សមាជិកសភាមកពីគណបក្ស សម រង្ស៊ីលោកស្រីមូរសុខហួរបានថ្លែងបន្ទាប់ពីបានទៅសួរសុខទុក្ខលោក ម៉មសូណង់ដូកាលពីថ្ងៃសុក្រថា សុខភាពរបស់ម្ចាស់ស្ថានីយវិទ្យុសម្បុកឃ្មុំរូបនេះ ដែលបច្ចុប្បន្ន កំពុងជាប់ពន្ធនាគារ និងកំពុងរង់ចាំការជំនុំជម្រះក្ដីពីបទចោទប្រកាន់ទាក់ទងនឹងចលនា ដែលគេហៅថាចលនាអបគមន៍ គឺលោកត្រូវការទៅសម្រាកព្យាបាលនៅក្នុងមន្ទីរពេទ្យនៅក្រៅពន្ធនាគារជាបន្ទាន់។
លោកស្រី មូរ សុខហួរ បានបន្ដថា លោកស្រីមានអារម្មណ៍រន្ធត់ពេលឃើញសុខភាពរបស់លោក សូណង់ដូ ចុះខ្សោយខ្លាំងពេកពេលលោកស្រីចូលសួរសុខទុក្ខលោកជាមួយសមាជិកសភាមកពីគណបក្ស សម រង្ស៊ីប្រាំមួយរូបផ្សេងទៀតនៅពន្ធនាគារព្រៃស។
លោកស្រីបន្ថែមទៀតថា “ សមាជិកសភាមកពីគណបក្ស សម រង្ស៊ី ប្រាំពីររូបបានទៅសួរសុខទុក្ខលោក សូណង់ដូ ដោយមានការយល់ព្រមពីសាលាដំបូងរាជធានីភ្នំពេញ។ ខ្ញុំមានអារម្មណ៍ក្ដុកក្ដួលខ្លាំងណាស់ ពេលឃើញគាត់មានសភាពអស់កម្លាំងខ្លាំង កម្លាំងកាយរបស់គាត់គឺពិតជាខ្សោយណាស់។ គាត់បានស្នើសុំឲ្យបានទៅសម្រាកព្យាបាលនៅមន្ទីរពេទ្យក្រៅពន្ធនាគារ”។
ចាប់តាំងពីថ្ងៃចាប់ខ្លួន នៅថ្ងៃទី១៥ ខែកក្កដាមក លោក សូណង់ដូ បានធ្លាក់ខ្លួនឈឺពីរលើកមក ហើយនៅក្នុងពន្ធនាគារដោយសារមានជំងឺរាគរូសធ្ងន់ធ្ងរ។ លោកស្រី មូរសុខហួរបានថ្លែងថាលោកបានផ្តើមមានជំងឺ ដោយសារមានការលំបាកក្នុងការដកដង្ហើម ហើយលោកហើមមុខមួយចំហៀង ដែលសមាជិកសមាគមរបស់លោកបាននិយាយកាលពីសប្ដាហ៍មុនថា ដោយសារលោកមានជំងឺឡើងសម្ពាធឈាម។
លោកស្រី មូរសុខហួរថ្លែងបន្ដថា “ លោកបានធ្លាក់ខ្លួនឈឺយូរមកហើយ។ លោកមិនអាចសម្រាកបានស្រួលទេ ហើយលោកមានបញ្ហាក្នុងការដកដង្ហើម។ លោកពិតជាមានអារម្មណ៍អន្ទះសាក្នុងចិត្តខ្លាំងណាស់”។ លោកម៉មសូណង់ដូកំពុងត្រូវរង់ចាំការជំនុំជម្រះក្ដីពីបទចោទប្រកាន់ថា លោកជាអ្នកគាំទ្រចលនាអបគមន៍ប្រឆាំងនឹងរដ្ឋាភិបាលនៅក្នុងខេត្តក្រចេះ។ ក្រុមនេះមានប្រជាពលរដ្ឋរាប់រយគ្រួសារដែលកំពុងតវ៉ាចំពោះការបាត់បង់ដីធ្លីរបស់ពួកគេដោយសារក្រុមហ៊ុនចម្ការកៅស៊ូឯកជន។
អង្គការលើកលែងទោសអន្ដរជាតិបានចាត់ទុកលោក សូណង់ដូ ជាអ្នកទោសមនសិការនៅក្នុងប្រទេសកម្ពុជា ដោយលើកឡើងថា លោកត្រូវបានចាប់ខ្លួនដោយសារ “បានអនុវត្តនូវសិទ្ធិបញ្ចេញមតិដោយសន្ដិវិធី”។
នៅក្នុងសេចក្ដីថ្លែងការណ៍មួយ ចេញផ្សាយ កាលពីដើមខែនេះ អង្គការលើកលែងទោសអន្ដរជាតិបានលើកឡើងថា ការចាប់ខ្លួនលោក សូណង់ដូ គឺទាក់ទងនឹងការផ្សាយព័ត៌មាន របស់វិទ្យុសម្បុកឃ្មុំអំពីការព្យាយាមដាក់ពាក្យបណ្ដឹងទៅតុលាការឧក្រិដ្ឋកម្មអន្ដរជាតិប្រឆាំងនឹងរដ្ឋាភិបាលបច្ចុប្បន្នពីបទឧក្រិដ្ឋកម្មប្រឆាំងមនុស្សជាតិ តាមរយៈសកម្មភាពបណ្ដេញប្រជាពលរដ្ឋរាប់ពាន់គ្រួសារចេញពីលំនៅដ្ឋានដោយបង្ខំ។
ការផ្សាយព័ត៌មានរបស់វិទ្យុសម្បុកឃ្មុំធ្វើឡើងតែប៉ុន្មានថ្ងៃមុនពេលលោកនាយករដ្ឋមន្ត្រី ហ៊ុន សែន បានថ្លែងសុន្ទរកថា នៅថ្ងៃទី២៦ ខែមិថុនា ដោយបានភ្ជាប់លោកសូណង់ដូទៅនឹងចលនាប្រឆាំងនឹងរដ្ឋាភិបាល។ អ្នកស្រី ឌិនផាណារ៉ាភរិយារបស់លោក សូណង់ដូ បានមានប្រសាសន៍ថា អ្នកស្រីក៏បានជួបស្វាមីរបស់អ្នកស្រីផងដែរកាលពីថ្ងៃសុក្រ។ អ្នកស្រីបានមានប្រសាសន៍បន្តថា លោកសូណង់ដូបានស្នើសុំឲ្យលោកស្រ៊ុន លាង ប្រធានមជ្ឈមណ្ឌលកែប្រែទី១នៃពន្ធនាគារព្រៃសអនុញ្ញាតឲ្យលោកបានទៅព្យាបាលជំងឺនៅមន្ទីរពេទ្យណាមួយ នៅខាងក្រៅពន្ធនាគារ ប៉ុន្ដែ លោកមិនទាន់បានទទួលនូវការឆ្លើយតបនៅឡើយទេ។ពេលទាក់ទងតាមទូរស័ព្ទកាលពីថ្ងៃសុក្រ លោក ស្រ៊ុនលាងបានបដិសេធមិនធ្វើអត្ថាធិប្បាយអំពីបញ្ហានេះទេ។
អ្នកស្រី ផាណារ៉ា បានមានប្រសាសន៍បន្ថែមថា“ សុខភាពរបស់គាត ់ កាន់តែទ្រុឌទ្រោមទៅៗ។ខ្ញុំគិតថា គាត់មិនស្រួលខ្លួនពីព្រោះគាត់ហូបមិនគ្រប់គ្រាន់ ហើយគាត់ហូបមិនទៀងទាត់ទៀត”។ សមាជិកសភាមកពីគណបក្ស សម រង្ស៊ីនឹងសរសេរលិខិតទៅក្រសួងយុត្តិធម៌ នៅថ្ងៃច័ន្ទ ដើម្បីគាំទ្រដល់សំណើររបស់លោក សូណង់ដូ សុំទៅសម្រាកព្យាបាលជំងឺនៅមន្ទីរពេទ្យ។ លិខិតនោះ នឹងអំពាវនាវផងដែរឲ្យដោះលែងលោកឲ្យនៅក្រៅឃុំជាបណ្ដោះអាសន្ន ដែលសំណើនេះត្រូវបានបដិសេធកាលពីខែមុនម្តងរួចមកហើយ។
លោកស្រី មូរ សុខហួរ បានមានប្រសាសន៍ថា លោកស្រីបានជួបលោក សូណង់ដូ រយៈពេលកន្លះម៉ោងក្នុងបរិវេណពន្ធនាគារ ហើយលោកស្រីបានមានប្រសាសន៍បន្ថែមទៀតថា លោក សូណង់ដូ គឺកំពុងតែតាមដានព្រឹត្តិការណ៍បច្ចុប្បន្ន និងប្រត្តិកម្មចំពោះសំណុំរឿងរបស់លោកតាយរយៈការស្ដាប់វិទ្យុ។
ប្រជាពលរដ្ឋជាង១០០.០០០នាក់បានផ្តិតមេដៃលើញត្តិមួយ ដើម្បីអំពាវនាវឲ្យដោះលែងលោកសូណង់ដូហើយអង្គការសហព័ន្ធសិទ្ធិមនុស្សអន្ដរជាតិកាលពីថ្ងៃសុក្រ បានចេញសេចក្ដីថ្លែងការណ៍មួយ អំពាវនាវឲ្យមាការគាំទ្រឲ្យចំពោះសំណើសុំដោះលែងម្ចាស់វិទ្យុសម្បុកឃ្មុំរូបនេះផងដែរ។
ក្រុមអង្គការសិទ្ធិមនុស្សបានលើកឡើងក្នុងសេចក្ដីថ្លែងការណ៍ថា”រដ្ឋាភិបាលមិនបានបង្ហាញភស្ដុតាងណាមួយច្បាស់លាស់ ដើម្បីដាក់បន្ទុកមកលើការចោទប្រកាន់របស់ខ្លួន ដែលអះអាងថាលោកសូណង់ដូ មានជាប់ពាក់ពន្ធនឹងចលនាអបគមន៍នៅក្នុងខេត្តក្រចេះនោះនៅឡើយទេ។
ក្នុងអំឡុងការបង្ក្រាបចលនា ដែលគេហៅថាចលនាអបគមន៍របស់ប្រជាកសិករ ចេញពីតំបន់មានជម្លោះដីធ្លីក្នុងខេត្តក្រចេះ តាមរយៈការប្រើកម្លាំងកងរាជអាវុធហត្ថ និងនគរបាលយ៉ាងច្រើន ហើយបានបណ្ដាលឲ្យក្មេងស្រីអាយុ១៤ឆ្នាំម្នាក់ស្លាប់។ រដ្ឋាភិបាលបានបកស្រាយបែបចំអកថា ករណីនេះមិនចាំបាច់មានការស៊ើបអង្កេតចំពោះការស្លាប់របស់កុមារីនេះទេ។
អ្នកស្រីហ៊ួន ផាន់ណារីអគ្គលេខាធិការសមាគមអ្នកប្រជាធិបតេយ្យបាននិយាយថាសមាជិកសមាគមជាង៦០នាក់បានប្រមូលផ្ដុំគ្នា នៅក្នុងវត្តអង្គមេត្រី នៅជិតពន្ធនាគារព្រៃសកាលពីថ្ងៃសុក្រដើម្បីបួងសួងឲ្យសុខភាពរបស់លោកសូណង់ដូ រាំងមាំឡើងវិញ។អ្នកស្រី ផាន់ណារី បានមានប្រសាសន៍ថាលោកសូណង់ដូគឺជាមនុស្សម្នាក់ ដែល “ស្រឡាញ់ប្រជាជនកម្ពុជា និងស្នេហាជាតិខ្លួន”។
លោកស្រីមូរសុខហួរមានប្រសាសន៍ថាលោកសូណង់ដូគឺកំពុងខិតខំតស៊ូ ដើម្បីបង្ហាញឲ្យឃើញថាលោកមិនមានកំហុសទេ។លោកស្រីបន្ដថា”ខ្ញុំអាចនិយាយបានថាបញ្ហានេះធ្វើឲ្យប៉ះពាល់ដល់អារម្មណ៍របស់គាត់ខ្លាំងណាស់ ប៉ុន្ដែគាត់នៅតែតស៊ូទ្រាំបាន។លោកមិនមានអារម្មណ៍សោកស្ដាយ ចំពោះការវិលត្រឡប់ពីសហរដ្ឋអាមេរិកមកកាន់ប្រទេសកម្ពុជាវិញនោះទេ។គាត់និយាយថានៅក្នុងពន្ធនាគារប្រសើរជាងនៅបរទេស ពីព្រោះយ៉ាងហោចណាស់គាត់បាននៅក្នុងទឹកដីកម្ពុជាដែរ”៕
ប្រែសម្រួលដោយឃិនណៃ