28 C
Phnom Penh

អស់​ជំនឿ​លើ​តុលាការ ប្រជា​ពល​រដ្ឋ​ដែល​​មាន​ទុក្ខ​លំបាកងាក​ទៅ​បួង​សួង​សុំ​ឲ្យ​វត្ថុ​ស័ក្តិសិទ្ធ​ិជួយ

ដោយ ឌឹ ខេមបូឌា ដេលី

បទវិភាគ

ប្រជាពល​រដ្ឋ​បាន​កាន់​​ធូប​ទៀនទៅ​កាន់​ព្រះ​អង្គ​ដង​កើ​ ដែលស្ថិត​នៅ​តាម​បណ្តោយ​តីរ​វិថី​ព្រះស៊ីសុវត្ថិ​ កាលពី​ចុង​ខែ​មុន ដើម្បី​បួងសួង​​សុំ​ឲ្យ​​​វត្ថុ​ស័ក្តិ​សិទិ្ធ​ជួយ​ ដោយ​សារ​តែ​ពួកគាត់​អស់​ជំនឿ​លើ​ប្រ​ព័ន្ធ​តុលាការ​។

នៅពេល​ដែល​ក្រុម​អ្នក​គាំ​ទ្រ​លោក ម៉ម សូណង់ដូ ម្ចាស់​ស្ថានីយ​វិទ្យុ​សម្បុក​ឃ្មុំ ​ដែល​កំពុង​ជាប់​ពន្ធ​នាគារ​ បាន​ជួប​ជុំ​គ្នា​នៅ​កន្លែង​សក្ការ​បូជា​នេះ​ដើម្បី​បួង​សួង​សុំ​ឲ្យ​វត្ថុ​ស័ក្តិ​សិទ្ធ​ិជួយ​ឲ្យ​គេដោះ​លែង​លោក​មក​វិញ ដែល​នេះ​ គឺ​ជា​ការ​បួង​សួង​លើកទី​២​ហើយ​ចាប់​តាំង​ពី​លោក ម៉ម សូណង់​ដូ ត្រូវ​បាន​ចាប់​ខ្លួន​កាល​ពី​ថ្ងៃ​ទី១៥ ​ខែ​កក្ក​ដា​មក។

ដោយ​លែង​មាន​ជំនឿ​លើ​សមត្ថ​ភាព​របស់​តុលាការ​នៅក្នុង​ការ​ដោះ​ស្រាយ​បញ្ហា​របស់ពួកគាត់ ​ប្រជា​ពល​រដ្ឋ​​ជា​ច្រើន​កំពុង​តែ​បួង​សួង​សុំ​ឲ្យ​វត្ថុ​ស័ក្តិ​សិទិ្ធ​ជួយ​វិញ​ម្តង។ អ្នក​ស្រី ហេង មុំ ​​តំណាង​ម្នាក់​មក​ពី​សហ​គមន៍​បឹង​កក់​ក្នុងរាជ​ធានី​ភ្នំពេញ​ បាន​និយាយ​ថា “ យើង​មិនជឿលើ​អាជ្ញាធរ​ រដ្ឋា​ភិបាល ឬ​ប្រ​ព័ន្ធ​តុលាការ​ទេ ពីព្រោះ​យើង​មិន​​ដែល​ទទួល​បាន​ដំណោះ​ស្រាយ​ល្អ​ពី​ពួកគេ​ឡើយ។​ដូច្នេះ​ហើយ​ទើប​បាន​ជា​យើង​ចាប់​ផ្តើម​បួង​សួងសុំ​ឲ្យ​វត្ថុ​ស័ក្តិ​សិទិ្ធ​ជួយ​យើង​វិញ​ម្តង”។ ក្នុង​រយ:ពេល​​ជា​ច្រើន​ឆ្នាំ​មក​នេះ អ្នក​ភូមិ​បឹងកក់ បាន​និង​កំពុង​តស៊ូ​ប្រ​ឆាំង​​ក្នុង​តុលាការ និង​នៅ​តាម​ផ្លូវ​នានា តទល់​នឹងរដ្ឋា​ភិបាលនិង​​ក្រុម​ហ៊ុន ស៊ូកាគូអីុន ដើម្បី​ទទួល​បាន​​ប័ណ្ណ​កម្ម​សិទ្ធិ​ដី​ធ្លី។

ប្រាំ​ឆ្នាំ​បន្ទាប់​ពី​រដ្ឋាភិបាល​បាន​ប្រ​គល់​កិច្ច​សន្យា​​ជួល​ឲ្យ​ទៅ​​ក្រុម​ហ៊ុន ស៊ូកាគូអីុន ដើម្បី​អភិវឌ្ឍ​​នៅ​តំបន់​​បឹង​កក់ ប្រជា​ពល​រដ្ឋ​រាប់​ពាន់​​គ្រួសារ​ត្រូវ​បាន​បណ្តេញ​ចេញ​ និង​ជា​ច្រើន​គ្រួសារទៀត​កំពុង​ជាប់​ក្នុង​ជម្លោះ​​នៅ​ឡើយ។ ការ​សន្យា​មួយកាលពី​ឆ្នាំ​មុន​របស់​​លោក​នាយក​រដ្ឋ​មន្ត្រី ហ៊ុន សែន ថា​ នឹង​លៃ​ដីទំហំ​១២,៤៤ហិកតា​​​ទុក​ដោយ​ឡែក​សម្រាប់​ប្រ​ជា​​ពល​រដ្ឋ​ដែល​នៅ​សេស​សល់​ទាំង​ប៉ុន្មាន​នៅ​តំបន់​បឹង​កក់​នោះ ​ពេល​នេះ​ធ្វើ​ឲ្យ​ប្រជា​ពល​រដ្ឋ​​ជិត​១០០​គ្រួសារ​​នៅ​តែ​គ្មាន​ដីធ្លីដដែល។

ហើយ​ប្រ​ហែលជា​គ្មាន​អ្វីគួរ​ឲ្យ​ភ្ញាក់​ផ្អើល​​ទេ ដែល​ពេល​នេះ​ពួកគាត់​បាន​អំពាវ​នាវ​ទៅ​​អាជ្ញា​ធរ​ដែល​មាន​ឋាន:ខ្ពស់​ជាង​រដ្ឋាភិ​បាល​ទៅ​ទៀត​នោះ​ អំឡុង​ពេល​​ជួប​ជុំ​គ្នា​នៅ​កន្លែង​​លោក​យាយ​ពេញនិង​ព្រះ​អង្គ​ដង​កើក្នុង​រាជ​ធានី​ភ្នំពេញ​ នោះគឺ​ការ​បួង​សួង​សុំ​ឲ្យ​វត្ថុ​ស័ក្តិ​សិទិ្ធ​ជួយ។ អ្នក​ស្រី ហេង មុំ បាន​និយាយ​ថា  “ យើង​​បួង​សួងសុំ​ឲ្យ​វត្ថុ​ស័ក្តិសិទិ្ធ​ជួយ​យើង ដាស់​តឿន​​អាជ្ញាធរ​និង​រដ្ឋាភិបាល​ថា ពួកគេ​មិន​​គួរ​ធ្វើ​បាបលើប្រជា​ពល​រដ្ឋ​របស់​ខ្លួន និង​មិន​គួរ​គាប​សង្កត់​ឬ​កេង​ចំណេញពី​ពួកគេ​ឡើយ”។

​ចំនួន​អ្នក​ភូមិ​​ក្នុង​​ស្រុក​សណ្តាន់ ខេត្ត​កំពង់​ធំ ​ចម្ងាយ​រាប់​រយ​គីឡូ​ម៉ែត្រ​ពី​រាជ​ធានី​ភ្នំពេញ​ ដែល​បាន​នាំ​គ្នា​​បួងសួងទាំង​ក្រុមៗ​ ក៏​មាន​ចំនួន​​កើន​ឡើង​ដែរ។ការ​កាប់​ឈើ​ខុស​ច្បាប់បាន​រីករាល​ដាល​យ៉ាង​ខ្លាំង​ក្នុង​ព្រៃ​ឡង់ ហើយ​ការ​​អំពាវ​នាវជា​ញឹក​ញាប់ទៅ​រដ្ឋាភិបាល​មិន​ទទួល​​បាន​លទ្ធ​ផលផ្លែ​ផ្កា​ទេ។

