33.3 C
Phnom Penh

ក្រុម​ហ៊ុនរដ្ឋ​ចិន​នៅ​ពី​ក្រោយ​ការ​​ចរចា​​ជា​មួយ​រដ្ឋាភិបាល​ ដើម្បីបន្ដ​គម្រោង​ស្តារ​ផ្លូវ​ដែក

ដោយ ឌឹ ខេមបូឌា ដេលី

បទវិភាគ

មន្ត្រី​ជា​ច្រើន​រូប​បាន​ឲ្យ​ដឹង​កាល​ពី​ម្សិល​មិញ​ថា​ ដោយ​សារ​ការ​ងារ​ស្តារ​ផ្លូវ​រថ​ភ្លើង​ចាស់​​ទ្រុឌ​ទ្រោម​មិន​អាច​ទៅ​មុខ​រួច​ ក្រសួង​សាធា​រណ​ការ និង​ដឹក​ជញ្ជូន​បាន​ចាប់​ផ្តើម​ពិភាក្សា​ជា​មួយ​ក្រុម​ហ៊ុន​ក្នុង​តំបន់​មួយ​ចំនួន​ ដែល​គ្រប់​គ្រង​ដោយ​ក្រុម​ហ៊ុន​ធំៗនៅ​​ក្នុង​ប្រទេស​​ចិន​ ដើម្បី​ឲ្យ​ក្រុម​ហ៊ុន​ទាំង​នេះ​ចូល​មក​ជំនួស​ក្រុម​ហ៊ុន​ស្តា​រផ្លូវ​រថភ្លើងបច្ចុប្បន្ន។

លោកត្រាំអុីវតឹករដ្ឋ​មន្ត្រី​ក្រសួង​សាធារ​ណការ​ និង​ដឹក​ជញ្ជូន​​ មាន​ប្រសាសន៍​កាល​ពី​ម្សិលមិញ​ថា “ វា​ឆាប់​ពេក​មិន​អាច​ពន្យល់​បាន​ទេ​…​ ក៏ប៉ុន្ដែ យើង​កំពុង​តែ​ធ្វើ​ការ​ចរចា”។ លោក​រដ្ឋមន្ត្រី​បាន​បន្ថែម​ថា “ ​ខ្ញុំ​នឹង​ធ្វើ​ការ​​ជាមួយ​ក្រុមហ៊ុន​កម្ពុជា​រ៉េលវេ (Kampuchea Railways) ដើម្បី​ដោះ​ស្រាយ​បញ្ហា​ទាំង​នេះ”។​ដោយសារ​មាន​បញ្ហា​​ទាក់​ទង​នឹង​ការ​សាង​សង់​ ព្រម​ទាំង​ការ​ពន្យារពេល​ដូច​ជា​ការ​តវ៉ា​លើ​ការ​ផ្លាស់​ប្ដូរ​ទី​លំនៅ​ប្រជាពលរដ្ឋ​រាប់ពាន់​គ្រួសារ ដែលក​ំពុង​រស់​នៅ​តាម​បណ្ដោយ​ផ្លូវ​រថភ្លើង​ ទើប​ក្រុមហ៊ុនថូល​ រ៉ូយ៉ាល់​ រ៉េលវេ (Toll Royal Railways) មិន​ដំណើរ​ការ​រថភ្លើង​តាម​ខ្សែ​ផ្លូវ​ដែកកាល​ពី​ថ្ងៃ​ទី​១១ខែ​មីនា។

