ្រួសារ​ៗ ២.០០០​ដុល្លារ​ពី​មន្ត្រី​ក្រុម​ហ៊ុន។

លោកមេឃុំ ឆាយ វុទ្ធ មាន​ប្រ​សាសន៍​ថា លោក លី យ៉ុងផាត់ បាន​មកជួប​ជា​មួយ​អ្នក​ភូមិ​​ដែល​ត្រូវ​បាន​កោះ​ហៅ​ទាំង​ប្រាំពីរ​រូបនេះ​ កាលពី​ថ្ងៃ​ច័ន្ទ​។ លោក វុទ្ធ បានមាន​ប្រសាសន៍​ថា “ គាត់​មក​ទីនេះ​​ដើម្បី​​ប្រាប់​គ្រួសារ​ទាំង​នេះ​ថា មិន​ចាំ​បាច់​ទៅ​តុលាការ​ទេ”។ លោក​បន្ថែម​ថា គ្រួសារ​ទាំង​នេះ​ក៏ត្រូវ​បាន​ប្រាប់​ផង​ដែរ​ថា ពួកគេគួរ​តែ​កុំយក​ចិត្ត​ទុក​ដាក់​ចំពោះ​គំនាប​ពី​ដើម​ចោទ​ផ្សេង​ទៀត​ឡើយ​​។

លោក​ វុទ្ធ បានមាន​ប្រសាសន៍​ថា នៅ​ឯ​ជំនួប​នោះ​ លោក លី​ យ៉ុង​ផាត់ ក៏បាន​ផ្ដល់​ប្រាក់​​ដល់​ប្រជា​ពល​រដ្ឋ​បួន​គ្រួសារ​ទៀត​ ដោយ​សង្ឃឹម​ថានឹង​បញ្ចុះ​បញ្ចូល​អ្នកភូមិ​ផ្សេង​ទៀត​ឲ្យ​ដក​បណ្ដឹង​របស់​ខ្លួន​។លោកបាន​បន្ដ​ថា “ ក៏ប៉ុន្ដែ ការ​ចរចា​នេះ​បាន​បរាជ័យ​ពី​ព្រោះ​មាន​ការ​មិន​យល់​ស្រប​ជំុវិញ​ចំនួន​ប្រាក់​ដែល​បាន​ផ្ដល់​ឲ្យ​”។

ដោយ​ត្រូវ​បាន​សួរ​ថា តើ​លោក លី​ យ៉ុង​ផាត់ កំពុង​តែ​ចរចា​ជួស​មុខ​ឲ្យក្រុម​ហ៊ុន​នេះ​ ឬយ៉ាង​ណា លោក​ វុទ្ធ បាន​បដិ​សេធ​មិន​ព្រម​ធ្វើ​អត្ថាធិប្បាយ​ឡើយ។ លោក​ លី យ៉ុង​ផាត់ និង​​តំណាង​ក្រុម​ហ៊ុន​ស្ករស​កោះ​កុង មិន​អាច​ទាក់​ទង​សុំ​ការ​អត្ថាធិប្បាយបាន​ទេ​។

ទោះជាយ៉ាង​ណ លោក វ៉េ វង្ស ដៃ​គូ​ជន​ជាតិ​តៃ​វ៉ាន់​​នៅ​ក្នុង​​ក្រុមហ៊ុន​ចម្ការ​អំពៅ​នេះ បាន​លើក​ឡើង​ក្នុង​សេចក្ដី​ប្រកាស​មួយ​កាល​ពី​ខែមុ​នថា លោក លី យ៉ុង​ផាត់ បាន​លក់​ភាគ​ហ៊ុនក្នុង​ក្រុម​ហ៊ុន​រយៈ​ពេល​ពី​រ​ឆ្នាំមក​ហើយ​។

