កាលពីម្សិលមិញ លោកនាយករដ្ឋមន្ត្រី ហ៊ុន សែន បានណែនាំឲ្យប្រជាពលរដ្ឋទាំងអស់ផ្អាកការងាររបស់ខ្លួនសិន ហើយតាមដានមើលការថ្លែង “សុន្ទរកថាជាប្រវត្តិសាស្ត្រ” របស់លោកស្តីពីបញ្ហាព្រំដែនជាមួយប្រទេសវៀតណាម ដែលលោកគ្រោងនឹងថ្លែងនៅរដ្ឋសភានាថ្ងៃនេះ។
ទីស្តីការគណ:រដ្ឋមន្ត្រី និងសាលារាជធានីភ្នំពេញ ក៏បានអំពាវនាវដល់បណ្តាភោជនីយដ្ឋានទាំងអស់ ម្ចាស់ហាង និយោជក និងបណ្តាស្ថាប័នរបស់រដ្ឋាភិបាល ឲ្យមើលផ្សាយការថ្លែងសុន្ទរកថាទាំងស្រុងរបស់លោកដែលមានរយ:ពេលបួនម៉ោង ដោយអនុញ្ញាតឲ្យអតិថិជន និងបុគ្គលិកអាចទស្សនាបានដែរ។
លោក ហ៊ុន សែន មានប្រសាសន៍ដូច្នេះក្នុងពិធីសម្ពោធដាក់ឲ្យប្រើប្រាស់់កំណាត់ផ្លូវជាតិថ្មីមួយថា “ សូមក្មួយៗទាំងអស់ជួបជុំគ្នានៅកន្លែងណា ដែលមានទូរទស្សន៍។មន្ត្រីរាជការ និងកងកម្លាំងប្រដាប់អាវុធទាំងអស់ត្រូវតែនាំគ្នាទៅធ្វើការ ប៉ុន្តែការងាររបស់ពួកគេ គឺអង្គុយស្តាប់”។
ការថ្លែងសុន្ទរកថារបស់លោក ហ៊ុន សែនក្នុងសភាជាតិ ធ្វើឡើងដើម្បីឆ្លើយតបទៅនឹងការចោទសួរពីសំណាក់តំណាងរាស្ត្រមកពីគណបក្ស សម រង្ស៊ី ពាក់ព័ន្ធនឹងការបោះបង្គោលព្រំដែន ដែលគណបក្សប្រឆាំងមួយនេះបានអះអាងថា កំពុងត្រូវបានប្រើប្រាស់ដើម្បីកាត់ដីឲ្យទៅប្រទេសវៀតណាម។
នៅក្នុងសេចក្តីប្រកាសមួយចេញកាលពីថ្ងៃអង្គារ សាលារាជធានីបានស្នើសុំឲ្យ “ រោងចក្រ សហគ្រាស ក្រុមហ៊ុន ហាងលក់ដូរនិងភោជនីយដ្ឋាននានាបើកទូរទស្សន៍ឲ្យចំកម្មវិធីផ្សាយបន្តផ្ទាល់នេះ ដើម្បីឲ្យនិយោជិត បុគ្គលិក និយោជក និងអតិថិជនបានមើលទាំងអស់គ្នា”។
សេចក្តីប្រកាសនេះក៏បានលើកឡើងដែរថា សាលាសង្កាត់ និងសាលាខណ្ឌគួរតែ “ ត្រៀមទូរទស្សន៍នៅតាមវត្តអារាម ស្ថានីយ ចំណត និងទីសាធារណ:នានា សម្រាប់ឲ្យព្រះសង្ឃ និងសាធារណជនបានមើលផង”។ សេចក្តីប្រកាសអំពីការថ្លែងសុន្ទរកថាដ៏វែងរបស់លោកនាយករដ្ឋមន្ត្រី នឹងជួយសាធារណជន“ កុំឲ្យមានការភាន់ច្រឡំតាមរយ:ប្រព័ន្ធផ្សព្វផ្សាយ ដែលបានផ្សាយព័ត៌មានខុសគ្មានមូលដ្ឋានច្បាប់ ពីសំណាក់ជនអគតិ”។ សេចក្តីប្រកាសស្រដៀងគ្នាដែរ ចុះហត្ថលេខាដោយលោក ប្រាក់ សុខុន រដ្ឋលេខាធិការទីស្តីការគណ:រដ្ឋមន្ត្រី ត្រូវបានទីស្តីការគណ:រដ្ឋមន្ត្រី ផ្សព្វផ្សាយទូទាំងប្រទេស។ លោក គួច ចំរើន អភិបាលខណ្ឌមានជ័យ មានប្រសាសន៍ កាលពីម្សិលមិញថា “ ខ្ញុំបានបញ្ជាចៅសង្កាត់របស់ខ្ញុំឲ្យប្រាប់ប្រជាពលរដ្ឋឲ្យមើលសម្តេចនាយករដ្ឋមន្ត្រីពន្យល់បកស្រាយបញ្ហាព្រំដែននៅថ្ងៃស្អែកនេះ”។