រហូត​មក​ដល់​ពេល​នេះ​ ក្រុម​ហ៊ុន ថូល​ រ៉ូយ៉ាល់​ រ៉េលវេ បាន​ផ្ញើ​លិខិត​មួយ​ច្បាប់​ជូន​រដ្ឋាភិបាល​ ដោយ​លើក​ឡើង​ថា ក្រុម​ហ៊ុន​បញ្ឈប់​កិច្ច​ការ​ស្ដារ​ផ្លូវ​រថភ្លើង​ ដោយសារ​តែ​ក្រុមហ៊ុន​មិន​អាច​រក​ប្រាក់​ចំណេញ​ពី​ដំណើរ​ការ​រថ​ភ្លើងបាន​ ពី​ព្រោះ​មាន​ការ​ពន្យារ​ពេល​​ច្រើន​ដង​ក្នុងការ​ស្ដារ​ផ្លូវ​រថភ្លើង​នេះ​។ដោយ​​មាន​ហិរញ្ញប្ប​ទាន​ភាគ​ច្រើន​បាន​មក​ពី​ធនាគារអភិវឌ្ឍ​ន៍អាស៊ី​ (ADB) ដែល​កាល​ពី​ដំបូង ​ថវិកាត្រូវ​ចំណាយ​ ដើម្បី​ស្ដារ​ខ្សែ​ផ្លូវ​រថភ្លើង​ឡើង​វិញមាន​ចំនួន​១៤៣លាន​ដុល្លារ​ ក៏ប៉ុន្ដែ​ ថវិកា​នេះបាន​អស់​ហើយ​ ហើយ​ក្រុមហ៊ុន​ត្រូវ​ការ​ថវិកា​ចន្លោះ​ពី​៦០​ទៅ​១០០​លាន​ដុល្លារ​ទៀត​ ដើម្បី​បញ្ចប់​ការងារ​ស្ដារ​ផ្លូវរថភ្លើង​។

នៅ​ក្នុង​សេចក្ដី​ថ្លែងការណ៍​មួយ​កាលពី​ម្សិល​មិញ ក្រុមហ៊ុន​កម្ពុជា​ រ៉េលវេ ​បានជូន​ដំណឹង​ថា កាល​ពី​សប្ដាហ៍​មុន​ ក្រុមហ៊ុន​បាន​ចរចា​ផ្ដល់​​ប្រាក់​ចំនួន​៩០​លាន​ដុល្លារ​ ដល់​រដ្ឋា​ភ​ិបាល ដើម្បី​បំពេញ​បន្ថែម​កង្វះ​ថវិកា​​ក្នុង​គោល​​បំណង​​ស្នើសុំ​បន្ដ​កិច្ច​ការ​នេះ​ឡើង​វិញ ក្នុង​​នាម​​ជា​ក្រុម​ហ៊ុន​ស្ដារ​ផ្លូវ​ដែក​តែមួយ​គត់​។

បច្ចុប្បន្ន​នេះ​ កិច្ចការ​ស្ដារ​ផ្លូវ​រថភ្លើង​ឡើង​វិញ​ ត្រូវ​បាន​​ផ្ដល់​ឲ្យ​ក្រុមហ៊ុន​បារាំង​ ធីអេស​អូ ខេមបូឌា ខូអិលធីឌី (TSOCambodiaCo. Ltd) ​ហើយ​​ការងារ​សាង​សង់​ កំពុង​ត្រូវ​​អនុវត្ត​​ដោយ​​ក្រុមហ៊ុន​ជប៉ុន​នីបផុន​ កូ​អេ ខូ (NipponKoeiCo)។

យោង​តាម​សំណើដែល​ត្រូវ​បាន​ដាក់​ជូន​​រដ្ឋាភិបាល​​បង្ហាញ​ថា ក្រុមហ៊ុន​កម្ពុជា​ រ៉េលវេ មិន​ត្រឹម​តែ​ផ្ដល់​ប្រាក់​​សម្រាប់​កង្វះថវិកា​ស្ដារ​ផ្លូវ​រថភ្លើង​វិញ​ និង​ចាប់​ផ្ដើម​ដំណើរ​ការ​ដឹក​ជញ្ជូន​ទំនិញ​​ ដែល​ក្រុមហ៊ុន​ ថូល​ រ៉ូយ៉ាល់​ រ៉េលវេ បាន​ផ្អាក​ដំណើរ​ការ​ប៉ុណ្ណោះ​ទេ​​ ក៏​ប៉ុន្ដែ ក្រុមហ៊ុន​នឹង​ចាប់​ផ្ដើម​សេវាកម្ម​ដឹក​អ្នក​ដំណើរ​​ទៅ​កាន់​ខេត្ត​កំពត នៅ​ពេល​ខ្សែ​រថភ្លើង​ឆ្ពោះ​​ទៅ​ភាគ​ខាង​ត្បូង​​នៃ​ប្រទេស​កម្ពុជា​ ដែល​មាន​ចម្ងាយ​​២៦៤​គីឡូ​ម៉ែត្រ​អាច​ដំណើរ​ការ​បាន​នៅ​ឆ្នាំ​ក្រោយ​។