វិវាទនៅ​ខេត្ត​កោះកុង បាន​ធ្វើ​ឲ្យ​មន្ត្រី​សហភាព​អឺរ៉ុប មាន​ការ​យក​ចិត្ត​ទុក​ដាក់​ ដែល​បាន​លើក​ឡើង​ថា ស្ករ​ដែល​ផលិត​នៅ​ចម្ការ​អំពៅ​ខេត្ត​កោះកុង អាច​មាន​ប្រយោជន៍​ ដោយសារ​តែ​ការ​នាំ​ចូល​រួច​ពន្ធ​ទៅអឺរ៉ុប​ ក្រោម​គម្រោង​មួយ​ឈ្មោះ អ្វីៗ​គ្រប់​យ៉ាង​លើក​លែង​តែ​អាវុធ​(Everything But Arms)។

អ្នក​ស្រី រិទ្ធ ខឿត អ្នកភូមិ​ដែល​បាន​ចូល​រួម​ជំនួប​ប្រជុំ​កាលព​ី​ថ្ងៃ​ច័ន្ទ បាន​មាន​ប្រ​សា​សន៍​តាម​ទូរស័ព្ទ​កាលពី​ម្សិល​មិញ​ថា លោក លី យ៉ុង​ផាត់ បាន​ប្រាប់​គ្រួសារទាំង​នេះ​ថា “ ខ្ញុំ​គ្មាន​ភាគ​ហ៊ុន​នៅ​ក្នុង​ក្រុម​ហ៊ុន​នេះទេ ប៉ុន្ដែ ខ្ញុំ​មាន​ភារកិច្ច​មួយ​ដោះ​ស្រាយ​បញ្ហា​នេះ ពីព្រោះ​ខ្ញុំ​បាន​បញ្ចុះ​បញ្ចូល​ក្រុមហ៊ុន​ថៃធ្វើ​វិនិយោគ​ចម្ការ​អំពៅ​ក្នុង​ប្រទេស​កម្ពុជា”។

អម​ដំណើរ​ដោយភរិយានិង​កូនៗ​របស់​លោក​  លោក លី យ៉ុងផាត់ បាន​ប្រាប់​អ្នក​ភូមិ​ថា លោក​នឹង​ចេញ​ប្រាក់​ពី​ហោបៅ៉​របស់លោក ដើម្បី​ដោះ​ស្រាយ​បញ្ហា​នេះ។អ្នក​ស្រី រិទ្ធ ខឿត បានមាន​ប្រសាសន៍​ថា អ្នកស្រី​ត្រូវ​បាន​លោក​ លី យ៉ុង​ផាត់ ផ្ដល់​ប្រាក់​​ចំនួន​២.០០០​ដុល្លារ​ ជា​សំណង​សម្រាប់​ការ​បាត់​បង់​ដី​បី​ហិកតារបស់​អ្នក​ស្រី ក៏​ប៉ុន្ដែ អ្នកស្រី​​បាន​បដិសេធ​ ពីព្រោះ​សំណង​នេះតិច​ពេក​។

មេធាវី​ម្នាក់​របស់​ដើម​ចោទ​រដ្ឋប្បវេណី បាន​ហៅ​ជំនួប​នេះ​ថា ជា​ការ​ប្រព្រឹត្ត​មិន​ត្រឹមត្រូវ​ទាល់​តែ​សោះ ពីព្រោះ​វា​បាន​ធ្វើ​ឡើង​ ដោយ​គ្មាន​វត្តមាន​មេធាវី​របស់​អ្នកភូមិ​។ លោក យិន សុវ៉ាត មេធាវី​របស់​មជ្ឈ​មណ្ឌល​អប់​រំ​ច្បាប់​សម្រាប់​សហ​គមន៍​បាន​មា​ន​ប្រ​សាសន៍​បន្ថែមទៀត​ថា “ បើ​ទោះ​ជា​កូន​ក្ដី​របស់ខ្ញុំ​មួយ​ចំនួន​ ​បាន​ដក​ពាក្យ​បណ្ដឹង​ក៏ដោយ​ ក៏​តុលាការ​នៅ​តែ​អាច​សម្រេច​កាត់​ក្តីរឿង​ក្ដី​នេះបាន​ដែរ​”៕

ប្រែ​សម្រួល​ដោយ ចេវ ប៊ុននី

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស