មន្ត្រីជាន់ខ្ពស់ក្នុងគណបក្សបានថ្លែងកាលពីម្សិលមិញថា គណបក្ស នរោត្តមរណឫទ្ធិ នឹងប្តូរឈ្មោះទៅជាគណបក្សអ្នកជាតិនិយមវិញ បន្ទាប់ពីព្រះអង្គម្ចាស់ នរោត្តមរណឫទ្ធិបានលាលែងពីតំណែងព្រះប្រធានគណបក្សនេះ ខណៈពេលដែលអគ្គលេខាធិការបក្ស លោកសៅរ៉ានីដែលមានជម្លោះជាមួយព្រះអង្គបណ្តាលឲ្យមានការបំបែកគណបក្សនេះ នឹងកាន់តំណែងជាប្រធានស្តីទីរបស់គណបក្សថ្មីនេះ។
លោករ៉ានីត្រូវបានសមាជិកក្រុមប្រឹក្សាភិបាលគណបក្សចំនួន៥៣រូប បោះឆ្នោតជ្រើសរើសក្នុងពេលប្រជុំជាសម្ងាត់នៅទីស្នាក់ការគណបក្សនៅក្នុងខណ្ឌទួលគោក កាលពីម្សិលមិញ។ ការបំបែកគណបក្សគឺធ្វើឡើងតែប៉ុន្មានថ្ងៃបន្ទាប់ពីព្រះអង្គម្ចាស់ នរោត្តម រណឫទ្ធិ និងថ្នាក់ដឹកនាំបក្សសំខាន់ជាច្រើនរូបបានប្រកាសលាលែងពីតំណែងបន្ទាប់ពីមានជម្លោះដ៏អូសបន្លាយ ដែលដណ្តើមអំណាចគ្នាក្នុងបក្សនេះ។
កាលពីខែកក្កដា លោករ៉ានីនិងសមាជិកគណបក្ស នរោត្តម រណឫទ្ធិ ប្រាំរូបផ្សេងទៀតត្រូវបានបណ្តេញចេញពីបក្ស ទើបលោក រ៉ានីដាក់ពាក្យបណ្តឹងពីបទក្លែងឯកសារប្រឆាំងនឹងសមាជិកគណបក្សជាន់ខ្ពស់មួយរូប ហើយត្រូវតុលាការចេញដីការក្សាការពារឲ្យរក្សាតួនាទីរបស់ខ្លួនសិន ដោយរង់ចាំតុលារបើកសវនាការជំនុំជម្រះ។
កាលពីម្សិលមិញ លោក រ៉ានី បានដកពាក្យបណ្តឹងវិញ ដោយលោកនិយាយថា លោកបានយល់ព្រមដកពាក្យបណ្តឹងនេះ ដោយសារតែព្រះអង្គម្ចាស់ នរោត្តម រណឫទ្ធិ បានលាលែងពីតំណែងព្រះប្រធានគណបក្ស។
លោក រ៉ានី បានថ្លែងនៅឯសន្និសីទសារព័ត៌មានមួយ បន្ទាប់ពីត្រូវបានតែងតាំងជាប្រធានស្តីទី ហើយលោកបានថ្លែងអំណរគុណជាពិសេសចំពោះព្រះអង្គម្ចាស់ នរោត្តមរណឫទ្ធិ ដែលព្រះអង្គបានដកព្រះកាយចេញ ដើម្បីបើកផ្លូវឲ្យមានការបង្រួបបង្រួមគណបក្សជាមួយគណបក្ស ហ៊្វុនស៊ិនប៉ិច។
លោកមានប្រសាសន៍ថា “ខ្ញុំចង់បង្រួបបង្រួមរវាងគណបក្សទាំងពីរនេះ ហើយខ្ញុំមិនចង់ទាមទារតួនាទីអ្វីទេ”។ លោកបានបន្តថា “ យើងនឹងប្រជុំនៅថ្ងៃទី២៥ខែសីហា ដើម្បីពិភាក្សាអំពីវិធីប្តូរឈ្មោះរបស់គណបក្ស នរោត្តម រណឫទ្ធិទៅជាគណបក្សអ្នកជាតិនិយម ហើយយើងនឹងបញ្ចូលគណបក្សនេះជាមួយគណបក្សហ៊្វុនស៊ិនប៉ិច ដើម្បីធ្វើឲ្យក្រុមការងាររបស់គណបក្ស នរោត្តម រណឫទ្ធិ រួមគ្នាជាមួយគណបក្ស ហ៊្វុនស៊ិនប៉ិច។ អ្នកគាំទ្ររបស់យើង បានយល់ព្រម ហើយពួកគេរីករាយចំពោះការបង្រួបបង្រួមបក្សនេះ ហើយយើងជឿថាការបង្រួបបង្រួមគណបក្សទាំងពីរនេះ នឹងទទួលបានអាសនៈថែមទៀត”។
គណបក្សអ្នកជាតិនិយម ដែលគេស្គាល់ នៅឆ្នាំ២០០៨ និងឆ្នាំ២០១០ដែលនៅពេលនោះព្រះអង្គម្ចាស់ នរោត្តម រណឫទ្ធិ ក៏មានបញ្ហាផ្នែកនយោបាយដែរ។ សមាជិកឃុំ-សង្កាត់របស់គណបក្សជាច្រើនមកពីបណ្តាខេត្តទូទាំងប្រទេសបានមកចូលរួមប្រជុំផ្លាស់ប្តូរឈ្មោះគណបក្សេនះក្នុងរាជធានីភ្នំពេញ ហើយអ្នកទាំងនោះសន្យាគាំទ្រលោក រ៉ានីជាមេដឹកនាំគណបក្សថ្មី។
លោក រុន ម៉ារី ជំទប់ឃុំឈូកស ស្រុកកំពង់ត្រឡាច ខេត្តកំពង់ឆ្នាំង មកពីគណបក្សនរោត្តម រណឫទ្ធិ និយាយថា “ ការសម្រេចបង្រួបបង្រួមគណបក្ស នរោត្តម រណឫទ្ធិជាមួយគណបក្ស ហ៊្វុនស៊ិនប៉ិច នៅមុនពេលបោះឆ្នោតឃុំ-សង្កាត់ថា ជាការលឿនពេក។ ខ្ញុំគិតថា ការបញ្ចូលគ្នារវាងគណបក្សទាំងពីរនេះ ប្រសើរជាងការបែកបាក់គ្នា។ជួនកាលពេលខ្លះត្រូវ និងពេលខ្លះទៀតខុស”។លោកមាស ទិត្យ អភិបាលស្រុកព្រះនេត្រព្រះ ខេត្ត បន្ទាយមានជ័យ បានយល់ស្របតាមលោករុន ម៉ារី ដែរ។
លោកមាសទិត្យនិងសមាជិកគណបក្សដទៃទៀត មិនខ្វល់នឹងការលាលែងពីតំណែងព្រះប្រធានគណបក្សរបស់ព្រះអង្គម្ចាស់នរោត្តម រណឫទ្ធិ នោះទេ។ លោកនិយាយបន្តទៀតថា “ វាជាសិទិ្ធរបស់ព្រះអង្គ ហើយខ្ញុំគិតថា ប្រហែលជាព្រះអង្គមានបញ្ហាផ្ទាល់ព្រះកាយរបស់ព្រះអង្គ ឬក៏ព្រះអង្គមានបញ្ហាអ្វីមួយ ដែលមិនអាចដឹងបាន”៕
ប្រែសម្រួលដោយឃិនណៃ