នៅកន្លែងធ្វើការនានា នាយកគ្រប់គ្រងបាននិយាយថា ពួកគេក៏នឹងចាក់ផ្សាយការថ្លែងសុន្ទរកថានេះដែរ ឬប្រាប់កម្មកររបស់ខ្លួនឲ្យតាមស្តាប់ការចាក់ផ្សាយឡើងវិញនៅពេលល្ងាច។
លោក ហុង លុយ ប្រធានរដ្ឋបាលនៅឯរោងចក្រកាត់ដេរ សាប្រ៊ីណា (Sabrina) ក្នុងខេត្តកំពង់ស្ពឺ បានលើកឡើងថា “ ពេលនេះយើងកំពុងប្រញាប់ប្រញាល់ដឹកជញ្ជូនផលិតផលចេញទៅក្រៅប្រទេស ប៉ុន្តែខ្ញុំនឹងប្រាប់ឲ្យកម្មករតាមដានមើលការថ្លែងសុន្ទរកថានេះអំឡុងពេលបាយថ្ងៃត្រង់”។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា “ នគរបាលគ្រប់់រូបនឹងមើលសម្តេច”។ លោកបានបន្តថា ក្រសួងមហាផ្ទៃបានជូនដំណឹងទៅប្រធាននាយកដ្ឋានទាំងអស់រួចហើយ ឲ្យចាក់ផ្សាយការថ្លែងសុន្ទរកថានេះ។ ទោះបីជាមានការរំពឹងថា មន្ត្រីរាជការនឹងតាមដានមើលការថ្លែងសុន្ទរកថានេះ ខណ:ពេលកំពុងធ្វើការក្តី ក៏លោក ហ៊ុន សែន បានមានប្រសាសន៍ថា លោកអនុញ្ញាតឲ្យក្រុមនិស្សិតស្ម័គ្រចិត្ត ដែលកំពុងវាស់វែងដីធ្លី ក្នុងគម្រោងផ្តល់ប័ណ្ណកម្មសិទ្ធិដីធ្លីថ្មីជួសមុខឲ្យក្រសួងរៀបចំដែនដី នគរូបនីយកម្ម និងសំណង់ បានឈប់សម្រាកមួយថ្ងៃ។ លោក ហ៊ុន សែន បានមានប្រសាសន៍ថា លោកសង្ឃឹមថា និស្សិតស្ម័គ្រចិត្តទាំងអស់ក៏នឹងមើលការថ្លែងសុន្ទរកថានេះដែរ។
លោកមានប្រសាសន៍បន្ថែមថា លោកបានបញ្ជាទៅអាជ្ញាធរគ្រប់ខេត្តក្រុងទាំងអស់ឲ្យប្រមូលផ្តុំសិស្ស និស្សិតនៅតាមវត្តអារាម ឬសាលាស្រុក ដើម្បីមើលឬស្តាប់សុន្ទរកថានេះ។ លោកបានថ្លែងថា “ ទូរទស្សន៍ និងវិទ្យុគ្រប់ប៉ុស្តិ៍ទាំងអស់នឹងផ្សាយបន្តផ្ទាល់”។លោកបន្តថា អ្នកមើលមិនគួរចាត់ទុកឱកាសនេះថាជា“ ការសម្រាក” ឡើយ ថ្វីបើបានសម្រាកពីការងាររយៈពេលបួនម៉ោងក៏ដោយ។ លោកបានលើកឡើងទៀតថា “ នេះជាពេលមួយដើម្បីសិក្សាអំពីប្រវត្តិសាស្ត្ររបស់ប្រទេសកម្ពុជា ទាក់ទិននឹងបញ្ហាព្រំដែន”៕
ប្រែសម្រួលដោយ តែម សុខុម