លោក​ ដារីល ឌីល័រ (DarylDealehr) អ្នក​នាំ​ពាក្យ​ក្រុមហ៊ុន​កម្ពុជា រ៉េលវេ និង​ជា​ទី​ប្រឹក្សា​ក្រុម​ហ៊ុន​សំណង់​ស៊ីណូ-ប៉ាស៊ីហ្វិក​ ខន់ស្ត្រាក់​សិន (Sino-PacificConstruction) ​មាន​ប្រសាសន៍​ថា

“ ក្រុមហ៊ុន​ស្ដារ​ផ្លូវ​រថភ្លើង​បច្ចុប្បន្ន​ទទួល​បាន​ការអនុញ្ញាត​ជា​ច្រើន​ឆ្នាំ​កន្លង​មក​ហើយ​ ហើយ​មិន​យក​ទុនទៅ​វិនិយោគ​លើ​គម្រោង​ស្ដារ​នេះ​ ឬក៏​មិន​បាន​បង្ហាញ​រដ្ឋាភិបាល​នូវ​​ផែន​ការ​អាជីវកម្ម​ណា​មួយ​របស់​ខ្លួន​នោះ​ទេ… ហើយ​បញ្ហា​នេះ​​ធ្វើ​ឲ្យ​មាន​ការ​អាក់​អន់​ចិត្ត​”។

លោក​បាន​បន្ថែម​ទៀត​ថា “ សំណើរបស់​​យើង​ នឹង​ជំរុញ​ឲ្យ​រដ្ឋាភិបាល​កម្ពុជា ​ចាប់​ផ្ដើម​ស្ដារ​ផ្លូវ​រថភ្លើង​នៅ​ភាគ​ខាង​ជើង​ភ្លាម​ៗ​តែ​ម្ដង​ ដោយ​បច្ចុប្បន្ន​នេះ​កំពុង​តែ​ត្រូវ​បាន​ផ្អាក​ ដោយសារ​តែ​កង្វះ​ថវិកា​”។

ក្រុមហ៊ុន​ កម្ពុជា រ៉េលវេ គ្រប់​គ្រង​ដោយ​ក្រុមហ៊ុន​ រ៉េល សឺវីស ខេមបូឌា អិលធីឌី (RailServicesCambodiaLtd) ជា​ក្រុមហ៊ុន​ក្នុង​ស្រុក​មួយ​ដែល​មាន​ដៃ​គូជាមួយ​ក្រុមហ៊ុន​ ហ៊ីកម៉ាត​​ អាស៊ី (Hikmat Asia) ជា​ក្រុមហ៊ុន​សំណង់​ម៉ាឡេស៊ី និង​ក្រុមហ៊ុន​ ស៊ីណូ-ប៉ាស៊ីហ្វិក ខន់​ស្ត្រាក់​សិន ជា​ក្រុមហ៊ុន​មួយ​ដែល​មាន​ភាគ​ហ៊ុន​​ភាគ​ច្រើន​របស់​​ ឆាយណា​ ស្ដេត ខន់​ស្ត្រាក់​សិន អុិនជិននៀរីង​ ខូ (ChinaStateConstructionEngineeringCo) ដែល​ជា​ក្រុមហ៊ុន​ដ៏​ធំបំផុត​មួយ​របស់​ប្រទេសចិន​។ ​

ក្រុមហ៊ុន​បាន​ឲ្យ​ដឹង​នៅ​ក្នុង​សេចក្ដី​ថ្លែង​ការណ៍​នេះ​​ថា បន្ថែម​លើ​ថវិកា​​ចំណាយ​សាង​សង់​  ក្រុមហ៊ុន​ កម្ពុជា រ៉េល​វេ ក៏បាន​សុំ​ផ្ដល់​ថវិកា​​ចំនួន​៧៥០លាន​ដុល្លារ​ទៀត​ ដើម្បី​ស្នើ​សុំ​សម្ប​ទាន​​រយៈ​ពេល​៦០​ឆ្នាំ​ ដើម្បី​សាងសង់​ និង​បើក​ដំណើរ​ការ​ផ្លូវ​​រថភ្លើង​មួយ​ខ្សែទៀត​ចេញ​ពី​រាជធានី​ភ្នំពេញ​ ទៅ​ទី​ក្រុង​ហូជីមិញ។ ក្រុមហ៊ុន ឆាយណា រ៉េលវេ ក៏​កំពុង​តែ​សុំសិទ្ធិ​សាងសង់​ផ្លូវ​រថភ្លើង​ពី​រាជ​ធានី​ភ្នំពេញ​ទៅ​ទី​ក្រុង​ហូជីមិញ​នេះដែរ​។