លោក ហឿន សុភាព ​តំណាង​សហ​គមន៍​ព្រៃ​ឡង់ បាន​លើក​ឡើង​ថា “ អាជ្ញាធរ​មិន​បាន​​ចាត់​វិធាន​ការ​បង្ក្រាបសកម្ម​ភាព​កាប់​ឈើ​ដែល​បណ្តាល​ឲ្យ​ព្រៃ​របស់​យើង​​វិនាស​បាត់​បង់​ពី​មួយ​ថ្ងៃ​ទៅ​មួយ​ថ្ងៃ​នោះ​ឡើយ។​ហេតុ​ដូច្នេះ​ហើយ បាន​ជា​យើង​ងាក​មក​ជឿ​លើ​​អបិយ​ជំនឿ​វិញ​ម្តង”។លោក​​ប៉ាន់​ប្រមាណ​​ថា ​ពេល​នេះ​អ្នក​ភូមិ​ជាង​២០០​នាក់​​ចូល​រួម​ក្នុង​ពិធីបួង​សួង​នាពេល​បច្ចុប្បន្ន​ ដែល​ធ្វើ​ឡើង​កាន់តែ​ញឹក​ញាប់​ជាង​មុន​។ លោក​​​បន្ត​ថា “ យើង​តែង​តែ​បួង​សួង​​សុំ​ឲ្យ​​ម្ចាស់​ទឹក​ម្ចាស់​ដី​ជួយ​ ពីព្រោះ​យើង​កាន់​តែ​​អស់​សង្ឃឹម​លើ​អាជ្ញាធរ​ និង​រដ្ឋាភិ​បាល​ហើយ​”​។

ប្រ​ជា​ពល​រដ្ឋក្នុង​​ស្រុក​ក្រគរ ខេត្ត​ពោធិ៍​សាត់​ បាន​តស៊ូ​​​ប្រ​ឆាំង​នឹង​ក្រុម​​ហ៊ុន​ភាពីម៉ិច ដ៏​មាន​ឥទ្ធិ​ពល​និង​មាន​ខ្នង​ក្រាស់ ចាប់​តាំង​ពី​ឆ្នាំ​១៩៩៧​មកម្លេ៉ះ ​នៅពេល​ក្រុម​ហ៊ុន​​នេះ​ទទួល​​បាន​ដីសម្ប​ទាន​សេដ្ឋ​កិច្ច​មួយ​កន្លែង​ទំហំ​៣១៦.០០០ហិក​តា​ពី​រដ្ឋាភិបាល​។​អាជ្ញាធរ​ប្រ​ដាប់​អាវុធ​​បាន​បំបែក​ការ​តវ៉ា​របស់​ពួកគាត់​ជុំ​វិញ​ការ​បាត់​បង់ដីធ្លី ខណៈ​ដែល​​មន្ត្រី​ថ្នាក់​ឃុំ​និយាយ​ថា ពួកគេ​គ្មាន​សមត្ថ​ភាព​ជួយ។ ពេល​នេះ ​អ្នកភូមិ​ក្នុង​ស្រុកក្រគរ ​បាន​បួងសួងសុំ​ឲ្យ​វត្ថុ​ស័ក្តិសិទិ្ធ​ដាក់​​បណ្តា​សា​ក្រុម​ហ៊ុនភាពីម៉ិច។​​​​​​​​​​​​​

