28 C
Phnom Penh

ដោយ​សារ​បារម្ភ​អំ​ពី​ការរំ​លោភ​កុមារ​​ អ្នក​សិក្សា​ស្រាវ​ជ្រាវ​មាន​គម្រោង​​​សិក្សា​រក​មូលហេតុ​នៃ​បញ្ហា​នេះ​​

ដោយ ឌឹ ខេមបូឌា ដេលី

បទវិភាគ

នៅ​ខណៈ​ពេល​​​​ដែល​មាន​របាយ​ការ​ណ៍​នៃ​ការ​​ចាប់​រំ​លោភ​កុមារ​ក្មេងៗ​ ចំនួនពីរ​ករណី​​​​បាន​កើត​ឡើង​កាល​ពី​ចុង​សប្តាហ៍​មុន​នោះ​​មក ​​​សាកល​វិទ្យា​ល័យ​ភូមិន្ទ​ភ្នំ​ពេញ​​មាន​គម្រោង​​​​ចាប់​ផ្តើម​សិក្សាស្រាវជ្រាវ​រក​មូល​ហេតុ​ទាក់ទង​នឹង​ចិត្ត​សាស្រ្ត​​ និង​សង្គម​សាស្ត្រ​ដែល​នាំ​ឲ្យ​មាន​អំពើរំលោភផ្លូវ​ភេទ​អនីតិ​​​ជន​នៅ​ក្នុងប្រ​ទេស​កម្ពុជា​។

អ្នក​ចិត្តសាស្ត្រ​​លើក​ឡើង​ថា ​​ការ​​សិក្សា​​​អំ​ពី​បញ្ហា​នេះ​គឺ​ជា​មធ្យោបាយមួយ​យ៉ាង​សំខាន់ ​​ដើម្បី​ស្វែង​យល់​​ពី​វិធីសាស្រ្ត​ក្នុង​ការ​ការ​ពារ​ឧក្រិដ្ឋផ្លូវ​ភេទ​មកលើ​កុមារ​​ដែល​កំពុង​តែ​បន្ត​កើន​ឡើង​ក្នុង​ប្រ​ទេស​កម្ពុជា​។

លោកសំវីឡុងមេបញ្ជាការ​រង​កង​រាជ​​​អាវុធហត្ថ​ខេត្ត​បាត់​ដំបង​ បាន​បញ្ជាក់​ថាកុមារី​អាយុ​៤ឆ្នាំម្នាក់​​ ត្រូវ​បានបុរស​អាយុ​៦៧​ឆ្នាំ​​ម្នាក់​ ចាប់​​​រំលោភនៅពេល​នាង​កំពុង​​លេង​ជាមួយ​កូនស្រី​របស់​ខ្លួន​​ កាល​ពីថ្ងៃអាទិត្យ​​ នៅ​ក្នុង​ស្រុក​បវេល​។

លោក​​វី​ឡុង​បាន​បន្តថា​ បុរស​ចំណាស់​នេះ​ត្រូវ​បាន​​​សាលា​ដំបូង​ខេត្ត​បាត់​ដំបង​ ចោទ​​​​ប្រ​កាន់កាល​ពី​​ម្សិល​មិញ​​​ ពី​បទ​រំលោភ​កុមារហើយ​បច្ចុប្បន្ន​នេះ​កំពុង​ត្រូវ​ឃុំ​ខ្លួន​បណ្តោះ​​​​អាសន្ន​។