រហូត​មក​ដល់​ខែ​ឧសភា ដំណើរ​ការ​ស្ដារ​ផ្លូវ​រថភ្លើង​មួយ​ខ្សែ​នៅ​ភាគ​ខាង​ត្បូង​ ដែល​ចេញ​ពី​រាជធានីភ្នំពេញ​ទៅ​ខេត្ត​ព្រះសីហនុ សម្រេច​បាន​ចំនួន​៦១,៥ភាគរយ​ហើយ​ ចំណែក​ឯ​​ការ​ស្ដារ​ផ្លូវ​រថភ្លើង​មួយ​ខ្សែ​ទៀត​ចេញ​ពី​រាជធានី​ភ្នំពេញ​ទៅ​ក្រុង​ប៉ោយប៉ែត​ ដែល​មាន​ចម្ងាយ​៣៨៦​គីឡូម៉ែត្រ​ សម្រេច​បាន​២៧,៨ភាគរយ។ ការ​ស្ដារ​​ខ្សែ​រថភ្លើង​ឆ្ពោះ​ទៅ​ភាគ​ខាង​ត្បូង​នៃ​ប្រទេស​កម្ពុជា​ ត្រូវ​​បាន​កំណត់​ពេល​បញ្ចប់​នៅ​ចុង​ឆ្នាំ​២០១១​ ក៏ប៉ុន្ដែ ឥឡូវ​នេះ​ត្រូវ​បាន​ក្រុមហ៊ុន​គ្រោង​នឹង​បញ្ចប់​នៅ​ខែ​មីនា ឆ្នាំ​២០១៣​វិញ​។

ទោះ​ជា​មាន​ការ​ដេញ​ថ្លៃ​ពី​សំណាក់​ក្រុម​ហ៊ុនកម្ពុជា រ៉េលវេ ក៏ដោយ ក៏​បុគ្គលិក​ម្នាក់​មក​​ពី​ក្រុមហ៊ុន ថូល រ៉ូយ៉ាល់​ រ៉េលវេ​ ឲ្យ​ដឹង​កាល​ពី​ម្សិលមិញ​ថា ក្រុមហ៊ុន​នឹង​បន្ដ​ប្រតិ​បត្តិ​ការ​​រថ​ភ្លើង​​​ឡើង​វិញ​នៅ​សប្ដាហ៍​នេះ។

លោក ដេវីដឃើ (DevidKerr) បាន​ចាប់​ផ្ដើម​​បន្ដ​ការ​ងារ​ជា​នាយក​ប្រតិបត្តិ​ក្រុមហ៊ុន​ ថូល រ៉ូយ៉ាល់​ រ៉េលវេ ឡើង​វិញ​កាល​ពី​សប្ដាហ៍​មុន​ បន្ទាប់​ពី​លោក​ត្រូវ​បាន​ជំនួស​អស់​រយៈ​ពេល​អស់​ជិត​បួន​ខែ​រួច​មក​ ហើយ​លោក​ត្រូវ​បាន​ក្រុមហ៊ុន​ជួល​ឲ្យ​មក​ធ្វើ​ការ​វិញកាល​ពី​សប្ដាហ៍​​មុន។ លោក​​មាន​ប្រសាសន៍​ថា “ ​បុគ្គលិក​មួយ​ចំនួន​​ត្រូវ​បាន​ក្រុមហ៊ុន​ជួល​ឲ្យ​មក​ធ្វើ​ការ​វិញ​ ដូច្នេះ​កិច្ចការ​នេះ​បាន​ចាប់​ផ្ដើម​ហើយ​”។

លោកមាន​ប្រសាសន៍​ឆ្លើយ​តប​នឹង​សំណួរ​អំពី​ការ​ចរចា​ផ្ដល់​ថវិកា​ពី​សំណាក់​ក្រុមហ៊ុន កម្ពុជា រ៉េលវេ ដូច្នេះ​ថា “ ម្ចាស់​ភាគ​ហ៊ុន​នានា​មិន​បាន​បង្ហាញ​ថា ពួក​គេ​មាន​បំណង​ចាក​ចេញ​​ពី​គម្រោង​នេះ​ទេ​”។

យោង​តាម​អនុស្សរណៈ​នៃ​ការ​យោគ​យល់​​គ្នា​រវាង​​រដ្ឋាភិបាល​ និង​ធនាគារ​អភិវឌ្ឍន៍​​អាស៊ី ដែល​បាន​ផ្ដល់​ហិរញ្ញប្បទាន​ភាគ​ច្រើន​សម្រាប់​គម្រោង​ស្ដារ​ផ្លូវ​រថភ្លើង​នេះ​ឡើង​វិញ​​បាន​ឲ្យ​ដឹង​ថា ក្រុមហ៊ុន នីបផុន កូអេ ខូ ជា​​ក្រុមហ៊ុន​ទទួល​បន្ទុក​ខាង​ការ​សាង​សង់​មិន​បាន​ធ្វើ​កិច្ច​ការ​បាន​គ្រប់​ជ្រុង​ជ្រោយ​នោះ​ទេ​។ យោងតាម​អនុស្សរណៈ​នេះ​ក៏បាន​បង្ហាញ​ឲ្យ​ដឹង​ដែរ​ថា ទំនាក់​ទំនង​របស់​ក្រុមហ៊ុន នីបផុន កូអេ ខូ និង​ក្រុមហ៊ុន​ ធីអេសអូ ខេមបូឌា ខូអិល​ធីឌី ជា​ក្រុមហ៊ុន​ម៉ៅការ​សាងសង់​លើ​គម្រោង​​ស្ដារ​ផ្លូវ​រថភ្លើង​នេះ “​ មាន​ភាពតាន​តឹង”។

លោក​ ដារីល​ ឌីឡឺ​ បាន​មាន​ប្រសាសន៍​ថា ប្រសិន​បើ​ក្រុមហ៊ុន​កម្ពុជា រ៉េលវេ ទទួល​បាន​សម្បទាន​នេះ​ នោះ​​គេ​លែង​ត្រូវ​ការ​សេវា​កម្ម​​ទាំង​ឡាយ​របស់​ក្រុមហ៊ុន នីបផុន កូអេ ទៀត​ហើយ​ រីឯ​កិច្ច​សន្យា​ជាមួយ​ក្រុមហ៊ុន​ ធីអេស​អូ ខេមបូឌា អិលធីឌី នឹង​ត្រូវ​ពិនិត្យ​ឡើង​វិញ​។

លោក​ ខ្លូត ពើទីត (ClaudePetit) នាយក​​ក្រុមហ៊ុន ធីអេសអូ ប្រចាំ​ប្រទេសកម្ពុជា​ បាន​មាន​ប្រសាសន៍ថា លោក​មិន​បាន​ទទួល​ដំណឹង​​អំពី​ការ​ចរចា​គ្នា​ ដែល​កើត​មាន​ឡើង​រវាង​ក្រុម​ហ៊ុន​មួយ​ចំនួន​ដែល​ចង់​ចរចា​យក​សម្បទាន​ស្ដារ​ផ្លូវ​រថភ្លើង​នេះ​ទេ​។លោក​បាន​បន្ថែម​ថា “ គេ​មិន​បាន​សាក​សួរ​​ខ្ញុំ​អំពី​សំណើ​នេះ​ទេ​។ អតិថិជន​របស់​យើង​គឺ​ក្រសួង​សាធារណការ​ និង​ដឹក​ជញ្ជូន​ ដូច្នេះ​យើង​មិន​ប្រកួត​ប្រជែង​ជាមួយ​អ្នក​ស្នើសុំ​សម្បទាន​នេះ​ទេ”៕

ប្រែសម្រួល​ដោយ ហួង កុកទៀន

​​                 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស