មន្ត្រីមូលដ្ឋាន និងអ្នកភូមិបានឲ្យដឹងកាលពីម្សិលមិញថា ផ្ទះរបស់ប្រជាពលរដ្ឋចំនួន១៣៧គ្រួសារនៅក្នុងស្រុកភ្នំក្រវាញ ខេត្តពោធិ៍សាត់ត្រូវបានបំផ្លាញកាលពីថ្ងៃទី៧ ខែសីហា នៅពេលនគរបាល មន្ត្រីកងរាជអាវុធហត្ថ និងមន្ត្រីរដ្ឋបាលព្រៃឈើជាង៦០នាក់បានចាប់ផ្ដើមបណ្ដេញប្រជាពលរដ្ឋចេញពីដីដែលបានអះអាងថា ជារបស់ក្រុមហ៊ុនកសិកម្ម ទូច ហ៊ីវ។
បុរសម្នាក់ក៏ត្រូវបានចាប់ខ្លួនក្នុងពេលបណ្ដេញចេញនោះដែរ។លោកអភិបាលស្រុក ទូច សំបូរ បានមានប្រសាសន៍ថា “ យើងបានបំផ្លាញផ្ទះរបស់គ្រួសារអ្នកភូមិណាដែលរស់នៅលើដីរបស់ក្រុមហ៊ុន និងដីព្រៃរបស់រដ្ឋ យើងមិនអាចអនុញ្ញាតឲ្យពួកគាត់ស្នាក់នៅបានទេ”។
យោងតាមលោក ប៉ាង ចាន់សុយុធារ៉ាព្រះរាជអាជ្ញារងអមសាលាដំបូងខេត្តបានឲ្យដឹងថា បុរសម្នាក់ ឈ្មោះ យឹម ទិត្យ អាយុ៥៩ឆ្នាំ ត្រូវបានចាប់ខ្លួនក្នុងពេលបណ្ដេញចេញនោះ ហើយត្រូវបានសាលាដំបូងខេត្តចោទប្រកាន់ពីបទកាប់ឆ្ការ និងវាស់វែងដីព្រៃដោយខុសច្បាប់។
អ្នកភូមិម្នាក់ឈ្មោះ អូន ម៉ាឌី ដែលត្រូវបានគំរាមចាប់ខ្លួននៅពេលគាត់ព្យាយាមប្រឆាំងនឹងការបណ្ដេញនេះនិយាយថា គ្រួសារទាំងអស់នេះពុំត្រូវបានជូនដំណឹងនោះទេ។ គាត់បានបន្ដថា “ ពួកគេមិនបាននិយាយអ្វីជាមួយយើងទេ។ ពួកគេដឹងតែបំផ្លាញអ្វីៗទាំងអស់”។អ្នកភូមិម្នាក់ទៀតឈ្មោះ ប្រាជ្ញ ជឿន បានឲ្យដឹងថា “ ប្រជាពលរដ្ឋជាច្រើនគ្រួសារបានចាប់ផ្ដេើមអស់អាហារទទួលទានហើយ ហើយអ្នកខ្លះគ្មានទឹកស្អាតទទួលទានឬក៏គ្មានទីជម្រកសម្រាប់ជ្រកពីទឹកភ្លៀងឡើយ។ ឥឡូវយើងកំពុងតែរស់នៅក្រោមដើមឈើ”។
មន្ត្រីមកពីក្រុមហ៊ុន ទូច ហ៊ីវ មិនអាចទាក់ទងសុុំអធិប្បាយបានទេ ប៉ុន្ដែយោងតាមលោក ម៉ាឌី បានឲ្យដឹងថា ក្រុមហ៊ុននេះបានអះអាងថា បានទិញដីនេះក្នុងឆ្នាំ២០០៤។ លោក ប្រាជ្ញ ជឿន បានមានប្រសាសន៍ថា“ ប៉ុន្ដែអ្នកភូមិជាច្រើនគ្រួសារ បានរស់នៅនិងធ្វើកសិកម្មនៅទីនេះតាំងពីឆ្នាំ២០០០មកម៉្លេះ។ ខ្ញុំមិនប្រាកដថា នឹងត្រូវធ្វើអ្វីទេ នៅពេលនេះ”៕
ប្រែសម្រួលដោយ ហម សុផាណ្ណា