លោក​បាន​បន្ថែម​ថា​ “យើង​កំពុង​ព្យាយាម​បង្កើន​​​ការ​យល់​ដឹង​អំ​ពីអំពើ​រំលោភ​​​ផ្លូវ​ភេទ​កុមារ​ និង​ការ​ការ​ពារ​កុមារ​ ប៉ុន្តែករណី​ទាំង​​​នេះ​នៅ​តែកើត​មាន​ឡើង​ដដែល​។ លោក​​ គឹម​ សារ៉េត​ អធិការ​នគរបាល​ស្រុកទឹក​ផុស​ ខេត្តកំពង់ឆ្នាំ​ងមាន​ប្រសាសន៍​ថា ​កាល​ពីថ្ងៃសៅរ៍មានកុមារី​ម្នាក់​អាយុ​៣ឆ្នាំ​​​ម្នាក់ ​​​ត្រូវ​បាន​​ឪពុក​មា​​របស់​នាង​ អាយុ​១៨ឆ្នាំ​ចាប់​រំលោភ​ ពេលឲ្យមើលថែទាំនាង​ ខណៈ​ម្តាយ​របស់​នាង​កំពុងតែដាំស្ល​នៅ​ក្នុង​ផ្ទះ​។លោកបាន​បន្ថែម​ថា​​​ ជន​សង្ស័យ​ត្រូវ​បាន​ចាប់​ខ្លួន ​​និង​ត្រូវ​បញ្ជូន​ទៅ​តុលាការក្នុង​ពេល​ឆាប់​ៗ​នេះ​ ដើម្បីឲ្យតុលាការ​ចោទ​ប្រ​កាន់។

លោកស្រីជួនចំរ៉ុង​ ប្រធាន​កម្មវិធី​ស្ត្រីនិង​កុមារ​ប្រចាំ​អង្គការ​អាដហុក​បាន​ថ្លែង​ថា​ទោះ​ជា​យ៉ាង​ណា ​​ចំនួនបាន​​​របាយ​ការណ៍​​​​ទាក់ទង​ករណី​ការ​ចាប់​រំលោភ​លើ​អនិតិជន​​ នៅ​ទូទាំង​ប្រទេស​បាន​ធ្លាក់​ចុះ​៣២ភាគរយ​ ក្នុង​អំឡុង​​ពេល​ប្រាំពីរ​ខែដំបូង​ នៃឆ្នាំ​នេះ ​បើ​ប្រៀបធៀប​​ទៅ​នឹង​រយៈពេល​ដូច​គ្នា​កាល​ពី​ឆ្នាំ​មុន​ ដែល​មាន​ករណី​រំលោភ​កុមារ​​ចំនួន​១១៦ករណី​ រវាង​ខែមករា​ដល់​​ខែកក្កដា។លោកស្រីបាន​លើក​ឡើង​ថាតួលេខ​​ទាំង​នេះ​​បាន​បង្ហាញតែ​​​ករណី​​​​រំលោភ​ដែល​​​​បាន​​​​​​​រាយការណ៍​ និង​បាន​ស៊ើប​​​អង្កេត​រួច​ហើយ​​ប៉ុណ្ណោះ​​ ហើយ​លោក​ស្រី​និយាយ​ថា​ តួ​​​លេខ​​​​ពិត​ប្រាកដ​​​នៃ​ករណី​រំលោភ​​​​​ផ្លូវ​ភេទ​​កុមារ​ គឺ​​​អាច​ខ្ពស់​​​ជាង​នេះ​​​ទៅ​​​​​ទៀត​។

លោកស្រី​មាន​ប្រសាសន៍​​បន្តថា“មាន​ការ​​អនុវត្តន៍​ច្បាប់​បាន​​ល្អប្រសើរ​ជាងមុន​ចាប់​តាំង​ពី​​ឆ្នាំ​មុនមក​​ ប៉ុន្តែយើង​ពិត​ជា​មិន​ដឹង​​ថា​​ហេតុអ្វី​បានជា​តួ​លេខ​នៃ​​ករណី​​​ចាប់​រំលោភ​នៅតែកើនឡើង​ខ្ពស់​ដដែល​​”។ ក្រុម​អ្នក​ស្រាវជ្រាវ​មកពី​សាកល​​​វិទ្យា​​​ល័យ​​​ភូមិន្ទភ្នំពេញ​ អាច​បក​ស្រាយ​បំ​ភ្លឺ​​អំ​ពី​​បញ្ហា​​​នេះ​បាន ​ក្នុង​ពេល​ឆាប់ៗ​នេះ​។

យោង​តាម​លោក​ស្រីសេកសុខុមប្រធានដេប៉ាតឺម៉ង់​ចិត្តវិទ្យានៃ​សាកលវិទ្យាល័យ​ភូមិន្ទភ្នំពេញ​ឲ្យ​ដឹង​ថា ​​និស្សិត​បាន​បញ្ចប់​ការ​សិក្សា​​បួន​នាក់ ​​មាន​គម្រោង​សិក្សា​រក​មូល​​​ហេតុ​​​ដែល​នាំ​ឲ្យមាន​ការ​​រំ​លោភ​​​​ផ្លូវ​​ភេទ​​​កុមារ​ ឬ​រំ​លោភ​​ផ្លូវ​ភេទ​អនីតិជន​​ ហើយ​គម្រោង​នេះ​នឹង​ចាប់​ផ្តើម​អនុវត្ត​​នៅ​ដើមឆ្នាំ​ក្រោយនេះ។

លោកស្រីសុខុមមាន​ប្រសាសន៍​បន្តថា “ ​​ជាង​នោះ​ទៅទៀត​​​ មិន​ទាន់​មាន​ការ​សិក្សា​ស្រាវជ្រាវ​បែប​វិទ្យាសាស្ត្រ​ណា​មួយ​​ ដើម្បី​រក​មូល​ហេតុ​ដែល​នាំ​ឲ្យ​មាន​ការ​រំលោភ​ផ្លូវ​ភេទ​កុមារ​នេះទេ ​ដូច្នេះ​យើង​មិន​ទាន់​អាច​ផ្តល់​​ហេតុផល​​បញ្ជាក់​ឲ្យបាន​ច្បាស់​បាន​ឡើយ​​​។មនុស្ស​ម្នាក់ៗ​​សន្និដ្ឋាន​រៀងៗ​ខ្លួន​ ប៉ុន្តែ​សម្រាប់​ យើង​មិន​ទាន់​អាច​និយាយ​បានថា​ វាបណ្តាល​មក​ពី​ហេតុ​អ្វី​នៅ​ឡើយ​ទេ​​ ទាល់​តែ​ធ្វើ​ការ​សិក្សា​តាម​បែប​វិទ្យា​សាស្ត្រ​​​​ចប់​សិន​”។លោកស្រី​បាន​បន្ថែម​ទៀតថាមូល​ហេតុ​ចម្បងៗ ​ដែល​នាំ​ឲ្យមាន​ការ​រំលោភ​​​​កុមារ​នេះ​ គឺបណ្តាល​មក​ពី​បញ្ហាផ្លូវចិត្ត​ ដែល​បាន​លើក​ឡើង ​ដោយសារជំងឺផ្លូវចិត្ត​កើត​​​ឡើងនាពេល​កន្លង​មក ​ឬដោយ​សារអា​​​ម្មរណ៍​រំជួលចិត្តពេក ​​​បញ្ហាចិត្ត​សាស្ត្រ​​ ឬក៏​​​ជា​​​បញ្ហា​​​បណ្តាលមកពី​អំពើ​ហិង្សា​ក្នុង​គ្រួសារ​។

មន្ត្រី​នគរ​បាល​នៅ​ទូទាំង​ប្រទេស​តែង​តែ​​​​ត្រូវ​បាន​ដក​ស្រង់​សម្តី​ថា​ បញ្ហា​ចម្បង​ទាក់​ទង​នឹង​ការ​ចាប់​រំលោភ​កុមារ​នៅ​ក្នុង​ប្រទេស​នេះ​ គឺ​ដោយ​សារ​​កង្វះ​ការ​យល់​ដឹងរបស់ឪ​ពុក​ម្តាយ​ក្មេងៗ​ទាំង​នោះ​ដែល​បណ្តាល​ឲ្យ​ជន​ល្មើស​ឆក់​ឱកាសបាន​​ និងអាច​បណ្តាល​មក​ពី​រូបភាព​អាស​អាភាស។ដើម្បី​​រក​ឲ្យ​ឃើញ​មូលហេតុ​ច្បាស់​លាស់​ថែម​ទៀត​ អំ​ពីការ​រំលោភ​ផ្លូវ​ភេទ​កុមារ​នោះ ​​អ្នក​ស្រាវ​ជ្រាវ​​​​មាន​គម្រោង​ធ្វើ​​សម្ភាស​ជា​មួយ​ជន​រង​គ្រោះ​និង​ជន​ល្មើស​នៅ​ក្នុង​ពន្ធនាគារ៕

ប្រែសម្រួលដោយឃិនណៃ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស