ប្រជាពលរដ្ឋនៅក្នុងសហគមន៍នេសាទខ្មែរឥស្លាមជាង១០០គ្រួសារដែលរស់នៅលើទូកតាមបណ្ដោយមាត់ទន្លេ ក្នុងសង្កាត់ជ្រោយចង្វា រាជធានីភ្នំពេញ ត្រូវអាជ្ញាធរមូលដ្ឋានបញ្ជាឲ្យចាកចេញដោយលើកឡើងថា ទូកនេសាទទាំងនោះធ្វើឲ្យខូចសោភ័ណភាពមាត់ទន្លេ និងតំបន់ជុំវិញសណ្ឋាគារថ្មី។
លោក ចៅ ស៊ីដន ចៅសង្កាត់ជ្រោយចង្វាមានប្រសាសន៍ថា “ យើងបានជូនដំណឹងដល់ពួកគាត់រួចហើយ [អំពីផែនការបណ្តេញចេញ]។ យើងបានប្រាប់ពួកគាត់អំពីគោលបំណងរួចហើយ គឺដើម្បីសុវត្ថិភាពរបស់សហគមន៍ សោភ័ណភាពតាមមាត់ទន្លេ និងតាមតំបន់អភិវឌ្ឍន៍សំណង់សណ្ឋាគារសុខា”។ លោក ស៊ីដន បានមានប្រសាសន៍បន្តថាគ្រួសារខ្មែរអុីស្លាម ដែលបានរស់នៅនិងរកស៊ីនៅលើទូកនេសាទតូចៗរបស់ពួកគេអាចត្រូវបណ្តេញចេញទៅកាន់កន្លែងផ្សេង និងមិនមានសំណងសម្រាប់ការផ្លាស់ទីកន្លែងរបស់ពួកគេទេ។
កាលពីថ្ងៃសុក្រ នគរបាល និងមន្ត្រីអាជ្ញាធរក្នុងមូលដ្ឋានបានចុះទៅដល់តំបន់នោះ ប៉ុន្តែ បានត្រឡប់ទៅវិញ ដោយមិនបានទៅដល់កន្លែងទូក ឬជួបជាមួយម្ចាស់ទូកទាំងនោះទេ ដែលពួកគេភាគច្រើនជាអ្នកកាន់សាសនាមូស្លីម។ លោក ស៊ីដន មានប្រសាសន៍បន្ថែមទៀតថា កាលពីថ្ងៃសុក្រ ទូកនេសាទទាំងនោះមិនត្រូវបានបណ្ដេញចេញដោយបង្ខំបានទេ ដោយសារតែលោកចង់រក្សាស្ថានការណ៍ឲ្យ “ ស្ងប់ស្ងាត់” ក្នុងអំឡុងពិធីបុណ្យរ៉ាម៉ាដាន ។
លោក ម៉ាត់ គ្រីយ៉ា ជាសមាជិករស់នៅក្នុងសហគមន៍ខ្មែរអុីស្លាម ដែលនឹងត្រូវបង្ខំឲ្យចេញពីមាត់ទន្លេដែរនោះបាននិយាយថា មិនមានការព្រមានជាមុនពីអាជ្ញាធរឡើយ តែនគរបាលជើងទឹកបានយកខ្សែពួរមកចងព័ទ្ធជុំវិញទូករបស់ពួកគាត់ កាលពីយប់ថ្ងៃព្រហស្បតិ៍ ហើយបានសណ្ដោងចេញទៅដាក់នៅកណ្ដាលទន្លេមេគង្គ និងទន្លេសាប។
រលកបោកបក់ដោយសារការសណ្តោងនោះ បានបណ្ដាលឲ្យធ្លាក់ក្មេងតូចៗពីរនាក់ ប៉ុន្ដែពួកគេមានសំណាងណាស់ ដោយអាចជួយសង្គ្រោះពួកគេបាន។ លោកបានមានប្រសាសន៍ថា “ យើងពិតជាមានការរន្ធត់ចិត្តណាស់ដោយសារនគរបាលមករុះរើផ្ទះលើទូករបស់យើង ដោយមិនបានប្រាប់មួយមាត់សោះ…។ ក្មេងតូចៗរបស់យើងស្ទើរតែលង់ទឹកទាំងអស់គ្នា”។
អ្នកស្រី មិត្ត ណាសៀត អាយុ៣៩ឆ្នាំ បាននិយាយថា អ្នកស្រី និងអ្នករស់នៅក្នុងសហគមន៍បណ្តែតទឹកផ្សេងទៀតមិនអាចផ្លាស់ចេញពីតំបន់ជិតមាត់ទន្លេជ្រោយចង្វាបានទេ ដែលបច្ចុប្បន្ននេះជាកន្លែងកំពុងតែចាក់បេតុងធ្វើច្រាំងទន្លេ និងជាតំបន់នៅជិតសាលារៀនសម្រាប់កូនៗរបស់ពួកគាត់ហើយពួកគាត់អាចរកស៊ីចិញ្ចឹមជីវិតដោយការនេសាទនៅទីនោះបាន។
អ្នកស្រីបានបន្ដថា “ យើងមិនអាចចាកចេញពីតំបន់នេសាទរបស់យើងនៅទីនេះបានទេ។ យើងសុំនៅទីនេះ ដើម្បីបានរស់តែប៉ុណ្ណោះ។ យើងសប្បាយចិត្តរស់នៅទីនេះ។ បើសិនជាពួកគេនៅតែចង់បណ្ដេញពួកយើងចេញ យើងនៅតែស្នើសុំពួកគេអនុញ្ញាតឲ្យពួកយើងរស់នៅទីនេះទៀត”៕
ប្រែសម្រួលដោយ ឃិន ណៃ