លោក គុច វ៉េង ​តំណាង​សហគមន៍​ក្នុង​ស្រុ​កក្រគរ ​​បា​ន​និយាយ​ថា “ អស់​រយ:ពេល​ជា​យូរ​មក​ហើយ ដែល​យើង​​​ស្នើ​សុំ​ឲ្យ​អាជ្ញាធរ​​​និង​រដ្ឋាភិបាល​​ជួយ​​ដោះ​ស្រាយ​ករណី​នេះ​សម្រាប់​ពួក​យើង ប៉ុន្តែ​ អាជ្ញាធរ​និង​រដ្ឋាភិបាល​​មិន​បាន​​ជួយ​ដោះ​ស្រាយ​ទេ។ដូច្នេះ​ហើយ​​បាន​ជា​អ្នកភូមិ​ទាំង​នោះ​នាំ​គ្នាបួងសួងសុំ​ឲ្យ​វត្ថុ​ស័ក្តិ​សិទ្ធិក្នុង​លោកនិង​ម្ចាស់ទឹកម្ចាស់ដី​​ជួយ​ដាស់​តឿន​អាជ្ញាធរ​ រដ្ឋាភិបាល​និង​ក្រុម​ហ៊ុន​ដោះស្រាយ​ករណី​នេះ”។

លោក ជុំ ង៉ាន  ​តំណាង​សហ​គន៍​បុរី​កីឡា ក្នុង​រាជ​ធានីភ្នំពេញ ​​​បន្ទរ​តាម​ថា “ ពេល​នេះ​​យើង​លែង​មាន​ជំនឿ​លើ​រដ្ឋា​ភិបាល​ហើយ។​យើង​បាន​មើល​ឃើញ​ថា រដ្ឋា​ភិបាល​​និង​ក្រុម​ហ៊ុន​នៅ​ស្ងាត់ស្ងៀម​នៅ​ឡើយ។​ដូច្នេះ​បាន​ជា​យើង​ងាក​ទៅ​ជឿ​លើ​អបិយ​ជំនឿ​វិញម្តង​”។

ជាការ​ពិតណាស់ ​ការ​ងាក​ទៅពឹង​ពាក់​សាសនា ពេល​ដែល​អ្នក​​ត្រូវ​ការ​ជំនួយ​នោះ​ មិន​មែន​ជា​រឿង​ថ្មី​ទេ។​ប៉ុន្តែ​ ការ​កើន​ឡើង​នូវ​​ពិធី​បួងសួង​និង​ការ​សម្បូងសង្រូង​ដាក់​បណ្តា​សា​​បែប​នេះ គឺជាការ​ឆ្លុះ​បញ្ចាំង​ឲ្យ​ឃើញ​​នូវ​ភាព​​អស់​សង្ឃឹម​កាន់​តែខ្លាំង​ឡើងៗ​របស់​​ប្រជា​ពល​រដ្ឋ​កម្ពុជា។

ព្រះ​ញាណវង្ស ឃឹម សន ព្រះ​បាឡាត់​គណ​រាជ​​ធានីភ្នំពេញ នៃ​គណៈមហា​និកាយ​ ​មាន​ថេរដីកា​ថា​ “ នៅពេល​មនុស្ស​មិនទទួល​បាន​អ្វីដែល​ខ្លួន​ចង​់បាន​ ឬ​នៅពេល​ដែល​ពួកគេ​ចង់​ឲ្យ​សម្រេច​ជោគ​ជ័យ​ក្នុង​កិច្ច​ការ​របស់​ខ្លួន​​នោះ ពួកគេ​តែង​តែ​បួងសួង​ទៅ​ដល់​វត្ថុ​ស័ក្តិ​សិទ្ធ។​នៅពេល​ពួក​គេ​​លែង​មាន​ជំនឿ​លើ​អ្វី​មួយ​ហើយ​នោះ​ ពួកគាត់​នឹង​ទៅ​ស្វែង​រក​ជំនួយ​ពី​អ្នក​ផ្សេងទៀត”។

លោក អង្គ ជូលីន (Ang Choulean)នរវិទូ​​មួយ​រូប​ដែ​លបាន​ចំណាយ​ពេល​រាប់​ទស​វត្សរ៍​សិក្សា​អំពី​ពិធី​សាសនា​នានា​ក្នុង​ប្រទេស​កម្ពុជា ​​បាន​មាន​ប្រ​សាសន៍​ថា “ ​នេះ​គឺជា​រឿង​ធម្មតា​ទេ។​វាធម្មតា​ទេ​ដែល​ពួកគេ​មានការ​ពឹងពាក់សាសនា​នោះ​”។

​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស